TIKIKAABAIRE kirungi munonga ku ogire ngu buri omwe naakora ebirungi?— Kwonka tihariho n’omwe orikubaasa kukora ebirungi byonka butoosha. Noomanya ahabw’enki twena obumwe turikukora ebintu bibi, n’obu twakuba turikwenda kukora ebirungi?— N’ahabw’okuba twena tukahungura ekibi. Kwonka abantu abamwe nibakora ebintu bingi bibi munonga. Nibanga abantu abandi kandi babahitsyaho akabi bakigyendereire. Nooteekateeka ngu nibabaasa kuhinduka babe barungi?—

Reeba omutsigazi ogwo orinzire ebijwaro by’abo abariyo nibateera Stefano amabaare. Eiziina rye ery’Oruheburaayo ni Saulo, kwonka omu Rurooma ni Paulo. Paulo ashemereirwe ngu Stefano omwegi w’Omwegyesa Mukuru ariyo naitwa. Ka tureebe ahabw’enki Saulo yaakozire ebintu bibi nk’ebyo.

Saulo akaba ari omwe aha kibiina ky’abanyadiini abaabaire nibeetwa Abafarisaayo. Abafarisaayo bakaba baine Ekigambo kya Ruhanga, kwonka bakaba nibakuratira munonga enyegyesa za bamwe aha beebembezi baabo b’ediini. Ekyo kikareetera Saulo kukora ebintu bibi.

Obu Stefano yaakomerwa omuri Yerusaalemu, Saulo akaba ariyo. Stefano akatwarwa omu kooti, ei bamwe aha baramuzi baabaire bari Abafarisaayo. N’obu ebintu bibi biraabe byagambirwe ahari Stefano, taratiinire. Ahonaaho akatunga obumanzi bw’okugambira abaramuzi ebirikukwata ahari Yehova Ruhanga na Yesu.

Kwonka abaramuzi abo tibarakunzire ebi Stefano yaagambire. Bakaba nibamanya bingi ebirikukwata ahari Yesu. Ahakuba hakaba haahingwireho obwire bukye baherize kwita Yesu. Kwonka bwanyima, Yehova  akagarura Yesu omu iguru. Abaramuzi omu mwanya gw’okuhindura aha mitwarize yaabo, bakarwanisa abeegi ba Yesu.

Abaramuzi abo bakakwata Stefano baamutwara aheeru y’orurembo. Bakamuteera munonga yagwa ahansi reero bamuteera amabaare. Kandi nk’oku orikureeba omu kishushani, Saulo ariyo naareeba abarikuteera Stefano amabaare. Naateekateeka ngu kihikire kwita Stefano.

Noomanya ahabw’enki Saulo yaateekateekire atyo?— Akaba ari Omufarisaayo, kandi akaba naikiriza ngu enyegyesa z’Abafarisaayo zihikire. Akatooreza eky’okureeberaho ky’Abafarisaayo abo.​—Ebyakozirwe 7:54-60.

Bwanyima y’okwitwa kwa Stefano, Saulo akakora ki?— Akateeraho kwita n’abeegi ba Yesu abandi. Akaba aza omu maka gaabo akwata abashaija n’abakazi abatwara omu kihome. Baingi aha beegi ba Yesu bakahunga baaruga omuri Yerusaalemu, kwonka tibararekire kubuurira ahari Yesu.​—Ebyakozirwe 8:1-4.

Ekyo kikareetera Saulo kwangira kimwe abeegi ba Yesu. N’ahabw’ekyo  akaza ow’Omunyamurwa Omukuru Kayaafa kandi yaikirizibwa kukwata Abakristaayo abaabaire bari omu rurembo rwa Damasiko. Saulo akaba naayenda kubareeta Yerusaalemu nk’embohe ngu bafubirwe. Kwonka ku yaabaire ari omu muhanda naza Damasiko, ekintu kirikutangaaza kyabaho.

Ekyererezi kuruga omu iguru kikamwakira, reero eiraka ryagira riti: ‘Saulo, Saulo, nompiiganisiza ki?’ Yesu niwe yaabaire naagamba kuruga omu iguru. Ekyererezi kikaba kiine amaani kyahumya Saulo, kandi abantu abu yaabaire aine nibo baamutwaire Damasiko.

Omu kworekwa, Yesu akeeyoreka omwe aha beegi be orikwetwa Anania ow’omuri Damasiko bwanyima y’ebiro bishatu. Yesu akagambira Anania kuza kutaayaayira Saulo, akamuhumuura kandi akagamba nawe. Anania ku yaagambire nawe, Saulo yaikiriza amazima agarikukwata ahari Yesu. Amaisho ge gaahumuuka. Emitwarize ye yoona ekahinduka kandi yaaba omuheereza wa Ruhanga omwesigwa.​—Ebyakozirwe 9:1-22.

Mbwenu waamanya ahabw’enki Saulo yaabaire naakora ebintu bibi?— N’ahabw’okuba akaba ayegyesiibwe ebigwire. Akatooreza abantu abaabaire bataribesigwa ahari Ruhanga. Kandi akaba ari omu kibiina ky’abantu abaabaire nibeebembeza emiteekateekyere y’abantu okukira Ekigambo kya Ruhanga. Kwonka shi ahabw’enki Saulo yaahindwire aha mitwarize ye akatandika kukora ebirungi, n’obu Abafarisaayo abandi baagumire nibakora ebi Ruhanga arikwanga?— N’ahabw’okuba Saulo buzima akaba atarikwanga amazima. N’ahabw’ekyo ku yaayegyesiibwe ekihikire, akaba ayeteekateekire kukikora.

Saulo akaija yaaba muntu wa muringo ki?— Akaija yaaba entumwa ya Yesu yaamanywa nk’entumwa Paulo. Kandi ijuka, ngu Paulo akahandiika ebitabo bingi bya Baibuli okukira abandi boona.

Hariho abantu baingi abari nka Saulo abarikubaasa kuhinduka. Kwonka tikyorobi ahabw’okuba haine oriyo naakora n’amaani kureetera  abantu kukora ebibi. Noomumanya?— Yesu akamugambaho obu Yesu yaayeyoreka Saulo omu muhanda arikuza Damasiko. Yesu ari omu iguru akagambira Saulo ati: ‘Ninkutuma, okuhumuura amaisho g’abantu, ngu bahindukye barugye omu mwirima, baze omu mushana, barugye omu bushoboorozi bwa Sitaane, bahindukire Ruhanga.’​—Ebyakozirwe 26:17, 18.

Buzima, Sitaane Omuregi niwe arikuteeraho kureetera abantu kukora ebintu ebibi. Obumwe nooshanga kikugumiire kukora ekihikire?— Twena nitugumirwa. Sitaane niwe arikutureetera kugumirwa. Kwonka hariho enshonga endiijo ahabw’enki butoosha kitoorobi kukora ekihikire. Noomanya ahabw’enki?— N’ahabw’okuba tukazaarwa n’ekibi.

Emirundi mingi ekibi ekyo nikyo kirikutureetera kukora ekitahikire omu mwanya gw’okukora ekihikire. Mbwenu, niki eki turikwetenga kukora?— Buzima, twine kuteeraho n’amaani kukora ekihikire. Twakora ekyo, nitubaasa kuhamya ngu Yesu, orikutukunda naija kutuhwera.

Obu Yesu yaabaire ari omu nsi, akaba akunda abantu abaabaire baba bakozire ebibi kwonka baketeisa. Akaba naamanya oku kyabaire kitaboorobeire kuhindura aha mitwarize yaabo. Nk’eky’okureeberaho hakaba hariho  abakazi abaabaire bateerana n’abashaija baingi. Hatariho kubangaanisa ekyo kikaba kiri kibi. Baibuli abakazi nk’abo neebeeta baamaraaya.

Eizooba rimwe, omukazi maraaya akahurira ebirikukwata ahari Yesu, kandi yaija omu nju y’Omufarisaayo ahu Yesu yaabaire ari. Akasiiga amajuta aha bigyere bya Yesu arikurira kandi yaaragaza amarira ge aha bigyere bya Yesu n’eishokye rye. Akeeteisa ebibi bye, Yesu yaamusaasira. Kwonka Abafarisaayo bo bakaba nibateekateeka ngu omukazi ogwo akaba atashemereire kusaasirwa.​—Luka 7:36-50.

Noomanya eki Yesu yaagambiire bamwe aha Bafarisaayo?— Akabagira ati: “Baamaraaya nibaija kubabandiza kutaaha omu bukama bwa Ruhanga.” (Matayo 21:31) Yesu akagamba atyo ahabw’okuba baamaraaya bakamwikiriza, kandi baahindura aha mitwarize yaabo mibi. Kwonka Abafarisaayo bakaguma nibatwariza kubi abeegi ba Yesu.

N’ahabw’ekyo Baibuli yaayoreka ngu eki turikukora ni kibi, twine kuba tweteekateekire kuhinduraho. Kandi twaheza kwega ebi Yehova arikwenda ngu tukore, tushemereire kwehayo kubikora. Twakora tutyo, nitwija kushemeza Yehova kandi naija kutuha amagara agatahwaho.