WALAY kabat mon mansasakit?— Nayarin mansakit ka met no maminsan. Nayarin napanateng ka, odino onsakit so eges mo. Arum a totoo et grabe sakit da. Ag-ira ni ingen makaalagey no anggapoy mangipaalagey ed sikara. Nagawa iya sano matakken lan maong so totoo.

Amin so mansakit no maminsan. Antam no akin a mansasakit, ontatakken, tan ompapatey so totoo?— Sakey ya agew et inawit da ed si Jesus so sakey a toon agmakaakar, tan impanengneng nen Jesus no akin a mansasakit tan ompapatey so totoo. Istoryaen ko ed sika.

Si Jesus so walad sakey ya abung diad baley ya asingger ed Dayat na Galilea. Sinmabi so grupo na totoon labay dan nanengneng si Jesus. Dakerakel a totoo so linma diman kanian agla makaloob iray arum ed abung. Anggapo ni ingen so makaasingger ed puerta. Balet, dakel ni onsasabin totoo! Walay sakey a grupo na totoo ya angawit na paralitikon laki. Binitbit na apatiran lalaki so angipadukolan da ed sikato.

Antam no akin a labay dan awiten iyan mansasakit a too ed si Jesus?— Walaan ira na pananisia a sikatoy sarag nen Jesus a tulongan. Panisiaan dan sarag nen Jesus a paabigen so sakit to. Antam no panon dan niyasingger ed si Jesus so paralitiko anggaman dakerakel so totoo ed abung?—

Onia’ay, nanengneng ed sayan retrato no panon dan ginawa itan. Unona, insegep da’d atep so laki. Palatas so atep. Insan da binungawan so atep. Kanian nileksab da so mansasakit a laki a walad dukolan to  diad binungaw da a dugaruga ed kuarto ed leksab. Talagan mabisbiskeg so pananisia ra!

Nandinayew so amin a totoo a walad abung sanen anengneng da so agawa. Say paralitiko so wadman ed pegley da. Kasin nampasnok si Jesus sanen anengneng toy ginawa na lalaki?— Andin balot! Aliketan ed impakanengneng to a sikaray walaan na pananisia. Inkuan to ed paralitikon laki: ‘Aperdona la iray kasalanan mo.’

Ag-inisip na arum a totoo a manepeg iman ya ibaga nen Jesus. Agda inisip a sikatoy makaperdona na saray kasalanan. Kanian pian ipanengneng a talagan sarag toy mamerdona, inkuan nen Jesus ed laki: ‘Alagey ka, alam so dukolan mo, tan onla ka ed abung mo.’

 Sanen imbaga nen Jesus itan, inmabig so laki! Aliwa lan paralitiko. Makaalagey la tan makaakar lan bukor. Nikelawan iray totoo ya akanengneng ed saman a milagro. Agni iran balot akanengneng na onman lan makapakelaw! Indayew da si Jehova lapud impangiter to’d sikara na sayan Sankamaongan a Managbangat, a sarag ton paabigen so totoo ed saray sakit da.—Marcos 2:1-12.

Antoy naaralan ta manlapud saman a milagro?— Naaralan ta a walay pakapanyari nen Jesus a mamerdona ed saray kasalanan tan mamaabig ed mansasakit a totoo. Balet wala met ni naaralan ta’n importantin maong. Naaralan ta a mansasakit iray totoo lapud kasalanan.

Lapud no maminsan et mansakit itayon amin, kasin kabaliksan na saya ya amin tayo et makasalanan?— On, ibabaga na Biblia a nianak itayon amin a walaan na kasalanan. Antam no antoy kabaliksan na nianak a walaan na kasalanan?— Kabaliksan ton nianak itayo ya ag-ayadyari. Makakagawa itayo no maminsan na saray lingo, anggano agtayo labay a gawaen itan. Antam no panon itayon amin a nagmaliw a makasalanan?—

Nianak itayon makasalanan lapud agtinulok na inmunan too, si Adan, so Dios. Sikatoy nankasalanan sanen sinumlang toy ganggan na Dios. Tan amin tayo so akatawir ed kasalanan nen Adan. Antam no panon tayon atawir ed sikato so kasalanan tayo. Ipaliwawak ed sika ed paraan a natalosan mo.

 Nayarin akanengneng ka lay manggagawa na tinapay diad sukogan. Antoy nagawa ed tinapay no walay kompil na sukogan? Antam?— Agta pareho met a marka, odino kompil, so napatnagan ed amin a tinapay?—

Si Adan et aliling toy sukogan, tan aliling tayo met so tinapay. Nagmaliw itayon ag-ayadyari sanen sinumlang toy ganggan na Dios. Singano sikatoy akompil, odino amarkaan na ag-inkayadyari. Kanian sanen nan-ilalak, antoy nagmaliwan da ey?— Amin ya ananak to so amarkaan met na ag-inkayadyari.

Maslak ya ugugaw so agnianak a walaan na mapatpatnag a deperensya a nanengneng mo. Aliwa iran pukol. Balet lapud agda inkayadyari et sikaray mansakit tan, nasabi panaon, ompatey ira.

Siempre, arum a totoo so mas masakit nen say arum. Akin ey? Kasin lapud sikaray nianak a mas makasalanan?— Andi, amin so nianak a walaan na parehon kasalanan. Nianak itayon amin ya ag-ayadyari. Kanian, diad kaunoran, amin so nawalaan na arum a klase na sakit. Anggan saray totoo a manguunor ed amin a ganggan na Dios tan anggapoy gagawaen dan mauges so mansakit met.

Sirin, akin a saray arum a totoo so mas mabetbet a masakit nen say arum?— Dakel iray rason. Nayarin lapud kulang so kakanen da. Odino ag-ira mamangan na dugan klase na kakanen. Nayarin mas dakel so kakanen dan cake tan kendi. Arum a rason et nayarin sikaray lablabi lan unugip kanian kulang so ugip da. Odino nayarin papaulyan day laman dan nabetelan. Arum a totoo et makapuy  so laman da, tan agda nalabanan so sakit, anggano maasikaso ira’d laman da.

Onsabi ni kasi so panaon ya ag-itayo la mansakit? Makalukpos tayo ni kasi ed kasalanan?— Antoy ginawa nen Jesus ed paralitikon laki?— Pinerdona nen Jesus iray kasalanan to tan pinaabig to. Diad ontan, impanengneng nen Jesus so gawaen to parad amin na saraman so mamapasyan manggawa na duga sano nasabi lay panaon.

No ipatnag tayon agtayo labay so mankasalanan, insan bubusolen tayo so mauges, paabigen itayo nen Jesus. Diad arapen, ekalen to ed sikatayo so ag-inkayadyari a walad sikatayo natan. Gawaen to iya bilang Ari ed Panarian na Dios. Aliwan tamtampol a naekal ed sikatayo so kasalanan. Naekal itan ed loob na sakey a panaon. Insan no anggapo lay kasalanan tayo, agtayo lan balot mansakit lamet. Nawalaan itayo na ayadyarin bunigas. Agaylan bendisyon itan!