ជំពូកទី២៣
ហេតុអ្វីមនុស្សឈឺ?
តើកូនស្គាល់អ្នកណាម្នាក់ដែលឈឺទេ?— ជួនកាលកូនប្រហែលជាឈឺដែរ។ កូនប្រហែលជាគ្រុនផ្ដាសាយ ឬឈឺពោះ។ អ្នកខ្លះឈឺធ្ងន់ណាស់ រហូតដល់មិនអាចក្រោកឈរបានទេ បើគ្មាននរណាម្នាក់ជួយគាត់។ នេះច្រើនតែកើតឡើងពេលដែលមនុស្សមានវ័យកាន់តែចាស់។
ជួនកាលយើងគ្រប់គ្នាឈឺ។ តើកូនដឹងមូលហេតុដែលមនុស្សយើងឈឺ ចាស់ ហើយស្លាប់ទេ?— ថ្ងៃមួយមានគេនាំបុរសឈឺម្នាក់ដែលមិនអាចដើរបានមកជួបលោកយេស៊ូ ហើយលោកបានប្រាប់មូលហេតុដែលមនុស្សយើងឈឺហើយស្លាប់។ សូមស្តាប់រឿងនោះ។
លោកយេស៊ូកំពុងស្នាក់នៅក្នុងផ្ទះមួយនាក្រុងជិតសមុទ្រកាលីឡេ។ ហ្វូងមនុស្សបានមកជួបលោក។ ដូច្នេះ មនុស្សជាច្រើនបានផ្តុំគ្នានៅទីនោះ រហូតដល់គ្មានកន្លែងសល់ទេ សូម្បីតែនៅមាត់ទ្វារផ្ទះក៏ដោយ។ តែមានមនុស្សកាន់តែច្រើនមកថែមទៀត! ក្នុងចំណោមពួកគេមានមនុស្សមួយក្រុមដែលបាននាំបុរសស្លាប់ដៃស្លាប់ជើងម្នាក់មករកលោកយេស៊ូ។ បុរសបួននាក់ត្រូវដាក់គាត់នៅលើគ្រែតូចមួយឬគ្រែស្នែង រួចសែងគាត់។
ហេតុអ្វីពួកគេចង់នាំបុរសដែលឈឺនេះទៅជួបលោកយេស៊ូ? តើកូនដឹងទេ?— ពួកគេជឿថាលោកយេស៊ូអាចជួយគាត់បាន ហើយជឿថាលោកអាចធ្វើឲ្យគាត់ជាសះស្បើយ។ តើពួកគេអាចនាំបុរសស្លាប់ដៃស្លាប់ជើងនេះចូលទៅជិតលោកយេស៊ូយ៉ាងដូចម្ដេចបាន បើមានមនុស្សពេញផ្ទះបែបនេះ? តើកូនដឹងទេ?—
ដូចកូនឃើញ ក្នុងរូបភាពនេះបង្ហាញអំពីរបៀបដែលពួកគេបានធ្វើ។ មុនបង្អស់ ពួកគេបានសែងបុរសស្លាប់ដៃស្លាប់ជើងនេះឡើងទៅលើដំបូលផ្ទះនោះដែលមានដំបូលរាបស្មើ។ រួចមក ពួកគេបានចោះប្រឡោះដំបូល។ នៅទីបំផុត ពួកគេបានសម្រូតបុរសដែលឈឺដេកលើគ្រែនោះចុះទៅក្នុងបន្ទប់ខាងក្រោម។ ពួកគេពិតជាមានជំនឿខ្លាំងណាស់!
ពេលដែលមនុស្សទាំងអស់ក្នុងផ្ទះបានឃើញ នោះពួកគេភ្ញាក់ផ្អើលយ៉ាងខ្លាំង។ បុរសស្លាប់ដៃស្លាប់ជើងដែលដេកនៅលើគ្រែនោះ បានត្រូវសម្រូតចុះមកនៅកណ្ដាលពួកគេតែម្ដង។ ពេលឃើញបុរសទាំងនោះធ្វើដូចនេះ តើលោកយេស៊ូខឹងទេ?— លោកមិនបានខឹងទេ! ផ្ទុយទៅវិញ លោកសប្បាយចិត្តណាស់ដែលឃើញថាពួកគេមានជំនឿដូច្នេះ។ លោកនិយាយទៅកាន់បុរសស្លាប់ដៃស្លាប់ជើងថា៖ «ការខុសឆ្គងរបស់អ្នកបានត្រូវអភ័យទោសឲ្យហើយ»។
តើលោកយេស៊ូបានប្រាប់បុរសស្លាប់ដៃស្លាប់ជើងឲ្យធ្វើអ្វី?
មនុស្សខ្លះបានគិតថាគឺមិនត្រឹមត្រូវទេដែលលោកយេស៊ូនិយាយដូចនោះ។ ពួកគេគិតថាលោកមិនអាចអភ័យទោសភាពខុសឆ្គងបានទេ។ ដូច្នេះ ដើម្បីបង្ហាញថាលោកពិតជាអាចអភ័យទោសភាពខុសឆ្គងបាន លោកយេស៊ូនិយាយទៅកាន់បុរសស្លាប់ដៃស្លាប់ជើងថា៖ «ចូរងើបឡើង យកគ្រែស្នែងរបស់អ្នក ហើយទៅផ្ទះអ្នកចុះ»។
ពេលលោកយេស៊ូនិយាយដូចនោះ បុរសនោះបានជាសះស្បើយភ្លាម! គាត់លែងស្លាប់ដៃស្លាប់ជើងទៀតហើយ។ ឥឡូវគាត់អាចក្រោកឈរ ហើយដើរដោយខ្លួនឯងបាន។ បណ្ដាជនដែលឃើញការអស្ចារ្យនេះបានកោតស្ងើចណាស់។ ក្នុងជីវិតរបស់ពួកគេមិនដែលឃើញអ្វីដ៏អស្ចារ្យដូចនេះទេ! ពួកគេបានសរសើរព្រះយេហូវ៉ាដែលបានឲ្យគ្រូដ៏ល្អប្រសើរនេះដល់ពួកគេ។ គ្រូល្អប្រសើរនោះថែមទាំងអាចធ្វើឲ្យបណ្ដាជនជាសះស្បើយពីជំងឺទៀតផង។—ម៉ាកុស ២:១-១២
តើយើងរៀនអ្វីពីការអស្ចារ្យនេះ?
តើយើងទាញមេរៀនអ្វីពីការអស្ចារ្យនេះ?— យើងរៀនថាលោកយេស៊ូមានអំណាចដើម្បីធ្វើឲ្យមនុស្សឈឺជាសះស្បើយ និងដើម្បីអភ័យទោសឲ្យភាពខុសឆ្គងរបស់ពួកគេ។ ប៉ុន្តែ យើងក៏ត្រូវរៀនអ្វីមួយទៀតដែរ អ្វីមួយនោះគឺសំខាន់ណាស់។ យើងរៀនថាមនុស្សឈឺដោយសារពួកគេមានភាពខុសឆ្គង។
យើងទាំងអស់គ្នាឈឺម្ដងម្កាល ដូច្នេះតើនេះមានន័យថាយើងទាំងអស់គ្នាមានភាពខុសឆ្គងទេ?— មែនហើយ គម្ពីរប្រាប់ថាយើងទាំងអស់គ្នាកើតមកដោយមានភាពខុសឆ្គង។ តើកូនដឹងថាការកើតមកដោយមានភាពខុសឆ្គងមានន័យយ៉ាងណាទេ?— នេះមានន័យថាយើងបានកើតមកដោយមានភាពមិនល្អឥតខ្ចោះ។ ពេលខ្លះយើងធ្វើខុស សូម្បីតែយើងមិនចង់ធ្វើក្ដី។ តើយើងទាំងអស់គ្នាមានភាពខុសឆ្គងមកពីណា? តើកូនដឹងទេ?—
យើងទាំងអស់គ្នាបានកើតមកដោយមានភាពខុសឆ្គង ដោយសារអាដាមជាបុរសទី១មិនបានស្តាប់បង្គាប់ព្រះ។ អាដាមបានធ្វើអំពើខុសឆ្គងដោយបំពានច្បាប់របស់ព្រះ ហើយយើងទាំងអស់គ្នាបានទទួលភាពខុសឆ្គងពីគាត់។ តើយើងទទួលភាពខុសឆ្គងពីគាត់យ៉ាងដូចម្ដេច? តើកូនដឹងទេ? ដើម្បីឲ្យស្រួលយល់អំពីរឿងនេះ ខ្ញុំសុំលើកឧទាហរណ៍មួយ។
ហេតុអ្វីយើងមានភាពខុសឆ្គង?
សូមគិតអំពីពេលមួយដែលកូនឃើញអ្នកណាម្នាក់ដុតនំក្នុងពុម្ព។ តើនំនោះនឹងមានរាងបែបណាបើពុម្ពនោះពៀច? តើកូនដឹងទេ?— គ្រប់នំទាំងអស់នឹងមានស្នាមពៀចនោះដែរ មែនទេ?—
អាដាមប្រៀបដូចជាពុម្ពនោះ ហើយយើងដូចជានំ។ ពេលគាត់បំពានច្បាប់របស់ព្រះ គាត់បានទៅជាមិនល្អឥតខ្ចោះ។ នេះហាក់ដូចជាគាត់មានស្នាមពៀចនោះជាប់ជាមួយ។ ដូច្នេះពេលគាត់មានកូន តើកូនៗទាំងអស់នឹងទៅជាយ៉ាងណា?— កូនទាំងអស់របស់គាត់នឹងមានស្នាមនេះដូចគ្នាដែរគឺភាពមិនល្អឥតខ្ចោះ។
ភាពមិនល្អឥតខ្ចោះមិនបណ្ដាលឲ្យកូនក្មេងភាគច្រើនកើតមកដោយមានបញ្ហាសុខភាពធ្ងន់ធ្ងរដែលកូនអាចឃើញនោះទេ។ ជាឧទាហរណ៍ កូនក្មេងភាគច្រើនមិនបានកើតមកដោយមានដៃឬជើងតែម្ខាងទេ។ ប៉ុន្តែភាពមិនល្អឥតខ្ចោះដែលពួកគេមានគឺច្រើនល្មមដែលធ្វើឲ្យពួកគេឈឺ ហើយក្រោយមកស្លាប់។
ពិតណាស់ មនុស្សខ្លះឧស្សាហ៍ឈឺជាងអ្នកឯទៀត។ ហេតុអ្វីដូច្នោះ? តើនេះដោយសារពួកគេកើតមកមានភាពខុសឆ្គងច្រើនជាងឬ?— មិនមែនទេ មនុស្សគ្រប់គ្នាកើតមកដោយមានភាពខុសឆ្គងដូចគ្នាទាំងអស់។ យើងទាំងអស់គ្នាកើតមកមិនល្អឥតខ្ចោះ។ ដូច្នេះ មិនយូរមិនឆាប់ គ្រប់គ្នានឹងមានជំងឺណាមួយមិនខាន សូម្បីតែមនុស្សដែលព្យាយាមធ្វើតាមច្បាប់ទាំងអស់របស់ព្រះ ហើយមិនសូវធ្វើអាក្រក់ក៏នឹងមានជំងឺដែរ។
ពេលយើងលែងមានភាពខុសឆ្គងទៀត តើយើងនឹងមានសុខភាពបែបណា?
ដូច្នេះ ហេតុអ្វីបានជាមនុស្សខ្លះឧស្សាហ៍ឈឺជាងអ្នកឯទៀត?— មានមូលហេតុផ្សេងៗ។ នេះប្រហែលជាពួកគេអត់មានអាហារគ្រប់គ្រាន់ ឬមិនបានញ៉ាំម្ហូបអាហារត្រឹមត្រូវ។ ពួកគេប្រហែលជាញ៉ាំនំនិងស្ករគ្រាប់ច្រើនពេក។ មូលហេតុមួយទៀតប្រហែលជាមកពីពួកគេក្រចូលគេងនៅពេលយប់ ហើយមិនបានគេងគ្រប់គ្រាន់ ឬក៏ពេលមានអាកាសធាតុត្រជាក់ពួកគេមិនបានស្លៀកពាក់សមនឹងអាកាសធាតុនោះ។ ណាមួយទៀត រាងកាយរបស់មនុស្សខ្លះខ្សោយពេកមិនអាចទប់ទល់នឹងជំងឺបាន ទោះជាពួកគេខំថែទាំសុខភាពយ៉ាងណាក្ដី។
តើនឹងមានគ្រាមួយដែលយើងមិនឈឺទេ? តើនឹងមានពេលណាមួយដែលយើងលែងមានភាពខុសឆ្គងទៀតទេ?— មានមែន។ ហេតុអ្វីយើងដឹង? តើកូននៅចាំទេ លោកយេស៊ូបានធ្វើអ្វីដើម្បីជួយបុរសស្លាប់ដៃស្លាប់ជើងនោះ?— លោកយេស៊ូបានអភ័យទោសភាពខុសឆ្គងរបស់គាត់ ហើយធ្វើឲ្យគាត់ជាសះស្បើយ។ តាមរបៀបនោះ លោកយេស៊ូបានបង្ហាញនូវអ្វីដែលលោកនឹងធ្វើនៅថ្ងៃមុខ សម្រាប់អស់អ្នកដែលខំព្យាយាមធ្វើអ្វីដែលត្រឹមត្រូវ។
បើយើងបង្ហាញថាយើងស្អប់អ្វីដែលអាក្រក់ ហើយមិនចង់ធ្វើអំពើខុសឆ្គង នោះលោកយេស៊ូនឹងធ្វើឲ្យយើងជាសះស្បើយ។ នៅពេលអនាគតលោកនឹងដកចេញភាពមិនល្អឥតខ្ចោះដែលយើងមាននៅឥឡូវនេះ។ លោកនឹងធ្វើដូចនេះក្នុងឋានៈលោកជាស្ដេចនៃរាជាណាចក្រព្រះ។ ភាពខុសឆ្គងនឹងមិនត្រូវដកចេញពីយើងភ្លាមមួយរំពេចទេ តែនឹងត្រូវដកចេញបន្តិចម្ដងៗ។ រួចមកនៅទីបំផុតភាពខុសឆ្គងរបស់យើងនឹងលែងមានទៀត ហើយយើងនឹងមិនឈឺទៀតទេ។ យើងនឹងមានសុខភាពល្អឥតខ្ចោះ។ នោះពិតជាធ្វើឲ្យយើងសប្បាយរីករាយណាស់!
ដើម្បីយល់ថែមទៀតថាភាពខុសឆ្គងមានឥទ្ធិពលយ៉ាងណាមកលើយើងគ្រប់គ្នា សូមអាន យ៉ូប ១៤:៤ ទំនុកតម្កើង ៥១:៥ រ៉ូម ៣:២៣; ៥:១២ និង៦:២៣។
លោកអ្នកក៏ប្រហែលជាចូលចិត្តដែរ
លោកយេស៊ូ ជាផ្លូវ ជាសេចក្ដីពិត ជាជីវិត
«ការខុសឆ្គងរបស់អ្នកបានត្រូវអភ័យទោសឲ្យហើយ»
តើលោកយេស៊ូបង្ហាញយ៉ាងដូចម្ដេចថាភាពខុសឆ្គងនិងជំងឺគឺទាក់ទងគ្នា?
