KORŨO andũ othe mekaga maũndũ mega-rĩ, githĩ gũtingĩrĩ kwega mũno?— No gũtirĩ mũndũ wĩkaga maũndũ mega hĩndĩ ciothe. Nĩ ũĩ kĩrĩa gĩtũmaga rĩmwe twĩke maũndũ moru, o na tũkĩendaga gwĩka maũndũ mega?— Nĩ tondũ ithuothe tũciaragwo tũrĩ na mehia. No andũ amwe nĩ mekaga maũndũ maingĩ moru mũno. Nĩ mamenete andũ arĩa angĩ na nĩ mamekaga maũndũ moru makĩendaga. Hihi nĩ ũkuona ta mangĩcenjia matuĩke andũ ega?—

Ta rora mbica-inĩ wone mũndũ ũrĩa ũrũgamĩte hakuhĩ na nguo cia arĩa marahũũra Stefano na mahiga. Eetagwo Saulu na Kĩĩhibirania, no na Kĩĩroma eetagwo Paulo. Nĩ arakena akĩona Stefano, mũrutwo wa Mũrutani Ũrĩa Mũnene, akĩũragwo. Reke tuone kĩrĩa gĩatũmaga Saulu eke maũndũ macio moru.

Saulu aarĩ wa ndini ya Afarisai. Afarisai acio nĩ maakoragwo na Kiugo kĩa Ngai, no nĩ maatĩĩte morutani ma atongoria ao gũkĩra Kiugo kĩa Ngai. Ũndũ ũcio nĩguo watũmaga Saulu eke maũndũ moru.

Hĩndĩ ĩrĩa Stefano aanyitirũo arĩ Jerusalemu, Saulu aarĩ ho. Stefano aacokire agĩtwarũo igooti-inĩ, na acirithania amwe maarĩ Afarisai. O na gũtuĩka andũ nĩ moigire atĩ Stefano nĩ eekĩte maũndũ moru, we ndaamakire. Aaririe ategwĩtigĩra na akĩhunjĩria acirithania acio ũhoro wĩgiĩ Jehova Ngai na Jesu.

No acirithania acio matiakenirio nĩ ũhoro ũcio. Nĩ mooĩ maũndũ maingĩ megiĩ Jesu. Mbere ĩyo acirithania acio nĩ moragithĩtie  Jesu! No thutha ũcio Jehova akĩmũcokia igũrũ. Handũ ha gũcenjia mĩthiĩre yao, acirithania acio nĩ kũrakara marakarĩire arutwo a Jesu.

Acirithania acio makĩnyita Stefano na makĩmũtwara nja ya itũũra rĩu. Makĩmũgũtha nginya akĩgũa thĩ na makĩambĩrĩria kũmũhũũra na mahiga. Na o ta ũrĩa ũrona mbica-inĩ, Saulu aarĩ hau akĩĩrorera. Onaga kũũraga Stefano ũrĩ ũndũ mwega.

Hihi nĩ ũĩ kĩrĩa gĩatũmaga Saulu ecirie gwĩka ũguo nĩ wega?— Nĩ tondũ aatũire arĩ Mũfarisai, na eetĩkĩtie atĩ morutani ma Afarisai nĩ mega. Onaga atongoria a Afarisai marĩ kĩonereria kĩega, na nĩkĩo ekaga tao.—Atũmwo 7:54-60.

Hihi nĩ ũĩ ũrĩa Saulu eekire thutha wa Stefano kũũragwo?— Aageririe kũniina arutwo acio angĩ a Jesu. Aathiaga nginya mĩciĩ-inĩ yao akamaruta kuo othe, athuri o na atumia. Agacoka akamatwara maikio njera. Arutwo aingĩ nĩ maathamire Jerusalemu no matiatigire kũhunjia ũhoro wĩgiĩ Jesu.—Atũmwo 8:1-4.

 Ũndũ ũcio nĩ watũmire Saulu amene arutwo a Jesu makĩria. Kwoguo agĩthiĩ kũrĩ Kaiafa Mũthĩnjĩri-Ngai-Mũnene, nĩguo aheo rũtha rwa kũnyita Akristiano thĩinĩ wa itũũra rĩa Dameski. Saulu eendaga kũmatwara Jerusalemu nĩguo maherithio. No arĩ njĩra-inĩ agĩthiĩ Dameski, nĩ harĩ ũndũ wa magegania wekĩkire.

Aamũrĩkirũo nĩ ũtheri kuuma igũrũ na akĩigua mũgambo ũkĩmũũria ũũ: “Saulu, Saulu, ũranyarira nĩkĩ?” Jesu nĩwe wamwaragĩria arĩ igũrũ! Ũtheri ũcio warĩ mũnene mũno nginya ũgĩtũma Saulu atuĩke mũtumumu. Andũ arĩa maarĩ hamwe nake nĩo maamũteithirie gũkinya Dameski.

Thutha wa thikũ ithatũ, Jesu akiumĩrĩra mũrutwo wake wetagwo Anania kũu Dameski na njĩra ya kĩoneki. Jesu akĩra Anania athiĩ kũrĩ Saulu nĩguo arie nake na amũhingũre maitho. Rĩrĩa Saulu aatarĩirio nĩ Anania ũhoro wĩgiĩ Jesu, nĩ aawĩtĩkĩrire. Namo maitho make makĩambĩrĩria kuona rĩngĩ. Ũtũũro wake wothe ũgĩcenjia, na agĩtuĩka ndungata njĩhokeku ya Ngai.—Atũmwo 9:1-22.

Hihi nĩ wamenya kĩrĩa gĩatũmaga Saulu eke maũndũ moru?— Nĩ tondũ aarutĩtwo maũndũ moru. Aarũmagĩrĩra andũ mataarĩ ehokeku harĩ Ngai. Ningĩ aarĩ wa gĩkundi kĩa andũ maatĩĩte mawoni ma andũ gũkĩra Kiugo kĩa Ngai. No nĩ kĩĩ gĩatũmire Saulu acenjie ũtũũro wake na ambĩrĩrie gwĩkaga maũndũ mega, o na gũtuĩka Afarisai acio angĩ maathiire na mbere gũkararia Ngai?— Nĩ tondũ Saulu ndaamenete ũhoro wa ma. Kwoguo rĩrĩa onirio maũndũ marĩa magĩrĩire, akĩambĩrĩria kũmeka.

Hihi nĩ ũĩ thutha-inĩ Saulu aatuĩkire ũ?— Nĩwe wacokire gũtuĩka mũtũmwo wa Jesu, ũrĩa wĩtagwo mũtũmwo Paulo. Ningĩ ririkana atĩ Paulo nĩwe waandĩkire mabuku marĩa maingĩ ma Bibilia gũkĩra andũ acio angĩ othe.

O ta Saulu, kũrĩ andũ aingĩ mangĩcenjia. No ti ũndũ mũhũthũ tondũ nĩ harĩ kĩũmbe kĩgeragia mũno kũhĩtithia andũ nĩguo meke  maũndũ moru. Hihi nĩ ũĩ kĩũmbe kĩu nĩ kĩrĩkũ?— Jesu nĩ aaririe ũhoro wa kĩũmbe kĩu rĩrĩa oimĩrĩire Saulu arĩ njĩra-inĩ agĩthiĩ Dameski. Hĩndĩ ĩyo Jesu aarĩirie Saulu kuuma igũrũ akĩmwĩra ũũ: ‘Ndĩragũtũma ũkahingũre andũ maitho, ũmarute nduma-inĩ ũmarehe ũtheri-inĩ, na ũmarute wathani-inĩ wa Shaitani ũmarehe harĩ Ngai.’—Atũmwo 26:17, 18.

Kĩũmbe kĩu nĩ Shaitani ũrĩa Mũcukani, ũrĩa ũgeragia kũhĩtithia andũ othe nĩguo meke maũndũ moru. Hihi nĩ kũrĩ hĩndĩ ũiguaga ũrĩ ũndũ mũritũ gwĩka ũrĩa kwagĩrĩire?— Ithuothe nĩ tũiguaga ũguo. Shaitani nĩwe ũtũmaga tũritũhĩrũo. No nĩ harĩ ũndũ ũngĩ ũtũmaga rĩmwe tũritũhĩrũo nĩ gwĩka ũrĩa kwagĩrĩire. Hihi nĩ ũĩ nĩ ũndũ ũrĩkũ ũcio?— Nĩ mehia marĩa tũciaragwo namo.

Mehia macio nĩmo kaingĩ matũmaga ũkorũo ũrĩ ũndũ mũhũthũ gwĩka maũndũ marĩa moru gũkĩra gwĩka marĩa mega. Kwoguo-rĩ, twagĩrĩirũo gwĩka atĩa?— No mũhaka twĩrutanĩrie biũ gwĩka maũndũ marĩa mega. Tweka ũguo, nĩ tũrĩkoragwo na ma atĩ Jesu nĩ egũtũteithia, tondũ nĩ atwendete.

Rĩrĩa Jesu aarĩ gũkũ thĩ, andũ arĩa meekĩte maũndũ moru no magĩcenjia nĩ aamonirie wendo. Nĩ aamenyaga atĩ ndwarĩ ũndũ mũhũthũ harĩ o gũcenjia. Kwa  ngerekano, nĩ kwarĩ atumia maakomanagia na arume aingĩ. Ũndũ ũcio warĩ mũru mũno. Bibilia ĩtaga atumia ta acio ahũri maraya.

Harĩ hĩndĩ mũtumia ũmwe ta ũcio aaiguire ũhoro wa Jesu, na agĩthiĩ mũciĩ kwa Mũfarisai ũmwe tondũ nĩ kuo Jesu aarĩ. Nĩ aahuurire magũrũ ma Jesu maithori na njuĩrĩ yake, na akĩmahaka maguta. Nĩ aaherete mũno nĩ ũndũ wa mehia make, nĩ ũndũ ũcio Jesu akĩmuohera. No Mũfarisai ũcio ndoonaga ta mũtumia ũcio agĩrĩirũo kuoherũo.—Luka 7:36-50.

Hihi nĩ ũĩ hĩndĩ ĩmwe ũrĩa Jesu eerire Afarisai amwe?— Aamerire ũũ: “Ahũri maraya magaatonya Ũthamaki-inĩ wa Ngai mbere yanyu.” (Mathayo 21:31) Jesu oigire ũguo tondũ ahũri maraya nĩ maamwĩtĩkirie, na magĩcenjia mĩtugo yao mĩũru. No Afarisai maathiire na mbere gwĩka arutwo a Jesu maũndũ moru.

Kwoguo rĩrĩa Bibilia yatwĩra atĩ ũndũ ũrĩa tũreka nĩ mũru, nĩ twagĩrĩirũo gwĩtĩkĩra gũcenjia. Na rĩrĩa tweruta maũndũ marĩa Jehova endaga twĩke, twagĩrĩirũo kũmeka tũtekũringĩrĩrio. Tweka ũguo, Jehova nĩ arĩkenagio nĩ ithuĩ, na nĩ agaatũhe muoyo wa tene na tene.