Cibalo 23

Icipa Kuti Bantu Kabaciswa

SENA kuli muntu uuciswa ngozyi?— Ziindi zimwi, ayebo ulaciswa. Ulakonzya kuciswa syini naa mwida. Bantu bamwi mbalwazi kapati. Tabakonzyi nokuba kwiimikila balikke kakunyina muntu wakubagwasya. Eeci cilacitika kanjikanji eelyo bantu nobacembaala kapati.

Ciindi aciindi muntu woonse ulaciswa. Sena ulicizyi cipa kuti bantu kabaciswa akucembaala alimwi akufwa?— Bumwi buzuba imwaalumi umwi iwatakali kukonzya kulyeendela wakaletwa kuli Jesu, alimwi Jesu wakatondezya cipa kuti bantu kabaciswa akufwa. Andikwaambile cakacitika.

Jesu wakali kukkala muŋanda imwi yakali mumunzi uuli afwaafwi a Lwizi lwa Galilaya. Mpoona kwakasika nkamu yabantu kuti bazyoomubone. Aboobo kwakayoboloka bantu banji kapati cakuti kwakacinyina busena bwakuti bambi bacikonzye kwiinda akunjila muŋanda. Alimwi mane kunyina wakali kunga wacikonzya kusika munsi aamulyango. Nokuba boobo, ibantu banji bakazumanana kuboola! Ikakamu kabantu kamwi kakaleta mwaalumi wakayuminide mubili naa wakalebukidwe katacikonzyi nokuba kulyeendelela. Wakatembedwe buya aakalo naa amacila abaalumi bone.

Sena ulicizyi ncobakamuletela kuli Jesu mwaalumi ooyo mulwazi?— Bakali kusyoma kuti Jesu wakali kukonzya kumuponya kubulwazi bwakwe. Sena ulizyi mbobakamusisya mwaalumi ooyo wakalebukidwe kuli Jesu mbwaanga kwakali bantu banji kapati muŋanda?—

Icifwanikiso ncobona aawa citondezya mbobakacita. Kusaanguna, bakatansyika mwaalumi ooyo aciluli caŋanda. Iciluli eeco cakali selebete.  Mpoonya bakavwumbula ciluli akupanga mweenya mupati. Kumane bakalengelezya kalo mpaakalede mumweenya ooyo akumusisya muŋanda. Mmasimpe bakalijisi lusyomo lwini-lwini!

Ibantu boonse bakali muŋanda bakagambwa nobakabona cakali kucitika. Imwaalumi wakayuminide mubili wakazyi kwiile kuba akati kabo. Sena Jesu wakanyema naakabona ceeco cakacita baalumi aabo?— Peepe! Wakakkomana kuti bakalijisi lusyomo. Wakaambila mwaalumi wakayuminide kuti: “Walekelelwa zibi zyako.”

Ibantu bamwi tiibakacibona kuti cakaleelede kuti Jesu aambe boobo. Tiibakali kumuyeeyela kuti wakali kukonzya kulekelela zibi. Aboobo, ikutegwa atondezye kuti wakalijisi nguzu  zyakucita boobo, Jesu wakaambila mwaalumi ooyo kuti: “Buka, bweza bulo bwako, uye kuŋanda yako.”

Jesu naakaamba majwi aayo, imwaalumi ooyo wakaponesyegwa! Tanaakacilebukidwe pe. Lino wakacikonzya kuliimikilila akulyeendelela mwini. Ibantu bakabona maleele aaya bakalamwa. Kunyina ikuzwa nibakazyalwa nibakaningalibonena cintu cigambya mbuli ceeco! Bakalumbaizya Jehova akaambo kakuti wakabapa Mwiiyi Mupati ooyu, iwakali kukonzya nokuba kuponya bantu kumalwazi aabo.—Marko 2:1-12.

Ino ncinzi ncotwiiya kumaleele aaya?— Twiiya kuti Jesu ulijisi nguzu zyakulekelela zibi alimwi akuponya bantu baciswa. Pele kuli acimbi ciyandika kapati ncotwiiya. Twiiya kuti bantu balaciswa akaambo kacibi.

Mbwaanga toonse tulaciswa zimwi ziindi, sena eeci caamba kuti toonse tuli basizibi?— Inzya, nkaambo Ibbaibbele lyaamba kuti toonse twakazyalwa acibi. Sena ulicizyi ncocaamba kuti toonse twakazyalwa acibi?— Caamba kuti twakazyalwa katutalondokede. Tucita zintu zitaluzi zimwi ziindi neliba leelyo notutayandi kuzicita. Sena ulizyi toonse mbotwakaba basizibi?—

Twakazyalwa acibi akaambo kakuti mwaalumi wakusaanguna, Adamu tanaakamuswiilila Leza. Wakabisya eelyo naakatyola mulawo wa Leza. Alimwi toonse twakakona cibi kuli Adamu. Sena ulizyi mbotwakacikona cibi kuzwa kulinguwe? Andikupandulwide munzila njondisyoma kuti inga waiteelela.

Ambweni wakabona kale muntu umwi kapanga cinkwa mumpani.  Ino ncinzi cinga cacitika ikuti kakuli keengo naa ikuti mpani kiidiimene amwi? Sena ulicizyi ciyoocitika?— Ikeengo aako naa aalya mpoidiimene ayoolibonya acinkwa coonse ncopanga mumpani eeyo, tee kayi?—

Adamu wakali mbuli mpani eeyo alimwi swebo tuli mbuli cinkwa. Wakaba sizibi naakatyola mulawo wa Leza. Cakali mbuli kuti wakabaa lubata, keengo naa kudiimana kwakutaba muntu uulondokede. Aboobo eelyo naakazyala bana, ino bakali kuyooba buti?— Bana bakwe boonse bakali kuyoolutambula lubata oolo lwakutaba bantu balondokede.

Ibunji bwabana tabalibonyi kuti tabalondokede ciindi nibazyalwa. Teensyi kuti inga mane tabajisi kwaanza buya naa kuulu. Pele tabalondokede ncobeni cakuti cibapa kuciswa alimwi mukuya kwaciindi mane balafwa.

Tulizyi kuti bantu bamwi balaciswa-ciswa kwiinda bamwi. Ino nkaambo nzi? Sena nkaambo kakuti bakazyalwa kababisyide kapati?— Peepe, muntu woonse ulazyalwa acibi ceelene acijisi bamwi. Toonse tulazyalwa katutalondokede. Aboobo mukuya kwaciindi, aumwi ulaciswa bulwazi bumwi. Nobaba bantu ibasolekesya kutobela milawo ya Leza alimwi ibataciti zintu zibyaabi balakonzya kuciswa.

Aboobo, ino nkaambo nzi bantu bamwi ncobaciswa-ciswa kwiinda bambi?— Kuli twaambo tunji. Balakonzya kabatajisi cakulya cikkwene. Naa ambweni balakonzya kabatalyi cakulya ceelede. Balakonzya kabalya buyo makkekke amaswiiti manji. Alimwi bamwi balakonzya kabaizya kapati masiku cakuti tabajisi ciindi cinji cakoona. Naa ambweni tabasami zisani zikasaala ciindi nokutontola naa kusama makkoti ciindi nokuwa mvwula kabatanazwa anze. Ibantu bamwi tabali bayumu kapati cakuti mibili yabo tiikonzyi kulwana tuzunda tuletela  malwazi neliba leelyo nobasola kulikwabilila.

Sena kuli ciindi eelyo notutakaciswi limbi? Sena kuli ciindi notutanoocijisi cibi?— Ino ncinzi Jesu ncaakacita kumwaalumi wakalebukide mubili?— Jesu wakamulekelela zibi zyakwe akumuponya. Munzila eeyo, Jesu wakatondezya eeco ncayoocitila baabo boonse basolekesya kucita ziluleme bumwi buzuba.

Ikuti twatondezya kuti tatuyandi kucita cibi akuti tulazisulaika zintu zitaluzi, Jesu uyootuponya. Kumbele, uyookugusya kutalondoka koonse nkotujisi lino. Uyoocicita eeci kali Mwami wa Bwami bwa Leza. Icibi tacikagusyigwi mulindiswe campoonya-mpoonya. Cinooyoogusyigwa mukwiinda kwaciindi cili mbocibede. Mpoonya eelyo cibi cesu caakuzwa coonse, kunyina alimwi notuyoociswa pe. Toonse tunoolondokede. Elo eeco cinookkomanisya kapati kaka!

Ikutegwa ujane twaambo tumbi kujatikizya mbocimujatikizya cibi muntu woonse, bala Jobu 14:4; Intembauzyo 51:5; Ba-Roma 3:23; 5:12; alimwi a 6:23.

[Cifwanikiso icili apeeji 123]

Ino ncinzi Jesu ncaakaambila mwaalumi wakalebukide mubili kuti acite?

[Cifwanikiso icili apeeji 124]

Ino ncinzi ncotwiiya kumaleele aaya?

[Cifwanikiso icili apeeji 125]

Ino mbuti toonse mbotwakaba basizibi?

[Cifwanikiso icili apeeji 126]

Ino tunoopona buumi buli buti eelyo cibi coonse caakumanizyigwa?