KASI ntena nciweme yayi usange waliyose wacitenge ico nciweme?— Kweni palije uyo wakucita vintu viweme nyengo zose. Kasi ukumanya cifukwa ico tose tikucitira vintu viheni nyengo zinyake, nanga tingaŵa kuti tikukhumba kucita viweme?— Ncifukwa cakuti tose tiri kubabika ŵakwananga. Kweni ŵantu ŵanyake ŵakucita vintu viheni vinandi comene. Ŵakutinka ŵanyawo na kuŵapweteka mwadala. Kasi ukughanaghana kuti ŵantu ŵanga ni aŵa ŵangasinta na kusambira kucita viweme?—

Wona mwanarumi uyo wali pa cithuzithuzi apa wakulaŵilira vyakuvwara vya awo ŵakudinya Stefano na malibwe. Zina lake la Cihebere ni Saulos, kweni zina lake la Ciroma ni Paulos. Iye ngwakukondwa kuti Stefano, uyo ni musambiri wa Msambizi Waluso, wakukomeka. Tiye tiwone cifukwa ico Saulos wakacitiranga vintu viheni.

Saulos wakaŵa wa gulu la cisopo ca Ciyuda lakucemeka kuti Ŵafarisi. Ŵafarisi ŵakaŵa na Mazgu gha Ciuta, kweni iwo ŵakapwerereranga comene visambizgo vyautesi vya ŵarongozgi ŵawo ŵa cisopo. Ici cikapangiska Saulos kucita vintu viheni.

Apo Stefano wakakakikanga mu Yerusalemu, Saulos wakaŵapo. Stefano wakatorekera ku khoti, uko ŵanyake ŵa ŵeruzgi ŵakaŵa Ŵafarisi. Nangauli vintu viheni vinandi vyakukhwaskana na Stefano vikayowoyeka, kweni wakacita wofi cara. Ŵati ŵamara waka kumucombora, Stefano wakayowoya mwacikanga na kuphalira ŵeruzgi ukaboni wakuyowoya za Yehova Ciuta na Yesu.

Kweni ŵeruzgi ŵara ŵakakondwa yayi na ivyo ŵakapulika. Ŵakamanyanga kale vinandi vyakukhwaskana na Yesu. Nakwenenako, pakaŵa kuti pajumpa nyengo yicoko waka kufumira apo iwo ŵakakomera Yesu!  Kweni pamanyuma pake, Yehova wakatoleraso Yesu kucanya. Sono, m’malo mwakusinta vyakucita vyawo, ŵeruzgi ŵara ŵakamba kulimbana na ŵasambiri ŵa Yesu.

Ŵeruzgi ŵakamukora Stefano na kufumira nayo kuwaro kwa msumba. Ŵakamuwiskira pasi na kwamba kumudinya na malibwe. Ndipo, nga ni umo ukuwonera pa cithuzithuzi apa, Saulos ni uyo wali capataliko pacoko wakulaŵilira. Iye wakaghanaghananga kuti mbuweme kukoma Stefano.

Kasi ukumanya cifukwa ico Saulos wakaghanaghaniranga nteura?— Cikaŵa cifukwa cakuti mu umoyo wake wose Saulos wakaŵa Mufarisi, ndipo wakagomezganga kuti visambizgo vyautesi vya Ŵafarisi vikaŵa vyaunenesko. Iye wakawonanga Ŵafarisi ŵara kuŵa ciyerezgero, nteura wakarondezganga vyakucita vyawo.—Milimo 7:54-60.

Kasi Saulos wakacitaci apo Stefano wakati wakomeka?— Wakayezga-yezga kuti wakome ŵasambiri wose ŵa Yesu! Wakarutanga mu nyumba zawo na kuguza ŵanarumi na ŵanakazi wuwo. Pamanyuma pake wakapangiskanga kuti ŵaŵikike mu jere. Ŵasambiri ŵanandi ŵakacimbira mu Yerusalemu, kweni ŵakareka yayi kupharazga za Yesu.—Milimo 8:1-4.

 Ici cikapangiska kuti Saulos watinke comene ŵasambiri ŵa Yesu. Nteura wakaruta kwa Kayafa, Musofi Mukuru, kuti wakapoke makarata gha kumuzomerezga kuti wakakake Ŵakristu awo ŵakaŵa mu msumba wa Damaseko. Saulos wakakhumbanga kuti wize nawo ku Yerusalemu kuti ŵazakapokere cilango. Kweni apo wakaŵa mu ntowa kuruta ku Damaseko, cintu cinyake cakuzizwiska cikacitika.

Ungweru ukaŵara kufuma kucanya, ndipo wakapulika lizgu lakuti: “Saulos, Saulos, ukundizikizgiraci?” Wakaŵa Yesu uyo wakayowoyanga kufuma kucanya! Ungweru ukaŵara comene mwakuti ukapangiska Saulos kureka kulaŵiska, ndipo ŵantu awo wakaŵa nawo ŵakacita kumukora pa woko kunjira naye mu Damaseko.

Mazuŵa ghatatu pamanyuma pake, Yesu wakawonekera kwa yumoza wa ŵasambiri ŵake mu mboniwoni ku Damaseko, zina lake Hananiya. Yesu wakaphalira Hananiya kuti wakakumane na Saulos, wakamovwire kwamba kulaŵiska, na kumupharazgira. Hananiya wakati wayowoya nayo, Saulos wakazomera unenesko wakuyowoya za Yesu. Wakambaso kuwona. Umoyo wake wose ukasinta, ndipo wakaŵa muteŵeti wakugomezgeka wa Ciuta.—Milimo 9:1-22.

Kasi sono wawona cifukwa ico Saulos wakacitiranga vintu viheni?— Cikaŵa cifukwa cakuti wakasambizgika vintu vyautesi. Wakarondezganga ŵantu awo ŵakaŵa ŵambura kugomezgeka kwa Ciuta. Ndiposo wakaŵa wa gulu ilo likazirwiskanga comene mahara gha ŵantu kuruska Mazgu gha Ciuta. Kweni kasi ncifukwa wuli Saulos wakasinta na kwamba kucita vintu viweme, nangauli Ŵafarisi ŵanyake ŵakarutirizga kulimbana na Ciuta?— Cikaŵa cifukwa cakuti Saulos wakatinkanga unenesko cara. Nteura wakati wasambizgika uwo mbunenesko, wakaŵa mucanya kale kuwurondezga.

Kasi ukumanya zina ilo Saulos pamanyuma pake wakamba kumanyikwa nalo?— Enya, wakamba kumanyikwa na zina lakuti mpostole Paulos, mpostole wa Yesu. Ndipo kumbukira kuti Paulos wakalemba mabuku ghanandi gha mu Baibolo kuruska muntu munyake waliyose.

Pali ŵantu ŵanandi ŵa nga ni Saulos awo ŵangasinta. Kweni ncipusu  yayi kusinta cifukwa pali muntu munyake uyo wakulimbikira comene kunyenga ŵantu kuti ŵacitenge vintu viheni. Kasi ukumumanya muntu uyu?— Yesu wakayowoyapo za muntu uyu apo wakawonekera kwa Saulos pa ntowa yakuya ku Damaseko. Pa ntowa para, Yesu wakayowoya na Saulos kufuma kucanya wakati: ‘Nkukutuma kuya kajura maso gha ŵantu, mwakuti ŵang’anamukeko ku cisi kwiza ku ungweru, na ku nkongono za Satana kwiza kwa Ciuta.’—Milimo 26:17, 18.

Enya, ni Satana Dyabulosi uyo wakuyezga-yezga kunyenga ŵantu kuti ŵacitenge vintu viheni. Kasi nyengo zinyake ukuwona kuŵa cakusuzga kucita ico nciweme?— Tose ndimo tikucitira. Satana ndiyo wakucitiska kuti ciŵe cakusuzga. Kweni paliso cifukwa cinyake ico cikupangiska kuti ciŵe cakusuzga kucita ico nciweme nyengo zose. Kasi ukucimanya cifukwa cake?— Ncifukwa cakuti tikababika ŵakwananga.

Nkwananga uku ndiko nyengo zinandi kukupangiska kuti kuŵe kupusu kucita uheni kuruska kucita uweme. Nteura, kasi tikwenera kucitaci?— Tikwenera kuyezgayezga kucita ico nciweme. Usange ticitenge ntena, mbwenu tiŵenge ŵakusimikizga kuti Yesu, uyo wakutitemwa, watovwirenge.

Apo Yesu wakaŵa pa caru capasi, wakarongora kuti wakatemwanga ŵantu awo pakwamba ŵakacitanga vintu viheni kweni ŵakasinta. Iye wakamanyanga umo kukaŵira  kwakusuzga kuti iwo ŵasinte. Mwaciyerezgero, pakaŵa ŵanakazi ŵanyake awo ŵakugonana na ŵanarumi ŵanandi. Ici cikaŵa ciheni nadi. Baibolo likucema ŵanakazi aŵa kuti ŵareŵi panji ŵazaghari.

Nyengo yinyake, yumoza wa ŵanakazi aŵa wakapulika za Yesu, ndipo wakaruta uko Yesu wakaŵa mu nyumba ya Mufarisi. Wakapungulira mafuta pa marundi gha Yesu na kupuputa masozi ghake agho ghakawira pa marundi gha Yesu na sisi lake. Wakaŵa wacitima comene cifukwa ca zakwananga zake, nteura Yesu wakamugowokera. Kweni Mufarisi yura wakaghanaghananga kuti mwanakazi yura wakeneranga kugowokereka yayi.—Luka 7:36-50.

Kasi ukumanya ivyo Yesu wakayowoya ku Ŵafarisi ŵanji?— “Ŵanakazi ŵareŵi ŵakumudangirirani kunjira mu Ufumu wa Ciuta.” (Mateyu 21:31) Yesu wakayowoya ntena cifukwa ŵanakazi ŵareŵi ŵakagomezga mwa iye, ndipo ŵakasinta umoyo wawo uheni. Kweni Ŵafarisi ŵakarutirizga kucitira ŵasambiri ŵa Yesu vintu viheni.

Nteura para Baibolo likurongora kuti ivyo tikucita ni viheni, tikwenera kuŵa ŵakukhumbisiska kusinta. Ndipo para tasambira ico Yehova wakukhumba kuti ise ticitenge, tikwenera kuŵa ŵakudoka kucicita. Para ticitenge ntena Yehova wakondwenge nase ndipo watipenge umoyo wamuyirayira.