BUA tshinyi lukonko elu lua ne: Nzambi webe nnganyi ludi ne mushinga wa bungi?​— Bualu bantu badi batendelela nzambi ya bungi. (1 Kolinto 8:5) Pavua mupostolo Paulo mupete bukole bua kudi Yehowa bua kuondopa muntu uvua kayi muanji kuenda katshia bamulela, bantu bakela mbila ne: ‘Nzambi mmipueke kutudi mifuane bantu!’ Bantu abu bakasua kutendelela Paulo ne mulunda wende Bânaba. Bakabikila Paulo ne: Hermes ne Bânaba ne: Zeus, mêna a nzambi ya dishima.

Kadi Paulo ne Bânaba kabavua mua kulekela bantu babatendelela to. Bakaya lubilu munkatshi mua bantu bamba ne: ‘Lekelayi malu aa a patupu, londayi Nzambi wa muoyo.’ (Bienzedi 14:8-15) ‘Nzambi wa muoyo’ uvua mufuke bintu bionso nnganyi?​— N’Yehowa, ‘Mutambe Bunene wa pa mutu pa buloba bujima.’ Yezu wakabikila Yehowa ne: ‘Nzambi umuepele mulelela.’ Nunku, nnganyi nkayende udi mukumbanyine bua bantu kumutendelelabu?​— Anu Yehowa!​—Musambu 83:18; Yone 17:3; Buakabuluibua 4:11.

Bantu ba bungi batu batendelela nzambi mikuabu pamutu pa kutendelela ‘Nzambi umuepele mulelela.’ Batu misangu ya bungi batendelela bintu bienza ne mabaya, mabue anyi biamu. (Ekesode 32:4-7; Lewitiki 26:1; Yeshaya 44:14-17) Nansha bamue balume ne bakaji badi bamanyike bikole batu babangata imue misangu bu banzambi ne babatumbisha. Mbimpe kupesha bantu aba butumbi anyi?​—

Kunyima kua Shaula mumane kulua mupostolo Paulo, wakafunda ne: ‘Nzambi wa tshikondo etshi mmufofomije mêsu a meji a badi kabayi bitabuja.’ (2 Kolinto 4:4) Nzambi eu nnganyi?​— N’Satana Diabolo! Satana mmusake bantu bua kutendelelabu bantu nabu ne kutendelela bintu bia bungi.

 Pavua Satana mukebe bua kusaka Yezu bua kumukukuila, Yezu wakamuambila tshinyi?​— ‘Kukuila anu [Yehowa] Nzambi webe, umuenzele yeye nkayende mudimu.’ (Matayo 4:10) Nunku Yezu wakaleja patoke ne: tudi ne bua kutendelela anu Yehowa. Tuanji tubaleku bualu bua bansongalume bavua bamanye pabu ne: tudi ne bua kutendelela anu Yehowa nkayende. Mêna abu avua Shadalaka, Meshaka ne Abedenego.

Bansonga bena Ebelu aba bavua ba mu tshisamba tshia Nzambi tshia Isalele ne bakaya nabu mu bupika mu buloba bua Babulona. Kuine aku mukalenge kampanda dîna diende Nebukadenesâ wakenza lupingu lunene lua or. Dinga dituku wakatuma dîyi ne: pavuabu ne bua kuimba mijiki, muntu yonso uvua ne bua kuinama kumpala kua lupingu alu. Wakadimuija bantu ne: ‘Muntu yonso wabenga kutua mpala panshi ne kulutendelela nebamuele mu tshikutu tshia kapia kakole.’ Anji ambabi tumone: wewe uvua mua kuikala muenze tshinyi?​—

 Pa tshibidilu, Shadalaka, Meshaka ne Abedenego bavua benza malu onso avua mukalenge ubalomba bua kuenza. Kadi bakabenga kukukuila lupingu alu. Udi mumanye bua tshinyi bakabenga anyi?​— Bakabenga bualu mukenji wa Nzambi uvua wamba ne: ‘Kuikadi ne nzambi mikuabu ne meme popamue. Kudisongedi lupingu, kuluinaminyi.’ (Ekesode 20:3-5) Nunku Shadalaka, Meshaka ne Abedenego bakatumikila mukenji wa Yehowa kubengabu bua kutumikila dîyi dia mukalenge.

Mukalenge wakafika munda bikole, ne diakamue wakabikidisha bansonga basatu bena Ebelu abu kumpala kuende. Wakabakonka ne: ‘Bushuwa nuenu kanuena nukuatshila nzambi yanyi mudimu? Eu mmusangu wa ndekelu. Mpindieu, panudi numvua mijiki, nutue mpala yenu panshi nutendelele lupingu lundi muenze. Nuenu kanuyi balutendelele, nebanuele mu tshikutu tshia kapia kakole. Tumone nzambi wanupandisha ku bianza bianyi.’

Ntshinyi tshivua bansongalume ne bua kuenza mpindieu? Wewe uvua mua kuenza tshinyi?​— Bakambila mukalenge ne: ‘Nzambi wetu utudi tukuatshile mudimu udi mua kutupandisha. Kadi nansha yeye kayi mutupandishe, katuena tukuatshila nzambi yebe mudimu to. Katuena tuinama kumpala kua lupingu luebe lua or nansha.’

Mukalenge wakafika munda bikole. Wakatuma dîyi ne: ‘Sonsolayi kapia mu tshikutu, kapite ka tshibidilu misangu muanda-mutekete!’ Pashishe wakatumina bantu bende ba bukole dîyi bua kusuikabu Shadalaka,  Meshaka ne Abedenego mionji ne kubela mu tshikutu tshia kapia! Tshikutu tshia kapia tshivua tshiteme bikole menemene, ndimi ya kapia kushipayi bantu bavua mukalenge mutume! Kadi ntshinyi tshiakafikila bena Ebelu basatu?

Shadalaka, Meshaka ne Abedenego bakapona munkatshi menemene mua tshikutu tshia kapia. Kadi bakalua kujuka kulu! Kabavua bapete njiwu to. Ne kabavua kabidi ne mionji mibasuika to. Mmushindu kayi uvuabi mua kuenzeka nanku?​— Mukalenge wakatangila munda mua tshikutu tshia kapia, ne tshiakamonayemu tshiakamuenza buôwa. Wakebeja ne: ‘Katuvua bele bantu basatu mu kapia anyi? Bena mudimu bende bakandamuna ne: ‘Mbulelela mukalenge.’

Pashishe mukalenge wakamba ne: ‘Tangilayi! Ndi mmona bantu banayi benda bendakanamu, ne kapia kakena kabenzela bualu to.’ Udi mumanye ne: muntu muinayi au uvua nganyi anyi?​— Uvua muanjelu wa Yehowa. Uvua mulame bena Ebelu basatu bua kaboshiki to.

Pakamona mukalenge bualu ebu, wakasemena ku tshiibi tshia tshikutu tshia kapia ne kuelaye lubila ne: ‘Shadalaka, Meshaka ne Abedenego, nuenu bantu ba Nzambi Mutambe Bunene, patukayi, luayi kuneku!’ Pakapatukabu, bantu  bonso bakamona ne: kabavua buoshike to. Kakuvua nansha mupuya wa mudilu pambidi pabu to. Pashishe mukalenge wakamba ne: ‘Nzambi wa Shadalaka, Meshaka ne Abedenego atumbishibue bualu [uvua mutume] muanjelu wende bua kupandisha bantu bende bualu kabavua mua kutendelela nzambi mukuabu nansha kakese, pa kumusha anu Nzambi wabu.’​—Danyele, nshapita 3.

Tudi mua kupeta dilongesha ku bualu buakenzeka abu. Nansha lelu bantu batu benza bimfuanyi anyi mpingu bua kubitendelela. Mukanda mukuabu udi wamba ne: “Dibendela, nansha nkuruse, mbintu bia tshijila.” (The Encyclopedia Americana) Badi mua kuenza bimfuanyi ne mabaya, mabue, biamu anyi bilamba. Bayidi ba kumpala ba Yezu kabavua mua kutendelela amperere wa bena Lomo to. Mufundi wa miyuki ya kale Daniel Mannix wakamba bua ditendelela edi ne: bavua mua kudifuanyikija ne “dibenga kuimanyina dibendele anyi kuambulula mutshipu wa lulamatu.”

Nunku udi wela meji ne: kumpala kua Nzambi bidi mua kuikala bimpe buobu benze tshimfuanyi ne tshilamba, dibaya, dibue anyi tshiamu anyi?​— Bidi mua kuikala bimpe bua musadidi wa Yehowa kutendelelaye mu mushindu kampanda bimfuanyi bia nunku anyi?​— Shadalaka, Meshaka ne Abedenego kabavua mua kuenza bualu abu to, ne Yehowa wakasanka bua bualu buabu. Mmushindu kayi uudi mua kuidikija tshilejilu tshiabu?​—