INDI bala mangin maayo gid kon ang tanan nagahimo sing maayo?— Apang wala sing tawo nga nagahimo sing maayo sa tanan nga tion. Nahibaluan mo bala kon ngaa kita tanan nagahimo kon kaisa sing malain, bisan pa luyag naton nga himuon ang maayo?— Bangod kita tanan natawo nga makasasala. Apang ang iban nga mga tawo nagahimo sing madamo nga kalainan. Ginadumtan nila ang iban nga mga tawo kag hungod nga ginahalitan sila. Sa banta mo ayhan mahimo pa sila magbag-o kag mangin maayo?—

Tan-awa ang isa ka pamatan-on nga lalaki nga nagabantay sang mga kunop sang mga nagabato kay Esteban. Ang iya Hebreo nga ngalan amo si Saulo, apang ang iya Romano nga ngalan amo si Pablo. Nalipay sia nga si Esteban, nga isa ka disipulo sang Daku nga Manunudlo, ginapatay. Tan-awon naton kon ngaa si Saulo naghimo sing malain.

Si Saulo katapo sang isa ka relihioso nga grupo sang mga Judiyo nga gintawag nga mga Fariseo. Natigayon sang mga Fariseo ang Pulong sang Dios, apang ginpasulabi nila ang mga panudlo sang ila relihioso nga mga lider. Amo sini kon ngaa si Saulo naghimo sing malain.

Sang gindakop si Esteban sa Jerusalem, ato gid didto si Saulo. Gindala si Esteban sa hukmanan, diin ang pila sang mga hukom mga Fariseo. Bisan pa ginpakalain si Esteban, wala sia magpakita sing kahadlok. Maisugon sia nga naghambal kag nagpanaksi tuhoy kay Jehova nga Dios kag kay Jesus.

Apang wala maluyagi sang mga hukom ang ila nabatian. Madamo na sila sing nahibaluan tuhoy kay Jesus. Sa katunayan, wala pa lang madugay antes sini, ginpapatay nila si Jesus! Apang pagkatapos sini, gindala  liwat ni Jehova si Jesus sa langit. Karon, sa baylo nga magbag-o sila, ginhingabot sang mga hukom ang mga disipulo ni Jesus.

Gindakop sang mga hukom si Esteban kag gindala sia sa guwa sang siudad. Gintiklod nila si Esteban gani natumba sia kag pagkatapos, ginbato nila sia. Subong makita mo sa laragway, nagatan-aw si Saulo sang matabo ini. Pagdumdom niya husto nga patyon si Esteban.

Nahibaluan mo bala kon ngaa amo sini ang pagdumdom ni Saulo?— Bueno, si Saulo isa ka Fariseo sa bug-os niya nga kabuhi, kag nagpati sia nga husto ang mga panudlo sang mga Fariseo. Gintamod niya ini nga mga tawo subong isa ka halimbawa, gani gin-ilog niya sila.—Binuhatan 7:54-60.

Sang mapatay si Esteban, ano naman ang ginhimo ni Saulo?— Ti, nagtinguha sia nga papason ang tanan nga mga disipulo ni Jesus! Ginpanulod niya ang ila mga puluy-an kag ginpangguyod ang mga lalaki kag mga babayi. Nian ginpabilanggo niya sila. Madamo nga disipulo ang napilitan nga maghalin sa Jerusalem, apang wala sila mag-untat sa pagbantala tuhoy kay Jesus.—Binuhatan 8:1-4.

 Bangod sini, labi pa nga ginkaugtan ni Saulo ang mga disipulo ni Jesus. Gani nagkadto sia sa mataas nga saserdote nga si Caifas kag nangayo sing pahanugot nga dakpon ang mga Cristiano sa siudad sang Damasco. Handum ni Saulo nga ipabilanggo sila sa Jerusalem agod masilutan. Apang sang nagapakadto sia sa Damasco, isa ka makatilingala nga butang ang natabo.

Isa ka kapawa ang nagsilak gikan sa langit, kag may tingog nga nagsiling: “Saulo, Saulo, ngaa ginahingabot mo ako?” Si Jesus yadto nga nagahambal gikan sa langit! Tuman kasanag ang kapawa amo nga nabulag si Saulo, gani gintuytuyan sia sang iya mga kaupod pa Damasco.

Pagligad sang tatlo ka adlaw, nagpakita si Jesus paagi sa isa ka palanan-awon sa isa sang iya mga disipulo sa Damasco nga si Ananias. Ginsugo ni Jesus si Ananias nga duawon si Saulo, ipasag-uli ang iya panulok, kag hambalon sia. Sang makighambal si Ananias sa iya, ginbaton ni Saulo ang kamatuoran tuhoy kay Jesus. Nakakita sia liwat. Nagbag-o ang iya bug-os nga dalanon sang pagkabuhi, kag nangin isa sia ka matutom nga alagad sang Dios.—Binuhatan 9:1-22.

Nahangpan mo na bala karon kon ngaa naghimo anay si Saulo sing malain?— Bangod sayop ang gintudlo sa iya. Ginsunod niya ang mga tawo nga indi matutom sa Dios. Kag kaupod sia sang isa ka grupo sang mga tawo nga nagpasulabi sa mga ideya sang tawo sangsa Pulong sang Dios. Apang ngaa nagbag-o si Saulo kag nagsugod sa paghimo sing maayo, bisan pa ang iban nga mga Fariseo padayon gihapon nga nagpakig-away sa Dios?— Bangod wala gid ginadumtan ni Saulo ang kamatuoran. Gani sang ginpakita sa iya kon ano ang husto, ginsunod niya ini.

Nahibaluan mo bala kon nangin sin-o si Saulo sang ulihi?— Huo, nakilal-an sia subong si apostol Pablo, isa ka apostol ni Jesus. Kag dumduma, mas madamo nga tulun-an sa Biblia ang ginsulat ni Pablo sangsa iban.

Madamo nga tawo kaangay ni Saulo ang mahimo magbag-o. Apang indi ini mahapos bangod may yara isa nga nagahaylo sa mga tawo nga  maghimo sing malain. Nahibaluan mo bala kon sin-o sia?— Ginsambit sia ni Jesus sang magpakita si Jesus kay Saulo sa dalanon pa Damasco. Naghambal didto si Jesus kay Saulo gikan sa langit kag nagsiling: ‘Ginapadala ko ikaw agod pamuklaton ang mga mata sang katawhan, agod palisuon sila gikan sa kadudulman pa kapawa kag gikan sa awtoridad ni Satanas padulong sa Dios.’—Binuhatan 26:17, 18.

Huo, ginahaylo ni Satanas nga Yawa ang tanan nga maghimo sing malain. Nabudlayan ka bala kon kaisa sa paghimo sing husto?— Amo kita sini tanan. Ginatinguhaan ini ni Satanas. Apang may isa pa ka rason kon ngaa indi pirme mahapos nga himuon ang husto. Nahibaluan mo bala ang rason?— Bangod natawo kita nga makasasala.

Ini nga sala amo ang kabangdanan kon ngaa masami nga mas madali himuon ang sayop sangsa husto. Gani, ano ang dapat naton himuon?— Huo, dapat kita magpanikasog sa paghimo sing husto. Kon himuon naton ini, mapat-od naton nga buligan kita ni Jesus nga nagahigugma sa aton.

Sang si Jesus yari sa duta, ginhigugma niya ang mga tawo nga nakahimo sing malain nga mga butang apang nagbag-o. Nahangpan niya kon daw ano kabudlay nga magbag-o sila. Halimbawa, may mga babayi nga nakighilawas sa  madamo nga lalaki. Sa pagkamatuod, malain ini. Ginatawag sang Biblia ini nga mga babayi nga mga makihilawason.

Isa ka bes, ang subong sini nga babayi nakabati tuhoy kay Jesus, kag ginkadtuan niya si Jesus sa balay sang isa ka Fariseo. Ginbubuan niya sing lana ang mga tiil ni Jesus kag ginpahiran sang iya buhok ang iya mga luha nga nagtulo sa tiil ni Jesus. Naghinulsol gid sia sa iya mga sala, amo nga ginpatawad sia ni Jesus. Apang para sa Fariseo, indi sia dapat patawaron.—Lucas 7:36-50.

Nahibaluan mo bala kon ano ang ginsiling ni Jesus sa pila ka Fariseo?— Ginsilingan niya sila: “Ang mga makihilawason magauna sa inyo sa ginharian sang Dios.” (Mateo 21:31) Ginsiling ini ni Jesus bangod ang mga makihilawason nagtuo sa iya, kag ginbag-o nila ang ila malain nga mga dalanon. Apang ang mga Fariseo padayon nga naghimo sing malain nga mga butang sa mga disipulo ni Jesus.

Gani kon ginasiling sang Biblia nga ang aton ginahimo malain, dapat kita magbag-o. Kag kon mahibaluan naton ang luyag ipahimo sa aton ni Jehova, dapat kita malangkag nga himuon ini. Nian malipay sa aton si Jehova kag hatagan niya kita sing kabuhi nga walay katapusan.