O KILA e dua e tauvimate tiko?— O rairai dau tauvimate tale ga. De o dau tauvi matetaka, se vutu na ketemu. E so era tauvimate levu. E sega mada ga ni rawa mera tucake ke sega ni vukei ira e dua. E yaco vakalevu oqo vei ira na sa qase.

Eda dau tauvimate kece. O kila se cava e vu ni noda tauvimate, da qase, da qai mate?— A vakaraitaka o Jisu na vu ni noda tauvimate da qai mate ena gauna e kau mai kina vua e dua na tamata e sega ni lako rawa. Meu talanoataka mada vei iko.

A tiko o Jisu ena dua na vale ena koro e volekata na Wasawasa o Kalili. E dua na ilala levu era mai raici koya. E sega tale ni curu rawa i vale e dua ni sa oso sara tu ga. E sega mada ga ni dua e torova rawa na katuba. Ia, era se tabili tiko ga mai na tamata! Era kauta mai e dua na tamata lokiloki e sega ni lako rawa e dua na ilala. Eratou le va sara ga na colati koya mai ena nona idavodavo.

O kila na vuna era kauta mai kina na tamata tauvimate vei Jisu?— Era vakabauta ni rawa ni vukei koya o Jisu. Era vakabauta ni rawa vei Jisu me vakabulai koya mai na nona tauvimate. O kila se ra kauti koya vakacava vei Jisu ni sa oso tu mada ga na vale?—

E vakaraitaki ena iyaloyalo oqori se eratou cakava vakacava. Eratou colati koya mada i delanivale. E raraba na delanivale. Eratou qai cakava e dua na qara ena delanivale. Eratou qai tukuca sobu na tamata tauvimate ena nona idavodavo i loma ni vale. E kaukaua dina na nodratou vakabauta!

 Era kurabuitaka na tamata era tiko e loma ni vale ena ka e yaco oya. E tukuci sobu sara ga mai ena kedra maliwa na tamata lokiloki kei na nona idavodavo. E cudru beka o Jisu ni raica na ka e caka oya?— E sega sara ga ni cudru! E marautaka na nodratou vakabauta. E kaya vua na tamata lokiloki: ‘Sa bokoci na nomu ivalavala ca.’

So era nanuma ni sega ni dodonu me cavuta na vosa oya o Jisu. Era sega ni vakabauta ni rawa vei Jisu me bokoca na ivalavala ca. Me vakaraitaka ni rawa vua me bokoca na ivalavala ca, e kaya vua na lokiloki o Jisu: ‘Tucake, taura na nomu idavodavo, lako i nomudou.’

Ni cavuta na vosa oya o Jisu, sa bula sara ga  mai na nona tauvimate! Sa sega tale ni lokiloki. E tucake ga vakataki koya qai lako. Era druka na raica na cakamana oya. Era se sega vakadua ni raica ena nodra bula na ka veivakurabuitaki vaka oya! Era vakalagilagi Jiova baleta ni tala mai vei ira na Qasenivuli Levu, e rawa tale ga ni vakabulai ira na tauvimate.​—Marika 2:1-12.

Na cava eda vulica mai na cakamana oya?— Eda vulica kina ni tu vei Jisu na kaukaua me bokoca na ivalavala ca, me vakabulai ira tale ga na tauvimate. Ia eda vulica tale ga kina e dua na ka bibi. Eda vulica kina ni ivalavala ca e vakavuna na tauvimate.

Nida dau tauvimate kece, e kena ibalebale beka oqo nida ivalavala ca kece?— Io, e kaya na iVolatabu nida sucu kaya mai na ivalavala ca. O kila na ibalebale ni noda sucu kaya mai na ivalavala ca?— E kena ibalebale nida sega ni tamata uasivi ena gauna eda sucu mai kina. So na gauna eda dau cakava na ka e sega ni dodonu, ia eda sega ni nakita. O kila se da mai valavala ca kece tu vakacava?—

E vu oqo mai na nona talaidredre vua na Kalou na imatai ni tamata, o Atama. E valavala ca ena gauna e beca kina na lawa ni Kalou. E mani dewa mai vei Atama na noda ivalavala ca. O kila se dewa vakacava mai vua na noda ivalavala ca? Meu vakamacalataka mada ena sala e rawa mo kila kina.

De o sa vukea e dua me vavi madrai ena kena kava. Ena  vakacava na irairai ni madrai ke kabibi toka na kena kava? O kila?— Ena laurai ena madrai na mawe ni kabibi ena kava e vavi kina, se sega beka?—

O Atama e vaka na kava oya, o keda eda vaka na madrai. Sa sega ni uasivi o Atama ni beca na lawa ni Kalou. E vaka sara ga e sa kabibi. Nira sucu na luvena, era na vakacava tale ga o ira?— Ena laurai kece vei ira na luvena na mawe ni ivalavala ca.

E sega ni laurai vei ira e levu na gone era sucu na mawe ni ivalavala ca. Era sega ni sucu ligamudu se yavamudu. Ia na kaukaua ni mawe ni ivalavala ca oya e vakavuna mera tauvimate, ra qai tini mate tale ga.

Ia e so era dau tautauvimate. Na cava beka e vuna? E baleta beka nira sucu kaya mai e levu cake na ivalavala ca?— Sega, e dua ga na ivakarau ni ivalavala ca eda sucu kaya mai. Eda sega ni uasivi ena gauna eda sucu mai kina. Eda na dau tauvimate kece. E rawa sara mada ga nira tauvimate o ira na muria vinaka na lawa ni Kalou ra qai sega ni cakava na ka e ca.

Ia na cava ga era tauvimate vakalevu kina e so?— E levu na ka e vakavuna. De lailai beka na kakana era kania. Se era sega ni kania na kakana bulabula. Se era kania vakalevu na kakana e sega ni yaga i yagodra. De baleta tale ga nira dau yadra sivia qai lailai na gauna ni nodra moce. Se era sega ni vakaisulu katakata nira lako ena vanua batabata. E so e malumalumu ga na yagodra, e sega ni valuta rawa na mate, dina ga nira qarauni ira vinaka.

 Ena yaco beka na gauna meda sa sega ni tauvimate? Ena rawa beka meda galala mai na ivalavala ca?— Na cava li a cakava o Jisu vua na tamata lokiloki?— E bokoca na nona ivalavala ca qai vakabulai koya tale ga. E vakaraitaka e keri o Jisu na ka ena qai cakava vei ira na saga tiko mera cakava na veika dodonu.

Ena vakabulai keda o Jisu, ke da vakaraitaka nida sega ni via valavala ca da qai cata na ka e sega ni dodonu. Ena qai kauta tani tale ga na mawe ni ivalavala ca e takavi keda tu ena gauna oqo. Ena vakayacora oqo ena nona itutu vaka Tui ni Matanitu ni Kalou. Ena sega ni kau laivi vakasauri na ivalavala ca. Ena qai kau laivi tiko vakamalua. Ni sa na vakaoti vakadua na ivalavala ca, eda sa na sega tale ni tauvimate. Sa na uasivi na noda bula. Ena gauna marautaki dina oya!