MO HINGA mbeni zo so tele ti lo aso?— Mo nga kue mo yeke tï peut-être kobela ngoi na ngoi. Koro alingbi ti sala mo wala yâ ti mo alingbi ti so mo. Ti ambeni zo, tele ti ala ni aso ngangu. Ala lingbi même ti londo ala mveni pëpe. A lingbi zo amû maboko na ala si. Ye so ayeke si ka mingi tongana azo ni aga mbakoro mingi.

Azo kue ayeke tï kobela ngoi na ngoi. Mo hinga ngbanga ti nyen azo ayeke tï kobela, ala ga mbakoro, na ala kui?— Mbeni lâ, a ga na mbeni koli na Jésus. Koli ni alingbi ti tambela pëpe, na Jésus afa ngbanga ti nyen azo ayeke tï kobela na akui. Zia mbi fa ni na mo.

Jésus ayeke lani na yâ ti mbeni da na mbeni kodoro ndulu na Ngu ti Galilée. Gbâ ti azo aga ti bâ lo. Ala si yâ ti da ni kue, si lege ti linda na yâ ni ayeke pëpe. Zo oko alingbi même ti si ndulu na yanga-da ni pëpe. Me kue gbä, azo angbâ ti ga! Ambeni zo aga na mbeni koli so amaboko na agere ti lo kue akui, si lo lingbi ti tambela même pëpe. Azo osio si ayô lo na ndo mbeni kete gbogbo.

Mo hinga ngbanga ti nyen ala ye ti ga na koli so na Jésus?— Ala mä na bê so Jésus alingbi ti sala mbeni ye ti zi kobela so na tele ti lo. So azo asi singo na yâ ti da ni, mo hinga tongana nyen ala wara lege ti ga na koli so na tele ti Jésus?—

Bâ, foto so ge afa tongana nyen ala sala ni. Kozoni kue, ala yô koli ni azia lo na li ti da ni. Li ti da ni aba pëpe. Na pekoni, ala sala  mbeni kota dû na yâ ni. Na ala yôro koli ni na gbogbo ti lo kue na yâ ti dû ni, ala gue na lo ngbii asi na tele ti Jésus. So tâ mabe!

Na bango ye so asi, li ti azo kue so ayeke na yâ ti da ni akpe. Koli so asi tâ gi na popo ti ala. Tongana Jésus abâ ye so akoli ni asala so, ngonzo agbu lo?— Oko pëpe! Tele ti lo anzere ti bâ mabe ti ala. Lo tene na koli so amaboko na agere ti lo kue akui: ‘A pardone siokpari ti mo awe.’

Ambeni zo abâ ti ala so a yeke na lege ni pëpe ti tene Jésus atene mara ti tënë tongaso. Ti ala, lo lingbi ti pardone siokpari ti zo pëpe. Ni la, ti fa so lo lingbi biani ti pardone siokpari ti zo, Jésus atene na koli ni: ‘Londo, mû gbogbo ti mo, na gue na da ti mo.’

 Tongana Jésus atene tënë so awe, tele ti koli so aga nzoni! Amaboko na agere ti lo akui mbeni pëpe. Lo lingbi fadeso ti londo lo mveni na ti tambela. Li ti azo so abâ ye so akpe kue. Ade ala bâ mara ti pendere ye tongaso na yâ fini ti ala pëpe! Ala gonda Jéhovah ngbanga ti so lo mû na ala Kota Wafango ye so, so alingbi même ti zi kobela na tele ti azo.​—Marc 2:1-12.

E manda nyen na lege ti miracle so?— E manda so Jésus ayeke na ngangu ti pardone siokpari ti azo na ti sala si tele ti ala aga nzoni. Me e manda nga mbeni ye nde so ayeke kota mingi. E manda so azo ayeke tï kobela ndali ti siokpari.

So e kue e yeke tï kobela ngoi na ngoi, aye ti tene so e kue e yeke awasiokpari?— A yeke tongaso. Bible atene so e kue a dü e na yâ ti siokpari. Mo hinga ye so a ye ti tene ti dü zo na yâ ti siokpari?— A ye ti tene so na ngoi so a dü e, e yeke mbilimbili-kue pëpe. Ngoi na ngoi e yeke sala aye so anzere pëpe, même tongana e ye ni pëpe. Mo hinga tongana nyen si e kue e wara siokpari?—

A yeke ngbanga ti so kozo koli, Adam, ake yanga ti Nzapa. Lo sala siokpari tongana lo ke ndia ti Nzapa. Tongaso, e kue e wara siokpari na lege ti Adam. Mo hinga tongana nyen si e wara ni? Zia mbi tara ti fa nda ni na mo si mo mä yâ ni.

Mo na mbeni zo atara awe ti zö mapa wala gato? Tongana mbeni kutu ayeke na yâ kopo ti zongo na gato ni, nyen la ayeke si? Mo hinga ni?— A yeke bâ ande dû na yâ ti agato kue so mo yeke zö, ni la ape?—

 Adam ayeke tongana kopo ti zongo na gato so, na e yeke tongana agato ni. Na ngoi so lo ke ndia ti Nzapa, lo ga zo so ayeke mbilimbili-kue pëpe. A yeke tongana mo bâ mo tene lo wara mbeni sioni kutu na yâ tele ti lo. Tongaso, tongana lo dü amolenge, ala yeke duti ande tongana nyen?— Amolenge ti lo ni kue ayeke wara oko kutu so. Kutu so ayeke wokongo wala dutingo so ayeke mbilimbili-kue pëpe.

Mingi ti amolenge, a dü ala pëpe na ambeni kota wokongo so mo yeke bâ tâ na lê ti mo. Agere nga na amaboko ti ala kue ayeke dä. Me wokongo so ala yeke na ni ayeke tâ ngangu mingi si ala yeke tï kobela, nga na nda ni, ala kui.

Me ambeni zo ayeke tï kobela mingi ahon ambeni. Ngbanga ti nyen tongaso? A yeke ngbanga ti so a dü ala na gbâ ti siokpari?— Oko pëpe, siokpari so zo ayeke na ni na yâ tele ti lo ayeke oko na ti tanga ti azo kue. E kue a dü e mbilimbili-kue pëpe. Ni la, atâa nyen, zo kue ayeke wara kamême mbeni kobela. Même azo so ayeke sala kue ti bata ndia ti Nzapa na so asala biani sioni pëpe ayeke tï nga kobela.

Ka ngbanga ti nyen ambeni zo ayeke tï kobela mingi ahon ambeni?— Nda ni ayeke mingi. Peut-être ala yeke na kobe mingi ti te pëpe. Wala peut-être ala te tâ nzoni kobe pëpe. Peut-être ala su gbâ ti abonbon na ala te gbâ ti gato. Peut-être ala lango hio na bï pëpe. Wala peut-être ala yü bongo ti dê pëpe tongana ngu apika. Tele ti ambeni zo awoko mingi, na a lingbi ti tiri na akobela pëpe, même tongana ala tara ti bata tele ti ala nzoni.

 Mbeni ngoi ayeke si ande so e yeke tï kobela mbeni pëpe? A yeke zi ande siokpari na tele ti e?— Jésus asala lani nyen na koli so amaboko na agere ti lo kue akui so?— Jésus apardone siokpari ti lo na Lo sava lo. Na lege so, Jésus afa ye so lo yeke sala ande teti azo kue so ayeke sala ngangu ti sala ye so ayeke mbilimbili.

Tongana e fa so e ye ti sala siokpari pëpe na so e ke ye so ayeke sioni, Jésus ayeke sava ande e. Na yâ angoi so ayeke ga, lo yeke zi ande awokongo kue so ayeke na yâ tele ti e laso. Lo yeke sala ande ni tongana Gbia ti Royaume ti Nzapa. Gi na yâ lango oko si a yeke zi siokpari na yâ tele ti e kue pëpe. Me a yeke gi yeke yeke. Na pekoni, tongana siokpari ahon na yâ tele ti e kue awe, e yeke tï kobela mbeni pëpe. E kue tele ti e ayeke duti ande nzoni mingi. So tâ ye ti mungo ngia ande!