Ibuot 25

Nte Mbon Oro Ẹnamde Ndiọi N̄kpọ Ẹkeme Ndikpụhọde?

NTE ikpedịghe utịben̄kpọ edieke kpukpru owo ẹkpenamde se ifọnde?— Edi idụhe owo ndomokiet emi esinamde nti n̄kpọ kpukpru ini. Nte afo ọmọfiọk ntak emi kpukpru nnyịn isinamde ndiọi n̄kpọ ndusụk ini, ke ini nnyịn ikam iyomde ndinam se ifọnde?— Koro kpukpru nnyịn idada idiọkn̄kpọ imana. Edi ndusụk owo ẹsinam ikpọ idiọkn̄kpọ. Mmọ ẹsisua mbon en̄wen ẹnyụn̄ ẹkokoi ẹnam mmọ ibak. Nte afo emekere ke mmọ ẹkeme ndikpụhọde nnyụn̄ n̄kpep ndinam se ifọnde?—

Se akparawa emi ekpemede ewụra mbon oro ẹtọn̄ọde Stephen ke itiat. Enyịn̄ esie ke usem Hebrew edi Saul, edi enyịn̄ Rome esie edi Paul. Enye adat esịt nte ke ẹwot Stephen, emi edide mbet Akwa Andikpep. Yak ise ntak emi Saul anamde utọ ndiọi n̄kpọ oro.

Saul edi owo ido ukpono mme Jew oro ẹkotde mme Pharisee. Mme Pharisee ẹnyene Ikọ Abasi, edi mmọ ẹnen̄ede ẹkpan̄ utọn̄ ẹnọ mme ukpepn̄kpọ ndusụk mme adaiso ido ukpono mmọ. Emi edi ntak oro Saul anamde ndiọi n̄kpọ.

Saul odu ke ini ẹmụmde Stephen ke Jerusalem. Ẹda Stephen ẹka esopikpe, emi ndusụk mme ebiereikpe ẹdide mme Pharisee. Stephen ikopke ndịk idem okposụkedi ẹtịn̄de ndiọi ikọ ẹban̄a enye. Enye etịn̄ ikọ uko uko onyụn̄ ọnọ mme ebiereikpe ọyọhọ ikọ ntiense aban̄a Jehovah Abasi ye Jesus.

Edi mme ebiereikpe oro imaha se mmọ ẹkopde. Mmọ ẹfọfiọk ekese ẹban̄a Jesus. Ke nditịm ntịn̄, ikebịghike-bịghi mbemiso emi, mmọ ẹma ẹwot Jesus! Edi ke oro ebede, Jehovah ama emen Jesus ọdọk  heaven. Idahaemi, utu ke ndikpụhọde mme usụn̄ mmọ, mme ebiereikpe oro ẹn̄wana ndibiọn̄ọ mme mbet Jesus.

Mme ebiereikpe oro ẹmụm Stephen ẹnyụn̄ ẹda enye ẹka edem obio. Mmọ ẹnụk enye ẹduọk ke isọn̄ ẹnyụn̄ ẹtọn̄ọ enye ke itiat. Ndien nte afo ekemede ndikụt ke ndise emi, Saul ada do ese. Enye ekere ke enen ndiwot Stephen.

Nte afo ọmọfiọk ntak emi Saul ekekerede ntre?— Ọfọn, Saul edi owo Pharisee ke ofụri eyouwem esie, ndien enye enịm ke akpanikọ ete ke ukpepn̄kpọ mme Pharisee enen. Enye eketiene uwụtn̄kpọ mme adaiso ido ukpono mme Pharisee, ntre enye ama ekpebe mmọ.—Utom 7:54-60.

Nso ke Saul anam ke ẹma ẹkewot Stephen?— Kamse, enye odomo ndiwot mme mbet Jesus eken! Enye aka ke ufọk mmọ okodụri iren ye iban osion̄o. Ekem enye anam ẹdọn̄ mmọ ke ufọk-n̄kpọkọbi. Ediwak mbet ẹkenyene ndiwọrọ n̄kpọn̄ Jerusalem, edi mmọ itreke ndikwọrọ mban̄a Jesus.—Utom 8:1-4.

 Emi anam Saul ọdọdiọn̄ asua mme mbet Jesus. Ntre enye aka ebịne Akwa Oku Caiaphas ọkọbọ unyịme ndimụm mme Christian ke obio Damascus. Saul oyom ndida mmọ ndi Jerusalem nte mbon n̄kpọkọbi man ẹnọ mmọ ufen. Edi nte enye asan̄ade ke usụn̄ aka Damascus, n̄kpọ n̄kpaidem etịbe.

Un̄wana oto heaven asiaha, ndien uyo ọwọrọ ete: “Saul, Saul, nsinam afo ọkọbọde Mi?” Jesus etie ke heaven etịn̄ ikọ emi! Un̄wana oro ayama etieti tutu Saul ikemeke ndikụt usụn̄, ndien mme owo emi ẹdude ye Saul ẹnyene ndimomụm enye n̄ka Damascus.

Ke usen ita ẹbede Jesus owụt kiet ke otu mbet esie emi ekerede Ananias idem ke n̄kukụt ke Damascus. Jesus ọdọhọ Ananias aka ekese Saul, man anam enye okụt usụn̄, onyụn̄ etịn̄ ikọ ọnọ enye. Ke ini Ananias etịn̄de ikọ ọnọ enye, Saul enyịme akpanikọ aban̄ade Jesus. Enye afiak okụt usụn̄. Ofụri usụn̄ uwem esie okpụhọde, ndien enye akabade edi anam-akpanikọ asan̄autom Abasi.—Utom 9:1-22.

Idahaemi, nte afo omokụt ntak emi Saul ekesinamde ndiọi n̄kpọ?— Ekedi koro ẹkekpep enye ndiọi n̄kpọ. Enye eketiene mme owo oro mîkanamke akpanikọ inọ Abasi. Ndien enye okodu ke otu mme owo oro ẹkedade mme ekikere owo ke akpan n̄kpọ ẹkan Ikọ Abasi. Edi ntak emi Saul okpụhọrede uwem esie onyụn̄ ọtọn̄ọde ndinam se ifọnde, idem okposụkedi mme Pharisee eken ẹkade iso ndin̄wana ye Abasi?— Ntak edi koro Saul inen̄ekede isua akpanikọ. Ntre ke ini ẹwụtde enye se ifọnde, enye eben̄e idem ndinam emi.

Nte afo ọmọfiọk se Saul akakabarede edi nte ini akade?— Ih, ẹkedidiọn̄ọ enye nte Paul apostle, kpa apostle Jesus. Ndien ti ete ke Paul ama ewet mme n̄wed Bible awak akan owo efen ekededi.

Ediwak owo ẹdu emi ẹkemede ndinam ukpụhọde ukem nte Saul. Edi idịghe mmemmem n̄kpọ koro odu owo emi esịnde ọkpọsọn̄ ukeme  ndinam mme owo ẹnam ndiọi n̄kpọ. Nte afo ọmọfiọk enye?— Jesus ama etịn̄ aban̄a enye ke ini Jesus okowụtde Saul idem ke usụn̄ Damascus. Do ke Jesus eketie ke heaven etịn̄ ikọ ọnọ Saul ete: ‘Ami ndọn̄ fi nte atat mme owo enyịn, ọwọn̄ọde mmọ osio ke ekịm esịn ke un̄wana onyụn̄ osio ke odudu Satan ọnọ Abasi.’—Utom 26:17, 18.

Ih, Satan kpa Devil odomo ndinam kpukpru owo ẹnam ndiọi n̄kpọ. Ndi esisọn̄ fi ndinam se inende ndusụk ini?— Esisọn̄ kpukpru nnyịn. Satan esinam ọsọn̄. Edi ntak efen odu emi esisọn̄de nnyịn ndinam se inende kpukpru ini. Nte afo ọmọfiọk ntak emi?— Edi koro nnyịn idada idiọkn̄kpọ imana.

Edi idiọkn̄kpọ emi esiwak ndinam edi mmemmem n̄kpọ nnyịn ndinam se idiọkde akan ndinam se ifọnde. Ntre, nso ke oyom nnyịn inam?— Ana nnyịn idomo ndinam se inende. Ke ini nnyịn inamde oro, nnyịn imekeme nditịm mfiọk ke Jesus, emi amade nnyịn, ayan̄wam nnyịn.

Ke ini Jesus okodude ke isọn̄, enye ama ama mme anamidiọk oro ẹkenamde ukpụhọde. Enye ama ọfiọk nte ọkọsọn̄de mmọ ndikpụhọde. Ke uwụtn̄kpọ, iban ẹma ẹdu emi ẹkenyenede ebuana  idan̄ ye ediwak iren. Nte ededi, emi ama ọdiọk. Bible okot iban emi mme akpara.

Odu ini oro utọ n̄wan oro kiet okokopde aban̄a Jesus, ndien enye ama edi ebiet emi Jesus okodude ke ufọk owo Pharisee kiet. Enye ama ọtọhọ aran ọduọk ke ukot Jesus onyụn̄ ada idet esie ọkwọhọde mmọneyet esie efep ke ukot Jesus. Enye ama enen̄ede atua n̄kpọfiọk ke mme idiọkn̄kpọ esie, ntre Jesus ama efen ọnọ enye. Edi owo Pharisee oro ikekereke ke akpana ẹfen ẹnọ enye.—Luke 7:36-50.

Nte afo ọmọfiọk se Jesus ọkọdọhọde ndusụk mme Pharisee?— Enye ọkọdọhọ mmọ ete: “Mme akpara ẹbem mbufo iso ẹdụk ke Obio Ubọn̄ Abasi.” (Matthew 21:31) Jesus eketịn̄ emi koro mme akpara ẹma ẹnịm enye ke akpanikọ ẹnyụn̄ ẹkpụhọde ndiọi usụn̄ mmọ. Edi mme Pharisee ẹma ẹka iso ndinam mme mbet Jesus ibak.

Ntre ke ini Bible ọdọhọde ke se nnyịn inamde ọdiọk, nnyịn ikpenyene ndinyịme ndikpụhọde. Ndien ke ini nnyịn ifiọkde se Jehovah oyomde nnyịn inam, nnyịn ikpenyene ndiben̄e idem ndinam emi. Ndien Jehovah eyenem esịt ye nnyịn oyonyụn̄ ọnọ nnyịn nsinsi uwem.

Man an̄wam nnyịn ifep ndinam se idiọkde, yak ikot Psalm 119:9-11; Mme N̄ke 3:5-7; ye N̄ke 12:15.

[Ndise ke page 133]

Ntak emi Saul ekerede ke enen ndiwot Stephen?

[Ndise ke page 135]

Anie etịn̄ ikọ ye Saul, ndien Enye ọdọn̄ Saul akanam nso?

[Ndise ke page 136]

Ntak emi Jesus ekefende ọnọ n̄wan emi akanamde ndiọi n̄kpọ?