Kauhanyo 27

Mulimu Wa Hao Ki Mañi?

KI KABAKALAÑI puzo ye li, Mulimu wa hao ki mañi? ha i li ya butokwa?— Libaka kikuli batu ba lapela milimu ye miñata. (1 Makorinte 8:5) Muapositola Paulusi ha n’a filwe m’ata a zwa ku Jehova a ku folisa munna ya n’a pepilwe a li siyanga sa mahutu, batu ne ba ize: “Milimu i til’o lu potela i ngile sibupeho sa batu.” Batu ne ba bata ku lapela Paulusi ni mulikan’a hae Barnabasi. Ne ba ize Paulusi ki yena Mercuri, mi Barnabasi kutwi n’e li yena Jupitere, mi ao n’e li mabizo a milimu ya bona.

Kono Paulusi ni Barnabasi ne ba si ka tuhelela batu ku ba lapela. Ba matela mwahal’a batu mi ba li: “Mu tuhele ku ya ka mikwa yeo ye si na tuso, mi mu sikuluhele ku Mulimu Ya-Pila.” (Likezo 14:8-15) Ki mañi yena “Mulimu Ya-Pila” y’o, yena ya ezize linto kamukana?— Ki Jehova, “Muambakani-ya-Pahami, wa lifasi kaufela.” Jesu n’a ize Jehova ki yena “Mulimu a nosi wa niti.” Kacwalo, ki mañi a nosi ya swanelwa ku lapelwa?— Ki Jehova fela a nosi!—Samu 83:18; Joani 17:3; Sinulo 4:11.

Batu ba bañata ba lapela milimu ye miñwi kwand’a yena “Mulimu a nosi wa niti.” Hañata, ba lapelanga lika ze ba panga fa kota, fa licwe, kamba fa sipi. (Exoda 32:4-7; Livitike 26:1; Isaya 44:14-17) Mane niheba banna ni basali ba ba zibahala hahulu fokuñwi ba bizwanga kuli milimu kamba ba ba tumile hahulu. Kana ba swanela ku fiwa tumbo?—

Saule ha s’a bile muapositola Paulusi, n’a ñozi kuli: ‘Mulimu wa lifasi le u foufalize kutwisiso ya ba ba si balumeli.’ (2 Makorinte 4:4) Yena mulimu y’o ki mañi?— Ki Satani Diabulosi! Satani s’a konile ku tahisa kuli batu ba lapele batu ba bañata ni lika ze ñata.

 Satani ha n’a likile ku kukueza Jesu ku kubama ni ku mu lapela, Jesu n’a buleleziñi Satani?— ‘Ku ñozwi kuli: Kubamela Mulena Mulimu wa hao, mi u sebeleze Yena a nosi.’ (Mateu 4:10) Kacwalo, Jesu n’a bonisize hande kuli Jehova ki yena a nosi ya lukela ku lapelwa. Ha lu bale ka za mitangana ba bañwi be ne ba ziba cwalo. Mabizo a bona ki bo Shadrake, Meshaki, ni Abedi-Nego.

Mitangana ba Maheberu bao ne ba li ba bañwi ba sicaba sa Mulimu sa Isilaele mi ne ba isizwe kwa naha ya Babilona sina batanga. Teñi k’o, mulena ya bizwa Nebukadenezare n’a ezize siswaniso se situna sa gauda. Zazi le liñwi, a laela kuli ha ne ku ka lizwa lipina, mutu kaufela n’a lukela ku kubamela siswaniso seo. A lemusa kuli: ‘Mutu kaufela ya si ke a si kubamela ni ku si lapela u ka nepelwa mwa liyekuyeku la mulilo.’ N’o ka be u ezizeñi wena?—

 Bo Shadrake, Meshake, ni Abedi-Nego hañata ne ba ezanga lika kaufela za n’a laela mulena. Kono ba hana ku kubamela siswaniso seo. Kana wa ziba libaka?— Libaka n’e li kuli mulao wa Mulimu n’o ize: ‘U si ke wa ba ni milimu i sili kwand’a na. U si ke wa ikezeza siswaniso sa ku beta ni ku si kubamela.’ (Exoda 20:3-5) Kacwalo, bo Shadrake, Meshake, ni Abedi-Nego ne ba utwile mulao wa Jehova ku fita ku utwa taelo ya mulena.

Mulena n’a nyemile hahulu, kacwalo, honaf’o, a laela kuli mitangana ba balalu ba Maheberu bao ba tiswe fapil’a hae. A buza, a li: ‘Kana ki niti luli kuli ha mu sebelezi milimu ya ka? Ni ka mi fa nako ye ñwi. Cwale, mu sa utwa fela lipina, mu wele fafasi ni ku lapela siswaniso se ni ezize. Haiba mu sa ezi cwalo, mu ka nepelwa mwa liyekuyeku la mulilo o cisa. Mi ki ufi yena mulimu y’o y’a kona ku mi lamulela mwa mazoho a ka?’

Batangana bao ne ba ka ezañi cwale? N’o ka be u ezizeñi wena?— Ba bulelela mulena, ba li: ‘Mulimu wa luna ye lu sebeleza wa kona ku lu lamulela. Kono nih’a sa ezi cwalo, milimu ya hao haki yona ye lu ka sebeleza. Ha lu na ku kubamela siswaniso sa hao sa gauda.’

Mulena n’a filikani. A laela kuli: ‘Mu tumbule liyekuyeku la mulilo kuli li cise ha 7 ku fita mo li cisezanga!’ Cwale a laela batanga  ba ba tiile ba hae ku tama bo Shadrake, Meshake, ni Abedi-Nego ni ku ba nepela mwa liyekuyeku la mulilo! Liyekuyeku leo ne li cisa hahulu kuli mane bona batanga ba mulena bao ba bulaiwa ki malimi a mulilo! Ku cwañi ka za Maheberu ba balalu bao?

Bo Shadrake, Meshake, ni Abedi-Nego ba y’o wela mwahal’a mulilo luli. Kono cwale ba yema! Ne ba si ka holofala. Mi ne ba tamuluhile. Nto yeo ne i konahalile cwañi?— Mulena a nangela mwa liyekuyeku la mulilo, mi a saba bakeñisa za n’a boni. A buza a li: ‘Kana ne lu si ka nepela banna ba balalu mwa mulilo?’ Batanga ba hae ba alaba, ba li: “Ku cwalo, shangwe mulena.”

Cwale mulena a li: ‘A mu bone! Ni bona banna ba bane ba ba zamaya-zamaya mwateñi, mi mulilo ha u cisi niheba a li muñwi ku bona.’ Kana mutu wa bune y’o wa mu ziba?— N’e li lingeloi la Jehova. Ne li silelelize Maheberu ba balalu bao kuli ba si ke ba holofala.

Mulena ha s’a boni cwalo, a taha kwa munyako wa liyekuyeku la mulilo, mi a huwa a li: “Mina bo Shadrake ni Meshaki ni Abedi-Nego, batanga ba Mulimu  Muambakani-ya-Pahami, a mu zwe, mu te kwanu!” Ha se ba zwile mwateñi, batu kaufela ne ba kona ku bona kuli ne ba si ka ciswa ki mulilo. Mane sifuka sa mulilo ne si siyo ku bona. Cwale mulena a li: ‘Ku lumbekwe Mulimu wa bo Shadrake ni Meshaki ni Abedi-Nego, Yena ya lumile lingeloi la hae ku t’o lamulela batanga ba hae kakuli ne ba si ke ba lapela mulimu o muñwi konji Mulimu wa bona.’—Daniele, kauhanyo 3.

Lwa kona ku ituta tuto ku ze n’e ezahezi kale-kale k’o. Ni kacenu, batu ba tomanga maswaniso a ku lapela. Buka ye bizwa The Encyclopedia Americana i li: “Ndembela ya lapelwa sina mo si lapelelwa sifapahano.” Maswaniso a kona ku eziwa fa kota, licwe, sipi, kamba lisila. Balutiwa ba pili ba Jesu ne ba si ke ba kubamela mulena wa Roma. Caziba wa ze ezahezi ya bizwa Daniel P. Mannix n’a ize ku eza cwalo ne ku swana ni “ku hana ku caela ndembela silutu kamba ku kutela ku bulela manzwi a ku ikonka ku sepahala.”

Kacwalo, kana u bona kuli ku na ni shutano ku Mulimu siswaniso sa bulapeli ha ne si ka eziwa fa lisila, kota, licwe, kamba sipi?— Kana ne ku ka swanela mutang’a Jehova ha n’a ka kubamela siswaniso se si cwalo?— Bo Shadrake, Meshake, ni Abedi-Nego ne ba si ka eza cwalo, mi Jehova n’a ba tabezi. U kona ku likanyisa cwañi mutala wa bona?—

Ba ba sebeleza Jehova ha ba koni ku lapela mutu ufi kamba ufi kamba nto ifi kamba ifi. Ha ku bale se si bulelwa ka za seo kwa Joshua 24:14, 15, 19-22; Isaya 42:8; 1 Joani 5:21; ni Sinulo 19:10.

[Siswaniso se si fa likepe 143]

Ki kabakalañi bo Paulusi ni Barnabasi ha ne ba si ka lumeleza batu ku ba kubamela?

[Siswaniso se si fa likepe 144]

Ki kabakalañi banna ba ha ba sa kubameli siswaniso?

[Siswaniso se si fa likepe 145]

Jehova n’a lamulezi cwañi batanga ba hae mwa liyekuyeku la mulilo?

[Siswaniso se si fa likepe 146]

Ki afi maswaniso e ba kuteka batu kacenu?