AI SE manaia pe a faapea e fai e tagata uma mea lelei, a ea?— Ae e leai ma se tagata e fai mea lelei i taimi uma. E te iloa le māfuaaga tatou te faia ai mea leaga i nisi taimi, e ui tatou te mananaʻo e fai le mea lelei?— Ona na tatou fananau uma mai ma le agasala. Ae e tele mea e sili ona leaga e fai e isi tagata. E feita i isi tagata, ma fai mea latou te manunuʻa ai. O le ā sou manatu, faamata e mafai ona suia a latou amio ma faamasani i le faia o mea lelei?—

Seʻi vaai i le tamāloa i le ata, lenā o loo vaavaaia ofu o i latou o loo tauʻaia Setefano i maa. O lona igoa Eperu o Saulo, a o lona igoa Roma o Paulo. O loo fiafia lenei tamāloa ua fasiotia Setefano, o se soo o le Faiaʻoga Sili. Seʻi tatou vaai pe aiseā na faia ai e Saulo na mea leaga.

Na iai Saulo i se ʻaulotu Iutaia e taʻua o le ʻau Faresaio. Sa iai i tagata Faresaio le Tusi Paia, peitaʻi e sili atu iā i latou aʻoaʻoga a o latou lava taʻitaʻi lotu. O le māfuaaga lenā na faia ai e Saulo mea leaga.

Na iai Saulo i le taimi na puʻeina ai Setefano i Ierusalema. Na ave Setefano i le faamasinoga lea na avea ai nisi o le ʻau Faresaio ma faamasino. E ui lava e leaga faamatalaga na fai faatatau iā Setefano, ae e leʻi fefe ai Setefano. Na tautala atu ma le loto tele Setefano ma na talaʻi atu i faamasino e uiga iā Ieova le Atua ma Iesu.

Ae e leʻi fiafia le ʻaufaamasino i tala na latou faalogo iai. Ua tele mea ua latou iloa e uiga iā Iesu. E leʻi leva tele atu talu le fasiotia o Iesu lea na māfua ona o i latou! Ae mulimuli ane, na toe aveina e Ieova Iesu i lugā i le lagi. Na i lo le suia la o o latou ala, na tetee atu le ʻaufaamasino i soo o Iesu.

 Na latou fetagofi atu iā Setefano ma ave i fafo o le aai. Ona latou tā lea iā Setefano ia paʻū, ma tauʻai i maa. E pei la ona e vaaia i le ata, o loo matamata Saulo i le mea o tupu. Sa manatu Saulo e lē sesē le fasiotia o Setefano.

E te iloa le māfuaaga na manatu ai Saulo faapena?— Ua leva ona avea Saulo ma Faresaio, ma na ia talitonu e saʻo aʻoaʻoga a le ʻau Faresaio. Na vaai Saulo i taʻitaʻi lotu o ni faaaʻoaʻoga lelei, o le māfuaaga lenā na faataʻitaʻi ai i a latou mea na fai.​—Galuega 7:54-60.

Ina ua māeʻa le fasiotia o Setefano, o le ā le mea a Saulo na fai?— Na taumafai e fasioti uma isi soo o Iesu! Na alu atu i o latou fale ma ave faamalosi tamāloloa faapea foʻi ma fafine, ma lafo uma i latou i le falepuipui. Na tuua Ierusalema e le toʻatele o soo, peitaʻi e leʻi taofia ai lo latou talaʻi atu e uiga iā Iesu.​—Galuega 8:1-4.

Ua atili ai ona ʻinoʻino Saulo i soo o Iesu. O le māfuaaga lenā na alu ai i le Ositaulaga Sili o Kaiafa, ina ia maua mai se faamaoniga e molia ai Kerisiano i le aai o Tamaseko. Na manaʻo Saulo e aumai  faapagota i Ierusalema soo o Iesu ina ia faasala ai. Ae a o alu atu Saulo i Tamaseko, sa iai se mea uiga ese na tupu.

Na susulu mai se malamalama mai le lagi, ma ua faapea mai se leo: “Saulo, Saulo e, se ā lea mea ua e sauā mai ai iā te aʻu?” O Iesu lea sa fetalai mai le lagi! Sa tauaso Saulo ona o le malosi o le susulu mai o le malamalama, o lea na taʻitaʻi ai o ia e tagata na latou malaga faatasi i Tamaseko.

Ina ua mavae aso e tolu, ona faailoa mai lea o Iesu i se vaaiga i se tasi o ona soo i Tamaseko, e igoa iā Anania. Na taʻu atu e Iesu iā Anania e alu e asi Saulo, ia toe faapupula ona mata ma talanoa atu iā te ia. Na talia e Saulo upu moni e uiga iā Iesu ina ua talanoa i ai Anania. Na toe faapupulaina mata o Saulo. Ua suia atoatoa le olaga o Saulo, ma ua avea ma auauna faamaoni a le Atua.​—Galuega 9:1-22.

Po ua e malamalama la i le māfuaaga na faia ai e Saulo mea leaga?— Talu ai na aʻoaʻoina o ia i mea sesē. Na mulimuli atu i tagata e lē faamaoni i le Atua. E lē gata i lea, sa auai i se vaega na latou faamuamua manatu o tagata na i lo le Tusi Paia. Ae aiseā na suia ai le olaga o Saulo ma amata ai ona ia faia mea lelei, e ui lava na faaauau ona tetee atu isi Faresaio i le Atua?— Talu ai, e lē faapea e ʻinoʻino Saulo i le upu moni. O lea ina ua aʻoaʻoina e Saulo le mea moni, na ia fiafia ai loa e fai.

E te iloa o le ā le mea sili ona lelei na oo iā Saulo mulimuli ane?— Ioe, na lauiloa o ia o le aposetolo o Paulo, o se tasi o aposetolo o Iesu. Ia manatua foʻi, e tele atu tusi o le Tusi Paia na tusia e Paulo na i lo se isi lava tagata.

E toʻatele tagata e mafai ona sui a latou amio, e pei o Saulo. Peitaʻi, e lē faigofie lenā mea, auā o loo iai se tasi o loo uunaʻia malosi tagata ina ia latou faia mea leaga. E te iloa o ai ia lenei?— Na taʻua e Iesu ia lenei, ina ua faailoa atu Iesu iā Saulo i luga o le auala i Tamaseko.  Na fetalai mai Iesu mai le lagi iā Saulo ma faapea atu: ʻOu te auina atu ai nei oe, e faapupula i mata o tagata, ia liliu mai le pōuliuli i le malamalama, ia liliu mai le pule a Satani ae ō atu i le Atua.’​—Galuega 26:17, 18.

Ioe, o loo taumafai Satani le Tiapolo e uunaʻia tagata uma ina ia latou faia mea leaga. Pe e faigatā i nisi taimi ona e faia le mea saʻo?— E faapena uma lava i tatou. O loo taumafai Satani e faafaigatā ona tatou faia le mea saʻo. Peitaʻi, e iai se isi māfuaaga e lē faigofie ai le faia o le mea saʻo. E te iloa le māfuaaga?— Auā na tatou faananau mai ma le agasala.

Ona o le agasala, e masani ona faigofie lo tatou faia o mea sesē na i lo mea saʻo. O le ā la le mea e tatau ona tatou faia?— Ioe, e tatau ona tatou tauivi e fai le mea saʻo. A faapea e tatou te tauivi, e mafai ona mautinoa o le a fesoasoani mai Iesu iā i tatou, auā e alofa iā i tatou.

A o soifua Iesu i le lalolagi, na ia faaalia lona alofa i tagata na fai mea leaga, ae ua sui a latou amio. E malamalama Iesu e faigatā tele i tagata nei ona suia o latou olaga. O se faataʻitaʻiga, na iai ni fafine na latou faia feusuaʻiga ma le tele o tamāloloa. Peitaʻi, e leaga lenā mea. E taʻua e le Tusi Paia fafine na, o fafine talitane.

 I se tasi taimi, na faalogo ai se fafine talitane e uiga iā Iesu, ma alu atu ai loa i le fale o se tamāloa Faresaio, lea na iai Iesu. Na liligi e lenei fafine se uu i vae o Iesu, ma faaaogā lona lauulu e solo ese ai ona loimata na maligi ifo i vae o Iesu. Na matuā salamō le fafine i ana agasala, o le māfuaaga lenā na faamagalo ai e Iesu. Peitaʻi, e leʻi manatu le tamāloa Faresaio e tatau ona faamagaloina agasala a lenei fafine.​—Luka 7:36-50.

E te iloa le tala a Iesu na fai atu i nisi o le ʻau Faresaio?— Na faapea le tala a Iesu: ʻE muamua atu fafine talitane iā te outou i le malo o le Atua.’ (Mataio 21:31) Ua ala ona fai atu le tala lenei a Iesu, auā foʻi na talitonu fafine talitane nei iā Iesu ma ua suia o latou ala leaga. Ae sa faaauau pea ona agaleaga le ʻau Faresaio i soo o Iesu.

O lea la, afai e taʻu mai e le Tusi Paia e leaga a tatou mea o fai, e tatau ona tatou naunau e sui a tatou amio. A faapea ua tatou aʻoaʻoina mea o loo finagalo Ieova e tatou te faia, e tatau la ona tatou naunau e fai mea na. O le iʻuga, o le a fiafia Ieova iā i tatou ma o le a tatou maua ai le ola e faavavau.