BEKUNGEKE kujabulise yini kube bonkhe bantfu bebenta lokulungile?— Kodvwa kute umuntfu lohlale enta lokulungile. Ucabanga kutsi kungani sonkhe senta tintfo letimbi ngaletinye tikhatsi ngisho nobe sifuna kwenta lokulungile?— Kungenca yekutsi sonkhe sitalwa sinesono. Kodvwa labanye bantfu benta tintfo letimbi letinyenti. Bayabenyanya labanye bantfu futsi babalimate ngemabomu. Ucabanga kutsi bangashintja yini futsi bente tintfo letilungile?—

Ase ubuke lelijaha leligadze timphahla talabo labagcoba Stefano ngematje. Libito lalo lesiHebheru nguSawula, kodvwa lesiRoma nguPawula. Lijabulile ngekutsi Stefano, longulomunye webafundzi bemFundzisi Lomuhle Kakhulu uyabulawa. Ase sibuke kutsi kungani Sawula enta tintfo letimbi kangaka.

Sawula ulilunga lelicembu lenkholo yemaJuda lelibitwa ngekutsi baFarisi. BaFarisi banalo liVi laNkulunkulu, kodvwa banaka kakhulu timfundziso tebaholi benkholo yabo. Ngiko loku lokwenta Sawula wenta tintfo letimbi.

Ngesikhatsi Stefano aboshwa eJerusalema, Sawula abekhona. Stefano uyiswa enkantolo, lapho lamanye alamajaji abaFarisi. Nanobe Stefano kushiwo tintfo letimbi ngaye, akesabi. Ukhuluma ngesibindzi futsi uniketa bufakazi lobuhle ngaJehova Nkulunkulu nangaJesu.

Lamajaji awakutsandzi loko lakuvako. Sewavele ati lokunyenti ngaJesu. Ngesikhashana nje ngaphambi kwekutsi kwenteke loku, abebulele Jesu. Kodvwa ngemuva kwaloko, Jehova watsatsa Jesu wamyisa ezulwini.  Kunekutsi ashintje tindlela tawo, lamajaji alwa nebafundzi baJesu.

Lamajaji abamba Stefano amkhiphela ngephandle kwelidolobha. Amshaya amwisa phansi futsi amgcoba ngematje. Njengobe ubona kulesitfombe, Sawula ume laphaya uyabukela. Ucabanga kutsi kuyintfo lelungile kubulala Stefano.

Ucabanga kutsi kungani Sawula abetiva ngaleyo ndlela?— Kungobe kusukela asemncane Sawula bekangumFarisi, futsi bekakholwa kutsi timfundziso tebaFarisi tiliciniso. Abetsatsa lamadvodza njengalasibonelo kuye, ngako wawalingisa.​—Imisebenti 7:54-60.

Ngemuva kwekubulawa kwaStefano, yini Sawula layenta?— Wabese wetama kubulala bonkhe bafundzi baJesu. Bekavele angene etindlini tabo advonsele ngephandle emadvodza nebafati. Ngemuva kwaloko, abafake ejele. Linyenti lebafundzi lahamba eJerusalema, kodvwa alizange liyekele kushumayela ngaJesu.​—Imisebenti 8:1-4.

 Loku kwenta Sawula kutsi abatondze kakhulu bafundzi baJesu. Waya kumPhristi Lophakame Khayafase kute atfole imvume yekubopha emaKhristu lahlala edolobheni iDamaseko. Sawula bekafuna kuwayisa eJerusalema abe tiboshwa kute ajeziswe. Kodvwa ngesikhatsi asendleleni leya eDamaseko, kwenteka intfo lemangalisako.

Kwamanyata kukhanya lokuvela ezulwini futsi kwavakala livi lelitsi: “Sawula, Sawula, ungihluphelani?” BekunguJesu akhuluma asezulwini. Lokukhanya bekukukhulu kangangekutsi kwenta Sawula waba yimphumphutse sikhashana futsi labantfu labebahamba naye kwadzingeka bambambe bamyise eDamaseko.

Ngemuva kwemalanga lamatsatfu, Jesu wavela kulomunye webafundzi bakhe eDamaseko libito lakhe lokungu-Ananiyase. Jesu watjela Ananiyase kutsi aye kuSawula kuze amvule emehlo futsi akhulume naye. Ngesikhatsi Ananiyase akhuluma naye, Sawula walemukela liciniso lelimayelana naJesu. Waphindze wakhona kubona. Indlela yakhe yekuphila yashintja, futsi waba yinceku yaNkulunkulu letsembekile.​—Imisebenti 9:1-22.

Sewuyabona kutsi kungani Sawula bekenta tintfo letimbi?— Kungobe abefundziswe tintfo letingemanga. Walingisa emadvodza labengakatsembeki kuNkulunkulu. Futsi abelilunga lelicembu lebantfu lebebatsatsa imibono yalabanye njengalebaluleke kakhulu kwendlula liVi laNkulunkulu. Kungani Sawula ashintja kuphila kwakhe futsi wacala kwenta tintfo letilungile ngisho nobe labanye baFarisi bebachubeka balwa naNkulunkulu?— Kungenca yekutsi Sawula abengalitondzi liciniso. Ngako ngesikhatsi afundza loko lokuliciniso, wakwenta ngekushesha.

Uyati kutsi ngekuhamba kwesikhatsi Sawula waba ngubani?— Watiwa ngekutsi ngumphostoli Pawula, futsi waba ngumphostoli waJesu. Khumbula kutsi Pawula wabhala tincwadzi teliBhayibheli letinyenti kwendlula nobe ngumuphi lomunye umuntfu.

 Banyenti bantfu labalingisa Sawula labangashintja. Kodvwa akusimelula ngobe kunemuntfu losebenta kamatima kute abangele bantfu bente tintfo letimbi. Ucabanga kutsi ngubani loyo?— Jesu wakhuluma ngaye ngesikhatsi ativeta kuSawula endleleni leya eDamaseko. Lapho Jesu wakhuluma asezulwini watsi kuSawula: ‘Ngiyakutfuma kutsi uyovula emehlo ebantfu, ubasuse ebumnyameni baye ekukhanyeni, futsi ubasuse ekulawulweni nguSathane baye kuNkulunkulu.’​—Imisebenti 26:17, 18.

NguSathane Develi lowetama kubangela bantfu kutsi bente tintfo letimbi. Ukutfola kulukhuni yini ngaletinye tikhatsi kwenta lokulungile?— Sonkhe sikutfola kulukhuni. NguSathane lowenta kube lukhuni. Kodvwa kunalesinye sizatfu lesibangela kube lukhuni ngaso sonkhe sikhatsi kwenta lokulungile. Ngusiphi leso sizatfu?— Kungenca yekutsi sitalwa sinesono.

Sono ngiso lesivame kusibangela kutsi sikutfole kumelula kwenta lokubi kunekutsi sente lokulungile. Ngako yini lokufanele siyente?— Kufanele silwe kamatima kute sente lokulungile. Nasenta njalo, sitawuciniseka ngekutsi njengobe Jesu asitsandza, utasisita.

Ngesikhatsi Jesu alapha emhlabeni, wabatsandza bantfu ekucaleni lebebenta tintfo letimbi base bayashintja. Bekati kutsi kube matima  kangakanani ngabo kutsi bashintje. Sibonelo saloko kutsi bekunebafati lebebalala nemadvodza lamanyenti. Loku bekuyintfo lembi. LiBhayibheli libita labafati ngekutsi tingwadla.

Ngalesinye sikhatsi, bekunemfati lobekanjalo loweva ngaJesu, futsi waya lapho Jesu abekhona endlini yemFarisi. Watsela emafutsa etinyaweni taJesu wase usula tinyembeti takhe etinyaweni taJesu ngetinwele takhe. Bekatisola kakhulu ngetono takhe, ngako Jesu wamtsetselela. Kodvwa lomFarisi bekacabanga kutsi akukafaneli atsetselelwe.​—Lukha 7:36-50.

Uyati kutsi Jesu watsini kulabanye baFarisi?— Watsi kubo: ‘Tingwadla tingena embili kunani eMbusweni waNkulunkulu.’ (Matewu 21:31) Jesu washo lamavi ngobe tingwadla betinekukholwa kuye, futsi tashintja tindlela tato letimbi. Kodvwa baFarisi bachubeka benta tintfo letimbi kubafundzi baJesu.

Ngako, nangabe liBhayibheli likhombisa kutsi loko lesikwentako kubi, kufanele sikulungele kushintja. Futsi nasifundza ngaloko Jehova lafuna sikwente, kufanele sitimisele kukwenta. Nasenta kanjalo, Jehova utawujabula ngatsi futsi utasinika kuphila lokuphakadze.