KAPU 27

Nani Kele Nzambi na Nge?

SAMBU na nki ngyufula yai ya ketuba nde, Nani kele Nzambi na nge? kele mfunu?— Sambu bantu kesambilaka banzambi mingi. (1 Korinto 8:5) Ntangu Yehowa kupesaka ntumwa Polo ngolo ya kubelula muntu mosi yina kuvandaka metambulaka ntete ve na luzingu na yandi, bantu kutubaka na ndinga ya ngolo nde: “Banzambi me baka nitu ya bantu. Bo me kwisa kukulumuka na kati na beto!” Bantu zolaka kusambila Polo ti nduku na yandi Barnabasi. Bo bingaka Polo nde Ermesi ebuna Barnabasi nde Zeusi, yina kuvandaka bazina ya banzambi ya luvunu.

Kansi Polo ti Barnabasi lendaka ve kubika nde bantu kusambila bo. Bo kotaka nswalu na kati ya kibuka ya bantu yango ebuna bo tubaka nde: “Beno balula ntima na Nzambi yina ke na moyo.” (Bisalu 14:8-15) Nani ke “Nzambi yina ke na moyo,” yina kusalaka bima yonso?— Nzambi yango kele Yehowa, “Muntu ya Kuluta Kuzanguka na zulu ya ntoto ya mvimba.” Yezu kubingaka Yehowa nde ‘Nzambi mosi kaka ya kyeleka.’ Yo yina, nani kaka mefwana nde beto sambila yandi?— Kaka Yehowa!—Nkunga 83:18, NW; Yoane 17:3; Kusonga 4:11.

Bantu mingi kesambilaka banzambi yankaka kansi ‘Nzambi mosi kaka ya kyeleka’ ve. Bo kesambilaka mbala mingi bima ya bo kesalaka na mabaya, matadi, to bibende. (Kubasika 32:4-7; Levi 26:1; Yezaya 44:14-17) Nkutu bantangu yankaka, bo kebingaka babakala ti bankento yina kekumaka bantu ya nene to bavedete nde banzambi. Keti yo kele mbote na kupesa bo lukumu?—

Ntangu Saule kukumaka ntumwa Polo, yandi sonikaka nde: “Nzambi ya ntangu yai me fwaka mayele na bo.” (2 Korinto 4:4) Nani kele nzambi yango?— Satana Dyabulu! Satana menungaka na kupusa bantu na kusambila bantu ti bima mingi.

 Ntangu Satana kulombaka Yezu na kufukama sambu na kusambila yandi, inki mambu Yezu kutubilaka Satana?— “Nge fweti samba Mfumu Nzambi, Nzambi na nge. Kaka yandi mpamba nge fweti samba!” (Matayo 4:10) Yo yina Yezu kumonisaka yo pwelele nde lusambu kele kaka ya Yehowa. Beto tanga disolo ya batoko yina kuzabaka dyambu yai. Bazina na bo kuvandaka Shadraki, Meshaki, ti Abedi-Nego.

Batoko yai ya Baebreo kuvandaka bantu ya dikanda ya Nzambi yina bo vandaka kubinga nde Izraele mpi bo nataka bo na kimpika na insi ya Babylone. Ntangu bo kumaka kuna, ntotila mosi na zina ya Nabukodonozore kusalaka kiteki mosi ya wolo ya nene mpenza. Kilumbu mosi yandi pesaka nsiku nde ntangu miziki tabula, konso muntu fwete fukimina kiteki yina. Yandi kebisaka bantu nde: ‘Konso muntu yina ta fukama ve mpi ta sambila ve, bo ta losa yandi na furu yina ya tiya ke pela ngolo.’ Inki nge zolaka kusala?—

 Shadraki, Meshaki, ti Abedi-Nego vandaka kusala mambu yonso yina ntotila vandaka kulomba bo na kusala. Kansi, na mbala yai, bo buyaka na kufukimina kiteki. Keti nge kezaba sambu na nki bo buyaka?— Bo buyaka sambu nsiku ya Nzambi kutubaka nde: ‘Kusamba banzambi yankaka ve, kaka mono. Nge fwete sala ve biteki mpi kufukama ve na ntwala na yo.’ (Kubasika 20:3-5) Yo yina, Shadraki, Meshaki, ti Abedi-Nego kulemfukaka na nsiku ya Yehowa kansi na nsiku ya ntotila ve.

Ntotila kuwaka makasi mingi mpenza, mpi na mbala mosi yandi tubaka nde bo natila yandi batoko ya Baebreo yina tatu. Yandi yulaka bo nde: ‘Keti ya kyeleka beno kebuya na kusambila banzambi na mono? Mono tapesa beno okazio yankaka. Ntangu yai, kana beno wa miziki, beno fukama, beno sambila kiteki yai mono mesala. Kana beno sala yo ve, bo talosa beno na furu ya tiya ya ke pela ngolo. Inki nzambi yina lenda gulusa beno na maboko na mono?’

Batoko yai zolaka kusala inki? Kana yo vandaka nge, inki nge zolaka kusala?— Bo tubilaka ntotila nde: ‘Nzambi na beto ya beto kesadilaka mefwana na kugulusa beto. Kansi ata yandi kusala yo ve, beto tasambila banzambi na nge ve. Beto tafukimina ve kiteki na nge ya wolo.’

Ntotila kuwaka makasi mingi mpenza. Yandi tubaka nde: ‘Beno tula tiya mingi mbala nsambwadi kuluta mutindu beno ke tulaka ntete!’ Na nima yandi tubilaka bantu na yandi ya ngolo na kukangisa Shadraki,  Meshaki ti Abedi-Nego bansinga ebuna bo losa bo na kati ya furu! Tiya ya kuvandaka na furu kulutanaka ngolo mpenza na mpila nde yo fwaka bantu ya ntotila! Ebuna nki kukuminaka Baebreo yina tatu?

Shadraki, Meshaki, ti Abedi-Nego kubwaka mbala mosi na kati-kati ya tiya. Kansi, na nima, bo telamaka! Bo pyaka ve tiya. Bo vandaka mpi dyaka ve ya kukangisa na bansinga. Inki mutindu bo kumaka mpidina?— Ntotila kutalaka na kati ya furu, ebuna mambu ya yandi monaka kupesaka yandi boma. Yandi yulaka nde: ‘Keti beto losaka ve bantu tatu na kati ya tiya?’ Bansadi na yandi kuvutulaka nde: “E, mfumu.”

Na nima, ntotila kutubaka nde: ‘Beno tala! Mono kemona bantu iya ke tambula-tambula na kati ya tiya, mpi tiya keyoka bo ve.’ Keti nge mezaba kana muntu yina ya iya kuvandaka nani?— Muntu yina ya iya kuvandaka wanzyo ya Yehowa. Yandi taninaka Baebreo yina tatu sambu bo zika ve.

Ntangu yandi monaka mpidina, ntotila kwendaka na kyelo ya furu ebuna yandi tubaka na ndinga ya ngolo nde: ‘Shadraki, Meshaki ti Abedi-Nego, beno bantu ya Nzambi ya Kuluta Kuzanguka, beno kwisa kubasika!’ Ntangu bo  basikaka, bantu yonso kumonaka nde bo pyaka ve tiya. Bo vandaka nkutu ve ata ti nsudi ya tiya. Ebuna ntotila kutubaka nde: ‘Lukumu na Nzambi ya Shadraki, Meshaki ti Abedi-Nego yina kutindaka wanzyo sambu na kugulusa bansadi na yandi sambu bo buyaka kusambila banzambi yankaka, katula kaka Nzambi na bo mosi.’—Daniele, kapu 3.

Beto le longuka dilongi mosi na mambu yina kusalamaka na ntangu yina. Ata bubu yai, bantu kesalaka bifwanisu, to biteki, sambu na lusambu. Mukanda mosi (The Encyclopedia Americana) ketuba nde: “Dibendelo kevandaka kima mosi ya santu bonso kulunsi.” Bifwanisu le vanda ya mabaya, ya matadi, ya bibende, to ya bilele. Balongoki ya ntete ya Yezu kufukamaka ve sambu na kusambila ntotila ya Roma. Daniel P. Mannix, muntu mosi yina vandaka kulonguka mambu ya ntangu ya ntama, kutubaka nde lusambu yina balongoki ya ntete kubuyaka beto lenda fwanisa yo bubu yai ti “kubuya kupesa lusaku na dibendelo to kubuya kusala lusilu sambu na luyalu.”

Kana kifwanisu ya dibundu mosi kele ya lele, ya dibaya, ya ditadi, to ya kibende, keti nge keyindula nde na meso ya Nzambi yo kele ya kuswaswana?— Keti yo tavanda mbote nde nsadi ya Yehowa kufukama na ntwala ya kifwanisu ya mutindu yina?— Shadraki, Meshaki, ti Abedi-Nego kubuyaka na kusala yo, mpi Yehowa kusepelaka na bo. Inki mutindu nge le landa mbandu na bo?—

Bayina kesadilaka Yehowa le sambila ve muntu to kima yankaka. Tanga mambu yina Biblia ketuba sambu na dyambu yango na Yozue 24:14, 15, 19-22; Yezaya 42:8; 1 Yoane 5:21; mpi Kusonga 19:10.

[Kifwanisu ya kele na lutiti 143]

Sambu na nki Polo ti Barnabasi kubuyaka nde bantu kufukimina bo?

[Kifwanisu ya kele na lutiti 144]

Sambu na nki bantu yai kezola ve kufukimina kiteki?

[Kifwanisu ya kele na lutiti 145]

Inki mutindu Yehowa kugulusaka bansadi na yandi na furu ya tiya?

[Bifwanisu ya kele na lutiti 146]

Bantu kepesaka lukumu na nki biteki bubu yai?