MA JKUNX sabiħ li kieku kulħadd jagħmel it-​tajjeb?— Imma ħadd ma jagħmel affarijiet tajbin dejjem. Taf għala lkoll kemm aħna nagħmlu affarijiet ħżiena xi kultant, anki meta nkunu rridu nagħmlu t-​tajjeb?— Għax ilkoll kemm aħna nitwieldu bid-​dnub. Imma xi nies jagħmlu ħafna affarijiet ħżiena ferm. Huma jobogħdu lil nies oħra u jweġġgħuhom apposta. Taħseb li dawn jistgħu jinbidlu u jitgħallmu jkunu tajbin?—

Ħares lejn ir-​raġel li qiegħed għassa mal-​ħwejjeġ taʼ dawk li qed jitfgħu l-​ġebel lil Stiefnu. Dan jismu Sawlu bl-​Ebrajk, imma bir-​Ruman jismu Pawlu. Hu ferħan li Stiefnu, li hu dixxiplu taʼ l-​Għalliem il-​Kbir, qed jiġi maqtul. Ejja naraw għala Sawlu jagħmel affarijiet tant ħżiena.

Sawlu jagħmel parti minn grupp reliġjuż taʼ nies Lhud imsejħin Fariżej. Il-​Fariżej għandhom il-​Kelma t’Alla, imma iktar jagħtu kas it-​tagħlim taʼ xi wħud mill-​mexxejja reliġjużi tagħhom. Minħabba f’hekk Sawlu jagħmel affarijiet ħżiena.

Meta Stiefnu jiġi arrestat f’Ġerusalemm, Sawlu jinsab hemm. Stiefnu jittieħed il-​qorti, u xi ftit mill-​imħallfin huma Fariżej. Għalkemm in-​nies jgħidu affarijiet koroh fuq Stiefnu, hu ma jibżax. Hu jagħmel il-​kuraġġ biex jitkellem u jagħti xiehda tajba lill-​imħallfin dwar Alla Ġeħova u dwar Ġesù.

Imma dawk l-​imħallfin ma jiħdux pjaċir b’dak li jisimgħu. Diġà jafu ħafna dwar Ġesù. Fil-​fatt, ftit taż-​żmien qabel, huma  ordnaw li Ġesù jiġi maqtul! Imma mbagħad, Ġeħova ħa lil Ġesù lura fis-​sema. Issa, minflok ma jbiddlu l-​opinjoni tagħhom, l-​imħallfin jiġġieldu kontra d-​dixxipli taʼ Ġesù.

L-imħallfin jaqbdu lil Stiefnu u joħorġuh barra l-​belt. Bid-​daqqiet li jagħtuh, huma jwaddbuh maʼ l-​art u mbagħad jitfgħulu l-​ġebel. U, bħalma tistaʼ tara fl-​istampa, Sawlu qiegħed hemm jara kollox. Hu jaħseb li qed jagħmlu tajjeb li joqtlu lil Stiefnu.

Taf għala Sawlu ħaseb hekk?— Sawlu kien ilu ħajtu kollha Fariżew, u kien jemmen li t-​tagħlim tal-​Fariżej huwa tajjeb. Hu kien jimxi fuq l-​eżempju tagħhom u jagħmel bħalhom.—Atti 7:​54-60.

Wara li joqtlu lil Stiefnu, Sawlu x’jagħmel?— Hu jipprova jeħles mill-​bqija tad-​dixxipli taʼ Ġesù! Hu jibqaʼ dieħel fid-​djar tagħhom u jkaxkar ’il barra kemm lill-​irġiel u kemm lin-​nisa. Imbagħad jitfagħhom fil-​ħabs. Ħafna mid-​dixxipli jkollhom jitilqu minn Ġerusalemm, imma ma jiqfux jippridkaw dwar Ġesù.—Atti 8:​1-4.

 Minħabba f’hekk, Sawlu jibda jobgħodhom iktar lid-​dixxipli taʼ Ġesù. Għalhekk, imur għand il-​Qassis il-​Kbir Kajfa u jġib permess biex jarresta lill-​Kristjani fil-​belt taʼ Damasku. Sawlu jrid iġibhom f’Ġerusalemm bħala priġunieri biex jieħdu kastig. Imma hu u sejjer Damasku tiġri xi ħaġa taʼ l-​għaġeb.

Dawl jiddi mis-​sema, u leħen jgħidlu: “Sawlu, Sawlu, għala qed tippersegwitani?” Dan Ġesù li qed jitkellem mis-​sema! Id-​dawl tant hu qawwi li Sawlu ma jibqax jara, u n-​nies li hemm maʼ Sawlu jkollhom iwassluh sa Damasku.

Tlett ijiem wara, Ġesù jidher f’viżjoni lil wieħed mid-​dixxipli f’Damasku li jismu Ananija. Ġesù jgħid lil Ananija biex imur jara lil Sawlu, jerġaʼ jġibu jara, u jkellmu. Meta Ananija jkellmu, Sawlu jaċċetta l-​verità dwar Ġesù u jerġaʼ jibda jara. Ħajtu tinbidel kollha, u jsir qaddej leali t’Alla.—Atti 9:​1-22.

Tistaʼ tifhem issa għala Sawlu kien jagħmel affarijiet ħżiena?— Għax hu kien tgħallem affarijiet ħżiena. Kien jagħmel bħan-​nies li ma kinux leali lejn Alla. U kien parti minn grupp taʼ nies li iktar kienu jemmnu f’dak li jaħsbu n-​nies milli fil-​Kelma t’Alla. Sawlu għala jbiddel ħajtu u jibda jagħmel it-​tajjeb, avolja Fariżej oħra jkomplu jiġġieldu kontra Alla?— Għax Sawlu mhux veru jobgħod il-​verità. Għalhekk, meta xi ħadd jurih dak li hu tajjeb, hu jkun lest li jobdi.

Taf min sar Sawlu iktar tard?— Iva, hu sar magħruf bħala l-​appostlu Pawlu, appostlu taʼ Ġesù. U ftakar, Pawlu kiteb iktar kotba tal-​Bibbja minn kwalunkwe persuna oħra.

Hemm ħafna nies bħal Sawlu li jistgħu jinbidlu. Imma dan m’huwiex faċli għax hemm xi ħadd li jaħdem iebes ħafna biex iġiegħel lin-​nies jagħmlu affarijiet ħżiena. Taf min hu  dan?— Ġesù tkellem dwaru meta deher lil Sawlu fit-​triq lejn Damasku. Hemmhekk Ġesù kellem lil Sawlu mis-​sema u qallu: ‘Qed nibagħtek biex tiftaħ għajnejn in-​nies, biex iddawwarhom mid-​dlam għad-​dawl u mill-​awtorità taʼ Satana lejn Alla.’—Atti 26:​17, 18.

Iva, Satana x-​Xitan hu dak li qed jipprova jġiegħel lil kulħadd biex jagħmel affarijiet ħżiena. Int ġieli ssibha diffiċli biex tagħmel it-​tajjeb?— Kulħadd isibha diffiċli għax Satana jipprova jfixkilna. Imma hemm raġuni oħra għala mhux dejjem faċli li nagħmlu t-​tajjeb. Taf għala?— Għax aħna nitwieldu bid-​dnub.

Minħabba dan id-​dnub, ħafna drabi iktar insibuha faċli nagħmlu l-​ħażin milli nagħmlu t-​tajjeb. Allura, xi rridu nagħmlu?— Iva, irridu nagħmlu sforz kbir biex nagħmlu t-​tajjeb. Meta nagħmlu hekk, nistgħu nibqgħu ċerti li Ġesù, li jħobbna, se jgħinna.

Meta Ġesù kien fuq l-​art, hu sar iħobb lil nies li kienu għamlu affarijiet ħżiena imma li mbagħad inbidlu. Kien jaf kemm kien diffiċli biex jagħmlu din il-​bidla. Per eżempju, kien hemm nisa li kellhom relazzjonijiet sesswali  maʼ ħafna rġiel. Dan żgur li kien ħażin. Lil dawn in-​nisa l-​Bibbja ssejħilhom żienja, jew prostituti.

Darba kien hemm mara bħal dawn li semgħet b’Ġesù, u marret fejn kien jinsab hu fid-​dar taʼ wieħed Fariżew. Hi tefgħet iż-​żejt fuq saqajn Ġesù u xxottat id-​dmugħ tagħha minn fuq saqajh b’xagħarha. Kien iddispjaċieha ħafna għad-​dnubiet tagħha, u għalhekk Ġesù ħafrilha. Imma l-​Fariżej ħassew li ma kellux jaħfrilha.—Luqa 7:​36-50.

Taf x’qal Ġesù lil xi wħud mill-​Fariżej?— Qalilhom: “Il-​prostituti sejrin qabilkom fis-​saltna t’Alla.” (Mattew 21:31) Ġesù qal dan għax il-​prostituti kienu jemmnu fih, u ma baqgħux jagħmlu affarijiet ħżiena. Imma l-​Fariżej komplew jagħmlu affarijiet ħżiena lid-​dixxipli taʼ Ġesù.

Mela meta l-​Bibbja turi li dak li qed nagħmlu hu ħażin, irridu nkunu lesti li ninbidlu. U meta nitgħallmu xi jridna nagħmlu Ġeħova, irid ikollna xewqa kbira li nagħmlu hekk. Imbagħad Ġeħova se jieħu pjaċir bina u se jagħtina ħajja taʼ dejjem.