Ibuot 23

Ntak Emi Mme Owo Ẹsidọn̄ọde

NTE afo ọmọfiọk owo ekededi emi ọdọn̄ọde?— Ekeme ndidi afo emesidọn̄ọ ndusụk ini. Afo emekeme ndidọn̄ọ obufịp, mîdịghe idịbi ekeme ndibiak fi. Ndusụk owo ẹdọn̄ọ idiọk idiọk. Mmọ ikemeke ndikam ndaha nda ke owo mîmenekede mmọ. Emi esiwak nditịbe ke ini mme owo ẹnen̄erede ẹsọn̄.

Kpukpru owo ẹsidọn̄ọ ke ndusụk ini. Nte afo ọmọfiọk ntak emi mme owo ẹsidọn̄ọde, ẹsọn̄de, ẹnyụn̄ ẹkpan̄ade?— Usen kiet ẹma ẹda owo emi mîkekemeke ndisan̄a ẹsọk Jesus, ndien Jesus ama owụt ntak emi mme owo ẹsidọn̄ọde ẹnyụn̄ ẹkpan̄ade. Yak ntịn̄ nnọ fi.

Jesus okodu ke ufọk kiet ke obio emi ekperede Inyan̄ Galilee. Otuowo ẹma ẹdi ndisobo ye enye. Mme owo ẹma ẹwak tutu ufan̄ ndomokiet idụhe inọ mbon en̄wen ndidụk ufọk oro. Owo ndomokiet ikakam ikemeke ndisan̄a n̄kpere enyịnusụn̄. Kpa ye oro, mme owo ke ẹkesụk ẹdedi! Otu kiet ẹma ẹmen owo akpauben̄ emi mîkakam ikemeke ndisan̄a ẹdi. Ama oyom owo inan̄ ẹmen enye ke ekpri akwan̄ m̀mê n̄kpana.

Nte afo ọmọfiọk ntak emi mmọ ẹkeyomde ndida owo udọn̄ọ emi nsọk Jesus?— Mmọ ẹma ẹnyene mbuọtidem nte ke Jesus ekeme ndin̄wam enye. Mmọ ẹma ẹnịm ke akpanikọ ẹte ke Jesus ekeme ndinam udọn̄ọ oro okụre enye. Nte afo ọmọfiọk nte mmọ ẹkenamde owo akpauben̄ oro ekesịm Jesus idem kpa ye kpukpru owo oro ẹkeyọhọde ufọk oro?—

Ọfọn, ndise emi afo okụtde mi owụt nte mmọ ẹkenamde. Akpa, mmọ ẹma ẹmen owo oro ẹdori ke ọkọm. Ọkọm oro akababara. Ekem, mmọ ẹma ẹtịbi akamba odudu ke ọkọm oro. Ke akpatre, mmọ ẹma  ẹsụhọde owo udọn̄ọ ke n̄kpana esie ẹsịn ke ubet oro. Nso mbuọtidem ke mmọ ẹkenyene ntem!

Idem ama akpa kpukpru owo ke ufọk oro ke ini mmọ ẹkekụtde se iketịbede. Ẹma ẹsụhọde owo akpauben̄ oro akanade ke n̄kpana ẹnịm ke ufọt mmọ. Ndi Jesus ama ayat esịt ke ini enye okokụtde se mme owo emi ẹkenamde?— N̄wan̄ansa-o! Enye ama enem esịt ndikụt ke mmọ ẹnyene mbuọtidem. Enye ama ọdọhọ owo akpauben̄ oro ete: “Ẹmefen mme idiọk-n̄kpọ fo.”

Ndusụk owo ẹkekere ke ifọnke Jesus nditịn̄ emi. Mmọ ẹkekere ke enye ikemeke ndifen mme idiọkn̄kpọ. Ntre man owụt nte ke imọ ke akpanikọ imekeme ndifen mme idiọkn̄kpọ, Jesus ama ọdọhọ owo oro ete: “Daha ke enyọn̄, men mbri fo, nyọn̄ ufọk.”

 Ke ini Jesus eketịn̄de oro, udọn̄ọ ama okụre owo oro! Enye ikọdọn̄ọke akpauben̄ aba. Idahaemi enye ama ekeme ndidaha nda nnyụn̄ nsan̄a ke idemesie. Idem ama akpa mme owo oro ẹkekụtde utịben̄kpọ emi. Akananam mmọ ikekwe n̄kpọ oro akpade owo idem ntre! Mmọ ẹma ẹtoro Jehovah ke ndinọ mmọ Akwa Andikpep oro akakam ekemede ndikọk mme owo udọn̄ọ mmọ.—Mark 2:1-12.

Nso ke nnyịn ikpep ito utịben̄kpọ emi?— Nnyịn ikpep nte ke Jesus enyene odudu ndifen mme idiọkn̄kpọ nnyụn̄ nnam idem ọsọn̄ mbon udọn̄ọ. Edi nnyịn imekpep n̄kpọ efen n̄ko, n̄kpọ emi edide ata akpan n̄kpọ. Nnyịn imekpep nte ke mme owo ẹsidọn̄ọ ke ntak idiọkn̄kpọ.

Sia kpukpru nnyịn isidọn̄ọde ndusụk ini, nte emi ọwọrọ ke kpukpru nnyịn idi mme anamidiọk?— Ih, Bible ọdọhọ ke kpukpru nnyịn idada idiọkn̄kpọ imana. Nte afo ọmọfiọk se ndida idiọkn̄kpọ mmana ọwọrọde?— Enye ọwọrọ ete ke nnyịn imana nte mme anana-mfọnmma. Nnyịn imesinam mme n̄kpọ oro mîfọnke ndusụk ini, idem okposụkedi nnyịn mîyomke ndinam mmọ. Nte afo ọmọfiọk nte kpukpru nnyịn ikasan̄ade inyene idiọkn̄kpọ?—

Nnyịn ikada idiọkn̄kpọ imana koro akpa owo oro, Adam, ikosụkke ibuot inọ Abasi. Enye ama anam idiọkn̄kpọ ke ini enye akabiatde ibet Abasi. Ndien kpukpru nnyịn ima ida idiọkn̄kpọ ito Adam. Nte afo ọmọfiọk nte nnyịn ikasan̄ade ida idiọkn̄kpọ ito enye? Yak ndomo nditịn̄ enye ke usụn̄ oro edin̄wan̄ade fi.

Ekeme ndidi afo emesikụt nte mme owo ẹdade usan usan̄ uyo  ẹtem bred. Nso iditịbe inọ bred oro edieke mbọn odude ke usan usan̄ uyo oro? Nte afo ọmọfiọk?— Ukem mbọn m̀mê ndo oro oyodu ke idem kpukpru bred oro ẹdade usan usan̄ uyo oro ẹtem, nte ididụhe?—

Adam eketie nte usan usan̄ uyo oro, ndien nnyịn itie nte bred. Enye ama akabade edi anana-mfọnmma ke ini enye akabiatde ibet Abasi. Eketie nte n̄kpọ eke enye ekenyenede mbọn m̀mê ndo. Ntre ke ini enye ekenyenede nditọ, mmọ ẹketie didie?— Kpukpru nditọ esie ẹma ẹnyene ukem mbọn unana mfọnmma emi.

Ediwak nditọwọn̄ idaha ikpọ ndo oro afo ekemede ndikụt imana. Mmọ inanake ubọk m̀mê ukot kiet. Edi unana mfọnmma mmọ okpon ekem ndinam mmọ ẹdọn̄ọ ẹnyụn̄ ẹkpan̄a nte ini akade.

Nte ededi, ndusụk owo ẹsiwak ndidọn̄ọ n̄kan mbon en̄wen. Ntak edide ntre? Nte edi koro idiọkn̄kpọ emi mmọ ẹdade ẹmana okponde akan?— Baba, kpukpru owo ẹda ukem udomo idiọkn̄kpọ ẹmana. Kpukpru nnyịn imana nte mme anana-mfọnmma. Ntre, ebebịghi m̀mê awawara, kpukpru owo ẹsinyene ndusụk orụk udọn̄ọ. Idem mme owo emi ẹdomode ndinịm ofụri ibet Abasi mînyụn̄ inamke n̄kpọ oro enen̄erede ọdiọk ẹkeme ndidọn̄ọ.

Ntem, ntak emi ndusụk owo ẹsidọn̄ọde ediwak ini ẹkan mbon en̄wen?— Ediwak ntak ẹdu. Ekeme ndidi nte ke mmọ inyeneke udia oro ekemde ndidia. Mîdịghe ekeme ndidi mmọ isidiaha eti udia. Mmọ ẹkeme ndidia inịn̄e inịn̄e n̄kpọ awak akaha. Ntak efen ekeme ndidi nte ke mmọ isisọpke ndidụk idap inyụn̄ idehe idap ekem. Mîdịghe ekeme ndidi mmọ isisịneke ọfọn̄ ofụk mmọ idem ke ini etuep. Idem ndusụk owo  inyeneke odudu ndin̄wana mbiọn̄ọ udọn̄ọ, kpa ye oro mmọ ẹdomode ndise n̄kpọ mban̄a idem mmọ.

Nte ini oyodu emi nnyịn mîdidọn̄ọke? Nte oyodu ini emi nnyịn idibọhọde idiọkn̄kpọ?— Ọfọn, nso ke Jesus akanam ọnọ owo akpauben̄ oro?— Jesus ama efen mme idiọkn̄kpọ esie onyụn̄ anam udọn̄ọ okụre enye. Ke ntre, Jesus ama owụt se imọ idinamde usen kiet inọ kpukpru mbon oro ẹsịnde ukeme ọkpọsọn̄ ndinam se inende.

Jesus ayanam udọn̄ọ nnyịn okụre edieke nnyịn iwụtde nte ke nnyịn iyomke ndinam idiọkn̄kpọ ye nte ke nnyịn imasua se idiọkde. Ke ini iso, enye eyemen unana mfọnmma oro nnyịn inyenede idahaemi efep. Enye ayanam emi nte Edidem Obio Ubọn̄ Abasi. Owo idimenke idiọkn̄kpọ nnyịn ifep inikiet. Ẹdida ndusụk ini imen enye ifep. Ekem ke ini ẹdimende idiọkn̄kpọ nnyịn ifep ke akpatre, nnyịn ididọn̄ọke aba tutu amama. Kpukpru nnyịn iyenyene mfọnmma nsọn̄idem. Nso edidiọn̄ ke oro edidi ntem!

Kaban̄a mme ekikere efen efen ke nte idiọkn̄kpọ otụkde kpukpru owo, kot Job 14:4; Psalm 51:5; Rome 3:23; 5:12; ye Ro 6:23.

[Ndise ke page 123]

Nso ke Jesus ọkọdọhọ owo akpauben̄ anam?

[Ndise ke page 124]

Nso ke nnyịn ikpep ito utịben̄kpọ emi?

[Ndise ke page 125]

Kpukpru nnyịn ikasan̄a didie idinyene idiọkn̄kpọ?

[Ndise ke page 126]

Nso orụk nsọn̄idem ke nnyịn idinyene ke ini ẹmende idiọkn̄kpọ nnyịn ẹfep?