‘OKÚ KE ‘ilo ha taha ‘oku puke?— ‘Okú ke hoko nai ‘o puke ‘i ha taimi. ‘Okú ke fofonu, pe ‘oku langa nai ho keté. ‘Oku puke lahi ‘a e kakai ‘e ni‘ihi. ‘Oku a‘u ‘o ‘ikai lava ke nau tu‘u ki ‘olunga ‘o ta‘e‘iai ha taha ke ne tokoni‘i kinautolu. ‘Oku fa‘a hoko ‘a e me‘á ni ‘i he taimi ‘oku vaivai ‘aupito ai ‘a e kakaí.

‘Oku hoko ‘o puke ‘a e tokotaha kotoa pē ‘i ha ngaahi taimi. ‘Okú ke ‘ilo ‘a e ‘uhinga ‘oku hoko ai ‘o puke, tupu ‘o vaivai pea mate ‘a e kakaí?— ‘I he ‘aho ‘e taha, na‘e ‘omai ai kia Sīsū ha tangata na‘e ‘ikai lava ke ‘alu, pea na‘e fakahā ‘e Sīsū ‘a e ‘uhinga ‘oku hoko ai ‘o puke pea mate ‘a e kakaí. Tuku ke u talanoa atu ia.

Na‘e nofo ‘a Sīsū ‘i ha fale ‘i ha kolo na‘e ofi ki he Tahi Kālelí. Na‘e ha‘u ha fu‘u kakai ke sio kiate ia. Na‘e fu‘u tokolahi ‘aupito ‘a e kakai na‘e ha‘ú ‘o ‘ikai ai ‘atā ki he ni‘ihi kehé ke nau hū mai ki he falé. Na‘e a‘u ‘o ‘ikai lava ke ofi atu ha taha ki he matapaá. Ka neongo ia, na‘e kei ha‘u pē ‘a e kakaí ia! Ko e kulupu ‘e taha na‘a nau ‘omai ha tangata na‘e mamatea ‘a ia na‘e a‘u ‘o ‘ikai lava ke ne ‘alu. Na‘e fe‘unga mo e kau tangata ‘e toko fā ke nau hiki ia ‘i ha ki‘i mohenga, pe ko ha me‘a-fata.

‘Okú ke ‘ilo ‘a e ‘uhinga na‘a nau fiema‘u ai ke ‘omai ‘a e tangata puke ko ení kia Sīsuú?— Na‘a nau tui ‘e malava ‘e Sīsū ke ne tokoni‘i ia, ‘e malava ke ne fakamo‘ui ia mei he mahaki ko iá. ‘Okú ke ‘ilo ‘a e founga na‘a nau ‘ave ai ‘a e tangata mamatea ko iá kia Sīsū neongo ‘a e fu‘u tokolahi ‘a e kakai ‘i he falé?—

Sai, ko e fakatātā ‘okú ke sio ki ai ‘i hení ‘oku fakahaa‘i ai ‘a e founga na‘a nau fai ai iá. ‘Uluakí, na‘a nau hiki hake ‘a e tangatá ki ‘olunga ki he ‘ató. Ko ha ‘ato lafalafa ia. Na‘a nau ‘ai leva ha fo‘i ava lahi ai. Faka‘osí, na‘a nau tuku hifo ‘a e tangata mahakí ‘i hono me‘a-fatá ‘o ‘alu hifo tonu  ‘i he fo‘i ava ko iá pea ki he loki ‘i laló. Ko ha tui mālohi mo‘oni na‘a nau ma‘ú!

Ko e kakai kotoa ‘i he falé na‘a nau ‘ohovale ‘i he‘enau sio ki he me‘a na‘e hokó. Ko e tangata mamatea ‘i he me‘a-fatá na‘e ‘alu hifo tonu ‘i honau lotolotongá. Na‘e ‘ita ‘a Sīsū ‘i he‘ene sio ki he me‘a na‘e fai ‘e he kau tangatá?— ‘Ikai ‘aupito! Na‘á ne fiefia ke sio na‘a nau ma‘u ha tui. Na‘á ne pehē ki he tangata mamateá: “Kuo fakamolemole ho‘o ngāhi angahala.”—Faka‘ītali ‘amautolu.

Na‘e fakakaukau ‘a e kakai ‘e ni‘ihi na‘e ‘ikai totonu kia Sīsū ke ne lea‘aki ia. Na‘e ‘ikai te nau fakakaukau ‘e malava ke ne fakamolemole ‘a e ngaahi angahalá. Ko ia, ke fakahaa‘i na‘á ne malava mo‘oní, na‘e pehē ‘e Sīsū ki he tangatá: “Tu‘u, to‘o ho mohenga, pea mole ki ho ‘api.”

 ‘I he taimi na‘e lea‘aki ai ‘e Sīsū ‘a e me‘a ko iá, na‘e mo‘ui ‘a e tangatá! Na‘e ‘ikai te ne toe mamatea. Na‘e malava leva he taimí ni ke ne tu‘u ‘iate ia pē ‘o ‘alu. Ko e kakai na‘a nau sio ki he mana ko ení na‘a nau ‘ohovale. Na‘e ‘ikai ‘aupito te nau mamata ‘i ha me‘a faka‘ohovale pehē ‘i he kotoa ‘o ‘enau mo‘uí! Na‘a nau fakahīkihiki‘i ‘a Sihova ‘i hono ‘omai kia kinautolu ‘a e Faiako Lahi ko eni, ‘a ia ‘oku a‘u ‘o malava ke ne fakamo‘ui ‘a e ngaahi mahaki ‘o e kakaí.—Maake 2:1-12.

Ko e hā ‘a e me‘a ‘okú ta ako mei he mana ko ení?— ‘Okú ta ako ai ‘oku ma‘u ‘e Sīsū ‘a e mafai ke fakamolemole ‘a e ngaahi angahalá pea ke fakamo‘ui ‘a e kakai puké. Ka ‘okú ta toe ako ai ha me‘a ‘e taha, ko ha me‘a mahu‘inga ‘aupito ia. ‘Okú ta ako ai ‘oku hoko ‘o puke ‘a e kakaí koe‘uhi ko e angahalá.

Koe‘uhi ‘oku tau hoko kotoa pē ‘o puke ‘i ha taimi, ‘oku ‘uhinga ení ko e kau angahala kotoa kitautolu?— ‘Io, ‘oku pehē ‘e he Tohitapú ‘oku fanau‘i kotoa mai kitautolu mo e angahala. ‘Okú ke ‘ilo ‘a e ‘uhinga ‘o e fanau‘i mo e angahalá?— ‘Oku ‘uhingá ‘oku fanau‘i mai kitaua ‘okú ta ta‘ehaohaoa. ‘Okú ta fai ‘i he taimi ‘e ni‘ihi ‘a e ngaahi me‘a ‘oku hala, neongo ‘oku ‘ikai te ta loto ki ai. ‘Okú ke ‘ilo ‘a e founga na‘a tau hoko kotoa ai ‘o ma‘u ‘a e angahalá?—

Na‘a tau hoko ki he tu‘unga ko ení koe‘uhi ko e ‘uluaki tangata ko ‘Ātamá, na‘e ‘ikai te ne talangofua ki he ‘Otuá. Na‘á ne faiangahala ‘i he taimi na‘á ne maumau‘i ai ‘a e lao ‘a e ‘Otuá. Pea ‘oku tau ma‘u kotoa ‘a e angahalá meia ‘Ātama. ‘Okú ke ‘ilo ‘a e founga na‘á ta ma‘u ai ‘a e angahalá meiate iá? Te u feinga ke fakamatala‘i ia ‘i ha founga ‘e lava ke ke mahino‘i aí.

Mahalo pē kuó ke sio ‘i ha taha ‘okú ne ta‘o ha fo‘i mā ‘i ha kapa. Ko e  hā ‘e hoko ki he fo‘i maá kapau ‘oku makoko ‘a e kapá? ‘Okú ke ‘ilo?— Ko e fo‘i faka‘ilonga tatau pē ko iá, pe makokó, ‘e hā ia ‘i he fo‘i mā kotoa pē na‘á ne ta‘o ‘i he kapa ko iá, ‘ikai ko ia?—

Ko ‘Ātamá na‘e hangē ko e kapa ko iá, pea ko kitaua ‘okú ta hangē ko e fo‘i maá. Na‘á ne hoko ‘o ta‘ehaohaoa ‘i he‘ene maumau‘i ‘a e lao ‘a e ‘Otuá. Na‘e hangē ia na‘á ne ma‘u ha faka‘ilonga koví pe makokó. Ko ia, ‘i he taimi na‘á ne ma‘u fānau aí, te nau hoko ‘o fēfē?— Ko ‘ene fānaú kotoa te nau ma‘u ‘a e faka‘ilonga tatau pē ko eni ko e ta‘ehaohaoá.

Ko e tokolahi taha ‘o e fānaú ‘oku ‘ikai ke fanau‘i mai kinautolu fakataha mo ha fu‘u mele ‘oku malava ke ke sio ki ai. ‘Oku ‘ikai te nau hala ha nima pe ko ha va‘e. Ka ko e ta‘ehaohaoa ‘oku nau ma‘ú ‘oku mamafa fe‘unga ia ki he‘enau hoko ‘o puke pea ‘i he ‘alu ‘a e taimí ‘o nau mate.

‘Oku mo‘oni, ko e kakai ‘e ni‘ihi ‘oku fa‘a hoko ‘o lahi ange ‘enau puké ‘i ha ni‘ihi. Ko e hā ‘oku hoko ai iá? ‘Oku peheé koe‘uhi ‘oku fanau‘i mai kinautolu mo ha angahala lahi ange?— ‘Ikai, ko e tokotaha kotoa ‘oku fanau‘i mai mo e angahala tatau pē. ‘Oku fanau‘i kotoa mai kitautolu ‘oku tau ta‘ehaohaoa. Ko ia, ‘e faifai atu pē, ko e tokotaha kotoa pē ‘e puke ‘i ha fa‘ahinga mahaki. Na‘a mo e kakai ‘oku feinga ke talangofua ki he ngaahi lao kotoa ‘a e ‘Otuá pea ‘oku ‘ikai te nau fai ha me‘a ‘oku kovi lahí ‘oku malava ke nau puke.

Ka ko e hā ‘oku fa‘a lahi ange ai ‘a e puke ‘a e kakai ‘e ni‘ihi ‘i he ni‘ihi kehé?— ‘Oku lahi ‘a e ngaahi ‘uhingá. Mahalo pē ‘oku ‘ikai ke ‘i ai ha me‘akai fe‘unga ke nau kai. Pe ‘oku ‘ikai nai te nau kai ‘a e fa‘ahinga me‘akai totonú. ‘Oku fu‘u lahi nai ‘enau kai ‘a e keké mo e lolé. Ko e toe ‘uhinga ‘e taha, mahalo pē ko ‘enau ‘ā ‘o fu‘u fuoloa ‘i he po‘ulí pea ‘ikai ke ma‘u ha mohe fe‘ungá. Pe ‘oku ‘ikai nai te nau tui ha vala māfana fe‘unga ‘i he taimi ‘oku ‘uha aí. Ko e kakai ‘e ni‘ihi ‘oku fu‘u vaivai ‘aupito  honau sinó, pea ‘oku ‘ikai lava ke nau tau‘i ‘a e mahakí, neongo kapau ‘oku nau feinga ke tokanga‘i kinautolu.

‘E ‘i ai nai ha taimi ‘e ‘ikai ai ke ta toe puke? ‘E ‘i ai ha taimi ‘e mole ai ‘a e angahalá meiate kitaua?— Sai, ko e hā na‘e fai ‘e Sīsū ki he tangata mamateá?— Na‘e fakamolemole‘i ‘e Sīsū ‘a ‘ene ngaahi angahalá pea fakamo‘ui ia. ‘I he me‘a ko iá, na‘e fakahā ai ‘e Sīsū ‘a e me‘a te ne fai ‘i ha ‘aho ma‘á e fa‘ahinga kotoa ‘oku nau feinga mālohi ke fai ‘a e me‘a ‘oku totonú.

Kapau ‘okú ta fakahaa‘i ‘oku ‘ikai te ta loto ke ta faiangahala pea ‘okú ta fehi‘a ‘i he me‘a ‘oku halá, ‘e fakamo‘ui kitaua ‘e Sīsū. ‘I he kaha‘ú, te ne to‘o meia kitaua ‘a e ta‘ehaohaoa ‘okú ta lolotonga ma‘ú. Te ne fai eni ‘i he tu‘unga ko e Tu‘i ‘o e Pule‘anga ‘o e ‘Otuá. ‘E ‘ikai ke to‘o kotoa meia kitautolu ‘a e angahalá ‘i ha fo‘i taimi pē ‘e taha. ‘E to‘o atu ia ‘i ha vaha‘a taimi. Pea ‘i he taimi ‘e mole ‘aupito ai ‘etau angahalá, ‘e ‘ikai ‘aupito ke tau toe puke. Te tau ma‘u kotoa pē ‘a e mo‘ui haohaoa. Ko ha tāpuaki ē ko ia!