¿YAQACHU yachashanki pipas onqosqa kasqanta?... Yaqapaschá qanpuni gripewan otaq wijsa nanaywan onqoruranki. Juj runakunaqa sinchitan onqonku. Wakinqa manan sayariytapas atinkuchu, astawanqa kuraq runakuna.

Llapa runakunan mayninqa imallawanpas onqonchis. ¿Imaraykun llapa runakuna onqonku, machuyanku, wañupunkupas? ¿Yachankichu?... Juj kutinmi onqosqa runata Jesusman apamuranku, chaypin Jesús willaran imaraykun runakuna onqonku chayta. Chayta kunan willasayki.

Jesusmi Galilea qochaq qayllan llaqtapi alojakusharan. Chayta yacharuspan askha runakuna alojakusqan wasiman juñukamuranku. Sinchi askha runakunan juñukamuranku, chaymi mana punkupi sayaykunallapaqpas campo karanchu. Chaymanmi mana kuyuriy atiq runata tawa runakuna camillapi apamuranku.

¿Imaraykun chay onqosqa runata Jesusman aparanku?... Chay runakunaqa creerankun Jesús atiyniyoq kasqanpi. Chaymi payman aparanku qhaliyachinanpaq. Ichaqa manan maynintapas Jesuspa kasqanman apayta atirankuchu. ¿Imatan ruwaranku? ¿Yachankichu?...

Qhawariy kay dibujota. Chay wasiq techonqa azotea jinan karan. Chay patamanmi onqosqa runata wicharachiranku, jinaspa  wasiq techonta t’oqoruranku. Chaynintan camillapi uraykachiranku Jesuspa ladonman. ¡Chay runakunaqa allin iñiyniyoqmi karanku!

Chay onqosqa runataqa runakunaq chaupinmanmi uraykachiranku. Chayta rikuspan llapa runakuna admirakuranku. Ichaqa, ¿ima niranmi Jesús? ¿Phiñakuranchu chay ruwasqankumanta?... Manan, aswanmi kusikuran allin iñiyniyoq kasqankumanta. Chaymi onqosqa runata niran: “Juchaykikunan perdonasqa kapun”, nispa.

Chayta uyarispan wakin runakuna sonqonkupi niranku: ‘Pitaq payri runakunaq  juchanta perdonananpaq’, nispa. Chaymi Jesusqa juchakunata perdonay atisqanta rikuchinanpaq onqosqa runata niran: “Sayariy, camillaykita oqarispa wasiykiman ripuy”, nispa.

Chayta niqtin jinan chay runaqa qhaliyapuran. Jinan sapallan sayarispa puriripuran. Chayta rikuspan runakunaqa anchata admirakuranku. Manan jayk’aqpas chayta rikurankuchu. Chaymi Jehová Diosta agradecekuranku Jesusta kachamusqanmanta (Marcos 2:1-12).

¿Imatan yachanchis chay milagro ruwasqanmanta?... Arí, Jesusqa atiyniyoqmi juchata perdonananpaq onqosqakunata qhaliyachinanpaqpas. ¿Imatawanmi yachanchis? Juchayoq kasqanchisrayku onqosqanchista.

Llapallanchismi mayninpi onqonchis ¿riki? Chhaynaqa, ¿llapallanchischu juchayoq kanchis?... Arí, Biblian willan llapanchis juchayoq nacesqanchista. Juchayoq nacesqanchisraykun imaymanapi pantanchis, ¿yacharankichu chayta?... Chaymi mayninqa mana munashaspa mana allinkunata ruwanchis. Ichaqa, ¿imaraykun llapa runa juchayoq kapuranchis?...

Arí, Adanmi Diospa kamachisqanta mana kasukuspa juchallikuran. Paypa causanpin llapanchis juchayoq kapunchis. ¿Imaynapin chay pasaran? Chayta kunan entiendesun.

 Yaqapaschá rikuranki juj moldepi t’antata otaq tortata ruwasqankuta. Sichus chay molde k’iñasqa kanman chayri, ¿imaynan chay torta lloqsinman?... Arí, chay k’iñasqa moldeq kasqanman jinan lloqsinqa. Chay moldepi imataña ruwasunman chaypas k’iñasqan lloqsinqa ¿riki?...

Adanmi chay molde jina karan noqanchistaq torta jina kanchis. Payqa Diospa kamachisqantan mana kasukuranchu. Chaymi chay k’iñasqa molde jina pantaq runa kapuran. ¿Imaynan wawankuna naceran juchallikusqanmantapacha?... Pay jina juchayoq, pantaq runakuna.

Wawakuna naceqtinqa manan llapallankupichu reparakun pantaq runa kasqankuta. Paykunaqa makiyoq, chakiyoq, junt’asqan nacenku. Ichaqa juchayoq runa kasqankuraykun wiñasqankuman jina onqopunku chaymantataq wañupunku.

Ichaqa, ¿imaraykun wakin runakuna sinchita onqonku? ¿Aswan juchayoq kasqankuraykuchu?... Manan, llapanchispas kaq juchayoqmi nacenchis. Chaymi qhepamanqa ima onqoypas llapanchista jap’iwanchis. Diosta kasukuqkunapas allin kaqta ruwaqkunapas onqopunkun.

Chhaynaqa, ¿imaraykun wakin runakunalla sinchita onqonku?... Wakinqa onqonku mana allinta alimentakusqankurayku, sinchi pisillata mijusqankurayku otaq askha misk’ita mijusqankurayku. Wakinqa pisillatan puñunku otaq mana allintachu puñunku. Wakinqa manan allintachu p’istukunku sinchi chiri  kashaqtin. Wakintaq nishu débil kanku, chaymi cuidakunkuña chaypas ratolla onqonku.

¿Jayk’aqllapas tukupunqachu onqoykuna? ¿Chinkanqachu jayk’aqllapas juchanchis?... Yuyarisun Jesuspa ruwasqanta. ¿Imatan ruwaran onqosqa runata rikuspa?... Arí, juchanta perdonaspan qhaliyachiran. Chaytan Jesusqa ruwallanqataq jamuq tiempopi llapa kasukuq runakunapaq.

Jesusqa Diospa gobiernonpi kamachikuyta qallarispan runakunaq juchanta chinkachipunqa. Sichus noqanchispas mana allin ruwaykunata cheqnikuspa allin kaqta ruwasun chayqa, Jesusmi qhaliyachiwasun. Chay tiempopiqa pisi-pisimantan jucha chinkapunqa. Jinan jucha chinkapuqtin llapallanchis qhali kapusunchis. Chayqa ancha kusikunapaqmi ¿riki?