LELO kudi muntu kampanda oyukile ubela?—Padi nobe ubelanga bitatyi bimobimo. Ukokeja kubela kipwiji, nansha kusanswa munda. Bantu bamo babelanga bininge. Babwanya’nka ne kukomenwa kwimana bwimwa shi kekudipo muntu wa kwibemika. Pavule pene kino kifikilanga bantu shi abanunupa kupita.

Muntu yense ubelanga bitatyi bimobimo. Le uyukile mwanda waka bantu babelanga, banunupa ne kufwa?—Difuku dimo bāletēle Yesu muntu kakokejapo kwenda, penepo Yesu walombola mwanda mwine ubelelanga bantu ne kufwa. Ivwana nkusapwile uno mwanda.

Yesu wādi ku njibo imo mu kibundi kyādi pabwipi na Dijiba dya Ngadilea. Kibumbo kya bantu kyāiya kumumona. Kwāile bantu bavule, penepo ne kyaba kya kutwelela mu njibo kine kyābulwa. I kutupu wādi ubwanya nansha kufwena pa kibelo pene. Leka, bantu bungi’bo, bāya’nka kwiya! Kibumbo kya bantu bamo kyāiya kiselele muntu wa bulebe kabwanyapo nansha kwenda kwine. Pādi pasakilwa bana-balume baná ba kumusela pa kakitanda, nansha kitalu.

Le uyukile kyobāidile na uno muntu ubela kudi Yesu?—Bādi na lwitabijo lwa amba Yesu ubwanya kumukwasha. Bādi bakulupile amba Yesu ukokeja kumundapa misongo’ya. Le uyukile mobāfikijije wa bulebe’wa pādi Yesu mu njibo muyule bantu nabya?—

Tala, kino kifwatulo kyomona pano’ki kilombola mobālongēle. Dibajinji, bākandije muntu’wa pangala pa musaka. Wādi musaka mubatalale. Kupwa, batubula’mo kipunzu kikata. Ku mfulo, batūkijija ubela’wa pa kipunzu’kya bityebitye kufika ne munshi mwa njibo, kasha utandabala pa kitalu kyandi’kya. Bine, bādi na lwitabijo lukomo mpata!

 Bantu bonso mu njibo bābezemuka pobāmwene byobya byālongekele. Muntu wa bulebe wika umbukata mwabo wilādile pa kitalu. Lelo Yesu wākwetwe bulobo paāmwene byālongele bantu’ba?—Nansha dimo! Wādi na nsangaji pa kumona amba bādi na lwitabijo. Wānena wa bulebe’wa amba: ‘Bubi bobe bubakulekelwa.’

Bantu bamo bādi kebalanga amba kebyendele’mo Yesu kunena nabya. Bādi balanga amba kabwanyapo kulekela bantu bubi. Kupwa, mwanda wa kwibalombola amba udi na luno lupusa, Yesu wānena muntu’wa amba: “Būka, utekune kitalu kyobe, wende kunjibo kobe.”

Yesu pa kunena namino, muntu’wa wāpwibwa ne kupwibwa! Kākidipo kadi monka na bulebe nansha dimo. Pano wādi kadi na bukomo bwa  kwiimanina aye mwine ne kwenda. Bantu bāmwene kino kingelengele bātulumukile mpata. Bine, bādi kebamwene kashā kintu kya kutendelwa pamo na kino! Penepo bātendela Yehova pa kwibapa uno Mufundiji Mukatampe, wādi ukokeja ne kundapa bantu misongo yabo.—Mako 2:1-12.

Le i ñeni’ka yotuboila ku kino kingelengele?—Kitufundija amba Yesu udi na bukomo bwa kulekela bantu bubi ne bwa kundapa babela. Ino kadi kitufundija kintu kikwabo kya mvubu mpata. Kitufundija amba bantu babelanga pa mwanda wa bubi.

Batwe bonso tubelanga mu bitatyi kampanda, lelo kino kishintulula amba batwe bonso twi babipya-mambo?—I amo, Bible unena amba batwe bonso twi babutulwe na bubi. Le uyukile bubinga bubutwilwa bantu na bubi?—Ko kunena amba twi babutulwe bampikwa kubwaninina. Dimodimo tuloñanga bintu bibi, nansha shi ketusakilepo kwibilonga. Lelo uyukile motwaikadile batwe bonso na bubi?—

Twi bapye’bo mwanda muntu mubajinji, Adama, kākōkelepo Leza. Wālongele bubi kitatyi kyaājilwile kijila kya Leza. Batwe bonso netu twi bapyane bubi kudi Adama. Lelo uyukile muswelo mwine otupile bubi kwadi? Ivwana nkushintulwile’byo mu muswelo obwanya kwivwana biyampe.

Padi kodi mumone pasoka muntu mikate mu kikombola. Lelo mikate ikatamba namani shi kikombola kidi na kikunu? Le uyukile moikekadila?—Kabulēma’ka, nansha kikunu’kya, kikafiyula mikate yonso ikalongelwa mu kikombola’kya, mwene i amo?—

 Adama udi pamo bwa kino kikombola, batwe netu bwa mikate. Paājilwile kijila kya Leza, wāikele ke wakubulwa kubwaninina. Wāikele pamo bwa aye wātambilwe na kikunu, nansha kabulēma kabi. Pa kino, le bana nabo badi ba kwikala namani?—Bana bonso badi ba kutamba na kabulēma kamo konka ka kubulwa kubwaninina.

Bana bavule shabo kebabutulwangapo na bulēma bumwekelele bobwanya kumona amba abu kebo. Kebabudilwepo shi kuboko shi kulu, mhm. Ino kubulwa kubwaninina kobadi nako i kukatampe bininge, o mwanda kwibafikijanga ku kubela ne, mwenda mafuku, bafwa ne kufwa.

Na bubine, bantu bamo babelanga kitatyi kyonso kupita’ko bakwabo. Mwanda waka? Lelo ko kunena amba abo babutulwanga na bubi buvule kupita?—Ehe, bantu bonso babutulwanga na bubi bwa muswelo umo. Batwe bonso tubutulwanga bampikwa kubwaninina. O mwanda, mwenda mafuku, muntu ne muntu wikalanga ubela misongo kampanda. Nansha ke bantu bekankamikanga kukōkela ku bijila byonso bya Leza, kwampikwa kulonga kabi nansha kamo kene, nabo babelanga.

Penepa, mwanda waka bantu bamo babelanga bininge kupita’ko bakwabo?—Kudi bubinga buvule. Padi i pa mwanda kebadipo na byakudya bivule. Pamo kadi kebadyangapo bidibwa biyampe. Pakwabo padi badyanga bitumbula ne mabombo mapite kipimo. Bubinga bukwabo i buno: padi beijanga bufuku bininge babulwa ne tulo twine tufwaninwe. Kadi padi kebavwalangapo bibapa kyanga senene pobatambila mu mvula nansha mu mashika. Maitu a bantu bamo nao ekalanga’nka mazoze, o mwanda kebabwanyapo kupitwa na misongo, nansha shi batompa kwilama muswelo’ka.

 Le kukekalanga kitatyi kyoketukabelapo kadi dikwabo? Le tukanyongololwanga ku bubi?—Tutale, i kika kyālongele Yesu na yewa muntu wa bulebe’wa?—Yesu wāmulekēle bubi bwandi ne kumukomeja. Pa kino, Yesu wālombwele byakalongela boba bonso beelela’ko kulonga byoloke.

Shi twilombola amba ketusakilepo kulonga bubi ne amba tushikilwe bibi, nabya Yesu uketundapanga. Mu mafuku a kumeso, uketutalula kubulwa kubwaninina kotudi nako pano’ku. Uketutalula’ko mwanda aye ye Mulopwe wa Bulopwe bwa Leza. Bubi kebuketutalulwapo musunsa umo kala ne kobwaya jimejime. Buketutalulwa mu bula bwa kitatyi kampanda. Kupwa shi bubi bwetu bubapwididila ne pa mfulo, papo ketukikabelapo dikwabo nansha dimo. Batwe bonso tukekalanga na bukomo bwa ngitu bubwaninine. Bine, akekalanga madyese a kashā!