Mekene 25

Ijije Kö Troa Saze La Itre Atr Ka Ngazo Thiina?

LOLO pi hë e tro la nöjei atr a kuca pala hi la loi, hapeue fe la mekuna i eö?— Ame hi la engazon, pëkö ka kuca lapane la loi. Atre fe hi eö la kepin?— Hnene laka hna hnaho së ngöne la ngazo. Hetrenyi kö la itre atr ka ngazo thiina catr. Maine hetre atr hnei angatre hna methinën, tro angatre lai a thele troa angazo angeice catr. Nemene la mekuna i eö, tro jë kö a saze la aqane ujë i angatr, matre tro pena ha kuca la loi?—

Öhne hi eö cahu thupëtresiji ka cil? Nyidrëti a thupëne la itre ixetre ne la itre atr ka tranyi Setefano hnei etë. Saulo la ëje i nyidrë qene Heberu, nge Paulo qene Roma. Madrine hë Saulo pine la hna humuthi Setefano, lo ketre atre xötrethenge la Atre Hamë Ini Ka Sisitria. Tha ewekë ka loi kö la hna kuca, celë hi matre eni a pi qaja koi eö la kepin matre kuca jë angeice la itre ewekë cili.

Ka sine nyidrë la hmi angetre Iudra, lo hna hëne fe ka hape, hmi angetre Faresaio. Ngacama Wesi Ula i Akötresie fe thei angatr, ngo pi tro pe angatre a xötrethenge la itre ini hna hamëne hnene la itre xa hene ne hmi angatr. Hane hi lai kepin matre ngazo la aqane ujë i Saulo.

Ceme Saulo fe hi ekö lo kola othi Setefano e Ierusalema. Hna kotrë Setefano qëmekene la angetre amekötin, cememine la itre xa Faresaio. Nge ngacama atë ju hë la ngazo hui angeic, ngo tha hnei Setefano kö hna xouene lai. Hnei angeice pala hi hna catre anyipici Iehova Akötresie me Iesu qëmekene la angetre amekötin.

Ngo tha kapa kö hnene la angetre amekötin la hnei angatre hna dreng, pine laka atre Iesu hë hnei angatr. Ketre, angatre hi lo angetre humuthi Iesu ekö. Ngo thupene jë hi lai, hnei Iehova hna amele Iesu me xomi nyidrë  hnengödrai eë. Ame angetre amekötin, tha saze kö la thiina i angatr; hnei angatre pala hi hna axösisine lo itretre drei Iesu.

Hnene la angetre amekötine hna ee Setefano, me huli angeic e tröne la traon. Angatre pë hë a ukapië angeice pi hnadro eë me tranyi angeice hnei etë. Tune la aqane amamane ngöne cahu iatr, Saulo a cile goeë angatr. Pëkö engazone koi nyidrë la kola humuthi Setefano.

Ame fe koi eö, pine nemene matre mekune jë Saulo tune lai?— Pine laka ketre Faresaio nyidrë, nge ka nyipici koi nyidrë la itre ini hna hamëne hnene la angetre Faresaio. Itre tulu nyine xötrethenge koi nyidrë la itre hene ne hmi, celë hi matre catre nyidrë xötrethenge angatr.—Itre Huliwa 7:54-60.

Nemene la hna kuca hnei Saulo, thupene la mec i Setefano?— Kolo pala hi a thele troa humuthe la itre atr ka xötrethenge Iesu, me lö hnine la itre uma i angatr, matre hule la itre trahmanyi me fö, me akalabusi angatr. Ngacama nyimutre la itretre drenge ka tro qa Ierusalema, ngo tha mano pi kö angatre qeje Iesu.—Itre Huliwa 8:1-4.

 Ka elë catre pala hi la hni Saulo kowe la itretre drei Iesu. Celë hi matre sipone jë nyidrë kowe la Atre Huuje Ka Sisitria ene Kaiafa, troa nue nyidrë troa xolouthe la itre Keresiano ne Damaseko, me thele jëne tro angatr a bëeke hmaca matre akalabusi angatr e Ierusalema. Ngo nyidrëti petre kö e kuhu gojenyi easenyine e Damaseko, ame hna traqa pi la ketre ewekë ka tru nyine hain.

Hna wië xötreithi nyidrë hnene la lai qa hnengödrai, ame hnei nyidrëti hna drenge la ketre nine ula, kola hape: “Saulo, Saulo fe, ue lae eö a angazo ni ?” Iesu hi lai ka ithanata qa koho hnengödrai! Pine la ecatrene la hudrumene la lai cili, ene pe atine ju la lue meke i Saulo, matre tha öhne hë nyidrë koilo. Hane hi lai kepine matre eatrongë nyidrëti jë hnene la itre sine tronge i nyidrë Damaseko eë.

Thupene hë la köni drai e Damaseko, ame hnei Iesu hna amamanyi kowe la ketre atre drei nyidrë, Anania la ëjen. Iesu pë hë a upi angeice jë troa wai Saulo, matre troa fe la lue meke i nyidrë, me ithanata koi nyidrë. Ame hnei Anania hna drengethenge Iesu, me tro troa ithanata me Saulo. Thupene lai, hnei Saulo hna kapa la nyipici göi Iesu, ene pe fe hmaca pi hi la lue meke i nyidrë.

Hapeu, trotrohnine hë eö la kepine matre kuca jë Saulo la itre ewekë ka ngazo?— Ame laka kuca jë nyidrëti la itre ewekë cili, tre, qa ngöne la itre ini ka thoi. Hnei nyidrëti hna mejiune kowe la itre atr ka mele thoi koi Akötresie, me sajuëne la ketre hmi ka amë panëne la itre mekuna i atr, hune la mekuna i Akötresie ka eje e hnine la Wesi Ula i Nyidrë. Ngo pine nemene matre saze pi Saulo troa kuca la loi, nge icilekeu ju pë hë me Akötresie hnene la itre xa Faresaio?— Pine laka tha patre kö la aja kowe la nyipici e kuhu hni Saulo. Ame ju hi la kola amamane koi nyidrë la meköt, canga kapa ju fe hi nyidrë.

Atre fe hi eö la ewekë ka traqa koi Saulo e thupen?— Nyidrëti hi lo hna hëne ka hape, Paulo aposetolo, nge atre cinyihane lo itre itusi ka nyimutre e hnine la Tusi Hmitrötr.

Tui Saulo, ijije fe tro la itre atr a hane saze. Ngo tha ewekë ka hmaloi kö lai, pine laka hetre ka hule catrëne la itre atr troa kuca la ngazo. Atre  fe hi eö ka hape, drei?— Hnei Iesu hna qaja amamane la pengö i angeic, ngöne lo nyidrëti a mama koi Saulo ngöne la gojenyi ne tro Damaseko. Öni nyidrëti ka hape: ‘Ini a upi eö troa fe la itre lue meke ne la itre atr, matre ujë jë angatre qa ngöne la jidri kowe la lai, me qa ngöne la mus i Satana kowe la musi Akötresie.’—Itre Huliwa 26:17, 18.

Eje hi, Satana Diabolo la ka uku së troa kuca la itre ewekë ka ngazo. Ka jole jë fe kö koi eö e itre xa ijin troa kuca la loi?— Eje hi laka jole catre lai kowe la nöjei atr asë, ke, Satana la qane la nöjei ewekë cili. Ngo hetre ketre kepine kö. Atre fe hi eö ka hape, nemen?— Hna hnaho së ngöne la ngazo.

Nyipici, itre atr ka ngazo së, celë hi matre canga saqe hi së kei kowe la ngazo hune la troa kuca la loi. Nemene jë la aqane tro sa cile kowe la jole cili?— Ene la tro sa isine troa kuca la ewekë ka meköt. Pine la aqane hnimi së hnei Iesu, haawe, ka xecie hnyawa koi së, laka, tro nyidrëti a xatua së.

Ame lo Iesu ekö e celë fen, tha sihngödri kö la ihnimi nyidrë kowe la itre atr ka ujë trije la thiina ka ngazo. Atre hnyawa hi nyidrëti laka tha ewekë ka hmaloi kö koi angatre la troa saze. Hanawange la pengöi itre xan. Hnene la itre xa föe ekö hna kuci ngazo me nyimu trahmany. Eje hi laka, ketre ewekë ka sisi catre lai. Celë hi matre jele föe ne gojenyi angatre jë hnene la Tusi Hmitrötr.

 Ame ngöne la ketre drai, hna drei meje i Iesu hnene la ketre föe ne gojeny, me traqa troa wai nyidrë ngöne la hnalapa ne la ketre Faresaio. Hnei nyiidro hna pane nenge la wakacu kowe la lue ca i Iesu, nge hna xölaxölane hnene la trenge timidra i nyiidro, ame hnei nyiidro hna aweliwelene hnene la ihnaihe i nyiidro. Pine la ietra i nyiidro, Iesu pë hë a nuetrije pi la itre ngazo i nyiidro. Ngo xele fe kö la Faresaio, ma kapa la ewekë cili.—Luka 7:36-50.

Atre fe hi eö la hnei Iesu hna qaja kowe la angetre Faresaio ngöne la ketre ijin?— Öni nyidrëti koi angatr, ka hape: “Ame la ite föe ne gojenyi, te, kola thipatë nyipunie kowe la baselaia i Akötesie.” (Mataio 21:31) Ame laka qaja jë Iesu la trenge ewekë celë, ke lapaune hë koi nyidrë hnene la itre föe ne gojenyi nge saze hë la aqane ujë i angatr, ngo angetre Faresaio pala hi a kuca la itre ewekë ka ngazo kowe la itretre drei Iesu.

Maine easa e la Tusi Hmitrötr, nge öhne hë së laka ngazo la aqane ujë së, haawe, canga saze pi. Nge maine trotrohnine hë së la hnei Iehova hna thele the së, haawe, xötrethenge ju. Qa ngöne lai tro hë sa amadrinë Iehova, nge tro Nyidrëti a hamë së la mele ka tha ase palua kö.

E jë la itre xötre celë ka troa xatua së troa neëne troa kuca la itre ewekë ka ngazo: Salamo 119:9-11; Ite Edomë 3:5-7; me Ite Edomë 12:15.

[Iatr ne la götran 133]

Pine nemene matre Saulo a mekun, ka hape, pëkö engazone la kola humuthi Setefano?

[Iatr ne la götran 135]

Drei la ka ithanata koi Saulo, nge nemene la hnëqa hna ahnithe koi nyidrë?

[Iatr ne la götran 136]

Pine nemene matre hnei Iesu hna nuetrije la itre ngazo hna kuca hnene la föe celë?