HAINE omuntu weena ou orikumanya orwaire?— Naiwe obumwe noobaasa kuba noorwara. Noobaasa kurwara senyiga nari oshaashe omunda. Abantu abamwe barwaire munonga, tibarikubaasa n’okwemerera omuntu yaaba atabahwereire. Eki nikikira kubaho omuntu yaaba akuzire munonga.

Abantu boona nibarwara. Noomanya enshonga ahabw’enki abantu nibarwara, bakura kandi bakafa?— Eizooba rimwe omushaija owaabaire atarikubaasa kugyenda bakamureetera Yesu, kandi Yesu akooreka ahabw’enki abantu nibarwara kandi bakafa. Ka nkutebeze oku byagyenzire.

Yesu haine enju ei yaabaire atwiremu kumara omwanya mukye omu tauni eri haihi n’enyanja ya Galilaaya. Abantu baingi bakaija kumureeba. Ahabw’abantu kuba baingi, hakaba hatakirimu gundi mwanya kugira ngu abandi bataheemu. Tihaine n’owaabaire naabaasa kuhika haihi n’orwigi. Kwonka, abantu abandi baingi bakaguma nibaija! Bamwe ahari abo bakaija n’omuntu owaabaire arwaire endwara y’okusharara atarikubaasa n’okugyenda. Kiketengyesa abashaija bana kumukiririza aha katanda.

Noomanya ahabw’enki baabaire nibenda kureeta omushaija ogwo orwaire ahari Yesu?— Bakaba baine okwikiriza ngu Yesu naija kumutambira endwara egyo. Noomanya oku baahikize omushaija ogwo orwaire ahari Yesu kandi obwo enju eijwiremu abantu?—

Ekishushani eki orikureeba nikyoreka oku baakikozire. Bakabanza baakiriza omushaija ogwo baamutembesa aha mutwe gw’enju. Baafumura aha mutwe gw’enju. Reero omushaija ogwo orwaire ari aha katanda  ke bakamurabya ahu baafumwire bamuhitsya ahu Yesu yaabaire ari. Ka baabaire baine okwikiriza kw’amaani!

Abantu boona omu nju bakatangaara ku baareebire ekyabaireho. Omushaija owaabaire arwaire endwara y’okusharara bakamuta ahagati y’abantu abandi. Mbwenu shi Yesu akagira ekiniga ku yaareebire eki abashaija abo baakozire?— Ngaaha buzima! Akashemererwa kureeba ngu bakaba baine okwikiriza. Akagambira omushaija owaabaire arwaire endwara y’okusharara ati: “Ebibi byawe byakusaasirwa.”

Bamwe aha bantu abo bakateekateeka ngu kikaba kitahikire Yesu kugamba atyo. Bakaba batarikuteekateeka ngu Yesu naabaasa kusaasira abantu ebibi. Kubaasa kubooreka ngu buzima akaba naabaasa kusaasira abantu ebibi, Yesu  akagira omushaija ogwo ati: ‘Imuka oyekorere akatanda kaawe, otaahe.’

Yesu ku yaagambire ebigambo ebyo, omushaija yaakira! Akaba atakiine ndwara y’okusharara. Hati akaba naabaasa kwemerera wenka akagyenda hataine omuhwereire. Abantu abaareebire ekyo nikibaho bakatangaara. Tihaine n’omwe omuribo owaabaire arareebireho ekintu nk’ekyo ekirikutangaaza! Bakahimbisa Yehova ahabw’okubaha Omwegyesa Mukuru ogwo, owaabaire naabaasa n’okutambira abantu endwara zaabo.​—Mako 2:1-12.

Niki eki turikwega aha ky’okutangaaza eki?— Nitwega ngu Yesu aine amaani g’okusaasira ebibi kandi akakiza n’abarwaire. Kwonka haine ekindi kikuru munonga eki turikukyegaho. Nitwega ngu abantu nibarwara ahabw’ekibi.

Obu twena obumwe turikurwara, ekyo nikimanyisa ngu twena turi abasiisi?— Eego, Baibuli neegira ngu twena nituzaarwa n’ekibi. Noomanya eki kirikumanyisa okuzaarwa n’ekibi?— Nikimanyisa ngu nituzaarwa turi abatahikiriire. Obumwe nitukora ebitahikire n’obu turikuba tutarikwenda kubikora. Noomanya oku twena twahikire aha kugira ekibi?—

Twena tukazaarwa n’ekibi ahabw’okugira ngu omuntu w’okubanza Adamu, tarayorobeire Ruhanga. Akashiisha obu yaahenda ekiragiro kya Ruhanga. Kandi twena tukahungura ekibi kuruga ahari Adamu. Noomanya oku twatungire ekibi kuruga ahari Adamu? Ka nteereho kukishoboorora omu muringo ogu orikubaasa kwetegyereza.

Noobaasa kuba orareebireho omuntu naatekyera omugaati omu mucebe. Niki ekirikuhika aha mugaati, omucebe ogwo gwaba guhompire?  Noomanya ekiraagubeho?— Omugaati ogwo nagwo nigwija kuba guhompire nari guriho akamogo, tikwo?—

Adamu akaba ari nk’omucebe ogwo, kandi itwe turi nk’omugaati. Ku yaahenzire ekiragiro kya Ruhanga yaaba otahikiriire. Akaba nk’owaahompa, nari owaatunga akamogo. Mbwenu ku yaakuzaire abaana, noogira ngu bakaabaire nibashusha ki?— Abaana be boona bakaabaire baine akamogo ako ak’okutahikiirira.

Abaana baingi tibarikuzaarwa n’obumogo obu orikubaasa kureeba n’amaisho. Tibarikuzaarwa bataine mikono nari maguru. Kwonka akamogo aku barikuba baine n’ak’amaani ahabw’okuba nikarugamu endwara n’okufa.

Nk’oku turikumanya, abantu abamwe nibakira kurwararwara kukira abandi. Ahabw’enki kiri kityo? Tugire ngu shi n’ahabw’okuba bakazaarwa n’ekibi kihango kukira abandi?— Ngaaha, twena tukazaarwa n’ekibi kirikwingana. Twena nituzaarwa turi abatahikiriire. N’ahabw’ekyo, haahinguraho obwire, buri omwe ahariitwe naagira endwara ei yaarwara. Nangwa n’abantu abarikworobera ebiragiro bya Ruhanga kandi batarikukora bibi nibabaasa kurwara.

Mbwenu shi, ahabw’enki abantu abamwe nibakira kurwararwara munonga kukira abandi?— Hariho enshonga nyingi. Noobaasa kushanga bataine by’okurya birikumara. Nari nibabaasa kuba nibarya eby’okurya ebitashemeire. Nibabaasa kuba nibarya eby’okurya bingi ebitarikwombeka mubiri. Enshonga endiijo neebaasa kuba eri ngu nibabyama kikyererezi kandi tibarikugwejegyera kirikumara. Nari obumwe ku barikuteerwa enjura nibabaasa kutarahuka kuhindura emyenda ahonaaho. Abantu abamwe emibiri yaabo teine maani  g’okurwanisa endwara, n’obu baakuba nibateeraho kwereberera gye.

Haryabaho obwire obu turaabe tutarikurwara? Obwire buryahika tubeho tutaine kibi?— Noijuka eki Yesu yaakoreire omushaija owaabaire arwaire endwara y’okusharara?— Yesu akamusaasira ebibi bye kandi yaamukiza. Omu muringo ogwo, Yesu akooreka eki arikwija kukorera abo abarikuteeraho kukora ebihikire.

Twayoreka ngu titurikwenda kushiisha kandi ngu nitwanga ebitahikire, Yesu naija kutukiza. Omu bwire bw’omumaisho, naija kutwihaho okutahikiirira oku twine hati. Ekyo naija kukikora nk’Omugabe w’Obukama bwa Ruhanga. Ekibi tikirikwija kuturugaho omurundi gumwe. Nikiija kuguma nikiturugaho mporampora kumara obwire. Kwonka ekibi ku kirituhweramu kimwe, titurigaruka kurwara. Twena turyagira amagara marungi. Ekyo ka nikiija kureeta okushemererwa kw’amaani!