TUKUY runas allin kajta ruwananchej sumaj kanman, ¿icharí?... Jinapis tukuy pantanchej. Mana munaspapis wakin kuti sajra kajta ruwanchej. ¿Yachankichu imaraykuchus?... Tukuyninchej juchayoj nacekusqanchejrayku. Jinapis wakenqa aswan sajra imasta ruwanku. Wajkunata chejninku, ñakʼarichinapajtaj churasqa kanku. Chay runas, ¿cambiankumanchu?...

Dibujota qhawariy. Uj runa Estebanta rumiswan chʼanqajkunaj ropankuta qhawashan. Hebreo sutenqa Saulo, romano sutintaj Pablo. Sauloqa Estebanta wañuchishasqankumanta kusikushan. Estebanqa Jesuspa yachachisqan karqa. ¿Imaraykú Saulo chay jina sajra karqa? Qhawarina.

Sauloqa fariseospa religionninkumanta karqa. Fariseosqa Diospa Palabranta rejsispapis, religionninkuta kamachejkunaj yachachisqankuta astawan kasukoj kanku. Chayrayku Sauloqa sajra imasta ruwaj.

Estebanta presochaspa jatun juntaman pusaykushajtinku, Sauloqa Jerusalenpi kasharqa. Wakin juezkunaqa fariseos karqanku. Estebantaj contranpi rimajtinkupis, mana manchikorqachu. Astawanpis Jehovamanta, Jesusmanta juezkunaman willarqa.

Juezkunarí parlasqanta uyarispa phiñakorqanku. Paykunaqa Jesusmanta yacharqankuña. Wañuchisqankumantapis niraj unaychu karqa. Jehovataj Jesusta kausarichispa cieloman oqharikaporqa. Chay juezkunarí sajra kajta ruwallarqankupuni, Jesuspi creejkunatataj qhatiykachayta qallarerqanku.

 Juezkunaqa Estebanta llajtamanta jawaman orqhospa, pampaman wijchʼorqanku, rumiswantaj chʼanqarqanku. Dibujopi rikushanki jina, Sauloqa chayta qhawasharqa. Paypajqa Estebanta wañuchinanku allin karqa.

¿Yachankichu imaraykuchus Saulo ajinata yuyasqanta?... Payqa fariseospa religionninkupi wiñarqa, creerqataj yachachisqanku cheqa kasqanta. Sauloqa fariseosta kamachejkunata sumajpaj qhawaj, paykuna kikintaj ruwaj (Hechos 7:54-60).

¿Imatá Saulo ruwarqa Estebanta wañuchisqankutawan?... Payqa Jesuspi creejkunata tukuchiyta munarqa. Chayrayku wasinkumanta orqhospa, qharista, warmista ima carcelman wisqʼacherqa. Ashkha creejkunaqa Jerusalenmanta ayqekorqanku, jinapis Jesusmanta willallarqankupuni (Hechos 8:1-4).

Saulotaj Jesuspa yachachisqasninta astawan chejnikorqa. Chayrayku kuraj kaj sacerdote Caifaswan parlaj rerqa. Paytaj ordenta  qorqa Damascopi cristianosta presochamunanpaj. Sauloqa chay cristianosta presochayta munarqa, Jerusalenpi jasutʼichinanpaj. Jinapi Damascoman rishajtin, tʼukuna imata rikorqa.

Cielomanta uj kʼanchay rikhurimorqa, uj parlaytaj uyarikorqa: “Saulo, Saulo, imaraykutaj qhatiykachashawankiri?”, nispa. ¡Jesús cielomanta parlamusharqa! Chay kʼanchayqa, sinchʼi kasqanrayku Saulota ciegoyacherqa. Paywan kajkunataj, aysaspa Damasco llajtaman pusarqanku.

Kinsa diasninman, Jesusqa Ananiasman mosqoypi jina rikhurerqa. Ananiasqa Damascopi tiyakorqa, Jesuspitaj creej. Jesusqa payta Sauloman kacharqa, sanoyachinanpaj, yachachinanpaj ima. Ananiasqa Sauloman Jesusmanta yachacherqa. Saulotaj chayta japʼikorqa, watejmantataj rikuyta aterqa. Chantá sajra kausayninta saqespa, Diospa kamachinman tukorqa (Hechos 9:1-22).

¿Reparankichu imaraykuchus Saulo sajra imasta ruwasqanta?... Paytaqa pantasqata yachachisqanku. Sauloqa Diosta mana kasoj runas jina ruwaj. Chay runasqa runaspa yachachisqallanta valechej kanku, Diospa Palabrantataj mana. Chay fariseos Diosman churanakojtinkupis, ¿imaraykutaj Saulo sajra kausayninta saqespa, allin kajta ruwayta qallarerqa?... Imaraykuchus Sauloqa Diosmanta cheqata yachayta munarqa. Chayrayku chayta yachaspa kasukorqapacha.

Chantá, ¿imataj Saulomanta karqa?... Jesuspa ujnin apostolninman tukorqa. Paytaj kashan apóstol Pablo. Ni pí jinataj Bibliaj ashkha librosninta qhelqarqa.

Ashkha runasqa sajra kausayninkuta saqespa, Saulo jina cambiayta atinkuman. Jinapis sajra kajman tanqasqa kasqankurayku, mana atillankuchu. ¿Yachankichu pichus chayman tanqasqanta?...  Imatachus Sauloman Jesús nisqanta qhawarina. Payqa Damascoman rej ñanpi Sauloman rikhurispa cielomanta nimorqa: “Kunan kachasqayki [runaspa] ñawisninkuta kicharinaykipaj laqhamanta sutʼiman llojsimunankupaj, Kuraj Supaypa atiyninmantataj Diosman kutirikunankupaj”, nispa (Hechos 26:17, 18).

Satanasqa tukuyta sajra ruwaykunaman tanqan. ¿Nichu wakin kutis allin kajta ruwayta atillanki?... Tukuy ajinapi rikukunchej, Satanás contranchejpi kasqanrayku. Chaywanpis waj ima allin kajta ruwaymanta jarkʼallawanchejtaj. ¿Yachankichu imachus kasqanta?... Juchasapas nacekusqanchej.

Chayrayku allin kajta ruwanamantaqa, sajra kajllata ruwanchej. ¿Imanasunmantaj?... Allin kajta ruwanapaj mayta kallpachakuna. Chayta ruwajtinchejqa Jesús munakuwasun, yanapawasuntaj.

Jesusqa Jallpʼapi kashaspa, sajra kausayninkuta saqejkunata munakoj. Payqa yacharqa sajra ruwaykunata saqey, mana atina jinallachu kasqanta. Sutʼincharinapaj, wakin warmisqa ashkha qhariswan puñuykoj kanku.  Chaytaj jucha. Bibliaqa chay warmis phisu warmis chayri khuchi warmis kasqankuta nin.

Uj kutipi, chay jina warmi Jesusmanta parlajta uyarerqa. Uj fariseoj wasinpi kashasqanta yachaspataj, chayman rerqa. Chay warmeqa Jesuspa chakisninta waqayninwan joqʼocharqa, chujchasninwantaj chʼakicherqa, chantapis perfumewan jichʼaykorqa. Payqa juchasninmanta mayta pesachikorqa. Chayrayku Jesús perdonarqa. Wasiyoj fariseotajrí, chay warmi mana perdonanapaj jinachu kasqanta yuyarqa (Lucas 7:36-50).

Jesús imatachus fariseosman waj kutipi nisqanta, ¿yachankichu?... Pay nerqa: ‘Phisu warmisqa Diospa gobiernonman ñaupajta yaykonqanku’, nispa (Mateo 21:31). Jesús chayta nerqa, chay warmis paypi creespa cambiasqankurayku. Fariseostaj, Jesuspi creejkunata qhatiykachallarqankupuni.

Biblia imapipis pantashasqanchejta reparachiwajtinchejqa, cambiana tiyan. Jehovaj munayninta yachakuspataj, tukuy sonqo chayta ruwana. Ajinamanta Jehovata kusichisun, wiñay kausaytataj japʼisun.