MWENE kyadi kya kwikala kiyampe mpata shi bantu bonso badi balonga biyampe?—Ino i kutupu muntu nansha umo uloñanga nyeke’nka biyampe. Le uyukile mwanda waka batwe bonso tuloñanga bibi kitatyi kimokimo, nansha shi tusaka kulonga biyampe?—Mwanda batwe bonso twi babutulwe na bubi. Inoko bantu bamo i batondeje’byo kulonga bibi bivule kupita. Bashikwa bantu bakwabo ne kwibasanshija ku kusaka. Le ulanga amba babwanya kushinta ne kwifunda kwikala bayampe?—

Tala pa kifwatulo yeu nsongwalume ulamine bivwalwa bya pangala bya boba basa Shitevani mabwe’ba. Dijina dyandi dya Kihebelu i Solo, ino dyandi dya bwine Loma i Polo. Usangedile kwipaya kobepaya Shitevani, mwanā bwanga wa Mufundiji Mukatampe. Pano tutale kilongeja Solo bintu bibi namino.

Solo udi mu kitango kya kipwilo kya Buyuda kya boba betwa bu Bafadiseo. Bafadiseo badi na Kinenwa kya Leza, ino batele mutyima kutabukidila ku bufundiji bwa bendeji babo bamobamo ba kipwilo. Kino kyo kilongeja Solo bintu bibi.

Padi pakwatwa Shitevani mu Yelusalema, Solo wadi ponka. Shitevani waselelwa ku njibo ya kidye kya mambo, ne batyibi bamobamo badi’ko i Bafadiseo. Shitevani kadipo na moyo, nansha byobamunenena bibibibi. Aye wesambe na kininga ne kadi usapwila batyibi bukamoni bwa myanda itala Yehova Leza ne Yesu.

Inoko bano batyibi kebasepelelepo byobya byobevwana. Kuyuka’ko bayukile kala myanda mivule ya Yesu. Mwanda, mafuku matyetye kumeso kwa uno mwanda, baipaije Yesu! Ino kupwa, Yehova  wamujokejeja mūlu. Pano, pa kyaba kya batyibi kushinta bilongwa byabo, abo’ko kebalu na bana ba bwanga ba Yesu.

Batyibi abakwata Shitevani, abamukokela panja pa kibundi. Abamushindila panshi kebamwase mabwe. Ne kadi, enka momwena mu kifwatulo’mu, Solo au keye ponka utala. Aye ulanga amba i byendele’mo kwipaya Shitevani.

Le uyukile kilangija Solo uno muswelo?—Bine, Solo wādi Mufadiseo mu būmi bwandi bonso, ne kadi wādi ukulupile amba bufundiji bonso bwa Bafadiseo i bwa bine. Wādi umona bano bantu bu bimfwa biyampe, o mwanda wādi wibeula.—Bilongwa 7:54-60.

Kupwa kwa Shitevani kwipaibwa, pano Solo kalonga’ka?—Bine, pano kakimbe kujimija bana ba bwanga ba Yesu bashele’ko! Wakatwelelela ne mu mobo abo mwine ukoka’mo bana-balume ne bana-bakaji. Penepo wenda wibela mu kifungo. Bana ba bwanga bavule ba Yesu abataluka mu Yelusalema, ino kebalekele’byopo kusapula myanda itala Yesu.—Bilongwa 8:1-4.

 Kino kyo kine kyavudija mushikwa wa Solo washikilwe bana ba bwanga ba Yesu. Penepa waenda kudi Kaifasa Kitobo Mukatampe amba bamupe’ko kishima kya kukuta bene Kidishitu mu kibundi kya Damakasa. Solo kyasaka i kwibaselela ku Yelusalema bu bakutwa ba kupa mfuto. Ino aye ukidi mu dishinda wenda ku Damakasa, kubalongeka kintu kimo kitulumukwa.

Kike kya mudilo kibatambe mūlu, ne diwi kedinena’mba: “Abe Solo! Abe Solo! Le i kika kyo umpangilapangila?” Bine, i Yesu unena aye mūlu! Kike byokyeñenya bininge, kibalonga Solo ke mpofu, ne bantu badi pamo na Solo abamukunkuja kufika ne ku Damakasa.

Mafuku asatu pa kupita’po, Yesu wamwekela mu kimonwa mwanā bwanga umo wa mu Damakasa, dyandi i Ananaisa. Yesu wasapwila Ananaisa ende kukapempula Solo, akamutalule bupofu bwandi, ne kwisamba nandi. Ananaisa pa kukesamba nandi, Solo waitabija bubinebine butala padi Yesu. Waanza ne kumona monka. Mwikadilo wandi onso wa umbūmi ubashinta, waikala ke mwingidi wa kikōkeji wa Leza.—Bilongwa 9:1-22.

Lelo pano kubamone’po kyādi kilongela Solo bibi?—I pa mwanda wāfundijibwe bintu bya bubela. Wādi ulonda bantu bakubulwa kukōkela Leza. Ne kadi wādi mu kitango kya bantu batangidija mifwatakanyo ya bantu kumeso kwa Kinenwa kya Leza. Ino mwanda waka Solo washinta būmi bwandi ne kushilula kulonga biyampe, nansha Bafadiseo bakwabo byobendelela kulwa Leza bulwi?—Mwanda na bubine Solo kashikilwepo bubinebine. O mwanda mwine aye pa kulombolwa amba bino byo biyampe, waitabija kwibilonga.

Le uyukile Solo wāikele ke ani mwenda mafuku?—Bine, wāikele kuyukana bu mutumibwa Polo, mutumibwa wa Yesu. Kadi vuluka, Polo wālembele mikanda mivule ya mu Bible kupita’ko muntu ye-yense.

Kukidi bantu bavule badi pamo bwa Polo babwanya kwalamuka. Inoko ke mwandapo upēla mwanda kudi muntu kampanda  ulonga buninge bwa kutonwena bantu ku kulonga bibi. Lelo umuyukile amba i ani?—Yesu wānene wandi mwanda paāmwekēle Solo mu dishinda paādi wenda ku Damakasa’pa. Yesu wāsapwidile Solo aye mūlu amba: “Nakutume [ku bantu] kukebaputula meso bavundamine ku fukutu, batadile ku mwinya, batambe ku lupusa lwa Satana batale kudi Leza.”—Bilongwa 26:17, 18, MB.

Bine, i Satana Dyabola utonwenanga bantu bonso ku kulonga bibi. Lelo byaba bikwabo umonga amba kulonga byoloke i kukomo?—I kwitukomene batwe bonso. Satana ye wikukomeja. Ino kudi bubinga bukwabo bokebikadilepo nyeke bipēla kulonga byoloke. Lelo uyukile i bubinga’ka?—I buno: batwe bonso twi babutulwe na bubi.

Bubi buno bo bwitulengeja nyeke tupēlelwe kulonga bibi kupita’ko kulonga byoloke. Penepo, le tufwaninwe kulonga kika?—Bine, tufwaninwe kulwa bulwi pa kulonga byoloke. Shi tulwe namino, tukokeja penepo kukulupila amba Yesu wituswele, ne uketukwasha.

Pādi Yesu pano pa ntanda, wādi uswele bantu bādi balonga bintu bibi, ino kupwa baālamuka. Mwanda wādi uyukile mobikadile bikomo kudi abo pa kwalamuka. Kimfwa, kwādi bana-bakaji bamo bādi balāla na bana-balume  bavulevule. Na bubine, byādi bibi. Bible utela bano bana-bakaji bu ba bwitwa, nansha bu ba busekese.

Difuku dimo, mwana-mukaji umo wa uno muswelo wāivwene myanda ya Yesu, wāiya kwaādi mu njibo ya Mufadiseo umo. Wāpungulwila Yesu māni ku maulu ne kumupampula na nywene yandi impolo yaāmusumijije ku maulu. Wēalakenye bininge pa mwanda wa bubi bwandi, ebiya Yesu nandi wāmulekela. Inoko Mufadiseo kādipo ufwatakanya amba yewa ukokeja kulekelwa bubi.—Luka 7:36-50.

Le uyukile kyānene Yesu ku Bafadiseo bamo?—Wēbasapwidile amba: “Babusekese, abēmubadikidila kutwela mu bulopwe bwa Leza.” (Mateo 21:31) Yesu wānenene namino mwanda ba busekese bāmwitabije, ne kushinta bibi byobādi balonga. Inoko Bafadiseo bāendelele kulonga bana ba bwanga ba Yesu bibi.

Nanshi shi Bible wetulombola amba byotulonga i bibi, tufwaninwe kwalamuka na mutyima wetu onso. Ne kadi shi tubefunde byobya bitusakila Yehova kulonga, tufwaninwe kwibilonga lubilo lonka. Nabya Yehova uketusangela ne kadi uketupa būmi bwa nyeke ne nyekeke.