KAPU 23

Sambu na nki Bantu Kebelaka

KETI nge mezaba muntu mosi ya kebela?— Ziku nge mosi mpi kebelaka bantangu yankaka. Nge le bela kosu-kosu to kuwa mpasi na divumu. Bantu mingi kebelaka ngolo mpenza. Nkutu bo le telama ve kana muntu yankaka mesadisa bo ve. Yo kesalamaka mingi ntangu bantu kenunaka.

Bantu yonso kebelaka bantangu yankaka. Keti nge mezaba sambu na nki bantu kebelaka, kenunaka, mpi kefwaka?— Kilumbu mosi, bo natilaka Yezu muntu mosi yina vandaka kutambula ve, ebuna Yezu kumonisaka sambu na nki bantu kebelaka mpi kefwaka. Bika mu tela nge disolo yango.

Yezu kuvandaka na kati ya nzo mosi na bwala mosi penepene na Nzadi ya Galilea. Kibuka mosi ya bantu kwisaka kutala yandi. Bantu kukwisaka mingi mpenza na mpila nde bantu yankaka kuvandaka dyaka ve ti kisika ya kukotila na kati ya nzo. Ata muntu mosi ve lendaka nkutu kupusana penepene ti kyelo. Kansi, bantu vandaka kukwisa kaka! Kibuka mosi ya bantu kunataka kikata mosi yina vandaka kutambula ve. Yo lombaka bantu iya sambu na kunangula yandi mpi kutula yandi na mbeto mosi ya fyoti.

Keti nge mezaba sambu na nki bo zolaka kunata mbefo yina na Yezu?— Bo vandaka kukwikila nde Yezu tasadisa yandi. Bo vandaka kukwikila nde Yezu takuka kubelula maladi yina. Keti nge mezaba nki mutindu bo kumisaka kikata yina penepene ti Yezu na kati ya nzo yina vandaka ya kufuluka ti bantu?—

Kifwanisu ya nge kemona awa kesonga mutindu bo salaka. Ntete, bo matisaka muntu yango na ludi ya nzo. Yo vandaka ludi ya kipalapala. Na nima, bo tobulaka dibulu ya nene na ludi. Nsukansuka, bo kulumusaka  kikata yina ti mbeto na yandi na dibulu yango. Bantu yai kuvandaka mpenza na lukwikilu!

Bantu yonso yina kuvandaka na nzo kuyitukaka ntangu bo monaka mambu yina. Bo kulumusaka mpenza kikata na mbeto na yandi na katikati ya bantu. Keti Yezu kuwaka makasi ntangu yandi monaka mambu yina bantu yai kusalaka?— Ata fyoti ve! Yandi vandaka na kyese na kumona nde bo vandaka na lukwikilu. Yandi tubilaka kikata yina nde: “Masumu na nge melolulama.” (NW)

Bantu mingi kumonaka nde Yezu kutubaka mbote ve. Bo yindulaka ve nde yandi mefwana na kulolula masumu. Yo yina, sambu na kusonga nde yandi mefwana mpenza na kusala yo, Yezu kutubilaka muntu yina nde: “Telema ka nge, baka mbeto na nge, ebuna vutuka na nzo na nge!”

Ntangu Yezu kutubaka mutindu yina, muntu yango kubelukaka! Yandi vandaka dyaka  ve kikata. Ntangu yai, yandi kukaka kutelama yandi mosi mpi kutambula. Bayina kumonaka dyambu ya kuyituka yai kuyitukaka mpenza. Bo vandaka bo memonaka ntete ve dyambu ya kuyituka ya mutindu yina na luzingu na bo ya mvimba! Bo pesaka Yehowa lukumu na mutindu yandi pesaka bo Longi ya Nene yina kukaka nkutu kubelula bamaladi na bo.—Marko 2:1-12.

Inki dyambu beto kelonguka na dyambu yai ya kuyituka?— Beto kelonguka nde Yezu kele na ngolo ya kulolula masumu mpi ya kubelula bantu ya maladi. Kansi beto kelonguka dyaka kima yankaka, kima mosi ya mfunu mpenza. Beto kelonguka nde bantu kebelaka sambu na masumu.

Sambu bantangu yankaka beto yonso kebelaka, keti yo kezola kutuba nde beto yonso kele bantu ya masumu?— Ee, Biblia ketuba nde beto yonso kebutukaka ti masumu. Keti nge kezaba kana kubutuka ti masumu ketendula inki?— Yo ketendula nde beto kebutukaka bantu ya kukonda kukuka. Bantangu yankaka beto kesalaka mambu ya mbi, ata beto mekana ve na kusala yo. Keti nge mezaba nki mutindu beto yonso mekumaka bantu ya masumu?—

Beto kebutukaka na masumu sambu muntu ya ntete, Adami, kulemfukilaka ve Nzambi. Yandi salaka disumu ntangu yandi kululaka nsiku ya Nzambi. Beto yonso mebakaka disumu ya Adami. Keti nge mezaba nki mutindu beto bakaka masumu na beto na yandi? Bika mu tendudila nge yo na mutindu mosi yina nge le bakisa.

Ziku nge memonaka dezia muntu kesala dimpa na kinzanza ya kuyokila mampa. Dimpa tabasika nki mutindu kana kinzanza yango ke ti kisika mosi ya kufobuka? Keti nge mezaba?— Keti kidimbu yina ya kufobuka  tamonana ve na mampa yonso ya yandi tasala na kinzanza yango?—

Adami kuvandaka bonso kinzanza yina, mpi beto kele bonso mampa. Yandi kumaka muntu ya kukonda kukuka ntangu yandi kululaka nsiku ya Nzambi. Yo vandaka bonso nde yandi fobukaka na kisika mosi buna to yandi bakaka kidimbu ya kufobuka. Ebuna ntangu yandi butaka bana, bana yango zolaka kuvanda nki mutindu?— Bana na yandi yonso zolaka kubaka kidimbu yina ya disumu.

Bana mingi kebutukaka ve ti bifu ya nene yina nge le mona. Bo kekondaka ve diboko to dikulu. Kansi kukonda kukuka na bo kele ya ngolo mpenza, mpi yo yina kesalaka nde bo bela mpi, na nima, bo fwa.

Beto mezaba nde bantu mingi kebelaka mingi kuluta bankaka. Sambu na inki? Keti bo kebelaka mpidina sambu bo mebutukaka ti masumu mingi kuluta bankaka?— Ve, masumu ya bantu yonso kebutukaka na yo kevandaka kaka kiteso mosi. Beto yonso mebutukaka bantu ya kukonda kukuka. Yo yina, yo vanda sesepi yai to na nima, beto le bela maladi mosi buna. Ata bantu yina kesalaka yonso sambu na kulemfuka na bansiku yonso ya Nzambi mpi kesalaka ve mpenza mambu ya mbi le bela.

Ebuna, sambu na nki bantu mingi kebelaka mbala mingi kuluta bankaka?— Bikuma ke mingi. Yo le vanda nde bo kevandaka ve ti madya ya kufwana. To ziku madya ya bo kedyaka kevandaka ve ya mbote. Mbala yankaka bo kedyaka bima mingi ya sukadi. Kikuma yankaka le vanda nde bo kelalaka ve mingi na mpimpa. To bo kekudifikaka ve to bo kelwataka ve bilele yina mefwana na ntangu bo kebasikaka na nsi ya mvula. Banitu ya bantu yankaka kevandaka petepete mpenza, mpi bo kekukaka ve kunwana ti maladi, ata bo kesala yonso sambu na kuditanina.

 Keti ke ti kilumbu beto tabelaka dyaka ve? Keti ke ti kilumbu beto takatuka na kimpika ya masumu?— Inki mambu Yezu kusalaka sambu na kikata yina beto tubilaka?— Yezu kulolulaka masumu na yandi mpi yandi belulaka yandi. Ntangu yandi salaka mutindu yina, Yezu kusongaka mambu ya yandi tasala na bilumbu kekwisa sambu na bayina yonso kesalaka ngolo na kusala mambu ya mbote.

Kana beto kemonisa nde beto kezolaka ve kusala masumu mpi nde beto kebuyaka mambu ya mbi, Yezu tabelula beto. Na bilumbu kekwisa, yandi takatula beto masumu ya beto ke na yo ntangu yai. Yandi tasala yo sambu yandi kele Ntotila ya Kimfumu ya Nzambi. Yandi takatula beto ve masumu yonso na mbala mosi. Yandi takatula beto yo na nima ya bantangu mingi. Nsukansuka, ntangu masumu na beto takatuka, beto tabelaka dyaka ve. Beto yonso tavanda na banitu ya mbote mpenza. Yo tavanda lusakumunu mosi ya nene kibeni!

Sambu na kuzaba mambu yankaka ya kemonisa mutindu masumu kesimbaka mawi ya bantu yonso, tanga Yobi 14:4; Nkunga 51:7; Roma 3:23; 5:12 mpi 6:23.

[Kifwanisu ya kele na lutiti 123]

Yezu kutubilaka kikata yai na kusala inki?

[Kifwanisu ya kele na lutiti 124]

Inki mambu beto kelonguka na dyambu yai ya kuyituka?

[Kifwanisu ya kele na lutiti 125]

Inki mutindu beto yonso mekumaka bantu ya masumu?

[Kifwanisu ya kele na lutiti 126]

Banitu na beto tavanda nki mutindu na ntangu masumu na beto takatuka?