APAY a ti saludsod a, Siasino ti Diosmo? ket napateg?— Ngamin, adu dagiti didios a pagdaydayawan dagiti tattao. (1 Corinto 8:5) Idi naaddaan ni apostol Pablo iti pannakabalin a naggapu ken Jehova a mangpaimbag iti maysa a lalaki a di pulos makapagna manipud pannakayanakna, impukkaw dagiti tattao: “Dagiti didios nagbalinda a kas tattao ket bimmabada kadatayo!” Kayatda ti agdayaw kada Pablo ken Bernabe a gayyemna. Inawaganda iti Hermes ni Pablo ket Zeus ti impanaganda ken ni Bernabe. Dagita ket nagan dagiti didiosen.

Ngem saan nga impalubos da Pablo ken Bernabe a dayawen ida dagiti tattao. Timmarayda nga immasideg kadagiti tattao ket kinunada: “Agbaw-ingkayo manipud kadagitoy ubbaw a banag nga agturong iti Dios a sibibiag.” (Aramid 14:​8-​15) Siasino ti “Dios a sibibiag,” a nangparsua kadagiti amin a banag?— Wen, ni Jehova, “ti Kangatuan iti intero a daga.” Kinuna ni Jesus a ni Jehova “ti maymaysa a pudno a Dios.” Siasino laeng ngarud ti maikari a dayawen?— Ni laeng Jehova!​—Salmo 83:18; Juan 17:3; Apocalipsis 4:11.

Saan a “ti maymaysa a pudno a Dios” no di ket dagiti didiosen ti pagdaydayawan ti kaaduan a tattao. Masansan nga agdayawda kadagiti banag a naaramid iti kayo, bato, wenno metal. (Exodo 32:​4-7; Levitico 26:1; Isaias 44:14-​17) No dadduma, maawagan a didiosen, bituen, wenno idolo uray dagiti nalatak a tattao. Umiso aya ti agdayaw kadakuada?—

Idi nagbalinen nga apostol Pablo ni Saulo, insuratna: “Ti dios daytoy a sistema ti bambanag binulsekna ti pampanunot dagiti di manamati.” (2 Corinto 4:4) Siasino daytoy a dios?— Wen, ni Satanas a Diablo! Naallukoy ni Satanas dagiti tattao nga agdayaw iti adu a tattao ken bambanag.

 Idi sinulisog ni Satanas ni Jesus nga agrukbab ken agdayaw kenkuana, ania ti imbaga ni Jesus ken ni Satanas?— “Ni Jehova a Diosmo ti masapul a daydayawem, ket kenkuana laeng ti masapul a pangipaayam ti sagrado a panagserbi.” (Mateo 4:10) Imbatad ngarud ni Jesus a ni laeng Jehova ti rumbeng a dayawen. Basaenta ti maipapan iti sumagmamano nga agtutubo a makaammo iti daytoy. Dagitoy ti naganda: Sidrac, Mesac, ken Abednego.

Dagitoy nga agtutubo a Hebreo ket kameng ti Israel nga ili ti Dios ken naipanda a kas balud iti daga ti Babilonia. Nangipasdek sadiay ti maysa nga ari nga agnagan Nabucodonosor iti dakkel a ladawan a balitok. Maysa nga aldaw, imbilinna nga apaman a mangrugi ti tokar, tunggal maysa ket masapul nga agruknoy iti ladawan. “Siasinoman a saan nga agruknoy ken agdayaw maipalladawto iti gumilgil-ayab a naapuy nga urno,” imballaagna. Ania koma ti inaramidmo?—

 Tungtungpalen idi da Sidrac, Mesac, ken Abednego ti amin nga ibilin ti ari. Ngem saanda a nagruknoy. Ammom kadi no apay?— Kuna ngamin ti linteg ti Dios: ‘Dika maaddaan kadagiti aniaman a sabali a didios. Dika mangaramid maipaay kenka iti kinitikitan a ladawan ken agruknoy iti dayta.’ (Exodo 20:​3-5) No kasta, tinungpal da Sidrac, Mesac, ken Abednego ti linteg ni Jehova imbes a ti bilin ti ari.

Nakaunget unay ti ari, isu nga imbilinna a dagus a maidatag iti sanguananna dagiti tallo nga agtutubo a Hebreo. Insaludsodna: ‘Pudno kadi a saanyo a pagserserbian dagiti diosko? Ikkankayo iti maysa pay a gundaway. Ita, no mangngegyo ti tokar, agruknoy ken agdayawkayo iti ladawan nga inaramidko. No dikay agdayaw, maipalladawkayo iti gumilgil-ayab nga urno. Ket siasino dayta a dios a makabael a mangalaw kadakayo manipud iti im-imak?’

Ania ti inaramidda? Ania koma ti inaramidmo?— Kinunada iti ari: ‘Ti Diosmi a pagserserbianmi kabaelannakami nga isalakan. Ngem uray no dinakam isalakan, saanmi a pagserbian dagiti diosmo. Saankami nga agruknoy iti ladawan a balitok nga inaramidmo.’

Nakapungtot unay ti ari. Imbilinna: ‘Papudotenyo ti urno iti mamimpito nga ad-adda ngem iti kadawyan a pannakapapudotna!’ Kalpasanna,  binilinna dagiti napipigsa a tattaona a reppetenda da Sidrac, Mesac, ken Abednego sada itapuak iti urno! Nakapudpudot ti urno nga uray la nauram dagiti mismo a tattao ti ari! Ania ngay ti napasamak kadagiti tallo a Hebreo?

Nagdisso da Sidrac, Mesac, ken Abednego iti tengnga ti apuy. Ngem timmakderda! Saanda a naan-ano. Ken saandan a nareppet. Kasano a napasamak daytoy?— Kimmita ti ari iti urno, ket nabutngan iti nakitana. ‘Saan kadi a tallo a lallaki ti impalladawtayo iti apuy?’ insaludsodna. “Wen, O ari,” insungbat dagiti adipenna.

Ket kinuna ti ari: ‘Adtoy! Uppat a lallaki ti makitak nga agpagnapagna iti apuy, ket saan a maan-ano ti siasinoman kadakuada.’ Ammom kadi no siasino daydiay maikapat a lalaki?— Anghel ni Jehova. Sinalaknibanna dagiti tallo a Hebreo tapno saanda a maan-ano.

Idi makitana daytoy, immasideg ti ari iti ruangan ti urno ket impukkawna: “Sidrac, Mesac ken Abednego, dakayo nga ad-adipen ti Kangatuan a Dios, rummuarkayo ket umaykayo  ditoy!” Idi rimmuarda, nakita ti amin nga adda sadiay a saan a nauram dagiti tallo. Awan angotda a nasiraman la koma. Kalpasanna kinuna ti ari: ‘Bendito koma ti Dios da Sidrac, Mesac ken Abednego a nangibaon iti anghel a mangisalakan kadagiti adipenna agsipud ta saanda nga agdayaw iti aniaman a dios malaksid iti Diosda.’​—Daniel, kapitulo 3.

Adda leksion a maadalta iti dayta a pasamak. Uray ita, adda dagiti ladawan, wenno idolo, nga inaramid dagiti tattao a pagdaydayawanda. Kuna ti The Encyclopedia Americana: “Sagrado ti bandera, kas iti krus.” Mabalin a naaramid dagiti ladawan iti kayo, bato, metal, wenno lupot. Dagiti nagkauna nga adalan ni Jesus saanda a nagdaydayaw iti emperador ti Roma agsipud ta kas kinuna ti historiador a ni Daniel P. Mannix, mayarig dayta iti “panagkedked nga agsaludo iti bandera wenno mangikari iti kinasungdo iti pagilian.”

No kasta, panagkunam anamongan aya ti Dios ti panangusar iti narelihiosuan a ladawan a naaramid iti lupot, kayo, bato, wenno metal?— Umiso aya nga agdayaw ti maysa nga adipen ni Jehova iti kasta a ladawan?— Saan nga inaramid dayta da Sidrac, Mesac, ken Abednego, ket naay-ayo ni Jehova kadakuada. Kasanom a matulad ida?—