Cibalo 25

Sena Bantu Ibacita Zintu Zibyaabi Balakonzya Kusanduka?

SENA inga tiicabota kapati ikuti bantu boonse nobali kucita zintu zibotu?— Pele kunyina muntu uucita zintu zibotu lyoonse. Sena ulicizyi cipa kuti toonse katucita zintu zibyaabi zimwi ziindi, neliba leelyo notuyandisisya kucita zibotu?— Nkaambo toonse twakazyalwa acibi. Pele bantu bamwi bacita zintu zinji izibyaabi kapati. Balabasulaika bantu bamwi alimwi akubacisa acaali. Sena uyeeya kuti bali boobo balakonzya kusanduka akwiiya kucita zintu zibotu?—

Kolanga mwaalumi mwana-mwana uuli mucifwanikiso uulindilila zisani zyaatala zyabaabo ibali mukuuma Stefano mabwe. Izina lyakwe lya Cihebrayo ngu Saulo, pele ilyaci Roma ngu Paulo. Ulikkomene kuti Stefano sikwiiya wa Mwiiyi Mupati ulajayigwa. Atubone cipa kuti Saulo kacita zintu zibyaabi zili boobu.

Saulo wakali wankamu yabukombi yaba Juda iitegwa ba Farisi. Iba Farisi bakalijisi Jwi lya Leza, pele bakali kubikkila maanu kapati kunjiisyo zyabeendelezi babo bamwi. Eeci ncecakali kupa kuti Saulo kacita zintu zibyaabi.

Eelyo Stefano naakaangwa mu Jerusalemu, Saulo wakaliko. Stefano wakatolwa kunkuta. Ibabetesi bamwi bamu nkuta eeyo bakali ba Farisi. Nokuba kuti Stefano wakatamikizyigwa zintu zinji zibyaabi, tanaakayoowa pe. Wakali kwaamba cabusicamba muzintu zyoonse alimwi wakapa bumboni cakusalazya kubabetesi kujatikizya Jehova Leza alimwi a Jesu.

Pele babetesi aabo tiibakazyikkomanina pe nzyobakamvwa. Nzinji nzyobakazyi kale kujatikizya Jesu. Mubwini, kaindi kasyoonto buyo musyule kacitanacitika eeci, bakalailila kuti Jesu ajayigwe! Pele kumbele,  Jehova wakamutola kujulu Jesu alimwi. Muciindi cakucinca nzila zyabo, ibabetesi bakatalika kulwana basikwiiya ba Jesu.

Ibabetesi bakamujata Stefano akumutola kunze aamunzi. Bakamuuma kapati cakuti wakawida ansi eelyo bamane bakatalika kumupwaya mabwe. Alimwi mbubwenya mbokonzya kubona mucifwanikiso, Saulo wakaliko afwaafwi kalangilila nocakali kucitika eeco. Wakali kuyeeya kuti cakali buyo kabotu kujaya Stefano.

Sena ulicizyi cakapa kuti Saulo kayeeya boobo?— Saulo wakali mu Farisi kuzwa naakazyalwa, alimwi wakali kusyoma kuti njiisyo zyaba Farisi zyakaliluzi. Iba Farisi mbebakali cikozyanyo cakwe cibotu ncaakali kutobela.—Incito 7:54-60.

Ino ncinzi ncaakacita Saulo naakajayigwa Stefano?— Kuzwa ciindi eeco, wakatalika kuyandaula basikwiiya ba Jesu boonse kuti abajaye abalo! Wakaunka mumaanda aabo akwaanga baalumi abanakazi. Mpoonya wakababikka muntolongo. Basikwiiya banji bakamwaika mu Jerusalemu, pele kunyina nobakaleka kukambauka makani aajatikizya Jesu.—Incito 8:1-4.

 Eeci cakapa kuti Saulo abasulaike kwiinda lyoonse basikwiiya ba Jesu. Aboobo wakaunka ku Mupaizi Mupati uutegwa Kayafa akumulomba kuti azumizyigwe kwaanga Banakristo bakali mumunzi wa Damasko. Saulo wakali kuyanda kubatola ku Jerusalemu kabali baange ikutegwa bakasubulwe. Pele naakali munzila kaya ku Damasko, icintu cimwi cigambya cakamucitikila.

Imumuni wakamweka kuzwa kujulu, alimwi kwakamvwugwa jwi lyakati: “Saulo, Saulo, undipenzezyanzi?” Ngu Jesu wakali kwaambaula kuzwa kujulu! Imumuni ooyo wakali kutuba kapati cakuti wakamoofwaazya Saulo, alimwi bantu mbocakali limwi bakamujatilila buya kumutola ku Damasko.

Nokwakainda mazuba otatwe Jesu wakalibonya mucilengaano kuli umwi wabasikwiiya bakwe mu Damasko wazina lya Hananiya. Jesu wakaambila Hananiya kuti akamuswaye Saulo, ikutegwa akamuponye kukoofwaala kwakwe alimwi akubandika anguwe. Eelyo Hananiya naakabandika anguwe, Saulo wakakazumina kasimpe kujatikizya Jesu. Wakatalika kubona alimwi. Ibuumi bwakwe boonse lino bwakacinca, wakaba mubelesi wa Leza uusyomeka.—Incito 9:1-22.

Sena wacizyiba lino cakali kupa kuti Saulo kacita zintu zibyaabi?— Nkaambo wakayiisyidwe zintu zitaluzi. Wakali kutobela bantu ibatakali kusyomeka kuli Leza. Alimwi wakali kuyanzana aankamu yabantu ibakali kwiisyoma kapati mizeezo yabantu kwiinda Jwi lya Leza. Pele ino ncinzi cakapa kuti Saulo acince buumi bwakwe akutalika kucita zintu zibotu nokuba kuti ba Farisi bambi bakazumanana kumukazya Leza?— Nkaambo Saulo tanaakakasulaikide pe ikasimpe. Aboobo eelyo naakayiisyigwa zintu ziluzi, wakalilisungwide kuzicita.

Sena ulizyi mbwaakaba Saulo kumbele?— Inzya, wakazyi kwiitwa kuti mmwaapostolo Paulo, imwaapostolo wa Jesu. Alimwi koyeeya kuti, Paulo nguwakalemba mabbuku aamu Bbaibbele manji kwiinda balembi boonse.

Kuli bantu banji ibali mbuli Saulo ibakonzya kusanduka. Pele tacili  cuuba-uba pe akaambo kakuti kuli muntu uusungilizya bantu kucita zintu zibyaabi. Sena ulimuzyi muntu ooyo?— Jesu wakamwaamba eelyo naakalibonya kuli Saulo mumugwagwa uuya ku Damasko. Ooko Jesu wakaambila Saulo kuzwa kujulu kuti: ‘Ndakutuma kuti ukajalule meso aabantu, ukabasandule kuzwa mumudima akubanjizya mumumuni akuzwa munguzu zya Saatani kuya kuli Leza.’—Incito 26:17, 18.

Mmasimpe, ngu Saatani Diabolosi uupa kuti bantu boonse kabacita zintu zibyaabi. Sena cilakuyumina zimwi ziindi ikucita zintu ziluzi?— Toonse cilatuyumina. Saatani nguupa kuti kacituyumina. Pele kuli kaambo akambi ncocitali cuuba-uba lyoonse ikucita zintu ziluzi. Sena ulikazyi kaambo aako?— Nkaambo twakazyalwa acibi.

Icibi eeci ncecipa kuti bunji bwaziindi katucita zintu zitaluzi. Aboobo, ino ncinzi ncotweelede kucita?— Inzya tweelede kusolekesya kucita zintu ziluzi lyoonse. Notucita boobo, tulakonzya kusyoma kuti Jesu ooyo uutuyanda unootugwasya.

Eelyo Jesu naakali anyika, wakabayanda bantu bakacitide zintu zibyaabi pele ibakasandukide aciindi eco. Wakalicizyi mbocakali ciyumu kulimbabo ikucinca bukkale bwabo. Mucikozyanyo, kuli banakazi bakoonana abaalumi banji. Eeci cakali cintu  cibyaabi. Banakazi aabo Bbaibbele libaamba kuti mbavwuule naa baamu.

Cimwi ciindi, imwanakazi umwi mwaamu wakamvwa mpuwo yakuti Jesu wakaliko, eelyo wakaunka nkwaakabede kuŋanda yamu Farisi. Wakatila mafwuta kumatende aa Jesu akupukuta misozi yakwe kumatende aakwe amasusu aakwe. Wakausa kapati kujatikizya zibi zyakwe, aboobo Jesu wakamulekelela. Pele mu Farisi kunyina naakayeeya kuti wakeelede kulekelelwa.—Luka 7:36-50.

Sena ulicizyi Jesu ncaakaambila ba Farisi aabo bamwi?— Wakabaambila kuti: “Basikuvuula balamusaangunina kunjila mu-Bwami bwa-Leza.” (Matayo 21:31) Jesu wakaamba boobo akaambo kakuti bamavwuule bakamusyoma, alimwi bakacinca bukkale bwabo bubyaabi akutalika kucita zintu zibotu. Pele ba Farisi bakazumanana kucitila basikwiiya ba Jesu zintu zibyaabi.

Aboobo, eelyo Bbaibbile nolitondezya kuti ncotucita ncibi, tweelede kulisungula kucinca. Alimwi eelyo notwiiya eeco Jehova ncayanda kuti tucite, tweelede kusungwaala kucicita. Eelyo Jehova uyootukkomanina alimwi uyootupa buumi butamani.

Ikutegwa tugwasyigwe kutacita zintu zibyaabi, atubale antoomwe ku Intembauzyo 119:9-11; Tusimpi 3:5-7; alimwi a 12:15.

[Cifwanikiso icili apeeji 133]

Nkaambo nzi Saulo ncayeeya kuti cili buyo kabotu kumujaya Stefano?

[Cifwanikiso icili apeeji 135]

Ino nguni uuli mukwaambaulaa Saulo, alimwi ino ncinzi ncaatuma Saulo kuti acite?

[Cifwanikiso icili apeeji 136]

Ino nkaambo nzi Jesu ncaakamulekelela mwanakazi ooyu iwakacitide zintu zibyaabi?