UDIKU mumanye muntu udi usama anyi?​— Pamuapa utu pebe usama matuku makuabu. Udi mua kupeta tshimpumpu, anyi munda mudi mua kukusama. Bantu bakuabu batu basama bikole. Kabatu nansha mua kuimana kulu padiku kakuyi muntu wa kubakuata to. Bitu bitamba kuenzeka nunku nangananga padi bantu bakulakaja bikole.

Muntu yonso utu usama. Udi mumanye bua tshinyi bantu badi basama, bakulakaja ne bafua anyi?​— Dituku dikuabu bakatuadila Yezu muntu uvua kayi mua kuenda, ne Yezu wakaleja bua tshinyi bantu batu basama ne bafua. Teleja nkulondele muvua bualu abu.

Yezu uvua musombele mu nzubu mukuabu mu tshimenga kampanda tshivua pabuipi ne Mâyi a Galela. Musumba wa bantu wakalua kumutangila. Nunku bantu ba bungi bakalua ne kakutshivua muaba bua bantu bakuabu kubuela mu nzubu to. Muntu kavua nansha mua kusemena pabuipi ne tshibi to. Kadi bantu batshivua anu balua! Tshisumbu kampanda tshia bantu bakalua ne muntu uvua mutshibukile panshi kayi nansha mua kuenda to. Bivua bikengela bantu banayi bua kumuambula pa kalalu.

Udi mumanye bua tshinyi bavua basue kuya ne muntu uvua usama eu kudi Yezu anyi?​— Bavua bitabuja ne: Yezu uvua mua kumuambuluisha ne kumuondopa disama diende adi. Udi mumanye mushindu uvuabu bafikishe mubedi eu pabuipi ne Yezu mu nzubu muikale bantu ba bungi nunku anyi?​—

Bulelela, tshimfuanyi tshiudi umona apa tshidi tshileja mushindu uvuabu benze. Kumpala, bakabandisha muntu au pa musaka wa nzubu. Musaka uvua mulandakane. Pashishe bakatubulapu disoso dinene. Ndekelu  wa bionso bakapuekeshila mubedi mulale pa kalalu kende lua mu disoso adi too ne munda mua nzubu. Bantu aba bavua ne ditabuja dikole bushuwa!

Bantu bonso bavua mu nzubu bakapapuka pa kumona tshivua tshienzeka atshi. Mubedi uvua mulale pa kalalu kende au wakapueka anu munkatshi muabu menemene. Yezu wakafika munda pakamonaye tshivua bantu abu benze anyi?​— Nansha kakese! Wakasanka bua kumona ne: bavua ne ditabuja. Wakambila mubedi au ne: ‘[Mpekatu] yebe yakujimijibua.’

Bantu bakuabu bavua bela meji ne: kabivua biakanyine bua Yezu kuambaye nanku to. Kabavua bitaba ne: yeye uvua mua kubuikidila bantu mpekatu to. Nunku bua kuleja bushuwa ne: uvua mua kubuikidila bantu mpekatu, Yezu wakambila muntu au ne: ‘[Juka], ambula bulalu buebe ndaku ku nzubu kuebe.’

 Pakamba Yezu mêyi aa, muntu au wakumvua bimpe! Katshivua kabidi mutshibukile panshi to. Mpindieu uvua mua kudimanyina kulu yeye nkayende ne kuenda. Bantu bakamona tshishima etshi bakakema. Katshia babalela kabavua banji kumona bualu budi bukemesha bu ebu to! Bakatumbisha Yehowa bua muvuaye mubapeshe Mulongeshi Munene eu, uvua mua kuondopa bantu masama abu.​—Mâko 2:1-12.

Tshishima etshi tshidi tshitulongesha tshinyi?​— Tshidi tshitulongesha ne: Yezu udi ne bukokeshi bua kujimija mpekatu ne bua kuondopa babedi. Kadi tshidi kabidi tshitulongesha bualu bukuabu, bua mushinga mukole. Tshidi tshitulongesha ne: bantu badi basama bua mpekatu.

Bu mututu tuetu bonso tusama misangu mikuabu, abi bidi bileja ne: tuetu bonso tudi bena mpekatu anyi?​— Eyowa, Bible udi wamba ne: tuetu buonso tudi baledibue ne mpekatu. Udi mumanye tshidi kuledibua ne mpekatu kumvuija anyi?​— Kudi kumvuija ne: tudi baledibue bapange bupuangane. Tutu imue misangu tuenza malu mabi, nansha tuetu katuyi basue to. Udi mumanye mutudi tuetu bonso bafike ku dipeta mpekatu anyi?​—

Tudi baledibue ne mpekatu bualu Adama muntu wa kumpala wakabenga kutumikila Nzambi. Wakenza mpekatu pakashipaye mukenji wa Nzambi. Tuetu bonso tuakapiana mpekatu kudi Adama. Udi mumanye mutuvua bapiane mpekatu eu kudiye anyi? Teleja, ndi nteta mua kumvuija mu mushindu uudi mua kumvua bimpe.

Pamuapa ukadiku mumone muntu wosha mampa mu tulata. Kalata kuoku kakonyangale muaba umue, diampa nedipatuke munyi? Udi mumanye anyi?​— Tshilema tshimue tshimue atshi netshimueneke pa mampa  onso ikalabu ne bua kuoshela mu kalata aku, ki mmuomu anyi?​—

Adama uvua bu kalata ka mampa aku, ne tuetu tudi bu mampa. Wakalua mupange bupuangane pakashipaye mukenji wa Nzambi. Bivua anu bu ne: uvua mukonyangale pa muaba kampanda. Nunku pakalelaye bana, bavua ne bua kuikala munyi?​— Bana bende bonso bavua ne bua kupeta tshilema tshimue tshimue tshia dipanga bupuangane atshi.

Bana ba bungi kabena baledibua ne bilema binene binudi mua kumona to. Ki mbapangile diboko anyi mukolo to. Kadi dipanga bupuangane didibu nadi nditambe bunene bualu badi basama ne pashishe bafua.

Bu mutudi bamanye, bantu bakuabu batu bapita kusamasama kupita bakuabu. Bua tshinyi? Bualu mbaledibue ne mpekatu ya bungi anyi?​— Toò, muntu yonso udi uledibua ne bungi bua muomumue bua mpekatu. Tuetu bonso tudi baledibue bapange bupuangane. Nunku, ku tototo nansha ku ndandanda, muntu yonso neasameku disama kampanda. Nansha bantu badi benza muabu muonso bua kutumikila mikenji yonso ya Nzambi ne badi kabayi benza bualu bubi menemene badi mua kusama.

Kadi bua tshinyi bamue bantu batu basama misangu ya bungi kupita bakuabu?​— Kudi malu a bungi adi mua kumvuija bualu ebu. Pamuapa kabena ne biakudia bikumbane. Anyi kabena badia biakudia bidi bibakumbanyine to. Badi mua kuikala badia bintu bia bungi bidi kabiyi nansha bidisha mubidi. Bualu bukuabu budi mua kuikala ne: badi basomba bikole butuku ne kabena balala tulu tukumbane to. Anyi kabena bavuala bilamba bidi bikumbanyine padiku mashika peshi padi mvula uloka. Mibidi ya bantu bakuabu mmitekete bikole ne kabena mua kukolela disama, nansha buobu bateta mua kudilama bimpe.

 Nekuikaleku tshikondo tshituikala katuyi tusama kabidi anyi? Nebatumushileku mpekatu dimue dituku anyi?​— Ntshinyi tshivua Yezu muenzele mubedi uvua mutshibukile panshi au?​— Yezu wakamubuikidila mpekatu yende ne kumuondopa. Mu mushindu au, Yezu wakaleja tshikalaye mua kuenzela bantu bonso dituku dikuabu badi bakeba ne muabu muonso bua kuenza malu mimpe.

Tuetu baleje ne: katuena basue kuenza mpekatu ne tudi bakine malu mabi, Yezu neatuondope. Mu matuku adi alua kumpala, neatumbushile dipanga bupuangane ditudi nadi mpindieu. Neenze nunku bualu m’Mukalenge wa Bukalenge bua Nzambi. Mpekatu yetu kayakujimijibua musangu umue to. Nebayumbushe munkatshi mua tshikondo kampanda. Ne pikala mpekatu yetu yonso ne bua kujika, katuakusama kabidi nansha. Netuikale ne makanda a mubidi mapuangane. Nebikale bualu bua disanka be!