Uzou Avọ 25

Kọ Ahwo Nọ A Re Ru Eware Iyoma A Rẹ Sai Nwene?

KỌ U gbe woma gaga otẹrọnọ ohwo kpobi o re ru ewoma ọvo?— Rekọ uvumọ ohwo nọ o re ru oware uwoma ọvo ẹsikpobi ọ riẹ hẹ. Kọ whọ riẹ oware nọ mai kpobi a je ru eware iyoma dede nọ ma gwọlọ ru uwoma?— Fikinọ a yẹ omai kpobi avọ izieraha. Rekọ ahwo jọ a re ru eware nọ i yoma gaga. A mu kpahe amọfa yọ a re keke aro fihọ ru amọfa oware uyoma. Kọ who roro nnọ a sai nwene re a jọ ahwo woma?—

Rri ọzae nọ ọ be rọ ẹro te iwu ahwo nọ a be rọ itho fi Stivin na. Odẹ Hibru riẹ họ Sọl, rekọ odẹ Rom riẹ kọ Pọl. Eva e be were iẹe inọ a bi kpe Stivin, olele ọ Owuhrẹ Ologbo na. Joma ruẹ oware nọ Sọl o ro ru eware iyoma itieye.

Sọl ọ jọ omọvo ẹko ahwo egagọ Ju nọ a re se Farisi. Otu Farisi na a wo Ẹme Ọghẹnẹ, rekọ iwuhrẹ ọ isu egagọ rai jọ a be mae gaviezọ kẹ. Onana o wọ Sọl je ru eware iyoma.

Okenọ a mu Stivin evaọ Jerusalẹm, Sọl ọ jọ etẹe. A tẹ rehọ Stivin kpohọ okọto, oria nọ otu Farisi a jẹ rrọ iguẹdhọ. Dede nọ a ta eware iyoma mu kpahe Stivin, ozọ u mu rie he. Ọ ta ẹme ududu ọ tẹ jẹ ta eme iwoma kpahe Jihova Ọghẹnẹ jẹ kpahe Jesu.

Rekọ eme nọ a yo e were iguẹdhọ na ha. A riẹ kpahe Jesu gaga no. Evaọ uzẹme, u ri kri nọ a kpe Jesu hu! Rekọ uwhremu  na, Jihova ọ tẹ rehọ Jesu zihe kpohọ odhiwu. Enẹna, ukpenọ a re nwene idhere rai, iguẹdhọ na a tẹ be họre ilele Jesu.

Iguẹdhọ na a kru Stivin a tẹ rehọ iẹe kpohọ otafe okpẹwho na. A tehe riẹ kie a tẹ rọ itho fi ei. Yọ, wọhọ epanọ whọ rẹ sae jọ uwoho na ruẹ na, Sọl o dikihẹ etẹe bi rri. O roro nọ u woma re a kpe Stivin.

Kọ whọ riẹ oware nọ o lẹliẹ Sọl roro ere na?— Whaọ, ohwo Farisi Sọl ọ rrọ no otọ ze, yọ ọ rọwo inọ iwuhrẹ otu Farisi na e gba. Ọ rehọ otu Farisi na wọhọ ahwo oriruo, fikiere ọ tẹ jẹ rọ aro kele ai.—Iruẹru 7:54-60.

Nọ a kpe Stivin no, eme Sọl o ru?— Whaọ, ọ gwọlọ edhere nọ o re ro kpe ilele Jesu edekọ no! Ọ rẹ ruọ eva iwou rai o ve si ezae gbe eyae na ruọ otafe. O ve fi ai họ uwou-odi. Ilele na buobu a tẹ dhẹ no Jerusalẹm, rekọ a siọ usiuwoma kpahe Jesu ba ẹta ha.—Iruẹru 8:1-4.

 Onana o tẹ lẹliẹ Sọl mukpahe ilele Jesu viere. Fikiere ọ tẹ nya bru Kayafas, Ozerẹ Okpehru na, ọnọ ọ kẹ riẹ obe udu nọ o re ro mu Ileleikristi evaọ okpẹwho Damaskọs. Sọl ọ gwọlọ mu ai ziọ Jerusalẹm re a kẹ ae uye. Rekọ nọ ọ rrọ edhere bi kpohọ Damaskọs na, oware igbunu jọ o tẹ via.

Elo jọ o te lo no odhiwu ze, urru jọ o tẹ ta nọ: “Sọl, Sọl, fikieme whọ jẹ rọ omẹ ekpokpo?” Jesu ọ be ta ẹme no odhiwu ze na! Elo na ọ ga te epanọ o ro tu Sọl aro, ahwo nọ a jọ kugbe Sọl a te kru rie obọ su kpohọ Damaskọs.

Edẹ esa e vrẹ no, Jesu ọ tẹ rọ oma via evaọ eruẹaruẹ kẹ olele riẹ jọ evaọ Damaskọs nọ a re se Ananias. Jesu ọ ta kẹ Ananias re ọ nya bru Sọl, re o rovie aro riẹ, re o je lele iei ta ẹme. Nọ Ananias o lele Sọl ta ẹme, ọ tẹ jẹ uzẹme kpahe Jesu rehọ. Aro riẹ o te rovie. Uzuazọ riẹ kpobi u te nwene, o te ti zihe ruọ odibo ẹrọwọ Ọghẹnẹ.—Iruẹru 9:1-22.

Kọ enẹna whọ ruẹ oware nọ o jẹ lẹliẹ Sọl ru eware iyoma na no?— Fikinọ a wuhrẹ i rie eware ethọthọ. O je lele ahwo nọ a jẹ rọ eva efuafo gọ Ọghẹnẹ hẹ. Yọ ọ jọ usu kugbe ahwo nọ a fi iroro ahwo-akpọ họ aro Ẹme Ọghẹnẹ. Rekọ fikieme Sọl o ro nwene uzuazọ riẹ je mu ewoma họ eru, dede nọ otu Farisi efa a gbẹ jẹ họre wọso Ọghẹnẹ?— Fikinọ orọnikọ Sọl o ghine mukpahe uzẹme na ha. Fikiere nọ a dhesẹ oware nọ o gba kẹe, ọ tẹ jẹe rehọ.

Kọ whọ riẹ ohwo nọ Sọl o ti zihe ro uwhremu na?— A tẹ te riẹ e wọhọ Pọl ukọ na, ukọ Jesu. Yọ kareghẹhọ, Pọl o kere ebe Ebaibol bu vi omọfa kpobi.

Ahwo buobu wọhọ Sọl a riẹ nọ a rẹ sai nwene. Rekọ o lọhọ  họ keme ohwo jọ o bi gele ai ru eware iyoma na. Kọ whọ riẹ ohwo na?— Jesu ọ ta ẹme kpahe iẹe evaọ okenọ ọ rehọ oma via kẹ Sọl evaọ edhere Damaskọs. Evaọ etẹe, Jesu ọ ta ẹme kẹ Sọl no odhiwu ze inọ: ‘Me bi vi owhẹ re who rovie aro ahwo no ebi ziọ elo je no ogaga Setan ze bru Ọghẹnẹ.’—Iruẹru 26:17, 18.

Ẹhẹ, Setan Ẹdhọ họ ọnọ ọ be dao oma gele ahwo kpobi ru eware iyoma. Kọ o rẹ jọ bẹbẹ kẹ owhẹ ẹsejọ re who ru oware nọ u woma?— O rẹ via kẹ omai kpobi. Setan o bi ru ei bẹbẹ. Rekọ oware ofa jọ o soriẹ ze nọ o gbẹ rrọ lọhọ ẹsikpobi hi re ma ru oware nọ u woma. Kọ whọ riẹ oware na?— Fikinọ a rọ izieraha yẹ omai.

Uzioraha nana u re ru ei lọhọ ẹsibuobu re ma ru oware nọ o thọ viukpọ onọ u woma. Fikiere, eme o fo nọ ma re ru?— Ẹhẹ, ma rẹ dao oma kpobi re ma ru oware nọ u woma. Ma te ru ere, u re mu omai ẹro nnọ Jesu, ọnọ o you omai na, o ti fi obọ họ kẹ omai.

Okenọ Jesu ọ jọ otọakpọ, o you enọ i je ru eware iyoma vẹre rekọ nọ i nwene no. Ọ riẹ epanọ o bẹ te kẹ ai re a nwene.  Wọhọ oriruo, eyae jọ e jariẹ nọ i je lele ezae buobu wezẹ. Nọ oware uyoma. Ebaibol na i se eyae nana igberẹ.

Okejọ o jariẹ nọ aye otiọye na jọ o yo kpahe Jesu, ọ tẹ ziọ oria nọ ọ jọ eva uwou ohwo Farisi jọ. O te ku udẹ họ awọ Jesu ọ tẹ rọ eto riẹ ririe irui-oviẹ riẹ no awọ riẹ. Izieraha riẹ e da riẹ gaga, fikiere Jesu ọ tẹ rọ vrẹ riẹ. Rekọ ohwo Farisi na o roro nnọ u fo re a rọ vrẹ riẹ hẹ.—Luk 7:36-50.

Kọ whọ riẹ ẹme nọ Jesu ọ ta kẹ otu Farisi na jọ?— Ọ ta kẹ ae nọ: “Igberedha a rẹ te kake rọ owhai ruọ uvie Ọghẹnẹ.” (Matiu 21:31) Jesu ọ ta ere keme igberẹ na a fi ẹrọwọ họ iẹe, a te nwene idhere iyoma rai. Rekọ otu Farisi na a gbe je ru eware iyoma kẹ ilele Jesu.

Fikiere okenọ Ebaibol na e tẹ ta nọ oware nọ ma bi ru o thọ, u re no omai eva ze re ma nwene. Yọ ma te wuhrẹ kpahe oware nọ Jihova ọ gwọlọ nọ ma ru, oma o rẹ kpakpa omai ru ei. Eva mai e vẹ te were Jihova ọ vẹ te kẹ omai uzuazọ ebẹdẹ bẹdẹ.

Re u fi obọ họ kẹ omai whaha eruo oware uyoma, joma se eria enana kugbe: Olezi 119:9-11; Itẹ 3:5-7; gbe 12:15.

[Uwoho nọ o rrọ ẹwẹ-obe avọ 133]

Fikieme Sọl o ro roro nọ u kiehọ re a kpe Stivin?

[Uwoho nọ o rrọ ẹwẹ-obe avọ 135]

Ono ọ be ta ẹme kẹ Sọl na, kọ eme O bi vi Sọl nnọ o ru?

[Uwoho nọ o rrọ ẹwẹ-obe avọ 136]

Fikieme Jesu ọ jẹ rọ vrẹ aye nana nọ o ru eware iyoma no na?