MAY kilala ka bala nga nagamasakit?— Ayhan ikaw man gani nagamasakit kon kaisa. Mahimo nga kataruhon ka, ukon magsakit ang imo tiyan. Ang iban nga mga tawo grabe ang balatian. Indi gani sila makatindog kon indi sila pagbuligan. Masami nga amo sini ang nagakatabo kon tigulang na gid ang mga tawo.

Ang tagsatagsa nagamasakit kon kaisa. Nahibaluan mo bala kon ngaa ang mga tawo nagamasakit, nagatigulang, kag nagakapatay?— Isa ka adlaw gindala kay Jesus ang isa ka tawo nga indi makalakat, kag ginpakita ni Jesus kon ngaa ang mga tawo nagamasakit kag nagakapatay. Sugiran ko ikaw tuhoy sini.

Si Jesus nagadayon sa isa ka balay sa banwa nga malapit sa Dagat sang Galilea. Ginkadtuan sia sang madamo nga tawo. Kadamo gid sang nag-alabot amo nga wala na makasulod ang iban sa balay. Indi na gani mapalapitan ang ganhaan. Apang, nagainabot pa ang mga tawo! Ang isa ka grupo sang mga tawo nagdala sing paralitiko nga tawo nga indi gani makalakat. Apat ka tawo ang naghakwat sang iya diutay nga katre, ukon teheras.

Nahibaluan mo bala kon ngaa luyag nila nga dalhon ining masakiton nga tawo kay Jesus?— Nagatuo sila nga mabuligan sia ni Jesus. Nagapati sila nga mapaayo ni Jesus ang iya balatian. Nahibaluan mo bala kon ano ang ila ginhimo agod ining paralitiko nga tawo makapalapit kay Jesus walay sapayan sadtong madamo nga tawo sa sulod sang balay?—

Bueno, ginapakita sang laragway nga makita mo diri kon ano ang ila ginhimo. Una anay, ginhakwat nila ang tawo sa atop. Matapan ang atop. Nian, ginguhaban nila ang atop. Pagkatapos sini, gintunton  nila ang teheras sang masakiton nga tawo. Daku gid ang ila pagtuo!

Nakibot ang tanan nga tawo sa sulod sang balay sang makita nila ang nagakatabo. Ang paralitiko nga tawo nga nagahigda sa teheras gintunton sa tunga nila. Naakig bala si Jesus sang makita niya ang ginhimo sang mga tawo?— Wala gid! Nalipay sia nga may pagtuo sila. Ginsilingan niya ang paralitiko nga tawo: “Ginapatawad na ang imo mga sala.”

Ginhunahuna sang iban nga mga tawo nga indi husto nga isiling ini ni Jesus. Wala sila maghunahuna nga makapatawad sia sing mga sala. Gani agod ipakita nga sarang sia makapatawad sing mga sala, ginsilingan ni Jesus ang tawo: “Bangon ka, hakwata ang imo teheras, kag magpauli ka sa imo puluy-an.”

 Sang ginsiling ini ni Jesus, nag-ayo ang tawo! Indi na sia paralitiko. Makatindog na sia kag makalakat. Natingala ang tanan nga nakakita sini nga milagro. Wala pa gid sila makakita sing subong sini ka makatilingala nga butang! Gindayaw nila si Jehova bangod ginhatag niya sa ila ining Daku nga Manunudlo, nga makapaayo sa balatian sang mga tawo.—Marcos 2:1-12.

Ano ang matun-an naton sa sini nga milagro?— Natun-an naton nga si Jesus may gahom sa pagpatawad sa mga sala kag sa pagpaayo sa masakiton nga mga tawo. Apang may natun-an pa kita, isa ka butang nga tuman ka importante. Natun-an naton nga ang mga tawo nagamasakit bangod sang sala.

Sanglit nagamasakit kita tanan kon kaisa, nagakahulugan bala ini nga kita tanan makasasala?— Huo, ang Biblia nagasiling nga kita tanan natawo nga may sala. Nahibaluan mo bala kon ano ang buot silingon sang natawo sa sala?— Nagakahulugan ini nga natawo kita nga di-himpit. Nagahimo kita kon kaisa sing sayop nga mga butang bisan pa indi naton luyag nga himuon ini. Nahibaluan mo bala kon paano kita tanan nangin makasasala?—

Natawo kita sa sala bangod ang una nga tawo nga si Adan wala magtuman sa Dios. Nakasala sia sang ginlapas niya ang sugo sang Dios. Kag napanubli naton tanan ang sala gikan kay Adan. Nahibaluan mo bala kon paano naton natigayon ang sala gikan sa iya? Ipaathag ko ini sa imo sa isa ka paagi nga mahangpan mo.

Ayhan nakakita ka na sang nagaluto sing tinapay. Ano ang matabo sa tinapay kon may gupi ang baking pan? Nahibaluan mo bala?— Ini  man nga marka, ukon gupi, magahurma sa tanan nga tinapay nga lutuon mo sa sini nga baking pan, indi bala?—

Si Adan kasubong sang baking pan, kag kita naman kasubong sang tinapay. Nangin di-himpit sia sang ginlapas niya ang sugo sang Dios. Daw subong bala nga may gupi sia, ukon malain nga marka. Gani sang makatigayon sia sing mga anak, ano ang ila kahimtangan?— Ang tanan niya nga mga anak nakabaton sini man nga marka sang pagkadihimpit.

Kalabanan sang nagakatawo nga mga bata wala sing kitaon gid nga di-kahimpitan. Ang ila butkon ukon tiil indi kumpol. Apang serioso gid ang ila di-kahimpitan amo nga nagamasakit sila kag, sa ulihi, nagakapatay.

Nahibaluan naton nga ang iban nga mga tawo mas masunson nga nagamasakit sangsa iban. Ngaa subong sini? Bangod bala natawo sila nga may mas madamo nga sala?— Indi, ang tanan natawo nga may pareho nga kadakuon sang sala. Kita tanan natawo nga di-himpit. Gani, sa ulihi, ang tanan nagamasakit sing pila ka sahi sang balatian. Bisan gani ang mga tawo nga nagatinguha sa pagtuman sa tanan nga sugo sang Dios kag wala nagahimo sing malain gid nagamasakit.

Kon amo, ngaa ang iban nga mga tawo mas masunson nga nagamasakit sangsa iban?— May madamo nga rason. Mahimo nga kulang sila sing makaon. Ukon mahimo nga indi husto nga sahi sang pagkaon ang ginakaon nila. Mahimo nga palakaon sila sing cake ukon matam-is nga kalan-on. Ang isa pa ka rason mahimo nga gab-i na sila nagatulog, amo nga kulang sila sing tulog. Ukon mahimo nga manipis ang ila bayo kon matugnaw. Ang iban nga mga tawo may maluya nga lawas, kag indi sila  makabato sa balatian, bisan pa nagahalong sila.

Maabot bala ang tion nga indi na kita magmasakit? Mahilway pa bala kita sa sala?— Bueno, ano ang ginhimo ni Jesus sa sadtong paralitiko nga tawo?— Ginpatawad ni Jesus ang iya mga sala kag ginpaayo sia. Sa sining paagi, ginpakita ni Jesus kon ano ang himuon niya sa pila ka adlaw sa tanan nga nagatinguha sa paghimo sing husto.

Kon ginapakita naton nga indi naton luyag magpakasala kag ginadumtan naton ang malain, ayuhon kita ni Jesus. Sa palaabuton, dulaon niya ang aton di-kahimpitan karon. Himuon niya ini subong Hari sa Ginharian sang Dios. Ang sala indi madula sa aton sa gilayon. Dulaon ini sa sulod sang isa ka panahon. Nian kon madula na sing bug-os ang aton sala, indi na kita magmasakit liwat. Makatigayon kita sing himpit nga panglawas. Mangin makalilipay gid ini!