ILLIT kina Guutigaajuk? Apeqqut pingaaruteqarpoq. Sooq taamaassoraajuk? — Inuit guuterpassuarnik pallorfiginnittarmata. (1 Korinthimiut 8:5) Ilaanni apustili Paulusi Jehovamit pissaanermik tunineqarami angut pisussinnaanngisaannarsimasoq ajorunnaarsippaa, inuit qiimmattarlutik suaartarput: “Guutit inuttut isikkoqarlutik aqqarfigisimavaatigut!” Paulusi ikinngutaalu Barnaba guutitut pallorfigerusuppaat! Paulusi Hermesimik taavaat, Barnabalu Zeusimik. Tassa guutipiluisa atiisa ilaat.

Paulusili Barnabalu inunnut pallorfigeqqunngillat. Inuit akornannut pulapput suaarlutillu: ‘Guutipiluit piunngitsut tunussigit Guutimullu uumasumut saagitsi.’ (Apustilit Suliaat 14:8-15) ‘Guuti uumasoq’ tamanik pinngortitsisoq kinaagami? — Aap, tassa Jehova, ‘qutsinnerussaartuusoq nunarsuarmi tamarmi’. Jiisusip Jehova “ilumut kisimi Guutiusumik” taavaa. Taamaattumik kina kisimi pallorfigineqartussaava? — Tassa Jehova. — Tussiaat 83:19; Johannesi 17:3; Saqqummersitat 4:11.

Inuit amerlanersaasa ‘ilumut kisimi Guutiusoq’ pallorfiginagu guutit allat pallorfigisarpaat. Ilaasa assilissat qisummit, ujaqqamit saviminermilluunniit sanaat pallorfigisarpaat. (2 Mosesi 32:3-7; 3 Mosesi 26:1; Esaja 44:14-17) Aamma inuit tusaamasat ilaatigut guutitut isigineqartarput. Taakku taaneqartarput ‘nuannaartorisanik’. Inuit taamarsuaq ataqqissallugit eqqortuua? —

Apustili Paulusi allappoq ‘silarsuup matuma guutiata uppinngitsut eqqarsaataat tappiillisikkai’. (2 Korinthimiut 4:4) Silarsuup matuma guutia kinaagami? — Tassaavoq Saatani Diaavulu. Taannalu inuppassuit eqqarsaataannik tappiillisitsivoq, taamaalillutik Jehova pallorfiginagu pigisat inuillu pallorfigilerpaat.

 Eqqaamaviuk Jiisusi Saatanimut qanoq oqartoq taamani Saatani Jiisusimut pallorfigiteriaraluarmat? — Ima oqarpoq: ‘Jehova Guutit kisiat pallorfigissavat.’ (Matthæusi 4:10) Erseqqissarpaa allanik Jehovaanngitsumik pallorfiginnissanngitsugut. Maanna tusassavatit angutit inuusuttut Jehova kisiat pallorfiginiarlugu aalajangersimasut. Shadrakimik, Meshakimik Abed-Negomillu ateqarput.

Pingasuullutik hebræeriupput; tassa imaappoq Guutip innuttaanut Israelikkunnut ilaapput. Babylonimulli tigusatut aallarunneqarsimapput. Babylonip kunngia Nebukadnesarimik ateqarpoq, angisoorsuarmillu guutilialiorsimavoq kuultiusumik, tassa inuusaliarujussuaq. Ullut ilaanni peqqusivoq nipilersorpalaamik tusaagaangamik ingerlaannaq inuusaliarsuaq pallorfigisassagaat. Ima oqarpoq: ‘Inuusaliannut kuultiusumut pallorfiginninngitsoq aatsitsivimmut aamaannaasumut iginneqassaaq.’ Illit qanoq iliorsimassagaluarpit? —

 Shadrakip, Meshakip Abed-Negollu kunngi naalattuaannarpaat. Maannali taamaaliorumanngillat. Nalunngiliuk sooq? — Guuti inatsisimini ima oqarmat: ‘Allanik guuteqassanngilatit uangaanngitsunik. Ilinnut guutilialiuutissanngilatit tamakkulu pallorfigissanngilatit.’ (2 Mosesi 20:3-5) Shadrakip, Meshakip Abed-Negollu Jehovap inatsisaa malippaat kunngip peqqussutaa malinnagu.

Kunngi kamangaarami erniinnarluinnaq hebræerit inuusuttut taakku pingasut aatippai. Ima aperai: ‘Ilumut guutiga guutisiorfigiumanngilisiuk? Periarfisseqqissavassi. Nipilersuutip nipaa tusaalerussiuk taava inuusaliaq sanatitara pallorfigissavarsi. Taamaaliunngikkussi erniinnaq aatsitsivimmut aamaannaasumut iginneqassaasi. Guutimi taanna kinaagami uanga assannit aniguisitsisinnaasoq?’

Maanna angutit inuusuttut pingasut qanoq iliussappat? Illit qanoq iliussagaluarpit? — Hebræerit pingasut kunngi ima oqarfigaat: ‘Uagut Guutitta pallorfigisatta annaassinnaavaatigut. Taamaaliunngikkaluarpalluunniit illit guutigisat kiffartorfiginianngilarput. Inuusaliallu kuultiusoq pallorfigiumanngilarput.’

Kunngi kamangaalerpoq. Ima peqqusivoq: ‘Aatsitsivik kissatsittarnerata arfineq-marloriaataanik kissatsissiuk!’ Sakkutuumi ilaat nukittuut peqquai Shadraki, Meshaki Abed-Negolu qilersoriarlugit aatsitsivimmut  aamaannaasumut igissagaat. Kissangaarmat igitsisut innerup ikualaneranit toqunneqarput. Hebræerimmi taakku pingasut?

Shadraki, Meshaki Abed-Negolu innermut iginneqarput. Taavali nikuipput! Ajoqusersimanngillat! Qilerutaalli peerneqarsimapput. Qanoq ililluni taama pisoqarsinnaagami? — Kunngip inneq isigaa, annilaangaarporlu! Ima aperivoq: ‘Ilaa angutit innermut igitavut pingasuupput?’ Kiffai akipput: ‘Tassami ilumut taamaappoq, kunngi.’

Kunngi ima oqarpoq: ‘Kisiannimi angutit sisamat takusinnaavakka aatsitsivimmiittut, innerullu innarlersimanngilai.’ Sisamaat kinaasoraajuk? — Tassa Jehovap inngiliisa ilaat. Hebræerit pingasut uunnginniassammata illersorpai.

Tamanna kunngip takugamiuk aatsitsivissuup matuata eqqaanut pilluni ima suaarpoq: “Shadraki, Meshaki Abed-Negolu, Guutip Qutsinnerussaartup kiffai, anigitsi maannarlusilu!” Taakkulu taamaaliorput, tamarmillu takusinnaavaat sunnguamilluunniit innarlerneqarsimanngitsut. Ikuallassunninngillalluunniit. Kunngi ima oqarpoq: ‘Unnersiutigineqarli Shadrakip, Meshakillu Abed-Negollu  Guutiat, taassuma inngilini aallartimmagu kiffani annaanniarlugit allat guutit pallorfigiumanngimmatigit Guutertik kisiat.’ — Danieli, kapitali 3.

Taamanikkut pisimasoq uagut ilinniutigilluarsinnaavarput. Ullumikkut aamma inuit ilaasa inoqatiminnut assilissat upperisarsiorpalaartut ilisarnaatilluunniit pallorfigitinniartarpaat. Inuit ilaasa sanningasulik illernartutut isigaat, allat ilisarnaatit allat pallorfigisarpaat. Tamakku qisunnit, ujaqqanit saviminermilluunniit sanaajusinnaapput imaluunniit annoraaminermut naqitaasinnaallutik. Jiisusip ajoqersugaasa siulliit Romamiut kaasariat pallorfigiumanngilaat. Oqaluttuarisaanermik ilisimatooq Daniel P. Manniximik atilik oqarpoq tamatuma ‘erfalasumik ataqqinnilluni ilassinnikkumannginneq’ assigiinnaraa.

Isumaqarpit pallorfigisaq annoraaminermit, qisummit, ujaqqamit saviminermilluunniit sanaajunersoq Guutip isaani allaassuteqartoq? — Isumaqarpit Jehovamut kiffartortoq tamakkuninnga pallorfiginnippat, soorlu seeqqummerfigalugu, ilassillugu qinuffigaluguluunniit, eqqortuusoq? — Shadraki, Meshaki Abed-Negolu taamaaliorumanngillat, Jehovallu nuannarai. Illit taakku qanoq ilaarsinnaavigit? —