Kauhanyo 25

Kana Ba Ba Eza Lika Ze Maswe Ba Kona Ku Cinca?

KANA ne ku si ke kwa ba hande hahulu kambe batu kaufela ba ezanga ze nde?— Kono ha ku na ni yo mukana ya ezanga ze nde kamita. Kana wa ziba libaka kaufel’a luna fokuñwi ha lu ezanga ze maswe, niha lu bata ku eza ze nde?— Libaka kikuli kaufel’a luna lu pepilwe lu na ni sibi. Kono batu ba bañwi ba ezanga lika ze ñata ze maswe hahulu. Ba toya batu ba bañwi mi ba ba holofaza ka bomu. Kana u ikutwa kuli ba kona ku cinca ni ku ituta ku eza ze nde?—

Ha ku bone mutangana y’o ya tokomela liapalo za ba ba sweli ku pobaula Setefani. Libizo la hae la Siheberu ki Saule, kono libizo la hae la Siroma ki Paulusi. U tabile kuli Setefani, mulutiwa wa Muluti yo Mutuna, wa bulaiwa. Ha lu bone libaka Saule ha n’a ezize lika ze maswe cwalo.

Saule ki yo muñwi wa Bafalisi, ili sikwata sa bulapeli bwa Sijuda. Bafalisi ba na ni Linzwi la Mulimu, kono ha ba isi hahulu pilu kwa lituto ze ñwi za ba bahulu ba bona ba bulapeli. Kabakaleo, Saule u kalisa ku eza lika ze maswe.

Setefani h’a tamiwa mwa Jerusalema, Saule u teñi. Setefani u iswa kwa kuta, k’o Bafalisi ba bañwi ba li baatuli. Nihaike ku bulelwa lika ze maswe ka za hae, Setefani h’a sabi. U bulela ka bundume ni ku paka hande kwa baatuli ka za Jehova Mulimu ni Jesu.

Kono baatuli bao ha ba lati ze ba utwa. Se ba zibile kale za Jesu. Mane, nakonyana fela zeo li si ka ezahala kale, ne ba tahisize kuli Jesu a bulaiwe! Kono hasamulaho, Jehova a kutisa Jesu kwa lihalimu.  Cwale, ku fita ku cinca mikwa ya bona, baatuli bao ba lwanisa balutiwa ba Jesu.

Baatuli bao ba swala Setefani mi ba mu isa kwand’a muleneñi. Ba mu wiseza fafasi ni ku mu pobaula ka macwe. Mi sina ha u kona ku bona fa siswaniso se, Saule u fa teñi inz’a buha. U hupula kuli ku bulaya Setefani ku lukile.

Kana wa ziba libaka Saule ha n’a ikutwa cwalo?— Libaka kikuli Saule n’a li Mufalisi mwa bupilo bwa hae kaufela, mi n’a lumela kuli ze ne ba luta Bafalisi n’e li ze lukile. N’a nga Bafalisi bao ku ba mutala o munde, kacwalo a ba likanyisa.—Likezo 7:54-60.

Setefani ha s’a bulailwe, Saule u ezañi cwale?— Ka bumai, u bata ku lika ku bulaya balutiwa ba Jesu kaufela! U ba kenela mwa mandu a bona ni ku hohela fande banna ni basali. Kihona a ba kenya mwa tolongo. Buñata bwa balutiwa ba zwa mwa Jerusalema, kono ha ba tuheli ku kutaza za Jesu.—Likezo 8:1-4.

 Kabakaleo, Saule u toya hahulu-hulu balutiwa ba Jesu. Kacwalo, u ya ku Kayafa, Muprisita yo Mutuna, kuli a y’o fiwa tumelezo ya ku tama Bakreste mwa munzi wa Damaseka. Saule u bata ku ba tisa kwa Jerusalema sina batamiwa ilikuli ba fiwe koto. Kono h’a nze a ya kwa Damaseka, ku ezahala nto ye ñwi ye makaza.

Kiha ku taha liseli le li benya ku zwa kwa lihalimu, mi linzwi li bulela kuli: “Saule, Saule u ni nyandisezañi?” Ki Jesu ya bulela ku zwelela kwa lihalimu! Liseli leo li benya hahulu kuli mane li foufaza meto a Saule, mi batu ba ba zamaya ni Saule ba na ni ku mu etelela kwa Damaseka.

Mazazi a malalu hasamulaho, Jesu u taha mwa pono ku yo muñwi wa balutiwa ba hae mwa Damaseka ya bizwa Ananiasi. Jesu u bulelela Ananiasi ku potela Saule, kuli a mu folise bubofu bwa hae, ni ku ambola ni yena. Ananiasi h’a ambola ni yena, Saule wa lumela niti ka za Jesu. Wa kalisa ku bona hape. Wa cinca mupilelo wa hae kaufela, mi u ba mutanga ya sepahala wa Mulimu.—Likezo 9:1-22.

Kana cwale wa kona ku bona libaka Saule ha n’a ezanga lika ze maswe?— Libaka kikuli n’a lutilwe lituto ze maswe. N’a latelezi banna be ne ba sa sepahali ku Mulimu. Mi n’a li yo muñwi wa batu be ne ba nga mihupulo ya batu ku ba ya butokwa hahulu ku fita Linzwi la Mulimu. Kono ki kabakalañi Saule h’a cinca mupilelo wa hae ni ku kalisa ku eza ze nde, nihaike Bafalisi ba bañwi ba zwelapili ku lwanisa Mulimu?— Libaka kikuli luli Saule h’a si ka toya niti. Kacwalo, h’a boniswa se si lukile, u si eza ka ku sa sinya nako.

Kana wa ziba m’o Saule n’a til’o zibahalela hasamulaho?— N’a til’o zibahala sina muapositola Paulusi, muapositola wa Jesu. Mi u si libali kuli Paulusi n’a ñozi libuka ze ñata za Bibele ku fita mutu ufi kamba ufi.

Ku na ni batu ba bañata ba ba swana ni Saule ba ba kona ku cinca. Kono ku cinca haki ko ku bunolo kakuli ku na ni ya sebeza ka  t’ata kuli a ezise batu lika ze maswe. Kana wa mu ziba?— Jesu n’a bulezi ka za hae ha n’a bonahalile ku Saule mwa nzila ye liba kwa Damaseka. Teñi, Jesu n’a bulezi ni Saule ku zwelela kwa lihalimu kuli: ‘Ni ku lumela ku y’o kwalula meto a libofu, ku ba sikulula ku zwa mwa lififi ku taha mwa liseli, ni ku zwa kwa m’ata a Satani ku taha ku Mulimu.’—Likezo 26:17, 18.

Ee, Satani Diabulosi ki yena ya sweli ku lika ku ezisa batu kaufela lika ze maswe. Kana fokuñwi wa fumananga t’ata ku eza se si lukile?— Kaufel’a luna kwa lu tatafalelanga. Satani u tatafalisa lika. Kono ku na ni libaka le liñwi ha ku si bunolo ku eza se si lukile. Kana wa ziba libaka leo?— Libaka kikuli lu pepilwe lu na ni sibi.

Sibi seo ki sona se si lu ezisa ka bunolo lika ze maswe ku fita ku eza ze lukile. Kacwalo, lu lukela ku ezañi?— Lu lukela ku tundamena ku eza ze lukile. Ha lu eza cwalo, lwa kona ku kolwa kuli Jesu, yena ya lu lata, u ka lu tusa.

Jesu ha n’a li fa lifasi, n’a til’o lata batu be ne ba ezanga ze maswe kono ili be ne ba cincize. N’a ziba kuli ku cinca ko ne ba cincize n’e si ko ku bunolo. Ka mutala, ne ku na ni basali be ne  ba ezanga tobali ni banna ba bañata. Kaniti, ku eza cwalo ne ku li ko ku maswe. Bibele i biza basali bao kuli mahule.

Muta o muñwi, musali ya cwalo n’a utwile ka za Jesu, mi n’a tile kwa ndu ya Mufalisi kwa n’a inzi Jesu. A sela oli kwa mahutu a Jesu, mi ka milili ya hae a omisa mioko ya hae kwa mahutu a Jesu. N’a utwile hahulu butuku kabakala libi za hae, kacwalo Jesu a mu swalela. Kono Bafalisi ne ba sa lumeli kuli musali y’o n’a lukela ku swalelwa.—Luka 7:36-50.

Kana wa ziba sa n’a bulezi Jesu ku ba bañwi ba Bafalisi bao?— N’a ba bulelezi kuli: “Basali ba mahule ba mi laka mwa mubuso wa Mulimu.” (Mateu 21:31) Jesu n’a bulezi cwalo kakuli basali ba mahule bao ne ba na ni tumelo ku yena, mi ne ba cincize mupilelo wa bona o maswe. Kono Bafalisi bona ba zwelapili ku eza ze maswe kwa balutiwa ba Jesu.

Kacwalo, Bibele ha i bonisa kuli ze lu eza ki ze maswe, lu lukela ku cinca ka ku itatela. Mi ha lu ituta z’a bata Jehova kuli lu li eze, lu lukela ku eza cwalo ka tukufalelo. Jehova kihona a ka lu tabela ni ku lu fa bupilo bo bu sa feli.

Kuli lu tusiwe ku sa eza ze maswe, ha lu bale hamoho Samu 119:9-11; Liproverbia 3:5-7; ni 12:15.

[Siswaniso se si fa likepe 133]

Ki kabakalañi Saule h’a hupula kuli ku bulaya Setefani ku lukile?

[Siswaniso se si fa likepe 135]

Ya ambola ni Saule ki mañi, mi U luma Saule ku y’o ezañi?

[Siswaniso se si fa likepe 136]

Ki kabakalañi Jesu ha n’a swalezi musali y’o ya n’a ezanga ze maswe?