PA I ti pou gou si tou dimoun ti fer sa ki byen?— Me napa personn ki toultan fer sa ki byen. Ou konnen akoz nou tou nou fer sa ki mal detanzaot, menm si nou anvi fer sa ki byen?— Akoz nou tou nou’n ne avek pese. Me i annan dimoun ki fer bokou keksoz mal. Zot ay lezot dimoun e fer zot ditor par ekspre. Ou krwar sa bann dimoun koumsa i kapab sanze e vin bann bon dimoun?—

Get sa zonm la ki pe vey lenz sa bann zonm ki pe anvoy ros avek Etyenn. Son non Ebre i Sol, me son non Romen i Pol. I kontan ki Etyenn, en disip Zezi, pe ganny touye. Annou vwar akoz Sol ti fer sa bann move keksoz.

Sol ti dan en larelizyon Zwif ki ti apel Farizyen. Bann Farizyen ti annan Parol Bondye, me zot ti prefere ekout sa ki zot sef ti ansennyen. Sa ti fer Sol fer bann move keksoz.

Kan Etyenn ti ganny arete Zerizalenm, Sol ti la. Etyenn ti ganny anmennen ankour, kot serten ziz ti bann Farizyen. Kantmenm zot ti dir bann move keksoz lo Etyenn, i pa ti per. I pa ti per pour koze e donn bann ziz en bon temwannyaz lo Zeova ek Zezi.

Me sa bann ziz pa ti kontan sa ki Etyenn ti dir. Zot ti deza konn en kantite lo Zezi. Pa bokou letan avan, zot ti’n fer touy Zezi! Me apre Zeova ti fer Zezi remont dan lesyel. Aprezan,  olye sanz zot mannyer, sa bann ziz ti pe lit kont bann disip Zezi.

Bann ziz ti graponn Etyenn e trenn li an deor lavil. Zot ti zet li ater e konmans saboul li avek ros. Parey ou vwar la dan portre, Sol ti la pe gete. I ti krwar i byen pour touy Etyenn.

Ou konnen akoz Sol ti krwar sa?— Akoz Sol ti en Farizyen e i ti krwar sa ki bann Farizyen i ansennyen i byen. I ti vwar bann Farizyen konman en bon legzanp, e i ti fer parey zot.—Akt 7:54-60.

Ki Sol ti fer apre ki Etyenn ti mor?— I ti oule met en lafen avek bann disip Zezi! I ti al dan zot lakaz e trenn zot deor, msye konman madanm. Apre i ti fer met zot dan prizon. Bokou disip ti bezwen kit Zerizalenm, me zot pa ti aret pres lo Zezi.—Akt 8:1-4.

 Sa ti fer Sol ay bann disip Zezi plis ankor. I ti al kot Gran Pret, Kaif, pour ganny permisyon pour aret bann Kretyen dan lavil Damas. Sol ti anvi anmenn zot Zerizalenm konman prizonnyen pour ganny pini. Me en keksoz enkrwayab ti arive ler i ti dan semen pour al Damas.

En lalimyer ti klere sorti dan lesyel, e en lavwa ti dir: “Sol. Sol, akoz ou persekit mwan?” Zezi dan lesyel ki ti pe koz avek li! Sa lalimyer ti sitan for ki i ti fer Sol pa vwar kler. Bann dimoun ki ti avek li ti bezwen anmenn li Damas.

Trwa zour plitar, Zezi ti aparet dan en vizyon avek enn son disip Damas ki ti apel Ananyas. I ti dir Ananyas al rann vizit Sol, fer li vwar kler ankor, e koz avek li. Ler Ananyas ti koz avek Sol, Sol ti aksepte laverite lo Zezi. I ti revwar kler. Depi sa zour, son lavi ti sanze, e i ti vin en serviter fidel Bondye.—Akt 9:1-22.

Ou konpran aprezan akoz Sol ti fer sa ki mal?— Akoz i ti’n ganny ansennyen bann move keksoz. I ti swiv bann zonm ki pa ti fidel avek Bondye. E i ti dan en group ki ti vwar lide zonm pli enportan ki Parol Bondye. Me akoz Sol ti sanz son lavi e fer sa ki byen, menm si lezot Farizyen ti kontinyen lit kont Bondye?— Akoz Sol ti vreman kontan laverite. Alors, ler i ti aprann sa ki byen, i ti pare pour fer li.

Ou konnen ki Sol ti vini plitar?— I ti vin en zapot Zezi. Sa ki nou konn li konman zapot Pol. E li menm ki’n ekrir plis liv dan Labib ki okenn lezot dimoun.

I annan bokou dimoun ki kapab sanze parey Sol. Me i pa fasil akoz i annan enn ki pe travay dir pour fer dimoun fer sa  ki mal. Ou konnen lekel li?— Zezi ti koz lo li ler i ti aparet avek Sol lo semen pour al Damas. I ti dir: “Mon pe anvoy ou pour ouver zot lizye, pour fer zot sorti dan fernwanr e tourn ver lalimyer, e kit pouvwar Satan e retourn kot Bondye.”—Akt 26:17, 18.

Wi, Satan ki pe sey fer tou dimoun fer sa ki mal. Eski ou vwar li difisil parler pour fer sa ki byen?— Nou tou parey. Satan i fer li difisil pour nou. Me i annan en lot rezon akoz i pa toultan fasil pour fer sa ki byen. Ou konnen akoz?— Akoz nou’n ne avek pese.

Sanmenm i pli fasil pour nou fer sa ki mal ki fer sa ki byen. Be ki nou bezwen fer alors?— Nou bezwen lite pour fer sa ki byen. Ler nou fer sa, nou kapab asire ki Zezi, ki kontan nou, pou ed nou.

Ler Zezi ti lo later, i ti kontan bann dimoun ki avan ti pe fer bann keksoz mal me apre zot ti sanze. I ti konnen ki i pa ti fasil pour zot sanze. Par egzanp, ti annan bann madanm ki ti dormi avek plizyer msye. I mal  pour fer sa. Labib i apel bann madanm ki fer sa bann keksoz bann prostitye.

En fwa, en madanm ti tann koz lo Zezi, e i ti vin kot Zezi ti ete dan lakaz en Farizyen. I ti vid delwil lo lipye Zezi e swiy son larm lo lipye Zezi avek son seve. I ti vreman regrete pour bann pese ki i ti’n fer. Alor Zezi ti pardonn li. Me bann Farizyen zot, zot ti krwar sa madanm pa devret ganny pardonnen.—Lik 7:36-50.

Ou konnen ki Zezi ti dir serten Farizyen?— I ti dir zot: “Bann prostitye pou antre dan Rwayonm Bondye avan zot.” (Matye 21:31) Zezi ti dir sa akoz bann prostitye ti krwar li e zot ti sanz zot move lavi. Me bann Farizyen ti kontinyen fer sa ki mal anver bann disip Zezi.

Alors ler Labib i montre ki sa ki nou pe fer i mal, nou devret pare pour sanze. E ler nou aprann sa ki Zeova i anvi nou fer, nou devret vreman anvi fer li. Sa pou fer Zeova kontan e i pou donn nou lavi eternel.