NUANNISSAGALUARPOQ inuit tamarmik ajunngitsuliortuaannaraluarpata, ilaa? — Taamaanngilarli. Inoqanngilaq ajunngitsuliortuaannartumik. Nalunngiliuk sooq ajunngitsuliorusukkaluarluta tamatta ilaannikkut kukkusartugut? — Tassa ajorteqarluta inunngornikuugatta. Inoqarporli ajortuliorujussuartartunik. Inuit ilaasa inuit allat uumigaat piaaralutillu ajortumik pisarlugit. Isumaqarpit allanngorsinnaallutillu ileqqorinnerulersinnaasut? —

Takoriassagit angut inuusuttoq Stefanusimut ujaqqanik milloortut atisaannik paarsisoq. Taassuma hebræerisut ateraa Sauli, imaluunniit Saulusi, Romamiutulli ateraa Paulusi. Stefanusi Ajoqersuisorsuup ajoqersugaraa, allaat Saulusi nuannaarpoq Stefanusi toqutaammat. Maanna tusassavat sooq taama ajortigisumik ilioqataanersoq.

Saulusi juutinut farisiiarinik taaneqartartunut ilaavoq. Taakkua Guutip oqaasii pigigaluarpaat, namminnerli upperisarsiornikkut ajoqersuisumik ilaasa oqaasii naalanneruaat. Tamannaana pissutigalugu Saulusi ajortumik iliortoq.

Jerusalemimi Stefanusi tigusaammat Saulusi najuuppoq. Stefanusi eqqartuussisunut sassartitaavoq, taakkualu ilaat farisiiariupput. Stefanusimut pasilliuterpassuaqarpoq, annilaanganngilarli. Ingerlaannaq oqalulerpoq eqqartuussisullu Jehova Guuti Jiisusilu pillugit oqaluttuutilerlugit.

Eqqartuussisut tamanna nuannarinngilaat. Jiisusi pillugu ilisimasaqarluarput, taakkuami toqumut eqqartuuteqqammerpaat! Jiisusi toqummat  Jehovap qilammut imminut pisippaa. Eqqartuussisulli Jiisusip toqunerata kingorna ileqqorinnerulersimanngillat, ajoqersugaalu malersortuarpaat.

Eqqartuussisut angutinut Stefanusi illoqarfiup avataanukaatsippaat. Angutit Stefanusi nunamut uppitippaat ujaqqanillu milloorlugu. Tamanna Saulusip nikorfalluni isiginnaaraa assiliartaani takusinnaavarput. Saulusi isumaqarpoq ajunngilluinnartoq Stefanusi toqutaammat.

Sooq Saulusi taama isumaqarsoraajuk? — Taama isumaqarpoq inuunini tamaat farisiiariusimagami, farisiiarillu siulersuisuisa oqaasii eqqorsorigamigit. Maligassatut isigigamigit ilaarusuppai. — Apustilit Suliaat 7:54-60.

Stefanusi toqutaavoq. Saulusi kingorna qanoq iliorpa? — Jiisusip ajoqersugaasa sinneri toqutaatinniarpai! Angerlarsimaffiinut iseriarluni angutit arnallu aallaruttarpai. Parnaarussivimmullu inissitsittarlugit. Ajoqersukkat ilarpassui Jerusalemimiit aallartariaqarput, Jiisusili oqaluussissutigiunnaanngilaat. — Apustilit Suliaat 8:1-4.

 Tamanna pissutigalugu Saulusip Jiisusip ajoqersugai uumiginerulerpai. Taamaattumik palasiunermut Kajfasimukarpoq, akuersissummillu pilluni kristumiut Damaskusimiittut tamaasa tigusarinissaanut. Tigusatut Jerusalemimukaanniarpai pillagaaniassammata. Damaskusilli tungaanut ingerlatillugit naatsorsuutiginngisaanik pisoqarpoq.

Tassanngaannaq qilammit qaamanermit qinngorfigineqarpoq, imalu oqartoqarpoq: “Sauli, Sauli, sooq malersorpinga?” Jiisusiuna qilamminngaanniit oqaluttoq! Qaamaneq sakkortungaarmat Saulusi tappingerpoq, ilagisaasalu Damaskusiliaattariaqarpaat.

Ullut pingasut qaangiummata Jiisusi ajoqersukkamut Damaskusimiittumut Ananiamik atilimmut takorruuinikkut takutippoq. Jiisusip Anania peqquaa Saulusi pulaaqqullugu, tappissiteqqullugu oqaluussiffigeqqullugulu. Anania taamaaliorpoq, Saulusillu sallusuissut Jiisusimut tunngasoq upperilerpaa. Tappisseqqippoq. Maannamiit inuunera allanngorluinnarpoq. Guutimut kiffartortunngorpoq aalajaatsoq. — Apustilit Suliaat 9:1-22.

Paasiviuk sooq Saulusi taama ajortigisumut peqataasimasoq? — Tassa eqqunngitsumik ilinniartinneqarsimagami. Inuit Guutimut aalajaatsuunngitsut upperai. Immikkooqatigiinnullu inuit eqqarsaataannik Guutip oqaasianit pingaarnerutitsisunut ilaavoq. Farisiiarit allat suli Guutimut akiuukkaluartut, suna pissutigalugu Saulusi inuunerminik allannguillunilu ajunngitsuliulerpa? — Saulusi ilumoortumut akerliunngilaq. Eqqortoq sunaasoq qulariunnaaramiuk ingerlaannaq malilerpaa.

Nalunngiliuk Saulusi qanoq pinersoq? — Jiisusip apustiliinut ilannguppoq, apustili Paulusitullu nalunnginneqalerluni. Allaat Biibilip atuagartaasa ilaat allanit amerlanerusut allappai.

Aap, allanngortoqarsinnaavoq, soorlu Saulusi taama iliortoq. Immaqa ajornaatsuujuaannanngilaq. Tamaviaarluni inunnik eqqunngitsuliortitsiniaasoqarpoq. Nalunngiliuk kinaanersoq? — Jiisusip taassuma  kinaanera oqaluttuaraa Saulusi Damaskusiliartillugu qilammit oqaluukkamiuk. Ima oqarpoq: ‘Aallartissavagit inuit isaat uiseqqullugit, taartumiit qaamasumut Saatanillu pissaaneraniit Guutimut saanniassammata.’ — Apustilit Suliaat 26:17, 18.

Aap, Saatanimuna Diaavulup kikkut tamaasa Guutip ajorneragaanik iliortinniartarai. Eqqortumik iliornissaq ilaannikkut sapernartittarpiuk? — Tamatta taama isumaqarpugut. Saatanip sapernarnerulersittaramiuk. Eqqortumik iliornissap ajornakusoorsinnaaneranut aamma alla pissutaaqataavoq. Nalunngiliuk suna pissutaanersoq? — Tassa tamatta ajorteqarluta inunngoratta.

Ajortiliugatta eqqortuliornata eqqunngitsulioqqajaanerusarpugut. Qanoq iliorsinnaavugut? — Eqqortuliorniarluta ilungersortariaqarpugut. Ilungersorutta qularissanngilarput Jiisusip ikiussagaatigut, asagamitigut.

Jiisusip nunamiikkallarami eqqunngitsuliorsimallutik isumataarsimasut asalerpai. Nalunngilaa imminnut allanngortinniarnerat qanoq ajornakusoortigisoq. Assersuutigalugu taamanikkut arnaqarsimavoq aningaasarsiutigalugu anguterpassuarnik atoqateqartartunik. Tamanna soorunami eqqortuliornerunngilaq.  Biibilimi taakku atortittartunik inuunerluttunilluunniit taaneqartarput.

Ilaanni arnaq taamatut inuunerluttoq Jiisusi pillugu tusagaqarpoq, farisiiarillu illuaniitillugu ornippaa. Qullini isigaanut kusertut nutsaminik allarterpai uulialu tipigissoq isigaanut kuillugu. Ajortuliarpassuani aliasuutigingaarmagit Jiisusip isumakkeerfigaa. Farisiiarilli isumakkeerfigineqarsinnaasorinngilaat. — Lukasi 7:36-50.

Nalunngiliuk ilaanni Jiisusip farisiiarit ilaat qanoq oqarfigigai? — Ima oqarpoq: ‘Arnat atortittartut ilissinnit siulliullutik Guutip naalagaaffianut isissapput.’ (Matthæusi 21:31) Taama oqarpoq arnat atortittartut upperimmanni allamillu isumataarsimammata eqqunngitsuliornitik qimallugit. Farisiiarilli Jiisusip ajoqersugaanik ajortumik pinnittuarput.

Biibilimi atuarutsigu iliuutsivut eqqunngitsut, taava allanngortitsinissatsinnut piareersimasariaqarpugut. Paasigutsigulu Jehovap qanoq iliortikkusunneraatigut maleruarnissaanut pilerisariaqarpugut. Jehovap tamanna nuannaarutigissavaa, inuunermillu naassaanngitsumik tunissalluta.