WETIN mek dis kwɛstyɔn we de ɔp ya impɔtant?— Na bikɔs pipul dɛn de wɔship bɔku gɔd dɛn. (Fɔs Lɛta Fɔ Kɔrint 8:5) We Jiova bin gi di apɔsul Pɔl pawa fɔ mɛn wan man we nɔ wande waka, di pipul dɛn bin ala se: ‘Di gɔd dɛn dɔn tɔn to mɔtalman ɛn dɛn dɔn kam to wi!’ Di pipul dɛn bin want fɔ wɔship Pɔl ɛn in padi Banabas. Dɛn kɔl Pɔl Amis ɛn dɛn kɔl Banabas Zus, we na dɛn lay lay gɔd dɛn nem.

Bɔt Pɔl ɛn Banabas nɔ bin gri fɔ mek di pipul dɛn wɔship dɛn. Dɛn rɔn go midul di krawd ɛn tɔk se: “Una lɛf fɔ du dɛn tin ya we go mek una day, ɛn kam to Gɔd we gɛt layf sote go.” (Di Apɔsul Dɛn Wok [Akt] 14:8-15) Udat na di “Gɔd we gɛt layf sote go,” we mek ɔltin?— Yɛs, na Jiova, we “de oba ɔlman na di wɔl.” Jizɔs kɔl Jiova “di wangren tru Gɔd.” So udat nɔmɔ yu tink se wi fɔ wɔship?— Na Jiova nɔmɔ!—Sam 83:18, NW; Jɔn 17:3; Rɛvɛleshɔn 4:11.

Bɔku pipul dɛn nɔ de wɔship “di wangren tru Gɔd,” bifo dat, na lay lay gɔd dɛn, dɛn de wɔship. Bɔku tɛm, dɛn kin wɔship tin dɛn we dɛn mek wit wud, ston, ɔ ayɛn. (Ɛksodɔs 32:4-7; Lɛvitikɔs 26:1; Ayzaya 44:14-17) Dɛn kin ivin trit man ɛn uman dɛn we bɔku pipul dɛn sabi, lɛk se dɛn na gɔd dɛn. Yu tink se i rayt fɔ trit dɛn da kayn we de?—

We Sɔl bi Pɔl, i bin rayt se: ‘Di gɔd we de na dis wɔl dɔn blaynd pipul dɛn maynd.’ (Sɛkɛn Lɛta Fɔ Kɔrint 4:4, NW) Udat na dis gɔd?— Yɛs, na Setan! Setan dɔn mek pipul dɛn de wɔship mɔtalman ɛn bɔku ɔda tin dɛn.

 We Setan bin want mek Jizɔs butu ɛn wɔship am, wetin Jizɔs bin tɛl am?— Jizɔs tɛl am se: ‘Pɔsin fɔ nil dɔŋ bifo Jiova we na in Masta ɛn pre to am ɛn na in nɔmɔ i fɔ wok fɔ.’ (Matyu 4:10) Jizɔs bin sho klia wan se na Jiova nɔmɔ wi fɔ wɔship. Lɛ wi lan bɔt sɔm yɔŋ man dɛn we bin no dis. Dɛn nem dɛn na Shedrak, Mishak, ɛn Abɛdnigo.

Dɛn yɔŋ man dɛn ya na bin Izrɛlayt dɛn we dɛn bin dɔn kɛr go na Babilɔn fɔ wok fɔ di kiŋ. Na de di kiŋ we nem Nɛbyukadnɛza bil wan big aydɔl wit gold. Wan de, i tɛl ɔlman se we dɛn ple di myuzik, dɛn ɔl fɔ butu to di aydɔl. Ɛn i wɔn dɛn bak se, ‘Dɛn go trowe ɛnibɔdi we nɔ butu ɛn wɔship am insay wan big big ovin we faya de kech bad bad wan.’ If na yu, wetin yu fɔ dɔn du?—

 Shedrak, Mishak, ɛn Abɛdnigo kin du ɔl wetin di kiŋ tɛl dɛn fɔ du. Bɔt dɛn nɔ gri fɔ du dis wan. Yu no wetin mek?— Na bikɔs Gɔd in lɔ se: ‘Una nɔ fɔ wɔship no ɔda gɔd pas mi. Una nɔ fɔ mek ɛni aydɔl ɛn butu to am.’ (Ɛksodɔs 20:3-5) So Shedrak, Mishak, ɛn Abɛdnigo obe Jiova in lɔ pas di kiŋ in lɔ.

Di kiŋ bin vɛks bad, so wantɛm wantɛm i mek dɛn briŋ Shedrak, Mishak, ɛn Abɛdnigo bifo am. I aks dɛn se: ‘Na tru se una nɔ de wɔship mi yon gɔd dɛn? A go gi una ɔda chans. Naw we una yɛri di myuzik, una fɔ butu ɛn wɔship di aydɔl we a dɔn mek. If una nɔ du dat, a go trowe una na da ovin we gɛt faya. Ɛn udat na da gɔd we go kam sev una?’

Wetin dɛn yɔŋ man dɛn ya go du? If na bin yu, wetin yu fɔ dɔn du?— Dɛn tɛl di kiŋ se: ‘Wi Gɔd we wi de wɔship go ebul sev wi. Bɔt if i nɔ bi so igen, wi nɔ go wɔship yu gɔd dɛn. Wi nɔ go wɔship di aydɔl we yu mek wit gold.’

Di kiŋ bin vɛks bad. I se: ‘Una wam di ovin sɛvin tɛm pas aw dɛn kin wam am!’ Dɔn i tɛl in strɔng man dɛn fɔ tay Shedrak,  Mishak, ɛn Abɛdnigo ɛn trowe dɛn na di faya! Di ovin bin so wam dat di kiŋ in man dɛn bin day! Wetin bin apin to di tri Izrɛlayt yɔŋ man dɛn?

Shedrak, Mishak, ɛn Abɛdnigo fɔdɔm rayt midul di faya. Bɔt dɛn grap! Natin nɔ du dɛn. Ɛn di rop we dɛn tek tay dɛn lus. Aw dis apin?— We di kiŋ luk insay di ovin, wetin i si mek i fred. I aks se, ‘Nɔto tri man dɛn wi trowe insay di faya? In savant dɛn ansa se: “Yɛs na bin dɛn tri sa.”

Dɔn di kiŋ se: ‘Bɔt a de si 4 man dɛn de waka insay di faya, nɔn nɔ tay, ɛn natin nɔ du dɛn.’ Yu no udat na di pɔsin we mek 4?— Na Jiova in enjɛl. I bin mek bad tin nɔ du di tri Izrɛlayt yɔŋ man dɛn.

Wɛl, we di kiŋ si dat, i kam na di ovin in domɔt ɛn tɛl dɛn se: ‘Shedrak, Mishak, ɛn Abɛdnigo, una we de wɔship di Gɔd we pas ɔlman, una kɔmɔt na di faya ɛn kam na ya!’ We dɛn kɔmɔt na do, ɔlman si se  natin nɔ du dɛn. Smok sɛnt sɛf nɔ bin de pan dɛn. Dɔn di kiŋ tɛl dɛn se: ‘Lɛ ɔlman prez Shedrak, Mishak, ɛn Abɛdnigo dɛn Gɔd we sɛn in enjɛl ɛn fri in savant dɛn we biliv am bikɔs dɛn nɔ gri fɔ wɔship ɛni ɔda gɔd pas dɛn yon Gɔd.’—Daniɛl, chapta 3.

Wi kin lan lɛsin frɔm wetin bin apin. Tide sɛf mɔtalman dɛn kin mek aydɔl fɔ wɔship. Wan buk we masta sabi bukman dɛn rayt se: “Di flag tan lɛk di krɔs; insɛf na tin we oli.” (The Encyclopedia Americana) Dɛn kin tek wud, ston, ayɛn, ɔ klos fɔ mek aydɔl dɛn. Di fɔstɛm Kristian dɛn nɔ bin de wɔship di Roman rula. Dis bin mek wan masta sabi bukman we nem Daniɛl P. Maniks bin se if pɔsin nɔ wɔship di rula dɛn, i tan lɛk we “i nɔ gri fɔ salut di flag” ɔ siŋ di plɛj.

So yu tink se i mek ɛni difrɛns to Gɔd we pipul dɛn de yuz klos, wud, ston, ɔ ayɛn fɔ mek aydɔl?— Yu tink se i rayt fɔ mek pɔsin we de sav Jiova wɔship dɛn kayn aydɔl dɛn de?— Shedrak, Mishak, ɛn Abednigo nɔ bin du dat, ɛn Jiova bin gladi fɔ dɛn. Aw yu go ebul falamakata dɛn ɛgzampul?—