Ibuot 27

Anie Edi Abasi Fo?

NTAK mbụme emi, “Anie edi Abasi fo,” edide akpan mbụme?— Koro mme owo ẹtuak ibuot ẹnọ ediwak abasi. (1 Corinth 8:5) Ke ini apostle Paul ọkọbọde odudu oto Jehovah ndinam mbụn̄ọ emi akananam mîsan̄ake asan̄a, mme owo ẹma ẹfiori ẹte: “Mme abasi ẹmeda mbiet owo ẹsụhọde ẹdi ke ọtọ nnyịn”! Mme owo oro ẹma ẹyom ndituak ibuot nnọ Paul ye ufan esie Barnabas. Mmọ ẹma ẹkot Paul Hermes ẹnyụn̄ ẹkot Barnabas Zeus, emi ẹkedide enyịn̄ mme nsunsu abasi.

Edi Paul ye Barnabas ikayakke mme owo oro ẹtuak ibuot ẹnọ mmọ. Mmọ ẹma ẹbụmede ẹdụk otu owo oro ẹnyụn̄ ẹfiori ẹte: “Ẹkpọn̄ mme ikpîkpu n̄kpọ emi ẹtiene Abasi uwem.” (Utom 14:8-15) Anie edi “Abasi uwem,” emi okobotde kpukpru n̄kpọ?— Enye edi Jehovah, kpa “Ata Edikon̄ ke ofụri ererimbot.” Jesus okokot Jehovah “ata Abasi kierakiet.” Ntre, ndien, anie kpọt odot se ẹtuakde ibuot ẹnọ?— Jehovah kpọt!—Psalm 83:18; John 17:3; Ediyarade 4:10b.

Ata ediwak owo ẹtuak ibuot ẹnọ mme abasi emi mîdịghe “ata Abasi kierakiet.” Mmọ ẹsiwak ndituak ibuot nnọ mme n̄kpọ oro mmọ ẹdade eto, itiat, m̀mê ukwak ẹnam. (Exodus 32:3-7; Leviticus 26:1; Isaiah 44:14-17) Ndusụk ini ẹsikpono iren ye iban emi ẹwọrọde etop nte ẹkpono abasi. Nte ọfọn ndinọ mmọ ubọn̄?—

Ke Saul ama akakabade edi Paul apostle, enye ama ewet ete ke ‘abasi eyo emi amanam ikike mmọ eke mînịmke ke akpanikọ ekịm.’ (2 Corinth 4:4) Anie edi abasi emi?— Satan kpa Devil! Satan amanam mme owo ẹtuak ibuot ẹnọ ediwak owo ye ediwak n̄kpọ.

 Ke ini Satan okodomode ndinam Jesus atuak ibuot ọnọ imọ, nso ke Jesus ọkọdọhọ Satan?— ‘Tuak ibuot nọ Jehovah Abasi fo, nyụn̄ nam n̄kpọ nọ Enye ikpọn̄-ikpọn̄.’ (Matthew 4:10) Ntre Jesus ama anam an̄wan̄a nte ke utuakibuot enyene Jehovah kpọt. Yak ikot iban̄a ndusụk n̄kparawa oro ẹkefiọkde emi. Enyịn̄ mmọ ẹkedi Shadrach, Meshach, ye Abednego.

N̄kparawa Hebrew emi ẹkedi ubak idụt Abasi Israel ndien ẹma ẹtan̄ mmọ ẹka ntan̄mfep ke Babylon. Do edidem kiet ẹkotde Nebuchadnezzar ama ada gold anam akamba mbiet. Usen kiet enye ama owụk ete ke ini ẹbrede ikwọ, kpukpru owo ẹkpenyene ndinụhọ nnọ mbiet oro. Enye ama ọtọt ete: ‘Ẹyetop owo ekededi eke mînụhọke ituak ibuot ẹsịn ke ufọt akwa ikan̄ eke asakde.’ Nso ke afo akpakanam?—

 Nte ido edide, Shadrach, Meshach, ye Abednego ẹma ẹsinam kpukpru n̄kpọ oro edidem ọdọhọde. Edi mmọ ẹma ẹsịn ndinụhọ nnọ mbiet oro. Nte afo ọmọfiọk ntak?— Koro ibet Abasi ọkọdọhọ ete: ‘Kûnyene abasi efen ukọrọ ye ami. Kûnam edisọi n̄kpọ unọ idem fo, kûnyụn̄ unụhọ unọ enye.’ (Exodus 20:3-5) Ntre Shadrach, Meshach, ye Abednego ẹma ẹnam ibet Jehovah utu ke ewụhọ edidem.

Edidem ama ayat esịt etieti, ndondo oro enye ama ọdọhọ ẹda n̄kparawa Hebrew ita emi ẹsọk imọ. Enye ama obụp ete: ‘Nte mbufo inamke n̄kpọ inọ mme abasi mi? Ami mmọn̄ nnọ mbufo ifet efen. Idahaemi, ke ini mbufo ẹkopde ikwọ, ẹduọn̄ọ ke isọn̄ ẹnyụn̄ ẹtuak ibuot ẹnọ mbiet emi ami nnamde. Edieke mbufo mîtuakke, ẹyetomo mbufo ẹdọn̄ ke akwa ikan̄ emi asakde. Ndien ewe abasi odu oro edikemede ndinyan̄a mbufo nsio mi ke ubọk?’

Nso ke n̄kparawa emi ẹkenam idahaemi? Nso ke afo akpakanam?— Mmọ ẹma ẹdọhọ edidem ẹte: ‘Abasi nnyịn emi nnyịn inamde n̄kpọ esie ekeme ndinyan̄a nnyịn. Edi idem ọkpọkọm enye inyan̄ake, nnyịn idinamke n̄kpọ inọ mme abasi fo. Nnyịn idinụhọke inọ mbiet o-gold fo.’

Edidem ama ayat esịt. Enye ama ọnọ uyo ete: ‘Ẹnam ikan̄ asak  utịm ikatiaba akan nte esidide!’ Ekem enye ama ọdọhọ n̄kpọsọn̄ n̄kparawa esie ete ẹbọp Shadrach, Meshach, ye Abednego ẹnyụn̄ ẹtomo mmọ ẹdọn̄ ke akwa ikan̄! Ikan̄ emi ama ofiop etieti tutu edemeikan̄ owot n̄kparawa edidem! Nso kaban̄a nditọ Hebrew ita oro?

Shadrach, Meshach, ye Abednego ẹma ẹduọn̄ọ ke ata ufọt ikan̄ oro. Edi ekem mmọ ẹma ẹdaha ẹda! Mmọ ikadaha unan. Ndien urụk ikọbọbọke mmọ aba ke idem. Didie ke emi ekekeme nditịbe?— Edidem ama ese akwa ikan̄ oro, ndien se enye okokụtde ama anam enye ndịk. Enye ama obụp ete: ‘Nte idịghe owo ita ke nnyịn ikotomo idọn̄ ke ikan̄ emi?’ Nditọufọk esie ẹma ẹbọrọ ẹte: ‘Edi ntre, O edidem.’

Ekem edidem ama ọdọhọ ete: ‘Sese! Mmokụt owo inan̄ ẹsan̄ade ke esịt, ndien ikan̄ inamke baba owo mmọ kiet n̄kpọ.’ Nte afo ọmọfiọk enye emi ọyọhọ owo inan̄ oro ekedide?— Ekedi angel Jehovah. Enye ama ekpeme nditọ Hebrew ita oro mbak ẹdida unan.

Ọfọn, ke okụtde emi, edidem ama asan̄a ekpere akwa ikan̄ oro onyụn̄ ofiori ete: “Shadrach, Meshach,  Abednego, mbufo ikọt Abasi ibom ẹwọn̄ọ ẹdi.” Ke ini mmọ ẹkewọn̄ọde ẹdi, kpukpru owo ẹma ẹkeme ndikụt nte ke ikan̄ ikataha mmọ. Ikan̄ ikakam itebeke mmọ ke idem. Ekem edidem ama ọdọhọ ete: ‘Ekọm enyene Abasi Shadrach, Meshach ye Abednego, emi ọkọdọn̄de angel esie edinyan̄a ikọt esie, koro mmọ mîdituakke ibuot inọ baba abasi kiet ke mîbọhọke Abasi mmọ.’—Daniel, ibuot 3.

Nnyịn imekeme ndikpep n̄kpọ nto se iketịbede ini oro. Idem mfịn mme owo ẹsinam mme mbiet, m̀mê ndisọi n̄kpọ, man ẹtuak ibuot ẹnọ. The Encyclopedia Americana ọdọhọ ete: “Ọfọn̄ etakubom edi edisana ukem nte cross.” Ẹkeme ndida eto, itiat, ukwak, m̀mê ọfọn̄ nnam mme mbiet. Mme akpa mbet Jesus ikatuakke ibuot inọ akwa edidem Rome, emi ewetmbụk oro Daniel P. Mannix ọkọdọhọde ke ẹkeme ndimen ndomo ye “edisịn ndikọm ọfọn̄ etakubom m̀mê nditịn̄ un̄wọn̄ọ edinam akpanikọ.”

Ntre nte afo emekere ke afịna Abasi edieke ẹdade ọfọn̄, eto, itiat, m̀mê ukwak ẹnam mbiet ido ukpono?— Nte ọkpọfọn asan̄autom Jehovah ndituak ibuot nnọ utọ mbiet oro?— Shadrach, Meshach, ye Abednego ikanamke oro, ndien Jehovah ama enem esịt ye mmọ. Didie ke afo ekeme ndikpebe uwụtn̄kpọ mmọ?—

Mbon oro ẹnamde n̄kpọ ẹnọ Jehovah ikemeke ndituak ibuot nnọ owo m̀mê n̄kpọ ekededi. Kot se ẹtịn̄de ẹban̄a emi ke Joshua 24:14, 15, 19-22; Isaiah 42:8; 1 John 5:21; ye Ediyarade 19:10.

[Ndise ke page 143]

Ntak emi Paul ye Barnabas mîkayakke mme owo ẹtuak ibuot ẹnọ mmọ?

[Ndise ke page 144]

Ntak emi iren emi mînụhọke inọ mbiet emi?

[Ndise ke page 145]

Didie ke Jehovah akanyan̄a ikọt esie osio ke akwa ikan̄?

[Mme ndise ke page 146]

Mme mbiet ewe ke mme owo ẹsikpono mfịn?