Uzou Avọ 23

Oware Nọ Ahwo A Be Rọ Mọ

KỌ WHỌ riẹ ohwo jọ nọ ọ be mọ?— Ẹsejọ whọ rẹ mọ re. Ọwọre ọ rẹ sai kru owhẹ, hayo eva e rẹ da owhẹ. Ahwo jọ a rẹ mọ gaga. Ohwo jọ o gbe fi obọ họ kẹ ae he a sae tubẹ kpare oma dikihẹ hẹ. Onana o rẹ mae via evaọ okenọ ahwo a tẹ kpako gaga no.

Ohwo kpobi ọ rẹ mọ ẹsejọ. Kọ whọ riẹ oware nọ ahwo a be rọ mọ, who, je whu?— Ẹdẹjọ a rehọ ọzae jọ nọ ọ rẹ sae nya ha bru Jesu ze, Jesu o te dhesẹ oware nọ o be lẹliẹ ahwo mọ je whu. Jome gbe iku na kẹ owhẹ.

Jesu o wohọ uwou jọ evaọ ẹwho jọ nọ ọ kẹle Abade Galili. Ogbotu ahwo a tẹ nya ze te rue riẹ. Ahwo nọ a nya ze a bu te epanọ uvẹ nọ amọfa a rẹ rọ ruọ uwou na o gbẹ jariẹ hẹ. Uvumọ ohwo ọ sae tubẹ nya kẹle ẹthẹ na dede he. Yọ ahwo a gbe bi zurie ze ghele! Ahwo jọ a rehọ ọmo jọ nọ ọ rẹ sae tubẹ nya ha ze. Ezae ene e wọ ehwa esese nọ o kiẹzẹ.

Kọ whọ riẹ oware nọ a be rọ wọ ọzae nana nọ ọ be mọ na bru Jesu ze?— A wo ẹrọwọ inọ Jesu ọ sai fi obọ họ kẹe. A rọwo nnọ Jesu ọ sai siwi iei no ẹyao na. Kọ whọ riẹ epanọ a rọ rehọ ọzae nọ okie o kie na te Jesu oma avọ ahwo nọ a vọ uwou na?—

Whaọ, ifoto nọ e rrọ etenẹ na i dhesẹ epanọ a ro ru ei. Orọ ọsosuọ, a wọ ọzae na gadiẹ kpohọ ehru uwou na. Ehru uwou na ọ jọ kpakpala. A te zue eghogho ologbo jọ fihọ iẹe. A tẹ rọ  eghogho na wọ ọzae na avọ ehwa riẹ ruọ uwou na. Ẹrọwọ rai ọ rro kẹhẹ!

U gbe ahwo nọ a jọ uwou na kpobi unu nọ a ruẹ oware nọ o be via. Ọzae nọ okie o kie na ọ nwane rrọ udevie rai. Kọ eva e dha Jesu nọ ọ ruẹ oware nọ ezae na i ru na?— Vievie! Eva e were riẹ fikinọ a wo ẹrọwọ. Ọ ta kẹ ọzae nọ okie o kie na nọ: “A rehọ izieraha ra vrẹ owhẹ no.”

Ahwo na jọ a roro nọ u fo re Jesu ọ ta ere he. A roro nọ ọ sae rọ izieraha vrẹ hẹ. Fikiere re o dhesẹ nọ ọ sae rọ izieraha vrẹ, Jesu ọ tẹ ta kẹ ọzae na nnọ: “Kparoma, tọlọ ehwa ra who kpo obọ uwou ra.”

 Nọ Jesu ọ ta ere no, ẹyao riẹ o te kpo! Okie o gbe ki ei hi. Enẹna ọye ọvo ọ rẹ sae kpare oma jẹ nya. U gbe ahwo nọ a ruẹ oware igbunu nana unu. A re ruẹ oware igbunu utionana anwẹnọ a ro yẹ ai hi! A yere Jihova nọ ọ rọ kẹ ai Owuhrẹ Ologbo ọnana, ọnọ ọ rẹ sai tube siwi eyao ahwo.—Mak 2:1-12.

Eme ma wuhrẹ no oware igbunu nana ze?— Ma wuhrẹ nọ Jesu o wo ogaga nọ ọ rẹ rọ rehọ izieraha vrẹ je ru oma ga ahwo nọ e be mọ. Rekọ ma wuhrẹ oware ofa jọ, oware nọ u wo uzou gaga. Ma wuhrẹ nọ fiki uzioraha ahwo a jẹ be mọ.

Nọ mai kpobi ma rẹ mọ ẹsejọ na, kọ onana u dhesẹ nọ mai kpobi erahaizi?— E, Ebaibol na e ta nọ a yẹ omai kpobi avọ uzioraha. Kọ whọ riẹ oware nọ u dhesẹ re a yẹ ohwo avọ uzioraha?— U dhesẹ nnọ a yẹ omai avọ sebaẹgba. Ma re ru eware thọ ẹsejọ ma gbẹ make gwọlọ ru ere he. Kọ whọ riẹ epanọ mai kpobi ma ro wo uzioraha?—

A yẹ omai fihọ uzioraha fikinọ ọzae ọsosuọ na, Adamu, o yo ẹme kẹ Ọghẹnẹ hẹ. O ru umuomu evaọ okenọ ọ raha uzi Ọghẹnẹ. Mai kpobi ma tẹ reuku uzioraha mi Adamu. Kọ whọ riẹ epanọ ma ro wo uzioraha mi ei? Jome ru ei vẹ ziezi kẹ owhẹ.

Ẹsejọhọ whọ ruẹ ohwo jọ nọ o bi ru ebrẹdi no. Eme ọ rẹ via  kẹ ebrẹdi na otẹrọnọ oria jọ omodhe nọ a ro ru ebrẹdi na ọ nwẹhẹ? Kọ whọ riẹ?— Oka ẹnwẹhẹ na o rẹ roma via evaọ ebrẹdi nọ a rọ omodhe ọyena ru kpobi, ogbẹrọ ere?—

Adamu ọ wọhọ omodhe na, ma tẹ wọhọ ebrẹdi na. Okenọ ọ raha uzi Ọghẹnẹ no ọ gbẹ gba ha. O wọhọ ẹsenọ o wo oka ẹnwẹhẹ, hayo oka uyoma. Fikiere nọ o te yẹ emọ, ẹvẹ a te jọ?— Oka sebaẹgba na o te jọ oma emọ riẹ kpobi.

A te yẹ emọ buobu ze, whọ rẹ jọ oma rai ruẹ uvumọ oka sebaẹgba ulogbo jọ họ. A re yẹ ai ababọ obọ hayo owọ jọ họ. Rekọ sebaẹgba nọ a wo o rro te epanọ a rẹ rọ mọ, uwhremu na a ve whu.

Wọhọ epanọ ma riẹ, ahwo jọ a rẹ mọ kiti vi amọfa. Ẹvẹ o rọ rrọ ere? Kọ fikinọ a yẹ rai avọ izieraha nọ i bu vi erọ amọfa?— Ijo, a yẹ ohwo kpobi avọ unu uzioraha ovona. A yẹ omai kpobi avọ sebaẹgba. Fikiere, uwhremu na, oghẹrẹ ẹyao jọ o ti kie ohwo kpobi. Makọ ahwo nọ a be dao oma koko izi Ọghẹnẹ kpobi gbe enọ e be nwani ru eyoma tere he a rẹ mọ.

Kọ fikieme ahwo jọ a jẹ mọ vi amọfa?— Eware buobu e rẹ whae ze. O sae jọ nọ a be ruẹ emu re tere he. Hayo a be re emamọ emu hu. O sae jọ nọ a be re enuawere bu hrọ. Oware ofa nọ o rẹ sae whae ze họ fikinọ a rẹ kaki kiẹzẹ evaọ aso ho. Hayo o sae jọ nọ oso o re kpe ai kẹdẹ kẹdẹ. Oma ahwo jọ o lọhọ  gaga, o rẹ sae họre ẹyao ho a tẹ make dao oma re a sẹro oma rai.

Kọ okejọ o te jariẹ nọ ma gbẹ te rọ mọ họ? Kọ uzioraha u ti no omai uzou ẹdẹjọ?— Kọ, eme Jesu o ru kẹ ọzae nọ okie o kie na?— Jesu ọ rọ izieraha riẹ vrẹ riẹ o te siwi iei. Evaọ edhere ọyena, Jesu o bi dhesẹ oware nọ o bi ti ru ẹdẹjọ kẹ enọ e be dao oma ru oware nọ u kiete kpobi.

Ma tẹ rọ uruemu mai dhesẹ nọ ma gwọlọ raha uzi hi gbe nnọ ma mukpahe eyoma, Jesu o ti siwi omai. Evaọ obaro, o ti si sebaẹgba nọ o rrọ omai oma obọnana no. O ti ru ere wọhọ Ovie Uvie Ọghẹnẹ. A te nwani si uzioraha no omai oma ẹsiẹvo ho. A ti si iei no ẹmẹrera. Okenọ a te si uzioraha mai kpobi no, ma gbẹ te mọ ofa ha. Oma mai kpobi o te jọ gbagba. Ẹvẹ oghale riẹ o te rro te!

Rọ kẹ iroro ejẹ efa kpahe epanọ uzioraha u bi ro kpomahọ ahwo kpobi, se Job 14:4; Olezi 51:5; Ahwo Rom 3:23; 5:12; gbe 6:23.

[Uwoho nọ o rrọ ẹwẹ-obe avọ 123]

Eme Jesu ọ ta kẹ ọzae nọ okie o kie na nọ o ru?

[Uwoho nọ o rrọ ẹwẹ-obe avọ 124]

Eme ma wuhrẹ no oware igbunu nana ze?

[Uwoho nọ o rrọ ẹwẹ-obe avọ 125]

Ẹvẹ mai kpobi ma ro wo uzioraha?

[Uwoho nọ o rrọ ẹwẹ-obe avọ 126]

Didi oma ma ti wo okenọ a te si uzioraha mai no?