EILOA ne koe se tino telā e masaki?— Kāti e masaki sāle foki koe i nisi taimi. E mafai o ‵mafa ou isu, io me e ‵mae tou tinae. E ma‵saki malosi a nisi tino. E se mafai eiloa o ‵tu aka latou ki luga e aunoa mo se tino ke fesoasoani atu ki a latou. E masani o tupu te mea tenei māfai ko gasolo aka o ma‵tua ‵ki a tino.

E ma‵saki a tino katoa i nisi taimi. E iloa ne koe a te pogai e ma‵saki, gasolo aka o ma‵tua, kae ‵mate a tino?— I te aso e tasi ne avatu se tagata telā ne seki mafai o sasale ki a Iesu, kae ne fakaasi atu ei ne Iesu a te pogai e ma‵saki kae ‵mate ei a tino. Tenei ke fakamatala atu ne au ki a koe.

Ne nofo atu a Iesu i se fale i te fa‵kai telā e pili ki te Tai o Kalilaia. Ne olo atu se vaitino ki a ia. Tela la, i te taimi ne olo atu ei a tino e tokouke, ne sai‵tia valevale te fale kae ko se mafai o ulu atu a nisi tino. E seai foki se tino ne mafai o fakapilipili atu ki te mataloa. Kae e gasolo aka faeloa o tokouke a tino ne olo atu! E isi se potukau o tino ne avatu ne latou se tagata telā ne faka‵mate tena foitino, kae ko se mafai o sasale. E tokofa a tāgata ne ‵tau o sau ne latou a ia i se tamā moega ‵fetu.

E iloa ne koe a te pogai ne fia avatu ei ne latou a te tagata masaki tenei ki a Iesu?— Ne maua ne latou te fakatuanaki me e mafai o fesoasoani a Iesu ki a ia. Ne tali‵tonu latou me e mafai o faka‵lei ne Iesu a ia mai i te masaki tenā. E iloa ne koe me ne avatu pefea ne latou a te tagata faka‵mate tenā ki a Iesu mo tino katoa konā i loto i te fale?—

Ia, e fakaasi mai i te ata telā e lavea ne koe i konei a te auala ne avatu ne latou. Muamua la, ne sau ne latou te tagata ki luga i te tuafale, telā e pāpā. Ne fai ne latou se pūga lasi i ei. Oti aka loa, ne tukutuku ifo ne latou a te tagata masaki i tena moega i te pūga tenā ki loto i te potu i lalo. Ko se faka‵tau eiloa i te malosi o te lotou fakatuanaki!

 Ne ōfo a tino katoa i te fale i te taimi ne lavea ei ne latou a te mea ne tupu. Ne tuku ifo eiloa a te tagata faka‵mate i luga i te moega ki te kogaloto o latou. E mata, ne kaitaua a Iesu i te taimi ne lavea ei ne ia a te mea ne fai ne tāgata konei?— Ikai loa! Ne fiafia a ia ke lavea atu me ne fakatuanaki latou. Ana muna ki te tagata faka‵mate: “Au agasala ko magalo.”

Ne seki mafau‵fau a nisi tino me se mea ‵lei ke fai atu penā a Iesu. Ne seki mafau‵fau latou me e mafai ne ia o fakamagalo a agasala. Tela la, ke fakaasi atu me e mafai eiloa ne ia, ne fai atu a Iesu ki te tagata: “Au e fai atu ki a koe, tu ki luga, puke tou moega, kae fano ki tou fale.”

I te taimi ne fai atu ei penā a Iesu, ne ‵lei eiloa te tagata! Ne seki toe faka‵mate tena foitino. Ko  mafai nei ne ia o tu ki luga i a ia eiloa kae sasale. Ne ōfo malosi a tino kolā ne lavea ne latou te vavega tenei. Ne seki lavea aka eiloa ne latou i olotou olaga kātoa se mea fakaofoofogia penā! Ne tavae atu latou ki a Ieova mō te tukuatuga ki a latou a te Faiakoga Sili tenei, telā ne mafai o faka‵lei ne ia a ma‵saki o tino.—Maleko 2:1-12.

Ne a mea e tauloto ne tatou mai i te vavega tenei?— E tauloto ne tatou me e isi se ‵mana o Iesu ke fakamagalo a agasala kae faka‵lei foki a tino ma‵saki. Kae e isi aka foki se mea e tauloto ne tatou, se mea telā e tāua ‵ki. E tauloto ne tatou me e ma‵saki a tino ona ko te agasala.

Ona ko te mea e ma‵saki a tino katoa i nisi taimi, e mata, e fakauiga i ei me e agasala a tatou katoa?— Ao, e fai mai te Tusi Tapu me ne fa‵nau mai tatou katoa mo te agasala. E iloa ne koe me se a te uiga o te fanau mai mo te agasala?— E fakauiga i ei me e fa‵nau mai tatou e pelā me ne tino sē ‵lei katoatoa. E fai ne tatou a mea ‵se i nisi taimi, faitalia me e se ma‵nako tatou ki ei. E iloa ne koe te auala ne fai ei tatou katoa mo fai ne tino agasala?—

Ne maua ne tatou te tulaga tenei ona ko te tagata muamua, ko Atamu, ne seki fakalogo ki te Atua. Ne agasala a ia ona ko te mea ne soli ne ia te tulafono a te Atua. Kae ne maua ne tatou katoa a te agasala mai i a Atamu. E iloa ne koe te auala ne maua ei ne tatou te agasala mai i a ia? Ke taumafai au o fakamatala atu i se auala telā e mafai o malamalama koe i ei.

Kāti ko oti ne fesoasoani atu koe ki se tino i te taoga o falaoa i se kāpa tao falaoa. Se a te mea ka tupu ki te falaoa māfai e isi se koga ‵koko  i te kāpa? E iloa ne koe?— Ka lavea atu a te fakailoga, io me ko te koga ‵koko tenā, i falaoa katoa kolā e tao i ei, ne?—

A Atamu ne fai pelā mo te kāpa tenā, kae e fai tatou e pelā mo te falaoa. Ne seki ‵lei katoatoa a ia i te taimi ne soli ei ne ia te tulafono a te Atua. Ne fai eiloa pelā me ne maua ne ia se koga ‵koko, io me se fakailoga masei. Tela la, i te taimi ne fai ei ana tama‵liki, ka fai pefea a latou?— Ne maua foki eiloa ne ana tama‵liki katoa a te fakailoga tenei ko te sē ‵lei katoatoa.

E se fa‵nau mai a te tokoukega o tama‵liki mo ne fakailoga ‵lasi o te sē ‵lei katoatoa kolā e mafai o lavea atu ne koe. E seai se lima io me se vae o latou e galo. Kae ona ko te masei o te lotou tulaga sē ‵lei katoatoa, ne fai ei latou ke ma‵saki, kae ‵mate fakamuli.

E tonu, e ma‵saki ‵soko a nisi tino i lō nisi tino. Kaia? Ona ko te mea ne fa‵nau mai latou mo agasala e uke atu?— Ikai, ne fa‵nau mai a tino katoa mo te tulaga agasala telā e ‵pau. E fa‵nau mai a tatou katoa mo te tulaga sē ‵lei katoatoa. Ka maua eiloa ne tino katoa a vaegā masaki valevale i taimi kese‵kese. E mafai eiloa o ma‵saki a tino kolā e taumafai ke faka‵logo ki tulafono katoa a te Atua kae e se fai foki ne latou a mea ma‵sei ‵ki.

Tela la, kaia e masani ei o ma‵saki malosi atu a nisi tino i lō nisi tino?— E uke a pogai. Kāti e fai penā me e se lava a mea‵kai a latou. Io me kāti e se ‵kai ki mea‵kai aoga. E mafai o ‵kai malosi latou ki keke mo lole. A te suā pogai ko te ‵pula po kae e se lava te lotou ‵moe. Io me e se ‵pei ki gatu ‵moko a koi tuai o olo atu ki se koga ‵moko. E vāi‵vai foki a foitino o nisi tino, kae e se mafai o ‵teke atu ki masaki, faitalia me e taumafai foki eiloa latou o tausi faka‵lei atu ki a latou.

 E mata, e isi eiloa se taimi telā ka se toe ma‵saki tatou? E mata, ka mafai o saoloto tatou mai te agasala?— Ia, ne a mea ne fai ne Iesu ki te tagata faka‵mate?— Ne fakamagalo ne ia ana agasala kae faka‵lei foki tena masaki. I te auala tenā, ne fakaasi mai ne Iesu a mea ka fai ne ia i se aso e tasi mō tino katoa kolā e taumafai o fai te mea ‵lei.

Kafai e fakaasi atu ne tatou me e se ma‵nako tatou ki te agasala kae takalia‵lia foki ki te mea masei, ka faka‵lei eiloa ne Iesu a tatou. I aso mai mua, ka ave keatea ne ia mai i a tatou a te tulaga sē ‵lei katoatoa telā e maua nei ne tatou. Ka fai ne ia te mea tenei e pelā me ko te Tupu o te Malo o te Atua. Ka se ave keatea a te agasala mai i a tatou i te taimi eiloa e tasi. Ka ave malielie keatea i loto i se vaitaimi tai leva. Kae kafai ko ‵galo katoatoa atu ‵tou agasala, ka se toe ma‵saki eiloa tatou. Ka malosi ‵lei katoatoa tatou. Ko oko eiloa i te gali o te fakamanuiaga tenā!