OU KONN en dimoun ki malad?— Petet ou osi ou malad parfwa. Ou ganny en lafyev oubyen vant fer mal. I annan dimoun ki byen malad. Zot telman malad ki zot pa ni kapab debout lo zot menm. Zot bezwen lezot pour ed zot. Souvan sa i arive ler en dimoun in vye.

Tou dimoun i malad detanzaot. Ou konnen akoz dimoun i malad, vin vye, e mor?— En zour bann dimoun ti anmenn en zonm ki pa ti kapab marse kot Zezi, e Zezi ti montre zot akoz dimoun i malad e mor. Mon a rakont ou ki ti arive.

Zezi ti pe reste dan en lakaz dan en lavil pre avek Lanmer Galile. En lafoul dimoun ti vin vwar li. Ti telman annan bokou dimoun ki ti napa ase plas dan sa lakaz pour lezot dimoun antre. Ni menm obor laport zot pa ti kapab arive. Kantmenm sa, dimoun ti pe kontinyen vini menm. Ti annan kat zonm ki ti pe anmenn en zonm paralize ki pa ti kapab marse lo en pti lili oubyen lanmak.

Ou konnen akoz zot ti anvi anmenn sa zonm malad kot Zezi?— Zot ti annan lafwa ki Zezi pou kapab ed zot. Zot ti krwar Zezi pou kapab fer sa zonm byen. Be selman lakaz ti plen avek dimoun. Ki mannyer zot ti pou fer sa zonm paralize ariv kot Zezi?—

Be get lo portre. Premyerman zot ti anmenn sa zonm lo twa lakaz. Sa twa ti plat. Zot ti fer en gro trou ladan. Apre zot ti  fer sa zonm desann dan sa lakaz par sa trou. Zot ti bezwen annan en lafwa for pour fer sa!

Tou dimoun dan lakaz ti sirprann pour vwar sa. En zonm paralize lo en lanmak ti apoz zis dan milye zot. Eski Zezi ti ankoler ler i ti vwar ki sa bann zonm ti’n fer?— I pa ti ankoler ditou. Okontrer i ti kontan pour vwar ki zot ti annan lafwa. I ti dir avek sa zonm paralize: “Ou pese in ganny pardonnen.”

Serten dimoun ti krwar i pa byen pour Zezi dir sa. Zot ti krwar i pa kapab pardonn pese. Alors Zezi ti montre zot ki i kapab pardonn pese. I ti dir avek sa zonm: “Leve, pran ou lanmak e al kot ou.”

 Osito ki Zezi ti dir sa, sa zonm ti geri! I ti nepli paralize. Aprezan i ti kapab leve e marse. Bann dimoun ki ti vwar sa mirak ti reste labous ouver. Zanmen zot ti’n deza vwar en keksoz koumsa! Zot ti rann glwar Zeova akoz li ki ti’n donn zot sa Gran Ansennyan, ki ti kapab menm geri dimoun.—Mark 2:1-12.

Ki nou aprann atraver sa mirak?— Nou aprann ki Zezi ti kapab pardonn pese e fer bann dimoun malad vin byen. Me nou osi aprann en lot keksoz, en keksoz tre enportan. Nou aprann ki dimoun i malad akoz pese.

Vi ki nou tou nou malad parfwa, eski sa i vedir ki nou tou nou peser?— Wi, Labib i dir ki nou tou nou’n ne avek pese. Ou konnen ki savedir ne avek pese?— Savedir nou’n ne enparfe. Sanmenm parfwa nou fer sa ki mal kantmenm nou pa anvi fer li. Ou konnen ki mannyer nou tou nou’n ganny pese?—

Nou’n ganny li avek sa premye zonm, Adan, ki ti dezobei Bondye. I ti fer pese ler i ti kas lalwa Bondye. E nou tou nou’n ganny sa pese avek Adan. Ki mannyer sa? Mon a eksplik ou dan en fason ki fasil pour konpran.

Petet ou’n deza vwar en dimoun pe fer dipen oubyen gato dan en moul. Si sa moul i kabose, savedir i annan en defo  avek. Ki pou arive avek bann dipen ki ganny fer dan sa moul?— Zot pou ganny sa menm defo. Pou annan en trou dan sa bann dipen zis kot sa moul i kabose, pa i vre?—

Adan ti parey sa moul, e nou nou parey sa dipen. I ti vin enparfe ler i ti kas lalwa Bondye. Ler i ti fer sa, ti konmsi i’n ganny en defo, oubyen en move mark. Alors, ler i ti fer zanfan, ki mannyer zot zanfan ti vini?— Zot ti ganny sa menm mark oubyen defo.

Laplipar zanfan pa ne avek en gro defo ki nou kapab vwar. Zot pa mank en kote lebra oubyen en kote lazanm. Me sa defo ki zot annan i ase grav akoz i fer zot malad, e finalman zot mor.

Be akoz serten dimoun i malad pli souvan ki lezot? Zot in ne avek plis pese?— Non, tou dimoun i ne avek menm kantite pese. Nou tou nou’n ne enparfe. Alors avek letan, tou dimoun i tonm malad. Menm bann dimoun ki sey obeir tou lalwa Bondye e ki pa fer nanryen vreman mal i kapab malad.

Be akoz serten dimoun i malad pli souvan ki lezot alors?— I annan plizyer rezon. Petet zot napa ase manze pour manze. Oubyen petet zot pa manz sa ki bon pour zot lasante. Zot manz tro bokou gato ek draze. En lot rezon i akoz zot pa dormi ase, zot al dormi tro tar. Oubyen petet zot les zot mouye dan lapli. I annan dimoun ki zot lekor i tro fay, e zot pa kapab konbat  serten maladi menm si zot sey pran swen avek zot lekor.

Eski pou annan en letan kot nou pa pou zanmen malad? Eski en zour nou pou ganny libere avek pese?— Be ki Zezi ti fer pour sa zonm paralize?— Zezi ti pardonn li son pese e geri li. Dan sa fason, Zezi ti montre ki i pou fer en zour pour tou bann dimoun ki fer zot mye pour fer sa ki byen.

Si nou montre ki nou pa anvi fer pese e nou pa kontan sa ki mal, Zezi pou geri nou. En zour i pou tir sa lenperfeksyon ki nou annan la konmela. I pou fer sa konman Lerwa dan Rwayonm Bondye. Pese pa pou kit nou en sel kou. I pou ale ptit-a-pti. Apre ler nou pese pou’n kit nou net, nou pa pou zanmen malad ankor. Nou pou annan en lasante parfe. Pa i pou gou sa letan!