KAPU 25

Keti Bayina Kesalaka Mambu ya Mbi Lenda Soba?

KETI yo zolaka kuvanda mbote ve kana bantu yonso vandaka kusala mambu ya mbote?— Kansi ata muntu mosi ve kesalaka kaka mambu ya mbote. Keti nge mezaba sambu na nki beto yonso kesalaka mambu ya mbi bantangu yankaka ata na ntangu ya beto kezola kusala mambu ya mbote?— Sambu beto yonso mebutukaka ti masumu. Kansi bantu mingi kesalaka mambu ya mbi mingi mpenza. Bo kezolaka ve bantu yankaka mpi bo kemonisaka bo mpasi na luzolo yonso. Keti nge keyindula nde bo le soba mpi bo le longuka na kuvanda bantu ya mbote?—

Tala mwana-bakala yai ketanina bakazaka ya zulu ya bantu yina ke na kulosila Etiene matadi. Na Kiebreo zina na yandi kele Saule, kansi na ndinga ya bantu ya Roma bo kebingaka yandi Polo. Yandi kesepela na mutindu bo ke na kufwa Etiene, yina kele longoki ya Longi ya Nene. Beto tala sambu na nki Saule kesala mambu ya mbi ya mutindu yina.

Saule kuvandaka mambre ya kibuka ya dibundu mosi ya Bayuda yina bo vandaka kubinga nde Bafarize. Bafarize kuvandaka ti Ndinga ya Nzambi, kansi bo vandaka kutula dikebi mingi na malongi ya bantwadisi yankaka ya dibundu na bo. Yo yina vandaka kunata Saule na kusala mambu ya mbi.

Ntangu bo kangaka Etiene na Yeruzalemi, Saule kuvandaka pana. Bo nataka Etiene na tribinale, kisika bazuzi mingi kuvandaka Bafarize. Ata bo tubilaka Etiene mambu ya mbi, yandi kuwaka ve boma. Yandi tubaka ti kikesa yonso mpi yandi taka kimbangi ya mbote na bazuzi sambu na yina metala Yehowa Nzambi ti Yezu.

Kansi bazuzi yina kusepelaka ve na mambu ya bo waka. Bo vandaka kuzaba dezia mambu mingi ya metala Yezu. Nkutu, mwa ntangu fyoti kaka na ntwala ya dikambu yai, bo fwaka Yezu! Kansi na nima, Yehowa kuvutulaka  Yezu na zulu. Ntangu yai, na kisika ya kusoba bikalulu na bo, bazuzi vandaka kunwanisa balongoki ya Yezu.

Bazuzi kukangaka Etiene mpi bo basisaka yandi na nganda ya bwala. Bo bulaka yandi tii kuna yandi bwaka na ntoto mpi bo losilaka yandi matadi. Saule vandaka pana mpi yandi vandaka kutala, mutindu nge le mona na kifwanisu. Yandi vandaka kuyindula nde kufwa Etiene kuvandaka dyambu mosi ya mbote.

Keti nge mezaba sambu na nki Saule vandaka kuyindula mutindu yina?— Sambu na luzingu na yandi yonso Saule kuvandaka Mufarize, mpi yandi vandaka kukwikila nde malongi ya Bafarize kuvandaka ya mbote. Yandi vandaka kumona bantu yina bonso bambandu, yo yina yandi vandaka kusala bonso bo.—Bisalu 7:54-60.

Na nima ya kufwa Etiene, inki mambu Saule kusalaka?— Yandi sosaka kufwa balongoki ya Yezu yonso! Yandi vandaka kukwenda mbala mosi na banzo na bo sambu na kubasisa bo na ngolo, babakala ti bankento. Ebuna, yandi vandaka kutula bo na boloko. Yo lombaka nde balongoki mingi kutina Yeruzalemi, kansi bo yambulaka ve na kulonga mambu ya Yezu.—Bisalu 8:1-4.

 Yo yina kima kupusaka Saule na kumenga balongoki ya Yezu mingi dyaka. Ebuna, yandi kwendaka na Kaifa, Mfumu ya banganga-Nzambi sambu na kubaka nswa ya kwenda kukanga Bakristu na Damasi. Saule zolaka kunata bo na boloko na Yeruzalemi sambu bo pesa bo ndola. Kansi, dyambu mosi ya kuyituka kibeni kusalamaka na nzila ntangu yandi vandaka kwenda na Damasi.

Nsemo mosi ya katukaka na zulu kubasikaka, mpi ndinga mosi kutubaka nde: “Saule, Saule, sambu na nki nge ke monisa mono mpasi?” Yina Yezu muntu vandaka kutuba katuka na zulu! Nsemo kuvandaka ngolo mpenza na mpila nde yo fwaka meso ya Saule, ebuna yo lombaka nde bantu yina kuvandaka ti yandi kunata yandi na Damasi.

Bilumbu tatu na nima, Yezu kumonanaka na mbona-meso na longoki na yandi mosi na zina ya Ananiasi na Damasi. Yezu kutubilaka Ananiasi nde yandi kwenda kutala Saule sambu na kubelula meso na yandi, mpi na kusolula ti yandi. Ntangu Ananiasi kusolulaka ti Saule, Saule kundimaka kyeleka ya metala Yezu. Meso na yandi kukangukaka. Luzingu na yandi yonso kusobaka, mpi yandi kumaka nsadi ya kwikama ya Nzambi.—Bisalu 9:1-22.

Ntangu yai, keti nge kebakisa sambu na nki Saule vandaka kusala mambu ya mbi?— Sambu bo longaka yandi mambu ya mbi. Yandi vandaka kulanda bantu yina kuvandaka ve ya kwikama na Nzambi. Mpi yandi vandaka na kibuka mosi ya bantu yina vandaka kumona nde bangindu ya bantu ke mfunu mingi kuluta Ndinga ya Nzambi. Kansi sambu na nki Saule kusobaka luzingu na yandi mpi yantikaka na kusala mambu ya mbote, ata Bafarize yankaka kulandaka kaka na kunwanisa Nzambi?— Saule kusalaka mpidina sambu yandi vandaka ve kumenga mpenza kyeleka. Yo yina ntangu bo songaka yandi mambu yina kuvandaka mbote, yandi ndimaka na kusala yo.

Keti nge kezaba kana Saule kukumaka nani na nima?— Ee, yandi zabanaka bonso ntumwa Polo, ntumwa ya Yezu. Mpi yibuka nde, Polo kusonikaka mikanda mingi ya Biblia kuluta bantu yonso yankaka.

Bantu mingi mpi le soba bonso Saule. Kansi yo ke pete ve sambu ke ti muntu mosi kesalaka yonso sambu na kupusa bantu na kusala mambu ya  mbi. Keti nge mezaba muntu yango?— Yezu kutubilaka yandi ntangu yandi monanaka na Saule na nzila ya Damasi. Kuna Yezu kutubaka na Saule katuka na zulu nde: ‘Mono ke tinda nge na kwenda kukangula meso ya bantu, ebuna bo ta katuka na mpimpa, bo ta kwisa na mwini; bo ta katuka na ngolo ya Satana, bo ta kwisa na Nzambi.’—Bisalu 26:17, 18.

Ee, Satana Dyabulu muntu kesosaka kupusa bantu yonso na kusala mambu ya mbi. Keti bantangu yankaka nge kemonaka nde kusala mambu ya mbote kevandaka mpasi?— Beto yonso kemonaka mutindu yina. Satana muntu kesalaka nde yo vanda mpasi. Kansi kele ti kikuma yankaka ya kesalaka nde kusala mambu ya mbote ntangu yonso kuvanda ve dyambu mosi ya pete. Keti nge mezaba kikuma yango?— Sambu beto mebutukaka ti masumu.

Disumu yango kesalaka nde beto sala mambu ya mbi mbala mingi kukonda mpasi na kisika ya kusala mambu ya mbote. Yo yina, inki beto fwe sala?— Beto fwe nwanaka sambu na kusala mambu ya mbote. Kana beto kesala mpidina, beto le tula ntima nde Yezu, yina kezolaka beto, tasadisa beto.

Ntangu Yezu kuvandaka na ntoto, yandi monisaka nde yandi vandaka kuzola bantu yina vandaka kusala ntete mambu ya mbi kansi bo sobaka na nima. Yandi zabaka nde bo monaka mpasi mpenza sambu na kusoba. Mu mbandu, kuvandaka ti  bankento yina vandaka kuvukisa nitu ti babakala mingi. Ntembe kele ve nde yo vandaka dyambu ya mbi. Biblia kebingaka bankento ya mutindu yina nde bandumba.

Kilumbu mosi, nkento mosi ya ndumba kuwaka mambu ya metala Yezu, ebuna yandi kwendaka kisika ya Yezu kuvandaka na nzo ya Mufarize mosi. Yandi tyamunaka mananasi na makulu ya Yezu mpi yandi sadilaka nsuki na yandi sambu na kudipa mansanga na yandi na makulu ya Yezu. Yandi waka mawa mpenza sambu na masumu na yandi, yo yina Yezu kulolulaka yandi. Kansi, Mufarize yina kuyindulaka nde bo fwe lolula ve nkento yina.—Luka 7:36-50.

Keti nge mezaba dyambu yina Yezu kutubilaka Bafarize?— Yandi tubilaka bo nde: “Bankento yina ke salaka kindumba bo ta kota na Kimfumu ya Nzambi na ntwala na beno.” (Matayo 21:31) Yezu kutubaka mpidina sambu bandumba kukwikilaka na yandi, mpi bo bikisaka bikalulu na bo ya mbi. Kansi Bafarize kulandaka na kusadila balongoki ya Yezu mambu ya mbi.

Yo yina, kana Biblia kesonga beto nde mambu ya beto kesala kele ya mbi, beto fwe ndima na luzolo yonso na kuyambula yo. Mpi na ntangu beto kelonguka mambu yina Yehowa kezolaka nde beto sala, beto fwe wa mpusa ya kusala yo. Ebuna Yehowa tasepela ti beto mpi yandi tapesa beto luzingu ya mvula na mvula.

Sambu na kusadisa beto na kubuya mambu ya mbi, beto tanga kumosi Nkunga 119:9-11; Bingana 3:5-7; mpi 12:15.

[Kifwanisu ya kele na lutiti 133]

Sambu na nki Saule keyindula nde yo kele mbote na kufwa Etiene?

[Kifwanisu ya kele na lutiti 135]

Nani ke na kutuba na Saule, mpi Yandi ketinda Saule na kusala inki?

[Kifwanisu ya kele na lutiti 136]

Sambu na nki Yezu kulolulaka nkento yai ya vandaka kusala mambu ya mbi?