ADDA kadi am-ammom a masakit?— Nalabit agsaksakitka a mismo no dadduma. Mabalin nga agpanatengka, wenno agsakit ti tianmo. Nakaro ti sakit ti dadduma a tattao. Dida pay ketdi makatakder no awan ti mangtulong kadakuada. Masansan a mapasamak ti kastoy no lumakay wenno bumaket unayen dagiti tattao.

Mapadasantayo amin ti agsakit sagpaminsan. Ammom kadi no apay nga agsakit, lumakay, ken matay dagiti tattao?— Maysa nga aldaw, impanda ken Jesus ti maysa a lalaki a di makapagna, ket impakita ni Jesus no apay nga agsakit ken matay dagiti tattao. Bay-am ta estoriaek dayta kenka.

Agdagdagus idi ni Jesus iti maysa a balay a masarakan iti ili nga asideg ti Baybay ti Galilea. Adu a tattao ti napan kenkuana. Nakaad-adu ti simmangpet isu nga awanen ti pagnaan dagiti dadduma a sumrek iti balay. Awan pay ketdin ti makaasideg iti ruangan. Ngem nagtultuloy ti panagsangpet dagiti tattao! Adda maysa a grupo dagiti tattao a nangisangpet iti paralisado a lalaki a di makapagna. Uppat a lallaki ti kasapulan a mangbagkat kenkuana iti bassit a pagiddaan, wenno langkapi.

Ammom kadi no apay a kayatda nga ipan ken Jesus daytoy a lalaki a masakit?— Adda pammatida a makatulong ni Jesus kenkuana. Patienda a kabaelan ni Jesus a paimbagen ti sakitna. Ammom kadi no kasanoda nga inyasideg ken Jesus dayta a paralisado nupay nakaad-adu ti tattao iti balay?—

Ti ladawan a makitam ditoy ipakitana no kasanoda nga inaramid dayta. Umuna, impangatoda ti lalaki iti atep. Patad dayta nga atep. Kalpasanna, binuttawanda dayta iti nalawa. Kalpasanna, impababada ti  masakit a lalaki iti langkapina babaen iti dayta nga abut agingga iti siled nga adda iti baba. Anian a nagbileg ti pammatida!

Nasdaaw amin dagiti tattao iti balay idi makitada dayta. Naipababa iti mismo a nagtetengngaanda ti paralisado a lalaki a nakaidda iti langkapi. Nakapungtot kadi ni Jesus idi makitana ti inaramid dagiti lallaki?— Saan! Naragsakan gapu ta nakitana nga adda pammatida. Kinunana iti paralisado a lalaki: “Mapakawan dagiti basolmo.”

Impagarup ti dadduma kadagiti tattao a di umiso nga ibaga ni Jesus ti kasta. Dida impagarup a kabaelanna ti mangpakawan iti basbasol. Isu a tapno maipakitana a talaga a kabaelanna, kinuna ni Jesus iti lalaki: “Bumangonka, bagkatem ta langkapim, ket agawidka iti pagtaengam.”

 Idi naibaga ni Jesus dayta, napaimbag ti lalaki! Saanen a paralisado. Kabaelannan ti tumakder ken magna a bukbukodna. Nasdaaw dagiti tattao a nakakita iti daytoy a milagro. Dida pay pulos nakakita iti nakaskasdaaw a banag a kas iti dayta! Indaydayawda ni Jehova gapu ta impaayna kadakuada daytoy Naindaklan a Mannursuro, a makabalin pay a mangpaimbag kadagiti tattao a masakit.​—Marcos 2:​1-​12.

Ania ti maadaltayo iti daytoy a milagro?— Maadaltayo nga adda pannakabalin ni Jesus a mangpakawan iti basbasol ken mangpaimbag kadagiti masakit. Ngem adda pay sabali a nakapatpateg a banag a maadaltayo. Maadaltayo nga agsakit dagiti tattao gapu iti basol.

Yantangay mapasarantayo amin ti agsakit no dadduma, kayatna kadi a sawen a managbasoltayo amin?— Wen, kuna ti Biblia a nayanaktayo amin a managbasol. Ammom kadi ti kayat a sawen ti nayanak a managbasol?— Kayatna a sawen a nayanaktayo nga imperpekto. No dadduma makaaramidtayo iti di umiso, nupay ditay kayat dayta. Ammom kadi no kasano a nagbalintayo amin a managbasol?—

Nayanaktayo a managbasol gapu ta saan a nagtulnog iti Dios ti immuna a tao, a ni Adan. Nagbasol idi sinalungasingna ti linteg ti Dios. Ket natawidtayo amin ti basol manipud ken Adan. Ammom kadi no kasanotayo a natawid kenkuana ti basol? Bay-am ta ilawlawagko dayta iti wagas a maawatam.

Mabalin a nakakitakan iti aglutluto iti tinapay nga agus-usar iti pagsukogan. Ania ti mapasamak iti tinapay no adda kuppitna ti pagsukogan?  Ammom kadi?— Agparang ti kasta met laeng a kuppit iti amin a tinapay nga aramidem iti dayta a pagsukogan, di ngamin?—

Mayasping ni Adan iti dayta a pagsukogan, ket datayo ti kaasping ti tinapay. Nagbalin nga imperpekto ni Adan idi sinalungasingna ti linteg ti Dios. Kayariganna a naaddaan iti kuppit. Isu nga idi naaddaan iti annak, ania ti nagbalinanda?— Naaddaan amin nga annakna iti agpapada a marka ti kinaimperpekto.

Kaaduan nga ubbing saanda a nayanak nga addaan iti nabatad a kinaimperpekto a mabalinmo a makita. Saan a pukol ti takiag wenno ti sakada. Ngem nakaro ti kinaimperpektoda isu nga agsakitda, ket inton agangay, matayda.

Siempre, adda dagiti tattao a masansan nga agsakit. Apay a kasta? Gapu ngata ta nayanakda nga ad-adu ti basolda?— Saan, nayanaktayo amin nga agpapada ti kaadu ti basoltayo. Nayanaktayo amin nga imperpekto. Gapuna, dumtengto latta ti tiempo a mapadasantayo amin ti nagduduma a kita ti sakit. Mabalin nga agsakit uray dagiti tattao a mangikagkagumaan a mangtungpal iti amin a linteg ti Dios ken saan nga agar-aramid iti dakes.

No kasta, apay nga agkarasakit ti dadduma a tattao idinto ta manmano nga agsakit dagiti dadduma?— Adu ti makagapu. Baka awan umdas a pagtaraonda. Wenno mabalin a saanda a mangmangan iti umiso a kita ti taraon. Mabalin a mapalaluanda ti mangan kadagiti di nasayaat a taraon. Maysa pay, baka naladawda unay a matmaturog iti rabii ket kurang ti turogda. Wenno mabalin a saanda nga agitugot iti paglinongda no agtudo. Nakapuy unay ti bagi ti dadduma a tattao, ket dida malabanan ti sakit, uray napalalo ti panagannadda.

 Addanto ngata tiempo a saantayon nga agsakit? Dumtengto ngata ti tiempo a maluk-atantayo iti basol?— Malagipmo kadi no ania ti inaramid ni Jesus iti daydiay paralisado a lalaki?— Pinakawan ni Jesus dagiti basolna ken pinaimbagna. Iti kasta, impakita ni Jesus no anianto ti aramidenna iti maysa nga aldaw kadagidiay mangikagkagumaan nga agaramid iti naimbag.

No ipakitatayo a ditay kayat ti agbasol ken guraentayo ti dakes, paimbagennatayto ni Jesus. Iti masanguanan, ikkatennanto ti natawidtayo a kinaimperpekto. Aramidennanto daytoy kas Ari ti Pagarian ti Dios. Saanto nga apagdarikmat ti pannakaikkat kadatayo ti basol. In-inutto a maikkat dayta iti panaglabas ti panawen. Ket inton naikkaten ti basoltayo, saantayton a pulos nga agsakit. Maaddaantayto amin iti perpekto a salun-at. Anian a bendision dayta!