E TE iloa se tagata o maʻi?— Atonu e iai foʻi taimi e te maʻi ai. Atonu e te maua i le fulū pe tigā foʻi lou manava. E tigāina maʻi o isi tagata. E lē mafai ona latou tutū i luga seʻi vaganā ua fesoasoani i ai se isi tagata. E masani ona tupu le mea lenei, pe afai ua matua tele se tagata.

E iai taimi e maua ai i maʻi tagata uma lava. E te iloa le māfuaaga ua oo ai tagata i le maʻi, le tino matua, ma le oti?— I se tasi aso, na aumai ai iā Iesu se tamāloa e lē mafai ona savali, ma sa faaalia e Iesu le māfuaaga ua mamaʻi ma feoti ai tagata. Seʻi oʻu faamatala atu le mea na tupu.

O loo nofo Iesu i se fale i se aai e lata ane i le Sami o Kalilaia. Ua ō mai le toʻatele o tagata iā te ia. Ua matuā tumu le fale i tagata, ma ua lē toe ofi atu se isi tagata. E lē mafai foʻi ona faaofiofi atu se tagata i le faitotoʻa. E ui i lea, o loo gasolo mai pea tagata! Ua ō mai isi tamāloloa ma se tagata pipili e lē mafai ona savali. E toʻafā tamāloloa ua latou siiina le fata o loo taoto ai le tamāloa pipili.

E te iloa le māfuaaga na mananaʻo ai e aumai le tamāloa maʻi iā Iesu?— E talitonu tamāloloa nei, e mafai ona fesoasoani atu Iesu. Na latou faatuatua, e mafai e Iesu ona faamālōlōina lona maʻi. E te iloa le auala na latou ave atu ai le tamāloa iā Iesu e ui i le tumu o tagata i le fale?—

E mafai ona e vaai i le auala na latou ō atu ai iā Iesu, pe a e vaai i le ata. Muamua lava, na latou siiina le tamāloa i le taualuga o le fale. E mafolafola le taualuga o le fale. Na latou faia se pū telē i le taualuga.  Ona latou tuutuu ifo lea i lalo o le fata o taoto ai le tamāloa, ma faataatia i totonu o le potu. Maʻeu le tele o le faatuatua o nei tamāloloa!

Ua teteʻi uma tagata o loo i le fale, i le mea ua latou vaai i ai. Ua tuutuu ifo i lalo le tamāloa maʻi ma faataatia i le ogatotonu o le potu. Pe na ita Iesu i mea a tamāloloa nei na fai?— E mautinoa lava e leai! Na fiafia Iesu i le vaai atu i le faatuatua o nei tamāloloa. Na fetalai atu o ia i le tamāloa pipili: “Ua faamagaloina au agasala.”

Na manatu nisi tagata, e lē saʻo le fai atu faapena o Iesu. E latou te manatu e lē mafai e Iesu ona faamagaloina agasala. Ina ia faaalia e mafai moni lava ona ia faamagaloina agasala, na fetalai atu Iesu i le tamāloa: “Inā tulaʻi ia, inā ave lou moega, ma alu atu i lou fale.”

 Ina ua fai atu le tala a Iesu, na malosi ai loa le tamāloa! Ua lē toe pipili. Ua mafai loa ona tū i luga e aunoa ma le fesoasoani i ai o se tagata. Na ofo uma tagata na vaai i lenā vavega. Latou te leʻi vaai lava i se mea ofoofogia faapena! Na latou vivii atu iā Ieova mo le auina mai o lenei Faiaʻoga Sili, o lē e mafai ona faamālōlōina maʻi o tagata.​—Mareko 2:1-12.

O le ā le mea tatou te aʻoaʻoina mai i lenei vavega?— Ua tatou iloa ai, e iai le mana o Iesu e faamagalo ai agasala ma aveesea ai maʻi o tagata. Ae tatou te iloa ai foʻi ma se isi mea e tāua tele. Ua tatou iloa ai, ua māfua ona mamaʻi tagata ona o le agasala.

Talu ai la e iai taimi tatou te mamaʻi uma ai, po o le uiga o lenā mea, e tatou te agasala uma?— Ioe, ua fai mai le Tusi Paia na tatou fananau uma mai ma le agasala. E te iloa le uiga o lenā mea, o le fananau mai ma le agasala?— O lona uiga, ua tatou fananau mai o ni tagata e lē lelei atoatoa. I nisi o taimi, tatou te faia ai mea sesē e ui lava tatou te lē mananaʻo ai. E te iloa le māfuaaga ua tatou agasala uma ai?—

Ua tatou agasala uma ona e leʻi usitai le tagata muamua o Atamu, i le Atua. Na agasala Atamu auā na ia solia le tulafono a le Atua. Ua tuufaasolo mai la le agasala a Atamu iā i tatou. E te iloa le auala ua tatou maua ai le agasala mai iā Atamu? Seʻi oʻu faamatala atu i se auala e te malamalama ai.

 Atonu na e matamata a o tao e se tagata ni falaoa i totonu o se ʻapa. O le ā e tupu i falaoa pe a faapea e omo le ʻapa? E te iloa?— E iai le omo i falaoa uma e tao i totonu o le ʻapa lenā, a ea?—

E mafai ona faatusa Atamu i le ʻapa, ae faatusa i tatou i le falaoa. Na lē lelei atoatoa Atamu ina ua ia solia le tulafono a le Atua. E tai pei ua maua e Atamu se omo, po o se faailoga leaga. Ina ua maua fanau a Atamu, sa faapeʻī i latou?— Na maua e lana fanau uma le faailoga lenei, o le lē lelei atoatoa.

E tatou te lē iloa le tulaga lē lelei atoatoa o le toʻatele o tamaiti pe a fananau mai. E lē o mutu o latou lima ma o latou vae. Peitaʻi, e matuiā lo latou tulaga lē lelei atoatoa auā e latou te oo uma i le maʻi, ma faasolosolo ina feoti.

E pei ona tatou iloa, e tele taimi e mamaʻi ai isi tagata na i lo isi. Aiseā? Po o lona uiga ea, e tele atu a latou agasala ina ua fananau mai?— E leai, e tutusa uma tulaga agasala o tagata ina ua fananau mai. O i tatou uma lava na fananau mai i se tulaga lē lelei atoatoa. O lea la, tatou te maua uma lava i maʻi. E oo lava i tagata o loo taumafai e usitai i tulafono uma a le Atua ma latou te lē o faia ni mea leaga, e maua foʻi i maʻi.

Aiseā e tele ai ina mamaʻi isi tagata ae e tau lē mamaʻi isi?— E tele māfuaaga. Atonu e lē lava meaʻai e aai ai. Pe atonu foʻi e lē o lelei a latou meaʻai. Atonu e tele ina latou aai i mea suamalie e pei o lole ma keke. O se isi māfuaaga, e ono tuai ona momoe i pō ma lē lava ai le mālōlō. Pe e lē lelei foʻi ona fai o latou ofu i le taimi e mālūlū ai. Peitaʻi, o isi tagata e vaivai o latou tino ma lē mafai ai ona teena faamaʻi, e tusa lava pe taumafai e tausi lelei lo latou malosi.

 Faamata o le a iai se taimi tatou te lē toe mamaʻi ai? Pe e iai se taimi o le a tatou saʻoloto ai mai le agasala?— O le ā le mea na fai e Iesu i le tamāloa pipili?— Na faamagaloina e Iesu ana agasala ma faamālōlō lona maʻi. E ala i lenā vavega, na faaalia ai e Iesu le mea o le a ia faia mo i latou e taumafai e fai le mea saʻo.

Afai tatou te faaali atu e tatou te lē mananaʻo e faia le agasala ma tatou ʻinoʻino i le leaga, o le a faamālōlōina i tatou e Iesu. I le lumanaʻi, o le a aveesea ai e Iesu lo tatou tulaga lē lelei atoatoa lea o loo iai nei. E faataunuu e Iesu le mea lenei, auā o ia o le Tupu o le Malo o le Atua. E lē aveesea faafuaseʻi lo tatou tulaga agasala. O le a faasolosolo mālie ona mou atu lo tatou tulaga agasala. A faapea la ua aveesea atoatoa le agasala, tatou te lē toe mamaʻi. O le a lelei atoatoa uma o tatou tino. Maʻeu se taimi fiafia!