ជំពូកទី២៥
តើអ្នកដែលធ្វើអំពើអាក្រក់អាចកែប្រែទេ?
បើមនុស្សគ្រប់គ្នាសុទ្ធតែធ្វើអំពើល្អគឺប្រសើរណាស់ មែនទេ?— ប៉ុន្តែ គ្មានអ្នកណាសុទ្ធតែធ្វើអំពើល្អជានិច្ចនោះទេ។ សូម្បីតែយើងចង់ធ្វើអំពើល្អក៏ដោយ តែជួនកាលយើងបែរជាធ្វើអំពើអាក្រក់ទៅវិញ។ តើកូនដឹងមកពីអ្វីទេ?— ដោយសារយើងទាំងអស់គ្នាកើតមកដោយមានភាពខុសឆ្គង។ ប៉ុន្តែ មនុស្សខ្លះធ្វើអំពើអាក្រក់ច្រើនណាស់។ ពួកគេស្អប់អ្នកឯទៀតហើយចូលចិត្តធ្វើបាបពួកគេ។ តើកូនគិតថាពួកគេអាចកែប្រែនិងរៀនធ្វើអំពើល្អបានឬទេ?—
សូមមើលយុវជនម្នាក់កំពុងឈរយាមសម្លៀកបំពាក់ក្រៅរបស់ពួកអ្នកដែលកំពុងគប់ស្ទេផាននឹងដុំថ្ម។ យុវជននោះមានឈ្មោះសុលជាភាសាហេប្រឺ តែឈ្មោះប៉ូលជាភាសារ៉ូម។ គាត់ពេញចិត្តឃើញពួកគេសម្លាប់ស្ទេផានជាអ្នកកាន់តាមគ្រូដ៏ល្អប្រសើរ។ សូមស្តាប់អំពីមូលហេតុដែលសុលធ្វើអំពើអាក្រក់។
សុលកាន់តាមក្រុមសាសនាយូដាមួយហៅថាផារិស៊ី។ ពួកផារិស៊ីមានបណ្ដាំរបស់ព្រះ តែពួកគេចូលចិត្តធ្វើតាមសេចក្ដីបង្រៀនរបស់ពួកអ្នកដឹកនាំសាសនាច្រើនជាង។ មូលហេតុនេះហើយ ដែលនាំឲ្យសុលធ្វើអំពើអាក្រក់។
ពេលដែលគេចាប់ស្ទេផាននៅក្រុងយេរូសាឡិម សុលក៏នៅទីនោះដែរ។ គេបាននាំយកស្ទេផានទៅតុលាការ នៅទីនោះពួកចៅក្រមខ្លះជាពួកផារិស៊ី។ ទោះជាគេនិយាយចោទប្រកាន់ស្ទេផានក្ដី តែគាត់មិនខ្លាចទេ។ គាត់បាននិយាយយ៉ាងក្លាហានទៅកាន់ពួកចៅក្រមទាំងនោះ ហើយបានធ្វើជាសាក្សីបញ្ជាក់ប្រាប់ពួកគេយ៉ាងសព្វគ្រប់អំពីព្រះយេហូវ៉ានិងលោកយេស៊ូ។
ប៉ុន្តែចៅក្រមទាំងនោះមិនពេញចិត្តស្តាប់អំពីរឿងនោះទេ។ ពួកគេដឹងអំពីរឿងលោកយេស៊ូច្រើនហើយ។ ការពិត រយៈពេលខ្លីមុននេះ ពួកគេកាត់ទោសលោកយេស៊ូឲ្យស្លាប់! ប៉ុន្តែ ក្រោយមកព្រះយេហូវ៉ាបានយកលោកយេស៊ូត្រឡប់ទៅស្ថានសួគ៌វិញ។ ចំណែកឯពួកចៅក្រម
ទាំងនោះមិនបានកែប្រែការប្រព្រឹត្តរបស់ខ្លួនទេ ផ្ទុយទៅវិញ ពួកគេបានប្រឆាំងនឹងអ្នកកាន់តាមលោកយេស៊ូ។ពួកចៅក្រមបានចាប់ស្ទេផានយកទៅក្រៅទីក្រុង។ ពួកគេវាយផ្ដួលគាត់ដល់ដីហើយគប់គាត់នឹងដុំថ្ម។ ដូចកូនឃើញក្នុងរូបភាពនេះ សុលកំពុងមើលនៅជិតនោះ។ គាត់គិតថាជាការត្រឹមត្រូវហើយដែលគេសម្លាប់ស្ទេផាន។
ហេតុអ្វីសុលគិតថាការសម្លាប់ស្ទេផានជាការត្រឹមត្រូវ?
ហេតុអ្វីសុលគិតដូច្នោះ? តើកូនដឹងទេ?— អស់មួយជីវិតសុល គាត់បានរៀនធ្វើជាផារិស៊ីម្នាក់ ហើយគាត់បានជឿថាសេចក្ដីបង្រៀនរបស់ពួកផារិស៊ីគឺត្រឹមត្រូវ។ គាត់ចាត់ទុកពួកផារិស៊ីជាគំរូល្អ ដូច្នេះគាត់ចង់ធ្វើតាមពួកគេ។—សកម្មភាព ៧:៥៤-៦០
ក្រោយពីគេសម្លាប់ស្ទេផាន តើសុលបានធ្វើអ្វី?— គាត់ព្យាយាមបំបាត់ចោលពួកអ្នកកាន់តាមលោកយេស៊ូដែលនៅសល់! គាត់សម្រុកចូលក្នុងផ្ទះរបស់ពួកគេតែម្ដង ហើយចាប់អូសទាំងប្រុសទាំងស្រីចេញមក រួចបញ្ជូនទៅគុក។ អ្នកកាន់តាមលោកយេស៊ូជាច្រើនបានចេញពីក្រុងយេរូសាឡិម ប៉ុន្តែពួកគេមិនបានឈប់ផ្សព្វផ្សាយអំពីលោកយេស៊ូទេ។—សកម្មភាព ៨:១-៤
នេះជាមូលហេតុមួយទៀតដែលសុលស្អប់អ្នកកាន់តាមលោកយេស៊ូកាន់តែខ្លាំងឡើង។
ដូច្នេះ គាត់បានទៅជួបសម្ដេចសង្ឃកៃផាដើម្បីសុំការអនុញ្ញាតទៅចាប់ពួកគ្រិស្ដសាសនិកនៅក្រុងដាម៉ាស។ សុលចង់ចាប់ពួកគេនាំមកក្រុងយេរូសាឡិមដើម្បីដាក់ទោស។ ប៉ុន្តែ កាលដែលគាត់កំពុងធ្វើដំណើរតាមផ្លូវទៅក្រុងដាម៉ាស មានការអស្ចារ្យមួយបានកើតឡើង។តើអ្នកណាកំពុងនិយាយមកកាន់សុល ហើយតើលោកបានចាត់សុលឲ្យទៅធ្វើអ្វី?
មានពន្លឺពីលើមេឃ ព្រមទាំងឮសំឡេងមួយបន្លឺមកថា៖ «សុល សុល ហេតុអ្វីអ្នកបៀតបៀនខ្ញុំ?»។ នេះជាសំឡេងរបស់លោកយេស៊ូពីស្ថានសួគ៌! ពន្លឺនេះគឺភ្លឺខ្លាំងណាស់រហូតធ្វើឲ្យសុលមើលអ្វីលែងឃើញ។ ដូច្នេះ អ្នកដែលទៅជាមួយគាត់ត្រូវជួយដឹកដៃគាត់នាំទៅក្រុងដាម៉ាស។
បីថ្ងៃក្រោយមក លោកយេស៊ូបានបង្ហាញខ្លួនឲ្យអ្នកកាន់តាមម្នាក់របស់លោកឃើញក្នុងគំនិត។ គាត់ឈ្មោះអាណានាសនៅក្រុងដាម៉ាស។ លោកយេស៊ូបានប្រាប់ឲ្យអាណានាសទៅជួបសុលដើម្បីធ្វើឲ្យគាត់មើលឃើញឡើងវិញ ហើយពន្យល់គាត់អំពីលោក។ ក្រោយពីអាណានាសពន្យល់សុល សុលបានទទួលស្គាល់សេចក្ដីពិតអំពីលោកយេស៊ូ។ គាត់បានមើលឃើញឡើងវិញ។ គាត់បានកែប្រែជីវិតទាំងស្រុង ហើយក្លាយទៅជាអ្នកបម្រើដ៏ស្មោះត្រង់របស់ព្រះ។—សកម្មភាព ៩:១-២២
ឥឡូវ តើកូនយល់មូលហេតុដែលសុលបានធ្វើអំពើអាក្រក់ទេ?— នេះគឺដោយសារគេបានបង្រៀនគាត់អំពីអ្វីដែលខុស។ គាត់បានធ្វើតាមមនុស្សដែលមិនស្មោះត្រង់ចំពោះព្រះ។ បន្ថែមទៅទៀត គាត់បានកាន់តាមក្រុមមនុស្សដែលចាត់ទុកទស្សនៈរបស់មនុស្សថាសំខាន់ជាងបណ្ដាំរបស់ព្រះ។ ប៉ុន្តែ ទោះជាពួកផារិស៊ីឯទៀតនៅតែប្រឆាំងព្រះក៏ដោយ ហេតុអ្វីសុលបានកែប្រែជីវិត ហើយចាប់ផ្ដើមធ្វើអំពើល្អវិញ?— នេះគឺដោយសារសុលមិនបានស្អប់សេចក្ដីពិតទេ។ ដូច្នេះ ពេលគាត់យល់សេចក្ដីពិតច្បាស់ហើយ គាត់ធ្វើតាមសេចក្ដីពិតនោះតែម្ដង។
ក្រោយមក តើសុលក្លាយទៅជាអ្នកណា? តើកូនដឹងទេ?— មែនហើយ គាត់បានក្លាយទៅជាសាវ័កម្នាក់របស់លោកយេស៊ូ ដែលគេហៅថាសាវ័កប៉ូល។ ម្យ៉ាងទៀត ប្រហែលជាកូននឹកឃើញថា ប៉ូលបានសរសេរសៀវភៅក្នុងគម្ពីរច្រើនជាងអ្នកផ្សេងទៀតទាំងអស់។
មនុស្សជាច្រើនអាចកែប្រែដូចសុលដែរ។ ប៉ុន្តែ គឺមិនងាយស្រួលទេ ព្រោះមានបុគ្គលម្នាក់កំពុងខំព្យាយាមយ៉ាងខ្លាំងដើម្បីជំរុញមនុស្សឲ្យធ្វើអំពើអាក្រក់។ តើកូនដឹងទេ អ្នកនោះជាអ្នកណា?— លោកយេស៊ូបាននិយាយអំពីអ្នកនោះ កាលដែលលោកបង្ហាញខ្លួនឲ្យសុលឃើញតាមសកម្មភាព ២៦:១៧, ១៨
ផ្លូវទៅក្រុងដាម៉ាស។ នៅទីនោះលោកយេស៊ូបាននិយាយមកកាន់សុលពីស្ថានសួគ៌ថា៖ «ខ្ញុំនឹងចាត់អ្នកឲ្យទៅ ដើម្បីបើកភ្នែកពួកគេ ហើយឲ្យពួកគេបែរចេញពីភាពងងឹតមកឯពន្លឺវិញ ថែមទាំងឲ្យចេញពីអំណាចរបស់សាថានមកឯព្រះវិញ»។—មែនហើយ អ្នកនោះគឺជាមេកំណាចសាថានដែលកំពុងព្យាយាមនាំមនុស្សគ្រប់គ្នាឲ្យធ្វើអំពើអាក្រក់។ តើកូនគិតថាជួនកាលពិបាកធ្វើអំពើល្អទេ?— មែន យើងគ្រប់គ្នាពិបាកធ្វើអំពើល្អ។ នេះដោយសារសាថានធ្វើឲ្យយើងពិបាក។ ប៉ុន្តែ មានមូលហេតុមួយទៀតដែលធ្វើឲ្យយើងមិនអាចធ្វើអំពើល្អជានិច្ច តើកូនដឹងមូលហេតុនោះទេ?— គឺដោយសារយើងកើតមកមានភាពខុសឆ្គង។
គឺភាពខុសឆ្គងនេះហើយ ដែលច្រើនតែធ្វើឲ្យយើងពិបាកធ្វើអំពីល្អជាងធ្វើអំពើអាក្រក់។ ដូច្នេះ តើយើងត្រូវធ្វើអ្វី?— ពិតមែន យើងត្រូវខំប្រឹងយ៉ាងខ្លាំងដើម្បីធ្វើអំពើល្អ។ ពេលយើងធ្វើដូចនោះ យើងអាចប្រាកដថាលោកយេស៊ូស្រឡាញ់យើង ហើយលោកនឹងជួយយើង។
កាលលោកយេស៊ូនៅផែនដី លោកបានបង្ហាញថាលោកស្រឡាញ់មនុស្សដែលបានកែប្រែការប្រព្រឹត្តអាក្រក់របស់ខ្លួន។ លោកយល់ថាគឺពិបាកខ្លាំងណាស់ចំពោះពួកគេក្នុងការកែប្រែ។ ជាឧទាហរណ៍ មានស្ដ្រីខ្លះដែលធ្លាប់រួមដំណេកជាមួយបុរសជាច្រើន។ ពិតណាស់ នេះជាអំពើអាក្រក់។ គម្ពីរហៅស្ដ្រីទាំងនោះថាស្រីពេស្យាឬស្រីខូច។
ហេតុអ្វីលោកយេស៊ូបានអភ័យទោសឲ្យស្ដ្រីនេះដែលជាអ្នកធ្វើអំពើអាក្រក់?
តើកូនដឹងថាលោកយេស៊ូបាននិយាយអ្វីទៅកាន់ពួកផារិស៊ីទេ?— លោកប្រាប់ពួកគេថា៖ «ពួកអ្នកយកពន្ធនិងពួកស្រីពេស្យាកំពុងចូលរាជាណាចក្ររបស់ព្រះមុនអ្នករាល់គ្នា»។ (ម៉ាថាយ ២១:៣១) លោកយេស៊ូបាននិយាយដូចនេះ ដោយសារស្រីពេស្យាទាំងនេះបានមានជំនឿលើលោក និងបានកែប្រែរបៀបរស់នៅរបស់ពួកគេ។ ប៉ុន្តែ ពួកផារិស៊ីនៅតែធ្វើបាបពួកអ្នកកាន់តែលោកយេស៊ូដដែល។
ដូច្នេះ ពេលគម្ពីរបង្ហាញថាអំពើដែលយើងកំពុងធ្វើជាអំពើអាក្រក់ យើងគួរសុខចិត្តកែប្រែ។ មួយវិញទៀត ពេលយើងស្គាល់អំពើណាដែលព្រះយេហូវ៉ាចង់ឲ្យយើងធ្វើ យើងគួរចង់ធ្វើអំពើនោះយ៉ាងខ្លាំង។ បើយើងធ្វើដូចនោះ ព្រះយេហូវ៉ាប្រាកដជាពេញចិត្តនឹងយើង ហើយលោកនឹងឲ្យយើងមានជីវិតដែលគ្មានទីបញ្ចប់។
ដើម្បីជួយយើងជៀសវាងពីការធ្វើអំពើអាក្រក់ សូមអានជាមួយគ្នា ទំនុកតម្កើង ១១៩:៩-១១ សុភាសិត ៣:៥-៧ និង១២:១៥។