KASI ukumanya muntu uyo ni murwari?— Nyengo zinyake nawe ukurwara. Ungarwara cikhoso panji mu nthumbo. Ŵantu ŵanyake mbarwari comene. Ŵangamilira yayi kwambura kuti yunji waŵawovwira kuti ŵimilire. Kanandi ici cikucitika ku ŵantu awo mbacekuru comene.

Waliyose wakurwara nyengo zinyake. Kasi ukumanya cifukwa ico ŵantu ŵakurwalira, kucekulira na kufwa?— Zuŵa linyake muntu uyo wakatondekanga kwenda ŵakiza naye kwa Yesu, ndipo pa nyengo iyi Yesu wakarongora cifukwa ico ŵantu ŵakurwalira na kufwa. Tegherezga nkani iyo nikuphalirenge.

Kwa nyengo yicoko waka Yesu wakakhalanga mu nyumba iyo yikaŵa pafupi na Nyanja ya Galileya. Mzinda wa ŵantu ukiza kuzakamuwona. Ŵantu ŵanandi ŵakiza, anteura malo ghakuti ŵantu ŵanjilire mu nyumba umo wakaŵa ghakasoŵa. Pakaŵavyirathu malo ghakuti muntu wangamilira pafupi na muryango. Ndipouli, ŵantu ŵakizanga ndipera! Ŵantu ŵanyake ŵakiza na muntu uyo wakarwaranga vinjenje. Muntu uyu wakatondekanga kwenda. Pakakhumbikwiranga ŵanarumi ŵanayi kuti ŵamunyamure pa luskaka panji kuti cakunyamulirapo ŵarwari.

Kasi ukucimanya cifukwa ico ŵantu aŵa ŵikizira na muntu uyu kwa Yesu?— Iwo ŵakagomezga kuti Yesu wamovwirenge murwari ku matenda agho wakaŵa nagho. Kasi ukumanya umo ŵanarumi ŵakizira na murwari pafupi na Yesu mu nyumba iyo iye wakaŵa nangauli mukaŵa ŵantu ŵanandi comene?—

Cithuzithuzi ici ukuciwona apa cikurongora umo iwo ŵakacitira. Cakwamba, ŵakanyamura murwari mupaka pacanya pa nyumba. Pacanya pa nyumba iyi pakaŵa pa fulati. Pamanyuma pake ŵakabowora cibowozi cikuru  pacanya pa nyumba na kunjizga murwari uyo wakagona pa luskaka. Nawo mbukuru wa cipulikano ico ŵakaŵa naco!

Ŵantu wose awo ŵakaŵa mu nyumba ŵakazizwa na ivyo vikacitikanga. Muntu wavinjenje uyo wakagona pa luskaka ŵakamunjizgira pacanya pa nyumba na kufika apo ŵakimilira iwo. Kasi Yesu wakakwiya peneapo wakawona ivyo ŵanarumi ŵara ŵakacitanga?— Napacoko-pose! Yesu wakakondwa comene kuwona kuti iwo ŵakaŵa na cipulikano mwa iye. Wakayowoya kwa muntu wavinjenje kuti: “Zakwananga zako zagowokereka.”

Ŵantu ŵanyake ŵakakondwa yayi na ivyo Yesu wakayowoya. Iwo ŵakaghanaghana kuti Yesu wangagowokera muntu yayi zakwananga. Anteura kuti warongore kuti wakugowokera ŵantu zakwananga zawo, Yesu wakaphalira murwari yura kuti: ‘Wuka, nyamula luskaka lwako, ndipo urutenge ku nyumba yako.’

 Apo Yesu wakati malizge waka kuyowoya, mbwenu muntu yura wakacira! Vinjenje vikamara. Wakawuka kwambura muntu munyake kumovwira kuti wamilire. Ŵantu awo ŵakawona cakucitika ici ŵakazizwa. Iwo ŵakaŵa ŵandawonepo cintu cakukondweska canteura ici mu umoyo wawo! Ŵakawonga Yehova cifukwa ca kuŵatumizgira Msambizgi Waluso, uyo wakacizganga ŵantu matenda ghawo.—Marko 2:1-12.

Kasi tikusambirapo vici pa cakucitika ici?— Tikusambirapo kuti Yesu wakaŵa na nkongono za kugowokera ŵantu zakwananga na kucizga ŵantu ŵarwari. Kweniso pali cintu cinyake ico tikusambirapo, cintu ici ncakuzirwa comene. Tikusambirapo kuti ŵantu ŵakurwara cifukwa ca zakwananga.

Pakuti nyengo zinyake tose tikurwara, kasi ici cikung’anamura kuti tose ndise ŵakwananga?— Enya, Baibolo likuyowoya kuti ise tose tiri kubabika na zakwananga. Kasi kubabika na zakwananga ukukumanya?— Kukung’anamura kuti tiri kubabika kwambura urunji. Nyengo zinyake tikucita vintu viheni, nangauli tikukhumba yayi kucita nteura. Kasi ukumanya umo tose tiri kubabikira na zakwananga?—

Tikababika na zakwananga cifukwa cakuti muntu wakwamba, Adamu, wakareka kupulikira Ciuta. Wakabuda apo wakaswa dango la Ciuta. Ndipo tose tiri kupokera zakwananga kufuma kwa Adamu. Kasi ukumanya umo tikapokelera zakwananga kufuma kwa iye? Reka nikurongosolere mu ntowa yakuti ungapulikiska makora.

Panji uli kuwonapo muntu wakuphika buledi mu cakuphikira cake panji cikondamoyo mu sefuliya. Kasi cingacitika ncivici usange cakuphikiramo buledi panji sefuliya njakuthifuka panji kuti njakunjira mukati?  Kasi ukumanya?— Apo pathifuka padindikengeso pa buledi panji cikondamoyo, asi ntena?—

Adamu wakuyana waka na cakuphikiramo buledi panji sefuliya, ndipo ise tikuyana waka na buledi panji cikondamoyo. Adamu wakaŵa wakwananga pamanyuma pa kuswa dango la Ciuta. Cikaŵa nga kuti wathifuka, panji kuti waŵa na cidindo. Anteura apo wakababa ŵana, kasi ŵakeneranga kuwoneka wuli?— Ŵana ŵake wose ŵakeneranga kupokera cidindo ca zakwananga.

Pali ŵana ŵanandi awo ŵali kubabika ŵambura kupendera. Iwo ŵali na marundi ghose na mawoko ghose. Kweni cifukwa cakuti ŵali kubabika na zakwananga, ŵakurwara ndipo mukuruta kwa nyengo ŵakufwa.

Nga ni umo tikumanyira, pali ŵantu ŵanyake awo ŵakurwara pafupi-pafupi kuruska ŵanji. Cifukwa wuli? Kasi tingayowoya kuti iwo ŵali kubabika na zakwananga zinandi?— Yayi, tose tirikubabika na zakwananga zakuyana. Tose ndise ŵambura urunji. Anteura tingarwara sono ntena panji nyengo yinyake; muntu waliyose wakurwara. Nanga ŵangaŵa ŵantu awo ŵakuyezgayezga kurondezga marango ghose gha Ciuta, na awo ŵakukana kucita uheni, nawo ŵangarwaraso.

Kweni ncifukwa wuli pera ŵantu ŵanyake ŵakurwara pafupi-pafupi kuruska ŵanji?— Pali vifukwa vinandi. Panji iwo ŵalije vyakurya vinandi vyakuti ŵaryenge. Panji iwo ŵakurya vyakurya vyakwenelera yayi. Panji ŵakurya vyakurya ivyo vikukuzga makora yayi mathupi ghawo. Cifukwa cinyake cingaŵa cakuti ŵakutemwa kugona mwakucedwa usiku, anteura ŵakugona maora ghacoko waka. Panji ŵakuvwara vyakuvwara vyakwenelera yayi para ŵakwenda usange vura yikurokwa. Mathupi gha ŵantu ŵanyake ngambura nkongono, anteura ghakutondeka kulimbana na matenda nangauli ŵangayezga kujipwererera.

 Kasi yilipo nyengo yakuti tizamurwaraso yayi? Kasi yizamuŵapo nyengo yakuti tizamufwatuka ku zakwananga?— Nga ni umo tawonera, kasi Yesu wakamucitira vici mwanarumi wavinjenje yura?— Yesu wakamugowokera zakwananga zake ndipo paumaliro pake wakamucizga. Mwakuyana na cakucitika ici, Yesu wakarongora ico zuŵa linyake wazamucitira ŵantu kuntazi awo ŵakuyezgayezga comene kucita vintu viweme.

Usange tikurongora kuti tikukhumba yayi kucita zakwananga, ndiposo tikutinka kucita vintu viheni, mbwenu Yesu wazamuticizga. Mu nyengo yakuntazi, iye wazamufumyamo zakwananga izo tiri nazo mu thupi lithu. Wazamucita nteura cifukwa ni Themba la Ufumu wa Ciuta. Kweni umanye kuti zakwananga izi zizamufumamo zose nyengo yimoza yayi. Zizamufumamo pacoko-pacoko. Paumaliro pakuti zakwananga zamara, tizamurwaraso yayi. Tizamuŵa na umoyo uweme. Ici cizamuŵa cakukondweska comene!