¿MI MU alakʼuk sba xa naʼ ti skotoluk krixchanoetik tspasik li kʼusitik leke?... Pe ta melel chʼabal onoʼox ti buchʼu jaʼ noʼox tspas li kʼusi leke. ¿Mi xa naʼ kʼu yuʼun ti chopol ta jpas jbatik bakʼintik manchuk mi mu jkʼantike?... Yuʼun jkotoltik jmulavil krixchanoutik chi j-ayanutik. Pe oy krixchanoetik ti tspasik li kʼusitik toj chopole. Tspʼajik li yantike xchiʼuk yalel chutsʼintaik. ¿Mi xuʼ van tsjel stalelalik xchiʼuk tspas sbaik ta lekil krixchanoetik xa naʼ?...

Kʼelavil li kerem ti yakal xchabibe skʼuʼ spokʼik li buchʼutik yakal xakʼbeik ton li Estebane. Li sbi ta hebreo kʼope jaʼ Saulo, pe jech xtok oy sbi ta roma kʼop, jaʼ Pablo. Li stuke xmuyubaj ti tsmilik li Estebane, ti jaʼ jun yajtsʼaklom li Mukʼta Jchanubtasvaneje. Pe jkʼeltik kʼu yuʼun toj chopol li Sauloe.

Li Sauloe jaʼ toʼox jun jchʼunolajel ta jtsop srelijion judioetik ti jaʼ sbi fariseoetike. Manchuk mi yichʼojik li sKʼop Diose, jaʼ mas ta xichʼik ta mukʼ li chanubtasel yuʼun li junantik jba beetik ta srelijionike. Taje jaʼ ta skoj ti chopol stalelal li Sauloe.

Li Sauloe te toʼox oy ta Jerusalén ti kʼalal la stsakik xchiʼuk laj yikʼik batel ta nail chapanobbail li Estebane. Tee te oyik junantik fariseoetik ti jaʼ jchapanvanejetike. Manchuk mi laj yalik kʼusitik chopol ta stojolal li Estebane, muʼyuk bu ixiʼ. Tsots yoʼonton laj yalbe li jchapanvanejetik li aʼyej ta sventa Jeova Dios xchiʼuk ta sventa li Jesuse.

Pe li jchapanvanejetike muʼyuk bu lek laj yaʼiik li kʼusi la xchikintaike. Ep xa snaʼojik ta sventa li Jesuse. Ta melel, jaʼik onoʼox li buchʼutik la xchapbeik skʼoplal ti tsmilik li Jesuse. Ta tsʼakale, li Jeovae la  xchaʼikʼ batel ta vinajel li Jesuse. Pe li jchapanvanejetike, muʼyuk bu la sjel li stalelike, moʼoj, solel lik snutsik li yajtsʼaklomtak Jesuse.

Li jchapanvanejetike la stsakik li Estebane, la slokʼesik batel li ta jteklume, la sjipik ta lum xchiʼuk laj yakʼbeik ton. Jech kʼuchaʼal chavil ta lokʼole, li Sauloe te noʼox nopol tskʼel li kʼusi yakal chkʼot ta pasele. Li stuke lek chaʼi ti tsmilik li Estebane.

¿Mi xa naʼ kʼu yuʼun jech toʼox ta snop li Sauloe?... Yuʼun ta sbikʼtal onoʼox kuxiem kʼuchaʼal fariseo xchiʼuk xchʼunoj ti yuʼun lek li chanubtaseletik yuʼun li relijion taje. Li jba beetik yuʼun li fariseoetike jaʼik toʼox jun skʼelobil ta sventa li Sauloe, xchiʼuk la xchanbe li stalelalike (Hechos 7:54-60).

Kʼalal la smilik li Estebane, ¿kʼusi la spas ta tsʼakal li Sauloe?... La snop ti tslajes li yantik yajtsʼaklomtak Jesuse. Persa tslokʼes ta sna li viniketik xchiʼuk li antsetike xchiʼuk la stikʼanan ta chukel. Ep jtsʼaklometike persa ilokʼik batel li ta Jerusalene, pe muʼyuk bu laj yiktaik ta xcholel li aʼyej ta sventa li Jesuse (Hechos 8:1-4).

Taje jaʼ laj yakʼ akʼo mas to ta spʼajbe yajtsʼaklomtak Jesús li Sauloe.  Jech un chaʼa, ibat ta stojolal li mero bankilal pale Caifase, akʼbat permiso sventa chchuk li yajtsʼaklomtak Cristo ti te nakalik ta Damascoe. Li Sauloe tskʼan toʼox chikʼanan batel ta Jerusalén sventa chakʼbe stoj smulik. Pe, oy kʼusi labal sba kʼot ta pasel li ta sbelel Damascoe.

Te ivinaj tal tsots xojobal lus ta vinajel xchiʼuk xi laj yal jun yechʼomal eile: «Saulo, Saulo, ¿cʼu yuʼun chavutsʼintaun?», xi. ¡Yakal ta xkʼoponat tal yuʼun Jesús te to ta vinajel! Li luse tstots tajmek xojobal, yuʼun la stupʼbe sat li Sauloe, vaʼun li xchiʼiltake persa la snitik batel kʼalal to ta Damasco.

Kʼalal echʼ oxib kʼakʼale, li Jesuse laj yakʼ sba ta ilel ta stojolal li Ananías ti jaʼ jun yajtsʼaklom te ta Damascoe. Laj yalbe ti akʼo bat svulaʼan li Saulo sventa akʼo sjambe li sate, xchiʼuk ti akʼo xchiʼin ta loʼile. Kʼalal kʼoponat yuʼun Ananías li Sauloe, la xchʼam li melel ta sventa li Jesuse xchiʼuk chaʼjam li sate. Jel ta j-echʼel-o li xkuxlejale xchiʼuk ipas ta jun tukʼil yajtunel Dios (Hechos 9:1-22).

Tana un, ¿mi chavaʼibe smelolal kʼu yuʼun ti tspas toʼox kʼusitik chopol li Sauloe?... Yuʼun maʼuk toʼox lekil chanubtasel li kʼusitik xchanoje. Tstsʼaklin toʼox krixchanoetik ti mu tukʼikuk ta stojolal li Diose, xchiʼuk jaʼ toʼox jun jchʼunolajel yuʼun jun relijion ti jaʼ mas ta xichʼik ta mukʼ li chanubtasel yuʼun li krixchanoetike, maʼuk chichʼik ta mukʼ li sKʼop Diose. Li yan fariseoetike yakalik-o skontrainel li Diose. Pe ¿kʼu yuʼun la sjel xkuxlejal xchiʼuk lik spas li kʼusitik lek li Sauloe?... Yuʼun ta melel li stuke muʼyuk bu spʼajoj li kʼusi melele, jaʼ yuʼun kʼalal akʼbat ta ilel li kʼusi melele, jpʼel-o yoʼonton la xchʼun.

¿Mi xa naʼ buchʼu ipas ta tsʼakal li Sauloe?... Ipas ta jun yajtakbol Jesús: jaʼ li jtakbol Pabloe. Vuleso ta ajol xtok ti Pabloe, jaʼ li buchʼu mas ep slivroal Vivlia la stsʼibae.

Oy ep krixchanoetik ti jaʼ jech stalelalik kʼuchaʼal li Sauloe xchiʼuk ti xuʼ sjel li stalelalike. Pe, muʼyuk bu kʼun chaʼiik ta spasel maʼ taje, yuʼun oy buchʼu yakal chakʼbe yipal sventa akʼo spasik kʼusitik chopol  li krixchanoetike. ¿Mi xa naʼ buchʼu jaʼ?... Li Jesuse laj yalbe skʼoplal ti kʼalal laj yakʼ sba ta ilel ta stojolal Saulo te ta sbelel Damascoe. Li Jesuse xi laj yalbe tal te to ta vinajel li Sauloe: Cha jtakot batel sventa cha jambe sat li krixchanoetike, sventa chlokʼik tal li ta ikʼ osile xchiʼuk chtalik li ta sak osile, sventa chlokʼik tal ta skʼob li Satanase xchiʼuk talikuk ta skʼob li Diose, xi (Hechos 26:17, 18).

Li Diablo Satanase jaʼ li buchʼu chakʼbe yipal sventa akʼo spasik kʼusitik chopol skotol li krixchanoetike. ¿Mi vokol chavaʼi bakʼintik ti lek cha pas abae?... Veno, jkotoltik tsots chkaʼitik yuʼun li Satanase jaʼ tspas ti akʼo tsotsuk xkaʼitike. Pe oy to yan srasonal kʼu yuʼun ti muʼyuk onoʼox kʼun chkaʼitik ta spasel li kʼusi leke. ¿Mi xa naʼ kʼusi jaʼ?... Jaʼ ti jmulavil krixchanoutik chi j-ayanutike.

Ta skoj taje, jaʼ mas kʼun ta pasel chkaʼitik li kʼusi chopole, jaʼ tsots ta pasel chkaʼitik li kʼusi leke. Vaʼun chaʼa, ¿kʼusi skʼan ta jpastik?... Skʼan chkakʼbetik yipal ti lekuk jpas jbatike. Mi jaʼ jech ta jpastike, xuʼ jchʼuntik ta melel ti tskoltautik li Jesuse, yuʼun skʼanojutik.

Kʼalal liʼ toʼox oy ta Balumil li Jesuse, laj yakʼ ta ilel ti skʼanoj li krixchanoetik ti tspasik toʼox kʼusitik chopole, pe jaʼ noʼox ti la sjel stalelalike. Li Jesuse snaʼoj ti toj tsots chaʼiik ti tsjel stalelalike. Jech kʼuchaʼal skʼelobil liʼe, oy toʼox antsetik ti ep viniketik  chchiʼinik ta vayele. Pe ta melel, chopol maʼ taje. Li Vivliae jmulavil antsetik tsbiiltas li antsetik taje.

Jun veltae, jun jmulavil antse laj yaʼibe skʼoplal li Jesuse, bat skʼel ta sna jun fariseo, yuʼun te oy li Jesuse. Li antse laj yakʼbe muil poxil ta yok li Jesuse xchiʼuk la stakijes ta stsotsil sjol li yaʼlel sat ti pʼaj yalel ta yok li Jesuse. Sutesoj tajmek yoʼonton ta skoj li muliletik spasoje, jaʼ yuʼun la spasbe perton li Jesuse. Pe li fariseoe, la snop ti muʼyuk la laj yichʼ pasbel perton ti jechuke (Lucas 7:36-50).

Ta yan veltae, ¿mi xa naʼ kʼusi laj yalbe junantik fariseoetik li Jesuse?... Xi laj yale: «Li jmulavil antsetique, jaʼ baʼyucbe ta xbat avuʼunic te yoʼ bu chventainvan li Diose», xi (Mateo 21:31). Li Jesuse jaʼ jech laj yal ta stojolal li antsetik taje, yuʼun la xchʼunik ta stojolal li Jesuse xchiʼuk la sjel li xchopol talelalike. Pe li fariseoetike muʼyuk bu laj yiktaik ta snutsel li yajtsʼaklomtak Jesuse.

Jech oxal chaʼa, mi chakʼbutik ta ilel ti oy kʼusi chopol yakal jpastik li Vivliae, skʼan jpʼeluk-o koʼontontik ta jel li jtalelaltike. Jech xtok, kʼalal ta jchantik li kʼusi skʼan Jeova akʼo jpastike, skʼan jaʼuk oyuk ta koʼontontik ta spasel. Mi jaʼ jech ta jpastike, li Jeovae jun yoʼonton ta jtojolaltik xchiʼuk ta xakʼbutik li kuxlejal sbatel osile.