YU NƆ tink se i go rili wɔndaful if ɔlman bin de du gud?— Bɔt nɔbɔdi nɔ de we de du gud ɔltɛm. Yu no wetin mek sɔntɛnde wi kin du bad tin, pan ɔl we wi want fɔ du gud?— Na bikɔs wi ɔl bɔn wit sin. Bɔt sɔm pipul dɛn de du bɔku bad tin dɛn. Dɛn et ɔda pipul dɛn ɛn dɛn de du dɛn bad bay wilful. Yu tink se dɛn go chenj ɛn lan fɔ du gud?—

Luk di yɔŋ man na di pikchɔ. I tinap nia sɔm klos dɛn. Yu no udat gɛt dɛn? Na di wan dɛn we de ston Stivin. Dis yɔŋ man in Ibru nem na Sɔl, bɔt in Roman nem na Pɔl. I bin gladi we dɛn de kil Stivin, we na di Gret Ticha in disaypul. Lɛ wi si wetin mek Sɔl bin de du dɛn kayn bad tin dɛn ya.

Sɔl na bin Faresi. Di Faresi dɛn na bigman dɛn pan Gɔd biznɛs we bin gɛt Gɔd in Wɔd, bɔt dɛn bin de pe atɛnshɔn mɔ to sɔm tin dɛn we dɛn yon bigman dɛn bin de tich. Na dis mek Sɔl bin de du bad tin dɛn.

We dɛn ol Stivin na Jerusɛlɛm, Sɔl bin de de. Dɛn kɛr Stivin go na kɔt usay sɔm pan di jɔj dɛn na Faresi dɛn. Pan ɔl we dɛn tɔk bad bad tin dɛn bɔt Stivin, i nɔ bin fred. I bin gɛt maynd fɔ prich gud gud wan to di jɔj dɛn bɔt Jiova Gɔd ɛn Jizɔs.

Bɔt dɛn jɔj ya nɔ bin lɛk wetin dɛn de yɛri. Dɛn bin no bɔku tin bɔt Jizɔs. Infakt, jɔs bifo dis tɛm, na dɛn mek dɛn kil Jizɔs! Bɔt leta Jiova bin mek Jizɔs go bak na ɛvin. Naw bifo dɛn jɔj dɛn ya chenj, dɛn de fɛt Jizɔs in disaypul dɛn.

 Di jɔj dɛn ol Stivin ɛn pul am kɔmɔt na di tɔŋ. Dɛn bit am te dɛn ib am na grɔn, dɔn dɛn bigin ston am. Ɛn jɔs lɛk aw yu de si na di pikchɔ, Sɔl tinap de, de wach. I fil se na fayn tin dɛn de du we dɛn de kil Stivin.

Yu no wetin mek Sɔl bin de tink da we de?— Wɛl, na bikɔs i dɔn te we Sɔl dɔn bi Faresi, ɛn i bin biliv se na di rayt tin di Faresi dɛn bin de tich. I bin de si di Faresi dɛn as pipul dɛn we bin de du fayn tin, so i bin de falamakata dɛn.—Di Apɔsul Dɛn Wok [Akt] 7:54-60.

Wetin Sɔl du afta dɛn kil Stivin?— Wɛl, i tray fɔ kil Jizɔs in ɔda disaypul dɛn! I bin de go insay dɛn os dɛn fɔ go pul man ɛn uman dɛn. Dɔn i bin de mek dɛn put dɛn na jel. Bɔku pan di disaypul dɛn bin kɔmɔt na Jerusɛlɛm, bɔt dɛn nɔ bin stɔp fɔ prich bɔt Jizɔs.—Di Apɔsul Dɛn Wok [Akt] 8:1-4.

 Dis mek Sɔl et Jizɔs in disaypul dɛn mɔ ɛn mɔ. So i go to di Ay Prist we nem Kayefas, ɛn Kayefas alaw am fɔ ol Kristian dɛn we de na Damaskɔs. Sɔl bin want kɛr dɛn go na Jerusɛlɛm fɔ mek dɛn pɔnish dɛn. Bɔt we i bin de go na Damaskɔs, wan wɔndaful tin apin.

Layt flash frɔm ɛvin ɛn wan vɔys se: “Sɔl, Sɔl, wetin mek yu de fɛt mi?” Na Jizɔs bin de tɔk frɔm ɛvin! Di layt bin so brayt dat i mek Sɔl blaynd, ɛn di pipul dɛn we bin de wit Sɔl kɛr am go na Damaskɔs.

Afta tri dez, Jizɔs apia na wan vishɔn to wan in disaypul na Damaskɔs, we nem Ananayas. Jizɔs tɛl Ananayas fɔ go to Sɔl, fɔ mek i si bak, ɛn fɔ tɔk to am. We Ananayas tɔk to Sɔl, Sɔl biliv di tru tin bɔt Jizɔs. Sɔl bigin si bak. In wan ol layf chenj, ɛn i bigin fɔ sav Gɔd gud gud wan.—Di Apɔsul Dɛn Wok [Akt] 9:1-22.

Yu dɔn si naw wetin mek Sɔl bin de du bad tin dɛn?— Na bikɔs dɛn bin dɔn tich am bɔku tin dɛn we nɔto tru. I bin de falamakata pipul dɛn we nɔ bin de du wetin Gɔd want. I bin de wit pipul dɛn we bin de fala wetin mɔtalman de tɔk ɛn lɛf wetin Gɔd in Wɔd se. Bɔt wetin mek Sɔl bin chenj ɛn bigin du gud, pan ɔl we ɔda Faresi dɛn kɔntinyu fɔ fɛt agens Gɔd?— Dis na bikɔs Sɔl nɔ bin rili et di tru. So we dɛn sho am wetin rayt, i bin rɛdi fɔ du am.

Yu no udat Sɔl bi leta?— Yɛs, pipul dɛn kam fɔ no am as di apɔsul Pɔl. In na bin Jizɔs in apɔsul. Ɛn mɛmba se Pɔl bin rayt bɔku buk dɛn na di Baybul pas ɛni ɔda pɔsin.

Bɔku pipul dɛn we tan lɛk Sɔl go ebul chenj. Bɔt i nɔ izi bikɔs sɔmbɔdi de we de tray tranga wan fɔ mek pipul dɛn du bad tin  dɛn. Yu sabi udat na da pɔsin de?— Jizɔs tɔk bɔt am we i apia to Sɔl na di rod fɔ go Damaskɔs. Jizɔs bin tɛl Sɔl se: ‘A de sɛn yu fɔ opin pipul dɛn yay, fɔ pul dɛn kɔmɔt na dak ɛn briŋ dɛn kam na layt, ɛn fɔ pul dɛn kɔmɔt ɔnda Setan in pawa ɛn briŋ dɛn kam to Gɔd.’—Di Apɔsul Dɛn Wok [Akt] 26:17, 18.

So na Setan de tray fɔ mek ɔlman du bad tin. Sɔm tɛm dɛn de i nɔ kin izi fɔ mek yu du wetin rayt, nɔto so?— Yɛs, i kin apin to wi ɔl. Setan kin mek i nɔ izi fɔ wi. Bɔt ɔda rizin de we mek i nɔ kin izi ɔltɛm fɔ du wetin rayt. Yu no di rizin?— Na bikɔs wi ɔl bɔn wit sin.

Na dis sin de mek i izi fɔ du wetin bad bifo wi du wetin rayt. So, wetin wi nid fɔ du?— Yɛs, wi fɔ tray tranga wan fɔ du wetin rayt. We wi du dat, wi shɔ se Jizɔs, we lɛk wi, go ɛp wi.

We Jizɔs bin de na di wɔl, i bin sho se i lɛk pipul dɛn we bin dɔn du bad tin dɛn bɔt we dɔn chenj. I bin no se i nɔ izi fɔ lɛ dɛn chenj. Fɔ ɛgzampul, sɔm uman dɛn bin de we bin dɔn du mami ɛn dadi biznɛs wit difrɛn difrɛn man dɛn. Dis na bad  bad tin. Di Baybul kɔl dɛn uman dɛn ya raregyal ɔ uman we de liv fri layf.

Wan tɛm, wan uman lɛk dat bin yɛri bɔt Jizɔs, ɛn i kam usay Jizɔs bin de na wan Faresi in os. I tɔn ɔyl we gɛt fayn sɛnt na Jizɔs in fut, ɛn i yuz in ia fɔ wep in kray wata na Jizɔs in fut. I bin rili fil bad fɔ in sin dɛn, so Jizɔs bin fɔgiv am. Bɔt di Faresi nɔ bin tink se Jizɔs fɔ fɔgiv di uman in sin dɛn.—Lyuk 7:36-50.

Yu no wetin Jizɔs bin tɛl sɔm Faresi dɛn wan ɔda tɛm?— I bin tɛl dɛn se: “Dɛn uman we de pan fri layf, go kam ɔnda Gɔd in rul bifo una.” (Matyu 21:31) Jizɔs bin tɔk dis bikɔs dɛn uman dɛn we bin de liv fri layf bin gɛt fet pan am, ɛn dɛn bin lɛf dɛn bad abit dɛn. Bɔt di Faresi dɛn bin kɔntinyu fɔ du bad tin dɛn to Jizɔs in disaypul dɛn.

So we di Baybul sho wi se di tin we wi de du na bad tin, i go fayn fɔ mek wi chenj. Ɛn we wi no wetin Jiova want wi fɔ du, wi fɔ du am wantɛm wantɛm. Dis go mek Jiova gladi fɔ wi ɛn i go mek wi de sote go.