UKHONA yini umuntfu lomatiko logulako?— Nawe kungenteka kutsi uhle ugula. Kungenteka uphatfwe ngumkhuhlane nobe sisu sakho sibe buhlungu. Labanye bantfu bagula kakhulu. Bagula baze bangakhoni ngisho nekutimela, baze badzinge kusekelwa ngulotsite. Loko kuvame kwenteka ngesikhatsi bantfu sebaguge kakhulu.

Bonkhe bantfu bayagula ngaletinye tikhatsi. Uyati kutsi yini lebangela bantfu bagule, baguge futsi bafe?— Ngalelinye lilanga lenye indvodza lebeyingakhoni kutihambela yaletfwa kuJesu, futsi Jesu wachaza kutsi yini lebangela kutsi bantfu bagule futsi bafe. Ase ngikucocele lendzaba.

Jesu bekasendlini leseceleni kweLwandle LwaseGalile. Sicumbi sebantfu seta kutombona. Bantfu baba banyenti kakhulu kangangekutsi bese kute indzawo yekutsi kungangena labanye kulendlu. Kute lobekakhona kusondzela ngisho nasemnyango. Nanobe kunjalo, bantfu bebachubeka beta. Labanye baletsa indvodza lebeyife luhlangotsi lebeyingakhoni kutihambela. Bekungemadvodza lamane labekatfwele lombedze lomncane nobe luhlaka.

Uyati kutsi yini leyabenta baletsa lendvodza lebeyigula kuJesu?— Bebanekukholwa kutsi Jesu utayelapha. Bebakholwa kutsi Jesu angayelapha kulokugula kwayo. Njengobe bekugcwele bantfu kulendlu, lamadvodza akhona njani kumikisa lendvodza lebeyife luhlangotsi?—

 Lesitfombe losibonako siveta kutsi bakwenta njani loko. Kwekucala, batitimisa lendvodza bayiyisa etulu eluphahleni. Loluphahla belubekile. Ngemuva kwaloko bavula imbobo kulo. Ekugcineni, behlisa lendvodza leseluhlakeni ngalembobo leyehlela endlini. Asingabati kutsi lamadvodza bekanekukholwa.

Bonkhe bantfu lebebakulendlu bamangala nababona loko kwenteka. Lendvodza lebeyife luhlangotsi lebeyitfwelwe ngeluhlaka bese isembikwabo. Jesu watfukutsela yini nakabona lamadvodza enta loko?— Akazange atfukutsele. Wajabula kubona kutsi lamadvodza anekukholwa. Watsi kulendvodza lefe luhlangotsi: “Tono takho titsetselelwe.”

Labanye bantfu labebakhona bacabanga kutsi bekungakafaneli akusho loko lakusho.  Bebacabanga kutsi ute emandla ekutsetselela tono. Kuze abakhombise kutsi angakwenta loko, Jesu watsi kulendvodza: “Sukuma utsatse luhlaka lwakho uhambe uye ekhaya.”

Ngesikhatsi Jesu asho loko lendvodza yaphila. Bese kuphelile kufa luhlangotsi. Ngaleso sikhatsi bese ikhona kutisukumela iphindze ihambe. Bantfu lababona lesimangaliso bamangala. Bekukwekucala ngca ekuphileni kwabo kubona intfo lemangalisa kangaka. Badvumisa Jehova ngekubaniketa Umfundzisi Lomuhle Kakhulu labekakhona ngisho nekwelapha bantfu ekuguleni kwabo.​—Makho 2:1-12.

Yini lesiyifundza kulesimangaliso?— Sifundza kutsi Jesu unemandla ekutsetselela tono kanye newekwelapha bantfu labagulako. Siphindze sifundze lokunye lokubalulekile. Sifundza kutsi bantfu bagula ngobe banesono.

Njengobe sihle sigula ngalesinye sikhatsi, loko kusho kutsi sinesono yini?— Kunjalo, liBhayibheli litsi sonkhe sitalwa sinesono. Uyati yini kutsi kusho kutsini kutalwa sinesono?— Kusho kutsi nasesitelwe nakanjani sitawenta emaphutsa. Ngalesinye sikhatsi senta emaphutsa singakacondzi. Uyati kutsi kwentiwa yini kutsi sonkhe sibe nesono?—

Sitalwa sinesono ngobe umuntfu wekucala, Adamu akamlalelanga Nkulunkulu. Wona ngesikhatsi angalaleli umtsetfo waNkulunkulu. Sonkhe satfola sono ku-Adamu. Uyati yini kutsi sasitfola njani sono kuye? Ase ngetame kukuchazela ngendlela lotayicondza.

 Mhlawumbe wake wabona umuntfu abhaka sinkhwa epanini. Kutakwentekani kulesinkhwa nangabe lelipani linesifaca? Uyati yini?— Lesifaca sitawuvela kuto tonkhe tinkhwa letitawubhakwa kusetjentiswa lelipani, angitsi kunjalo?—

Adamu ufanana nalelopani futsi tsine sifanana nalesinkhwa. Waba nesono ngesikhatsi angalaleli umtsetfo waNkulunkulu. Kwafanana nekutsi sewutfole sifaca nobe luphawu lolubi. Ngesikhatsi atala bantfwana, bebatawuba njani?— Bonkhe bantfwabakhe bebatawutfola loluphawu lwekuba nesono.

Bantfwana labanyenti nabatalwa akubonakali kutsi banesono. Abatalwa banesandla nobe umlente munye. Sono labanaso sikhulu kangangekutsi bagcine bagula futsi bafile.

Njengobe sati, labanye bantfu bagula kakhulu kunalabanye bantfu. Kubangelwa yini loko? Kubangelwa kutsi batalwa banetono letinyenti yini?— Akusinjalo, ngobe wonkhe umuntfu utalwa anesono lesilingana nesalomunye. Sonkhe sitalwa sinemaphutsa. Ngekuhamba kwesikhatsi wonkhe umuntfu uba nekugula lokutsite. Ngisho nebantfu labetama kuyilalela yonkhe imitsetfo yaNkulunkulu futsi bangenti lutfo lolubi, bayagula.

Kungani labanye bantfu bagula kakhulu kunalabanye?— Tinyenti tizatfu taloko. Kungenteka bete kudla lokwenele. Nobe kungenteka abadli kudla lokufanele. Kungenteka badla emakhekhe lamanyenti nemaswidi. Lesinye sizatfu kungaba kutsi bayaphuta kulala, lokwenta bangabi naso sikhatsi lesenele sekuphumula. Kungenteka abagcoki tintfo letifutfumele ngalokwenele nakumakhata. Imitimba yalabanye bantfu ibutsakatsaka futsi bayehluleka kulwisana nekugula  ngisho nobe benta imetamo yekutinakekela.

Kutakwenteka yini kufike sikhatsi lapho singasaguli khona? Kutakwenteka yini kutsi singabi naso sono?— Yini leyentiwa nguJesu kulendvodza lebeyife luhlangotsi?— Jesu wayitsetselela tono tayo waphindze wayelapha. Ngaleyo ndlela, Jesu wakhombisa loko latakwenta ngalelinye lilanga kubo bonkhe bantfu labenta konkhe lokusemandleni abo kuze bente lokulungile.

Nasikhombisa kutsi site inhloso yekwenta sono futsi siyakwenyanya lokubi, Jesu utasiphilisa. Esikhatsini lesitako Jesu utasisusa sono lesinaso. Njengobe ayiNkhosi yeMbuso waNkulunkulu, loko utakwenta. Sono angeke sisuswe kitsi ngesikhatsi lesifishane. Kutawutsatsa sikhatsi lesidze kusisusa. Nasesite sono, angeke siphindze sigule. Sitawujabulela imphilo lete kugula. Leso kutawuba sibusiso lesikhulu.