HIHI nĩ harĩ mũndũ ũĩ mũrwaru?— O nawe rĩmwe nĩ ũrwaraga. No ũrware homa kana ũrĩo nĩ nda. Andũ amwe makoragwo marĩ arwaru mũno. Matihotaga nginya kũrũgama mategũteithĩrĩrio nĩ mũndũ. Kaingĩ gũthiaga ũguo rĩrĩa mũndũ akũra mũno.

Gũtirĩ mũndũ ũtarwaraga. Nĩ ũĩ kĩrĩa gĩtũmaga andũ marware, makũre na makue?— Hĩndĩ ĩmwe mũndũ ũtaahotaga gũthiĩ nĩ aatwarirũo kũrĩ Jesu, na Jesu akĩonania kĩrĩa gĩtũmaga andũ marware na makue. Ta reke ngwĩre ũrĩa gwathiire.

Kũrĩ hĩndĩ Jesu aaikaraga nyũmba yarĩ taũni-inĩ ĩmwe hakuhĩ na Iria rĩa Galili. Kĩrĩndĩ kĩingĩ nĩ gĩokire kũmuona. Gwokire andũ aingĩ nginya nyũmba ĩyo ĩkĩiyũra biũ. Nginya gũtirĩ mũndũ ũngĩ wahotaga gũkuhĩrĩria mũrango. O na kũrĩ ũguo, andũ maathire o na mbere kũingĩha. Mũndũ ũcio ũtaahotaga gwĩtwara aakĩrehwo kũrĩ Jesu tondũ aarĩ mũrwaru mũrimũ wa gũkua ciĩga. Aakuuanĩirũo nĩ athuri ana aigĩrĩirũo gatanda-inĩ.

Hihi nĩ ũĩ kĩrĩa gĩatũmire marehe mũndũ ũcio kũrĩ Jesu?— Nĩ meetĩkĩtie atĩ Jesu nĩ angĩamũteithirie. Tondũ nĩ meetĩkĩtie nĩ angĩamũhonirie mũrimũ ũcio. Na tondũ nyũmba yarĩ na andũ aingĩ mũno-rĩ, nĩ ũĩ ũrĩa meekire nĩguo makinyie mũndũ ũcio harĩ Jesu?—

Mbica ĩno ũrona haha nĩ ĩronania ũrĩa meekire. Maambire magĩkuua mũndũ ũcio, makĩmũtwara igũrũ rĩa nyũmba ĩyo. Magĩcoka  magĩtũra irima inene. Thutha ũcio, magĩikũrũkĩria mũndũ ũcio irima-inĩ rĩu arĩ gatanda-inĩ. Ũcio warĩ wĩtĩkio mũnene mũno!

Andũ arĩa othe maarĩ nyũmba ĩyo nĩ maagegire mũno mona ũguo. Mũndũ ũcio aaikũrũkirio agĩkinya o gatagatĩ-inĩ kao. Hihi Jesu nĩ aarakarire nĩ kuona ũrĩa athuri acio meekire?— Aca ndaarakarire! O na nĩ gũkena aakenire nĩ kuona atĩ maarĩ na wĩtĩkio. Eerire mũndũ ũcio warĩ mũrwaru ũũ: “Nĩ woherũo mehia maku.”

Andũ amwe monire ta Jesu ataagĩrĩirũo kuuga ũguo. Meeciragia atĩ ndangĩahotire kuohanĩra mehia. No nĩguo Jesu onanie atĩ no ahote kuohanĩra mehia, eerire mũndũ ũcio ũũ: ‘Ũkĩra, woe gatanda gaku, na ũinũke.’

 Rĩrĩa Jesu oigire ũguo, mũndũ ũcio akĩhona mũrimũ ũcio! Akĩhota kwĩrũgamia, na agĩĩtwara. Andũ arĩa monire kĩama kĩu Jesu aaringire nĩ maamakire mũno. Mbere ĩyo mationete ũndũ wa magegania ta ũcio. Nĩ maagoocire Jehova nĩ ũndũ wa kũmahe Mũrutani ũcio Mũnene, tondũ aahotaga nginya kũhonia andũ mĩrimũ yothe.—Mariko 2:1-12.

Tũreruta atĩa kuumana na kĩama kĩu?— Tũreruta atĩ Jesu nĩ arĩ hinya wa kuohera andũ mehia na kũhonia arwaru. Ningĩ nĩ tũreruta kaũndũ kangĩ ka bata mũno. Andũ marwaraga nĩ ũndũ wa mehia.

Tondũ ithuothe nĩ tũrwaraga-rĩ, hihi ũguo nĩ kuuga atĩ ithuothe tũrĩ ehia?— Ĩĩ, Bibilia yugaga atĩ ithuothe tũciaragwo tũrĩ na mehia. Hihi nĩ ũĩ gũciarũo tũrĩ na mehia nĩ kuuga atĩa?— Ũguo nĩ kuuga atĩ tũciaragwo tũtarĩ akinyanĩru. Rĩmwe nĩ twĩhagia o na tũtekwenda. Nĩ ũĩ ũrĩa gwathiire nĩguo ithuothe tũtuĩke ehia?—

Twatuĩkire ehia tondũ mũndũ wa mbere kũmbwo, Adamu, ndaathĩkĩire Ngai. Eehirie rĩrĩa aagire kũrũmĩrĩra watho wa Ngai. Ithuothe twagaire mehia kuuma kũrĩ Adamu. Hihi nĩ ũĩ twagaire mehia kũrĩ we atĩa? Reke ngũtaarĩrie na njĩra hũthũ.

No gũkorũo nĩ ũrĩ wona mũndũ akĩruga keki kana mĩgate akĩhũthĩra karaĩ ga kũruga keki. Karaĩ kau kangĩkorũo karĩ kamondeku-rĩ, hihi keki kana mĩgate ĩyo ĩngĩhaana atĩa?— Yothe ĩngĩkorũo  ĩrĩ mĩmondeku o ta karaĩ kau, kana tiguo?—

No tuuge Adamu aahaanaga ta karaĩ kau, na ithuĩ tũhaana ta keki kana mĩgate ĩyo. Rĩrĩa aaregire gwathĩkĩra watho wa Ngai, aatuĩkire mũndũ ũtarĩ mũkinyanĩru. Nĩ ta kũmondeka aamondekire. Kwoguo Adamu aagĩire ciana ihaana atĩa?— Ciana ciake ciothe ciaciarirũo itarĩ nginyanĩru.

Ciana nyingĩ iticiaragwo irĩ na thĩna mũnene ũroneka. Ciana imwe nĩ iciaragwo itarĩ na thĩna wa moko kana wa magũrũ. No nĩ ũndũ wa kwaga gũkinyanĩra, o nacio nĩ irwaraga na thutha-inĩ igakua.

No andũ amwe nĩ marwaraga maita maingĩ gũkĩra arĩa angĩ. Gũthiaga ũguo nĩkĩ? Hihi nĩ tondũ maciaragwo marĩ na mehia maingĩ gũkĩra andũ arĩa angĩ?— Aca, andũ othe maciaragwo marĩ na mehia maiganaine. Ithuothe tũciaragwo tũtarĩ akinyanĩru. Kwoguo, mũndũ o wothe no arware. O na andũ arĩa mathĩkagĩra watho wa Ngai na makaaga gwĩka maũndũ moru nĩ marwaraga.

No hihi nĩ kĩĩ gĩtũmaga andũ amwe marware maita maingĩ gũkĩra arĩa angĩ?— Nĩ harĩ itũmi nyingĩ. Gĩtũmi kĩmwe no gĩkorũo arĩ kwaga irio cia kũigana. Kana kwaga kũrĩa irio iria ciagĩrĩire. Makarĩa keki na thuiti irĩ na cukari mũingĩ. Gĩtũmi kĩngĩ nĩ atĩ no gũkorũo makomaga macereirũo, nginya makaaga kũigania toro. Angĩ nĩ maagaga kwĩhumba wega hĩndĩ ĩrĩa kũrĩ na heho kana mbura. Andũ angĩ nao o na mangĩgeria kwĩmenyerera, nĩ  marwaraga kaingĩ tondũ wa mĩĩrĩ yao kwaga hinya.

Hihi nĩ kũrĩ hĩndĩ tũtakaarwaraga? Hihi nĩ kũrĩ hĩndĩ tũtagaakorũo na mehia?— Jesu eekĩire mũndũ ũrĩa wakuĩte ciĩga atĩa?— Nĩ aamuoheire mehia na akĩmũhonia. Na njĩra ĩyo, Jesu onanirie ũrĩa agekĩra arĩa merutanagĩria mũno gwĩka wega.

Tũngĩaga kwĩhia na tuonanie atĩ nĩ tũthũire gwĩka ũũru, Jesu nĩ agaatũhonia. Mahinda mokĩte nĩ agaatwehereria kwaga gũkinyanĩra kũrĩa tũrĩ nakuo. Ageeka ũguo arĩ Mũthamaki wa Ũthamaki wa Ngai. Mehia matikeherio thĩinĩ witũ o rĩmwe. Makeherio o kahora kahora nginya mathire. Mehia mathira biũ, tũtikarwara rĩngĩ. Ithuothe tũgaakorũo na ũgima mũkinyanĩru wa mwĩrĩ. Kĩu gĩgaakorũo kĩrĩ gĩkeno kĩnene mũno!