WASWE, iu savve long eniwan wea sik?— Iuseleva tu maet sik samfala taem. Maet iu flu, or bele soa. Samfala pipol barava sik. Olketa needim samwan for helpem olketa standap. Plande taem diswan happen taem pipol barava olo.

Evriwan sik samfala taem. Waswe, iu savve why pipol kasem sik, kamap olo, and dae?— Wanday olketa tekem go long Jesus wanfala man wea no savve wakabaot, and Jesus talem why nao pipol kasem sik and dae. Mi laek storyim diswan long iu.

Jesus stap for lelebet taem long wanfala haos long taon klosap long Sea bilong Galilee. Staka pipol kam for lukim hem. From olketa hia staka tumas no eni spes stap for nara pipol go insaed long haos. Hem hard tumas for eniwan go klosap long door. Nomata olsem, plande moa pipol kam! Wanfala sekson tekem kam man wea paralyze. Hem needim fofala man for karem hem long wanfala smol bed.

Waswe, iu savve why nao olketa laek tekem kam disfala sik man long Jesus?— Olketa garem faith hao Jesus savve helpem hem. Olketa bilivim hao Jesus savve healim hem from datfala sik. Waswe, iu savve hao nao olketa tekem datfala man wea paralyze kam long Jesus nomata staka pipol stap insaed long datfala haos?—

Disfala piksa showim hao olketa duim. Firstaem, olketa tekem datfala man go ap long ruf. Hem ruf wea flat. Then, olketa mekem wanfala big hol long ruf. Last samting, olketa isisi letem  hem go daon insaed rum witim rope. Olketa barava garem strong faith!

Evriwan insaed long haos sapraes taem olketa lukim diswan. Man wea paralyze long bed kam daon midol long olketa. Waswe, Jesus hem kros taem hem lukim wanem olketa man hia duim?— Nomoa nao! Hem hapi for lukim olketa garem faith. Hem sei long man wea paralyze: “Mi forgivim olketa sin bilong iu.”

Samfala pipol ting hem no stret for Jesus talem datwan. Olketa no ting hem savve forgivim sin. So for showim hem savve barava forgivim sin, Jesus sei long datfala man: “Standap, tekem bed bilong iu and go bak long haos bilong iu.”

 Taem Jesus talem datwan, datfala man heal nao! Hem no paralyze nao. Hem savve standap seleva and wakabaot. Pipol wea lukim disfala mirakol sapraes fogud. No enitaem bifor olketa lukim eni samting wea nambawan olsem datwan! Olketa praisem Jehovah for givim long olketa datfala Nambawan Teacher, wea savve healim sik pipol.—Mark 2:1-12.

Wanem nao iumi lanem from disfala mirakol?— Iumi lanem hao Jesus garem paoa for forgivim sin and healim sik pipol. Bat iumi lanem nara samting tu wea hem barava important. Iumi lanem hao pipol sik bikos long sin.

From samfala taem iumi evriwan savve sik, waswe, diswan minim iumi evriwan sin?— Ia, Bible sei iumi evriwan born witim sin. Waswe, iu savve wanem nao hem minim for born witim sin?— Hem minim iumi born long wei wea no perfect. Samfala taem iumi duim olketa rong samting, nomata iumi no laek for duim datwan. Waswe, iu savve why nao iumi evriwan born witim sin?—

Iumi born witim sin bikos first man, Adam, no obeyim God. Hem sin taem hem brekem law bilong God. And iumi evriwan kasem sin from Adam. Waswe, iu savve hao nao iumi kasem sin from hem? Mi bae trae for explainim long wei wea iu savve minim.

Maet iu lukim samwan wakem bred insaed wanfala tray. Wanem nao bae happen long bred sapos tray hem bend? Waswe, iu  savve?— Datfala sem mark bae showaot long evri bred iu mekem insaed datfala tray, iaman?—

Adam nao olsem datfala tray, and iumi nao olsem datfala bred. Hem kamap man wea no perfect taem hem brekem law bilong God. Hem olsem hem kasem wanfala nogud mark. So taem hem garem olketa pikinini, olketa bae hao?— Evri pikinini bilong hem kasem disfala sem mark wea mekem olketa no perfect.

Plande pikinini born witim body wea gud nomoa. Olketa no garem wanfala hand or wanfala leg nomoa. Bat wei wea olketa no perfect mekem olketa kamap sik, and gogo, olketa dae.

Olsem iumi savve, samfala pipol sik plande taem winim nara pipol. Why nao hem olsem? Waswe, hem bikos olketa born witim staka sin?— Nomoa, evriwan born witim sem sin. Iumi evriwan born witim wei for no perfect. So gogo, evriwan bae kasem wanfala sik. Nomata pipol wea trae hard for obeyim olketa law bilong God and no duim eni samting wea nogud savve sik tu.

Sapos olsem, why nao samfala pipol sik plande taem winim nara pipol?— Plande reason stap. Maet datwan hem from olketa no garem inaf kaikai. Or olketa maet no kaikaim healthy kaikai. Maet olketa kaikaim tumas cake or loli. Maet olketa wekap leit tumas long naet and no kasem inaf sleep. Or maet olketa no werem kaleko wea fitim taem hem rain. Body bilong samfala pipol hem wik tumas, so olketa no savve winim sik, nomata sapos olketa trae for keepim olketa seleva gud.

 Waswe, enitaem long future iumi bae no kasem sik moa? Waswe, enitaem iumi bae free from sin?— Wanem nao Jesus duim for datfala man wea paralyze?— Jesus forgivim olketa sin bilong hem and healim hem. Long wei olsem, Jesus showim wanem hem bae duim long future for evriwan wea trae hard for duim stret samting.

Sapos iumi showim iumi no laek for sin and iumi heitim rong samting, Jesus bae healim iumi. Long future, hem bae aotem wei for no perfect wea iumi garem distaem. Hem bae duim diswan taem hem rul olsem King long Kingdom bilong God. Hem bae no wantaem aotem sin from iumi. Hem bae isisi aotem sin. Then taem sin bilong iumi finis evribit, iumi bae no sik moa. Iumi evriwan bae garem health wea perfect. Datwan bae wanfala nambawan blessing!