NALUNNGISAQARPIT napparsimasumik? — Immaqa aamma illit ilaanneeriarlutit napparsimasarputit. Imaassinnaavoq nuffasertutit naarlulertutilluunniit. Inuit ilaat napparsimasorujussuupput. Ilaat allanit ikiorneqanngikkunik nikuissinnaanngillalluunniit. Amerlanertigut utoqqarujussuit taamaalisarput.

Kisianni inuit tamarmik napparsimalertarput. Nalunngiliuk sooq inuit napparsimalertarlutillu utoqqalisartut naggataatigullu toqusartut? — Ilaanni angut pisussinnaanngitsoq akiarlugu Jiisusimukaanneqarpoq, taava Jiisusip nassuialerpaa sooq napparsimasarlutalu toqusartugut. Tamanna oqaluttuarissavara.

Jiisusi illoqarfimmi Galilæap Tasersuata eqqaaniittumi angerlarsimaffeqarpoq. Inuppassuarnit pulaarneqartarpoq. Aggersut amerlangaaramik illumut isertoqaqqissinnaajunnaarpoq, aap, isaariaanulluunniit isertoqarsinnaanani. Inuillu suli aggiallutik. Aamma angummik nukillaarsimanini pissutigalugu pisussinnaanngitsumik aggiussisoqarpoq. Taanna akiummi angutit sisamat akiagaanni nalavoq.

Nalunngiliuk sooq angutit napparsimasoq Jiisusimukaanneraat? — Upperigamikku Jiisusip ikiorsinnaagaa. Upperilluinnarpaat Jiisusip nappaataa ajorunnaarsissinnaagaa. Qanormitaava ilillutik nukillaarsimasoq Jiisusimukaappaat inuit taama amerlatigisut? —

Assiliartaani takusinnaavat qanoq ilillutik taamaaliortut. Siullermik angut illup qalianut qaqippaat. Illup qalia toqqissuuvoq. Qalia putorsualioriarlugu angut akiummiittoq tassuuna ningippaat inimut  Jiisusip isersimaffigisarpiaanut. Tamatuma takutippaa uppersuseqarnerat, ilaa? —

Inuit illumiittut qanoq pisoqarnera takugamikku tupigusupput. Angut nukillaarsimasoq akiummiittoq saarpiaminnut ninginneqartoq takuaat! Jiisusi qanoq oqarpa? Taama pisoqarnera kamaatigaa? — Naamik, kamaatiginngilaa. Angutit uppersusiat takugamiuk nuannaarutigaa, nukillaarsimasorlu ima oqarfigalugu: “Ajortinnik isumakkeerfigineqarputit.”

Jiisusip taama oqarnera ilaasa ajoraat. Isumaqanngillat Jiisusi ajortinik isumakkeerfiginnissinnaasoq. Taamaaliorsinnaanini uppernarsarniarlugu, angummut ima oqarpoq: “Nikuigit, nallaviit tiguuk, angerlarlutillu.”

 Jiisusi taama oqarniariartoq nukillaarsimasoq ajorunnaarpoq! Nammineq nikuissinnaanngorlunilu pisussinnaanngorpoq. Tupinnartuliamik tamatuminnga takunnittut tamarmik tupigusupput. Taamaattumik takunikuunngisaannarput! Jehova unnersiutigaat Ajoqersuisorsuarmik, inuit nappaataannik ajorunnaarsitsisinnaasumik, tunisimammatik. — Markusi 2:1-12.

Tupinnartuliami tamatumani suna paasivarput? — Paasivarput Jiisusi ajortinik isumakkeerfiginninnissaminut inuillu napparsimasut ajorunnaarsinnissaannut pissaaneqartoq. Aammali allamik pingaartumik paasisaqarpugut, tassa ajorteqaratta napparsimasartugut.

Oqaatigineqareersutut tamatta ilaannikkut napparsimasarpugut. Tamanna isumaqarpa tamatta ajortuliortartugut? — Aap. Biibilimi allassimavoq ajorteqarluta inunngortugut. Nalunngiliuk tamanna qanoq isumaqarnersoq? — Isumaqarpoq naammalluinnanngitsuusugut. Kissaatiginngikkaluarlugu ilaannikkut kukkusoortassaagut. Tamatta ajorteqarluta inunngornitsinnut suna pissutaanersoq nalunngiliuk? —

Tamanna aallarnerpoq inummit siullermit, Adamimit. Guutip inatsisaa unioqqutippaa, taamaalilluni ajortilinngorpoq. Taassumannga tamatta ajorti pivarput. Maannalu nassuiassavara qanoq pisoqarsimanersoq.

Kaagiliorfik atorlugu iffiaq-qaqortuliortumik ikiuinikuuit? Taamaaliorsimaguit, taava takorluulaariaruk kaagiliorfimmi singarneqartoq.  Tassanimi kaagiliorfimmi iffialiat tamarmik qanoq iluseqalissappat? Eqqoriarsinnaaviuk? — Singarneq iffialiani tamani takuneqarsinnaassaaq, ilaa? —

Adami kaagiliorfittut ippoq, uagullu iffialiatut ippugut. Guutip inatsisaa unioqqutikkamiuk naammalluinnartuujunnaarpoq. Adami kaagiliorfittut singarneqalerporlusooq. Meerartaavi iffialiatut ‘singarneqalerput’. Tamanna qanoq paasisariaqarami? — Adamitut naammalluinnanngitsuupput.

Soorunami inuit tamarmik takussaasumik amigaateqarlutik inunngorneq ajorput, soorlu talimik imaluunniit niumik amigaateqarlutik. Imali naammalluinnanngitsigipput napparsimasarlutik toqujumaarlutillu.

Soorunami inoqarpoq allanit napparsimanerusunik. Tassa imaappa allanit ajorteqarnerullutik taakku inunngorsimasut? — Naamik, arlaannarpulluunniit ajorteqarnerulluni inunngornikuunngilaq. Tamarluinnatta inunngorattali naammalluinnanngitsuuvugut. Tamannalu isumaqarpoq qaqugukkulluunniit napparsimalersinnaasugut. Aamma inuit Guutip inatsisaanik tamanik maleruaaniartut ajuissumillu iliunngisaannartut napparsimalersinnaapput.

Soormiuna ilaat allanit napparsimanerusut? — Amerlasoorpassuit peqqutaasinnaapput. Immaqa naammattunik nerisassaqanngillat. Imaluunniit nerisassanik eqqortunik nerineq ajorput. Imaassinnaavoq kaagit mamakujuttullu inuussutiginerugaat. Imaassinnaavorlu innajaarneq ajortut sinnakippallaartarlutillu. Immaqa nillertillugu naammattunik atisassaqanngillat. Allalli qanorluunniit mianersortigigaluarunik napparsimalianeruinnarput. Tamanna namminneq pisuussutiginngilaat.

 Qaqugumulluunniit napparsimasoqartuassava? Qaqugumulluunniit ajorti atuuttuassava? — Jiisusip angut nukillaarsimasoq qanoq iliorfigaa? — Jiisusip ajortaanik isumakkeerfigaa ajorunnaarsillugulu. Taamaaliornermigut Jiisusip takutippaa ullut ilaanni ajunngitsumik iliorusuttunut tamanut qanoq iliorumaarluni.

Ajortuliorusunnata takutikkutsigu, eqqunngitsullu tamaasa uumigalugit, Jiisusip ajorunnaarsikkumaarpaatigut. Ullut ilaanni naammalluinnanngissutsitsinnit aniguisikkumaarpaatigut. Guutip naalagaaffiani kunngiutilluni taamaaliorumaarpoq. Ajorti uagutsinniittoq ingerlaannaq peerunnavianngilaq. Piffissap ingerlanerani peerukkiartuaarumaarpoq. Kiisalu ajorti peeruppat napparsimaleqqinngisaannassaagut. Peqqilluinnartunngussaagut. Nuannissaqaaq!